Wɔrehwehwɛ Wɔn a Wɔpɛ Onyankopɔn Som wɔ Guinea

NNIPA a wokyinkyin hwehwɛ asase so nneɛma de wɔn nkwa too asiane mu mfe pii de hwehwɛɛ agude ne ahonyade. Akokodurufo a wobeduu Guinea a ɛwɔ Afrika Atɔe fam no huu akorade abien—honam fam de ne honhom fam de. Dɛnkyɛmmo, sika kɔkɔɔ, fagude a wonya nnade fi mu, ne nea wonya nkyɛnsee fi mu ahyɛ ɔman yi mu ma. Nnipa bɛboro ɔpepem akron na wɔwɔ Guinea man yi mu.

Ɛwom sɛ Kristoman asɔre ahorow nnyee ntini wɔ ɔman yi mu de, nanso wɔn ani gye nyamesom ho na wɔn mu pii mfa Onyankopɔn som nni agoru. Henanom na wɔpɛ Onyankopɔn som yi? Ɛyɛ Yehowa asomfo anokwafo a wɔka wɔn ho asɛm wɔ Hagai 2:7 sɛ “amanaman nyinaa ade a wɔpɛ” no.

Wɔn a Wɔpɛ Onyankopɔn Som

Egye mmɔdenbɔ kɛse na wɔatumi atu asase ase akohu akorade a ahintaw. Saa ara na Kristofo som adwuma no nso te, egye mmɔdenbɔ kɛse na wɔahu nnipa a wɔpɛ Onyankopɔn som. Ahenni asɛnka adwuma no fii ase wɔ Guinea man no mfinimfini wɔ 1950 mfe no mfiase, na annu ɔman no ahenkurow Conakry mu kosii 1960 mfe no mfiase. Seesei Yehowa Adansefo bɛyɛ 900 na wɔwɔ asafo ahorow ne akuw 21 mu wɔ ɔman no nyinaa mu.

 Asɛmpatrɛwfo beduu ɔman no mu wɔ afe 1987 mu, na wɔne asafo biako pɛ a ɛwɔ Conakry no na ɛyɛɛ adwuma. Seesei asɛmpatrɛwfo bɛboro 20 na wɔwɔ ɔman no ahenkurow mu ne ɔman no mfinimfini. Wɔde nsi hyɛ asafo ahorow no den na wɔne anuanom a wɔwɔ hɔ no bom yɛ asɛnka adwuma no.

Luc a ɔte Conakry no ani gyei sɛ ɔne aberante oduruyɛfo Albert suaa Bible no. Ná Albert akyinkyin asɔre ahorow mu rehwehwɛ nokware no, na ɔde ne ho hyɛɛ ahonhonsɛmdi mu. Ná ɔhyɛ kawa bi a ɔkɔmfo bi de maa no a na ɔkyerɛ sɛ ɛbɛma asi no yiye. Bere a Albert hwehwɛɛ nokware som nanso ankosi hwee no, ɔtow ne kawa no kyenee bɔɔ mpae sɛ: “Onyankopɔn sɛ wowɔ hɔ a, ma minhu wo sɛnea ɛbɛyɛ a metumi asom wo. Sɛ anyɛ saa a, mɛbɔ me bra sɛnea mepɛ biara.” Ɛno akyi bere tiaa bi no, Albert kɔsraa ne nuabea wɔ ne fie. Bere a ɔwɔ hɔ no, na Yehowa Dansefo bi ne Albert wɔfase resua Bible no, na ɔtee nea na wɔreka no. Ankyɛ koraa na wɔyɛɛ nhyehyɛe maa Luc ne Albert suaa Bible no.

Nnawɔtwe biara na Luc de anigye twa kwansin abiɛsa ne Albert kosua ade. Ɛwom sɛ Luc ankɔ sukuu annu akyiri de, nanso sɛnea na Luc nim Kyerɛwnsɛm no yiye ne sɛnea ɔkyerɛkyerɛ Bible mu no kaa Albert a na wawie sukuupɔn no koma paa. Bere a Albert hui sɛ ɛnyɛ Onyankopɔn na ama adesamma rehu amane, na mmom Yehowa abɔ ne tirim sɛ obeyi amanehunu nyinaa afi hɔ, na wama asase adan paradise no, n’ani gyei paa. (Dwom 37:9-11) Bible mu nokwasɛm ne abrabɔ pa a asafo no mufo daa no adi no kaa Albert koma.

Nanso sɛnea ehia sɛ sikadwumfo tɔ ne bo ase twitwa dɛnkyɛmmo ho ma ɛhyerɛn no, saa ara na na ehia sɛ Albert yi wiase su gu na ama wabɔ ne bra ma ɛne Onyankopɔn trenee gyinapɛn ahyia. Ogyaee ahonhonsɛmdi, asanom bebrebe, ne kyakyatow. Nanso na ɛyɛ den ma Albert sɛ obegyae sigaretnom. Bere a ɔbɔɔ mpae denneennen hwehwɛɛ Yehowa mmoa no, otumi gyaee. Asram asia akyi  no, ɔwaree ne yere wɔ mmara kwan so. Ne yere fii ase suaa Bible no. Ɛnnɛ, wɔn baanu nyinaa abɔ asu sɛ Yehowa Adansefo.

Obi foforo a n’ani begyee Onyankopɔn som ho ne Martin. Bere a odii mfe 15 no na ofii ase suaa Bible wɔ Guéckédou. Ná n’awofo a wɔyɛ Katolekfo no mpɛ sɛ ɔkɔ Yehowa Adansefo nhyiam. Wɔsɛee Bible ho nhoma a na Martin wɔ, wɔhwee no, na wɔpam no fii fie. Sɛnea sɛ asase ase yɛ hyew paa a ɛma mframa a wɔfrɛ no carbon dan dɛnkyɛmmo no, saa ara na ɔsɔretia maa Bible mu gyidi a Martin wɔ no mu yɛɛ den. Bere rekɔ so no, n’awofo adwene sesae ma ɔsan kɔɔ fie. Dɛn na ɛmaa n’awofo adwene sesae? Wohui sɛ nsonsonoe wɔ Martin ne ne nuanom nkumaa a aka no abrabɔ mu. Ná ne nuanom nkumaa no adan atuatewfo, na na wɔde wɔn ho ahyɛ nna mu ɔbrasɛe mu. Wobehui sɛ ɔsom foforo a Martin de ne ho ahyem no reboa no, enti wogyee asafo no mufo a wɔba wɔn fie no fɛw so. Martin maame ada anuanom ase mpɛn pii wɔ nea wɔayɛ de aboa ne ba no ho. Martin bɔɔ asu bere a na wadi mfe 18, na akyiri yi, ɔkɔɔ Asomfo Ntetee Sukuu, na mprempren ɔsom sɛ ɔkwampaefo titiriw.

Atubrafo a Wɔpɛ Onyankopɔn Som

Bere a Guinea de agude pii a ɛwɔ ɔman no mu kɔ aman afoforo so no, nnipa a wɔpɛ Onyankopɔn som fi aman afoforo so ba hɔ. Nnipa pii atu afi Afrika aman afoforo so aba hɔ, a ade titiriw nti a wɔbae ne sɛ wɔrebɛpɛ sika. Ebinom nso, esiane ɔko a akɔ so bere tenteenten wɔ wɔn man mu nti na wɔaguan aba hɔ.

Mfe 12 ni a Ernestine a ofi Cameroon baa Guinea. Ɔne Yehowa Adansefo suaa ade, na ɔkɔɔ wɔn nhyiam mfe pii a na ɔmmɔɔ asu. Bere a ɔhwɛɛ nnipa a wɔrebɔ asu wɔ ɔmansin nhyiam a Yehowa Adansefo yɛe wɔ afe 2003 mu no, nusu guu no. N’ahonim buu no fɔ na  ɔbɔɔ Yehowa mpae sɛ: “Madi mfe 51, na menyɛɛ ade pa biara mmaa wo. Mepɛ sɛ mesom wo.” Ɛno akyi no, Ernestine yɛɛ nea ɔbɔɔ ho mpae no ho adwuma. Ɔka kyerɛ ɔbarima a na ɔne no te no sɛ, sɛ wobetumi akɔ so atra a, gye sɛ wɔware mmara kwan so. Ɔbarima no penee so, na akyiri yi, bere a Ernestine ankasa bɔɔ asu wɔ November 2004 mu no, anigye ma osui.

Efi 1990 mfe no mfiase no, aguanfo mpempem pii a wofi Liberia ne Sierra Leone, a Yehowa asomfo ka ho aba Guinea. Sɛ anuanom bedu aguanfo atrae hɔ ara pɛ a, wofi ase yɛ asafo nhyiam, fi asɛnka adwuma no ase, na wosi Ahenni Asa. Nnipa binom abɛyɛ Yehowa asomfo wɔ aguanfo atrae hɔ. Isaac yɛ wɔn mu baako. Wɔ Isaac asubɔ akyi no, onyaa hokwan sɛ ɔsan kɔyɛ n’adwuma a kan na ɔyɛ wɔ adwumakuw kɛse bi a ɛwɔ Liberia no mu. Nanso ɔpawee sɛ ɔbɛtra aguanfo atrae a ɛwɔ Lainé na wasom sɛ bere nyinaa ɔsɛmpakafo. Ɔkyerɛkyerɛ mu sɛ: “Seesei ɛho nhia sɛ mesrɛ kwan fi m’adwumam panyin hɔ ansa na makɔ asafo nhyiam anaa ɔmansin nhyiam. Mewɔ hokwan a mede som Yehowa.” Wɔ December 2003 mu no, wɔyɛɛ ɔmantam nhyiam maa Adansefo 150 a wɔka aguanfo 30,000 ho a wɔte aguanfo atrae a ɛwɔ akyirikyiri no. Anigyesɛm ne sɛ, nnipa 591 na wɔbae, na emu 9 a wɔyɛ mum no tiee dwumadi no wɔ mum kasa mu. Wɔbɔɔ nnipa 12 asu. Anuanom ani sɔɔ mmɔden a wɔbɔe ma wɔn nsa kaa honhom fam apontow a ɛte saa no.

Wɔn a Wɔfata Yɛ Nsakrae a Ehia

Ɛte sɛ nea biribiara ntumi nsiw nnipa a wɔrehwehwɛ sika kɔkɔɔ ne dɛnkyɛmmo no kwan. Saa ara na mmɔden a wɔn a wɔyɛ foforo bɔ de di akwanside biara so sɛnea ɛbɛyɛ a wɔbɛsom Yehowa no nso ka koma yiye. Susuw Zainab asɛm yi ho hwɛ.

Bere a Zainab dii mfe 13 no, wɔhyɛɛ no ma ɔsomee sɛ abaawa. Wɔfaa no fii Afrika Atɔe fam man bi so kɔɔ Guinea. Odii mfe 20 no, ɔtee Bible mu asɛm no, na ɔpɛe sɛ ɔde nea ɔresua no bɔ ne bra.

Ná ɛyɛ den sɛ Zainab bɛkɔ Kristofo nhyiam. Nanso na n’ani gye nhyiam a ɛte saa ho paa ma enti na ɔmpɛ sɛ ɛpa ne ti so. (Hebrifo 10:24, 25) Ná ɔde ne nhoma kosie abɔnten sɛnea ɛbɛyɛ a obetumi akɔfa de akɔ nhyiam no. Esiane Kristofo nhyiam a ɔkɔ nti, wɔn a na ɔsom wɔn no hwee no mpɛn pii.

Akyiri yi, tebea no sesae ma Zainab dee ne ho. Ofii ase ntɛm ara kɔɔ asafo nhyiam nyinaa, na ɛboaa no ma onyaa Onyankopɔn som mu nkɔso ntɛm. Wanyɛ adwuma a ɛbɛma wagye akatua kɛse a anka ɛremma onnya kwan nkɔ nhyiam nkotie Kristofo nkyerɛkyerɛ. Ɔde ne ho hyɛɛ Teokrase Ɔsom Sukuu no mu, ɔbɛyɛɛ Ahenni dawurubɔfo a ɔmmɔɔ asu, na akyiri yi, ohyiraa ne nkwa so maa Yehowa bɔɔ asu. Eyi akyi pɛɛ no, ɔyɛɛ akwampaefo aboafo adwuma no bi. Asram asia akyi no, ɔbɛyɛɛ daa kwampaefo.

Bere a obi a n’ani gye asɛm no ho kɔɔ Kristofo nhyiam kakra no, ɔkae sɛ: “Sɛ meba ha a, na mewerɛ afi me hia.” Bere a nnipa pii ani gye honam fam nneɛma a ɛwɔ Guinea ho no, wɔn a wɔdɔ Yehowa no ani abere rehwehwɛ Onyankopɔn som. Nokwarem no, ɛnnɛ, “amanaman nyinaa ade a wɔpɛ” redan ba Yehowa nokware som mu!

[Mfonini wɔ kratafa 8]

GUINEA - 2005

Adansefo dodow: 883

Bible adesua: 1,710

Nnipa a wɔbaa Nkaedi: 3,255

[Asase mfonini ahorow a ɛwɔ kratafa 8]

(Wopɛ nsɛm a wɔahyehyɛ awie no a, hwɛ nhoma no mu)

GUINEA

Conakry

SIERRA LEONE

LIBERIA

[Mfonini wɔ kratafa 9]

Albert ne Luc

[Mfonini wɔ kratafa 9]

Ahenni Asa a ɛwɔ Conakry

[Mfonini wɔ kratafa 10]

Martin

[Mfonini wɔ kratafa 10]

Ernestine

[Mfonini wɔ kratafa 10]

Zainab

[Mfonini wɔ kratafa 8]

USAID