Dɔte Nsɔano Bi A ‘Ɛyɛ Yukal Dea’

WƆ AFEHA a ɛto so ason A.Y.B. mu no, Kaldeafo sodifo Nebukadnesar ko faa Yerusalem, ɔhyew kurow no, na ɔsɛee n’afasu. Ɔfaa Sedekia, Yudafo hene no dommum, na ɔbobɔɔ n’aniwa. “Yuda adehye nso, Babel hene kunkum wɔn.”—Yeremia 39:1-8.

Yuda adehye, anaa mmapɔmma no mu baako a ɛbɛyɛ sɛ owui wɔ Babilonfo no nsa ano ne Selemia ba Yukal. Wɔahu Yukal ho nsɛm foforo nnansa yi. Nanso, ansa na yebesusuw ho no, ma yɛnhwɛ nea Kyerɛwnsɛm no ka wɔ Yukal ne ne bere so ho.

“Wɔrentumi Wo”

Yehowa ka kyerɛɛ odiyifo Yeremia sɛ ɔnkɔka atemmusɛm nkyerɛ Yuda ne Yerusalem. Onyankopɔn ka kyerɛɛ Yeremia sɛ, Yuda ahene, asafohene anaa mmapɔmma, asɔfo ne nkurɔfo no ne no “bedi ako.” Yehowa kae sɛ: “Nanso wɔrentumi wo, efisɛ midi w’akyi.”—Yeremia 1:17-19.

Bere a Babilonfo bɛkaa Yuda ahenkurow Yerusalem hyɛɛ mu no, Ɔhene Sedekia somaa nnipa mprenu sɛ wonkobisa Yeremia sɛ, Nebukadnesar bɛsɛe kurow no anaa, na wɔnka nkyerɛ odiyifo no ma ɔmmɔ mpae na amma saa. Wɔn a ɔhene no somaa wɔn no mu baako ne Yukal a wɔsan frɛ no Yehukal. Onyankopɔn ka kyerɛɛ Yeremia sɛ Babilonfo anaa Kaldeafo bɛsɛe kurow no. Ná obiara a ɔbɛka Yerusalem no bewu wɔ ɔkɔm, owuyare, anaa afoa ano. Nanso, na wɔn a wɔbɛkɔ Kaldeafo nkyɛn no benya nkwa. Hwɛ sɛnea Yeremia nsɛm no bɛhyɛ Yudafo mmapɔmma no abufuw afa!—Yeremia 21:1-10; 37:3-10; 38:1-3.

Yukal yɛ ɔsafohene a ɔhyɛɛ Sedekia sɛ: “Wonkum ɔbarima [Yeremia] yi ɛ, efisɛ ɔde sɛɛ rema akofofo a wɔaka kurow yi mu ne ɔman no nyinaa nsam agugow.” Ná Yukal otirimɔdenfo no nso ka wɔn a wɔtow Yeremia too abura a dontori ahyɛ mu ma a akyiri yi woyii odiyifo no fii mu no ho. (Yeremia 37:15; 38:4-6) Esiane sɛ Yeremia tiee Yehowa nti, onyaa nkwa wɔ Yerusalem sɛe no mu, nanso Yukal a ɔde ne werɛ hyɛɛ Yudafo nhyehyɛe mu no wui wɔ ɔsɛe no mu.

Wɔahu Ne Ho Nsɛm Foforo

Yebetumi aka sɛ “wɔkyerɛw” Yukal ho nsɛm foforo a wɔahu no wɔ Yerusalem. Wɔkyerɛw no afe 2005 yi ara mu. Ná wɔn a wotutu fam hwehwɛ tetefo nneɛma mu retutu  baabi a wosusuw sɛ wobehu Ɔhene Dawid ahemfie. Wohuu ɔdan kɛse bi a wɔde abo asi a wogye di sɛ wɔsɛee no bere a Babilonfo ko faa Yerusalem wɔ Yeremia bere so no.

Yɛrentumi nsi pi nka sɛ eyi yɛ Dawid ahemfie anaa ɛnyɛ ɛno. Nanso, wɔn a wotutu fam yi huu dɔte nsɔano ketewaa bi a nkyerɛwee wɔ so a ɛwɔ kratafa 14 no. Ɛyɛ nhoma bi a asɛe dedaadaw nsɔano. Nkyerɛwee a ɛwɔ so no kenkan sɛ: “Ɛyɛ Shovi ba Shelemiyahu ba Yehukal dea.” Ɛda adi sɛ Yeremia tamfo Yehukal, anaa Yukal a ɔyɛ Selemia ba no din na ɛwɔ dɔte nsɔano yi so.

Obi a otutu fam hwehwɛ tetefo nneɛma mu a wɔfrɛ no Eilat Mazar a ɔkyerɛɛ nkyerɛwee no ase no kyerɛwee sɛ, Safan ba Gemaria a ne din wɔ nsɔano bi a wohui wɔ Dawid Kurow mu no akyi no, Yehukal na na ɔyɛ “ahemfie bapɔmma a odi hɔ.” *

Ɛnyɛ adwini bi a wɔakohu na ɛbɛma yɛanya gyidi wɔ Onyankopɔn Asɛm mu; na mmom nkɔmhyɛ a anya mmamu ne ade a ɛsɛ sɛ yegyina so gye Bible no di. Abakɔsɛm ma yehu sɛ nkɔm a Yeremia hyɛ faa Yerusalem sɛe ho no baa mu pɛpɛɛpɛ. Ɛsɛ sɛ animguase a ɛtoo Yeremia atamfo no hyɛ gyidi a yɛwɔ no mu den sɛ sɛ yedi nokware te sɛ Yeremia a, yɛn atamfo ‘rentumi yɛn, efisɛ Yehowa di yɛn akyi.’

[Ase hɔ asɛm]

[Mfonini wɔ kratafa 15]

Ahunahuna amma Yeremia angow Onyankopɔn asɛm mu

[Mfonini Fibea wɔ kratafa 14]

Gabi Laron/Institute of Archaeology/ Hebrew University ©Eilat Mazar