Daniel Bɔɔ Ne Nhyiam Baagye

YESU kaa nyamesom akannifo a na wobu wɔn ho treneefo a wɔn bo fuwii bere a wohui sɛ mmarimaa reyi Onyankopɔn ayɛ wɔ baguam no anim. Ɛfata sɛ Yesu bisaa wɔn saa asɛm yi: “So moankenkan sɛ ‘Nkokoaa ne wɔn a wonum nufu anom na wɔasiesie ayeyi’?”—Mateo 21:15, 16.

Daniel a wadi mfe asia a ɔwɔ asafo a wɔka Russia kasa mu wɔ Germany no ma yehu sɛ mmofra da so ara reyi Yehowa ayɛ nnɛ. Ɔne ne maame ne ne nuabea kɔɔ Yehowa Adansefo ɔmantam nhyiam wɔ Duisburg. Ná eyi ne nea edi kan koraa a na wɔakɔ nhyiam kɛse a ɛte saa. Ná wonhuu nneɛma ne nea a ɛkɔɔ so wɔ hɔ no bi da: ahɔhodan, nnipadɔm, tra a wɔtra faako nnansa, asubɔ, ɛnkanka drama no. Daniel yɛɛ n’ade dɛn? Ɔdaa suban pa adi.

Wowiee nhyiam no Kwasida, na ade kyee Dwoda no, Daniel sɔree ntɛm anɔpa sɛ ɔrekɔ sukuu. Nanso, na dɛn na ɛda so bɔ n’atade mu? Ɛyɛ baagye a ɛkyerɛ sɛ ɔka wɔn a wɔkɔɔ nhyiam no ho! Daniel maame ka kyerɛɛ no sɛ: “Yɛawie nhyiam no, enti wubetumi ayi wo baagye no ato hɔ nnɛ.” Nanso, Daniel kae sɛ: “Mepɛ sɛ obiara hu baabi a mekɔe ne nea mikosuae.” Enti, Daniel bɔɔ ne baagye no anigye so da mu no nyinaa wɔ sukuu hɔ. Bere a Daniel kyerɛkyerɛfo bisaa no baagye no ho asɛm no, ɔkaa nhyiam no mu asɛm kyerɛɛ no.

Daniel nam saa a ɔyɛe so suasuaa mmarimaa ne mmeawa mpempem pii a wɔakamfo Yehowa wɔ baguam mfehaha pii no nhwɛso.