Yehowa ‘Bebu Atɛntrenee’
Yehowa ‘Bebu Atɛntrenee’
‘So Onyankopɔn remmu atɛntrenee mma wɔn a wɔapaw wɔn a wɔteɛm frɛ no awia ne anadwo no?’—LUKA 18:7.
1. Henanom nhwɛso na ɛhyɛ wo nkuran, na dɛn ntia?
WƆ WIASE nyinaa no, Kristofo mmarima ne mmea pii a wɔyɛ Yehowa Adansefo de mfe bebree asom Yehowa nokware mu. So w’ankasa wunim anuanom adɔfo yi binom? Ebia onuawa bi a ne mfe akɔ anim a ɔbɔɔ asu mfe pii ni a ɔkɔ nhyiam wɔ Ahenni Asa so daa ho adwene aba wo tirim. Anaa wubetumi asusuw onua akwakoraa bi a ɔne asafo no bɔ anan yɛ asɛnka adwuma no nnawɔtwe biara, na wakɔ so ayɛ saa mfe pii no ho. Nokwarem no, anokwafo yi mu pii susuwii sɛ anka saa bere yi Harmagedon aba dedaw. Nanso ɛmfa ho sɛ wiase bɔne yi da so wɔ hɔ no, wɔda so ara wɔ ahotoso a emu yɛ den wɔ Yehowa bɔhyɛ ahorow mu, na wɔn bo a wɔasi sɛ ‘wobegyina mu akosi awiei’ no mu nso da so yɛ den. (Mateo 24:13) Gyidi a emu yɛ den a Yehowa asomfo anokwafo a wɔte saa wɔ no hyɛ asafo mũ no nyinaa nkuran ankasa.—Dwom 147:11.
2. Tebea bɛn na ɛhyɛ yɛn awerɛhow?
2 Nanso ɛtɔ mmere bi a, nea yehu no yɛ soronko koraa. Adansefo binom de mfe pii yɛɛ asɛnka adwuma no, nanso bere kɔɔ so no, Yehowa mu gyidi a wɔwɔ no ano brɛɛ ase, na wɔtwee wɔn ho fii Kristofo asafo no ho. Ɛyɛ yɛn awerɛhow sɛ nnipa a bere bi na yɛne wɔn bɔ no agyae Yehowa som. Yɛpɛ sɛ yɛkɔ so boa “oguan a wayera” biara ma ɔsan bɛka nguankuw no ho. (Dwom 119:176; Romafo 15:1) Ɛno mpo no, nsɛmmisa bi sɔre wɔ wɔn a wɔda so ara kura wɔn gyidi mu ne wɔn a wɔahwere wɔn gyidi no ho. Dɛn nti na Adansefo dodow no ara da so wɔ Yehowa bɔhyɛ ahorow mu gyidi, na ebinom de, wɔahwere wɔn gyidi? Dɛn na yɛn ankasa betumi ayɛ na ama ‘Yehowa da kɛse’ a ɛrebɛn no mu ahotoso a yɛwɔ no mu akɔ so ayɛ den? (Sefania 1:14) Ma yensusuw mfatoho bi a ɛwɔ Luka Asɛmpa no mu ho nhwɛ.
Kɔkɔbɔ ma Wɔn a Wɔte Ase Bere a “Onipa Ba no Ba” No
3. Henanom titiriw na wobetumi anya okunafo ne ɔtemmufo no ho mfatoho no so mfaso, na dɛn ntia?
3 Yehu Yesu mfatoho a ɛfa ɔbea okunafo bi ne ɔtemmufo bi ho wɔ Luka ti 18. Ɛte sɛ ɔbarima a ɔkɔɔ so guan ne yɔnko ho no ho mfatoho a yesusuw ho wɔ adesua a edi eyi anim mu no. (Luka 11:5-13) Nanso, Bible mu nsɛm foforo a ɛfa okunafo ne ɔtemmufo no ho ho mfatoho no ma yehu sɛ eyi fa wɔn a wɔte ase wɔ bere a “onipa Ba no ba” n’ahenni tumi mu no ho titiriw. Saa bere no fii ase wɔ 1914 mu.—Luka 18:8. *
4. Dɛn na Yesu kaa ho asɛm ansa na ɔrema mfatoho a ɛwɔ Luka ti 18 no?
4 Ansa na Yesu rema okunafo ne ɔtemmufo no ho mfatoho no, ɔkae sɛ nnipa pii behu adanse a ɛkyerɛ sɛ waba Ahenni tumi mu “sɛnea anyinam . . . hyerɛn fi ɔsoro ase fã bi kɔ ɔsoro ase fã foforo no.” (Luka 17:24; 21:10, 29-33) Nanso nnipa dodow no ara a wɔte “awiei bere” mu no bebu wɔn ani agu saa adanse no so. (Daniel 12:4) Dɛn ntia? Efisɛ wɔbɛyɛ nneɛma a ɛmaa Noa ne Lot beresofo buu wɔn ani guu Yehowa kɔkɔbɔ so no ara bi. Saa bere no, nnipa ‘didii, wɔnomee, wɔtɔe, wɔtɔnee, woduae, na wosisii adan kosii da a wɔsɛee wɔn.’ (Luka 17:26-29) Nea ɛma wowuwui ne sɛ nneɛma a na wɔyɛ no daa no dii wɔn ti ara ma wobuu wɔn ani guu Onyankopɔn apɛde so. (Mateo 24:39) Ɛnnɛ nso, nnipa dodow no ara de wɔn ho ahyɛ nnwuma a wɔyɛ no daa mu fẽẽ araa ma wonhu adanse a ɛkyerɛ sɛ wiase bɔne yi awiei abɛn no.—Luka 17:30.
5. (a) Henanom na Yesu de kɔkɔbɔ bi maa wɔn, na dɛn ntia? (b) Dɛn na ama ebinom ahwere wɔn gyidi?
5 Ɛda adi sɛ, Satan wiase a na ebetumi atwetwe Yesu akyidifo no adwene ma anhwɛ mpo a na ‘wɔasan akɔfa nneɛma a ɛwɔ akyi no’ yɛ ade a na ɛhaw Yesu. (Luka 17:22, 31) Nokwasɛm ne sɛ, biribi a ɛte saa ato Kristofo binom. Nnipa a wɔte saa no de mfe pii hwɛɛ da a Yehowa de wiase bɔne yi bɛba awiei no kwan. Nanso bere a Harmagedon amma wɔ bere a wɔhwɛɛ kwan no mu no, wɔn abam bui. Yehowa atemmu da a abɛn no mu ahotoso a wɔwɔ no kɔɔ fam. Wɔtotoo asɛnka adwuma no ase na nkakrankakra wɔde wɔn ho kɔhyɛɛ asetram nneɛma mu ma wɔannya bere pii anyɛ Yehowa som adwuma no. (Luka 8:11, 13, 14) Bere bi akyi no, ‘wɔsan kɔfaa nneɛma a ɛwɔ akyi no.’ Awerɛhosɛm bɛn ara ni!
Ehia sɛ ‘Yɛbɔ Mpae Daa’
6-8. (a) Ka mfatoho a ɛfa okunafo ne ɔtemmufo no ho ho asɛm. (b) Yesu kyerɛkyerɛɛ mfatoho yi mu dɛn?
6 Dɛn na yebetumi ayɛ na ama ahotoso a emu yɛ den a yɛwɔ wɔ Yehowa bɔhyɛ ahorow a ɛbɛba mu no mu akɔ so ayɛ den? (Hebrifo 3:14) Bere a Yesu de kɔkɔbɔ maa n’asuafo no sɛ mma wɔnsan wɔn akyi nkɔ Satan wiase bɔne no mu no wiei pɛ na obuaa asɛmmisa no.
7 Luka bɔ amanneɛ sɛ, Yesu toaa so “maa wɔn mfatoho bi de kyerɛɛ sɛnea ehia sɛ wɔbɔ mpae daa a wɔmpa abaw.” Yesu kae sɛ: “Ná ɔtemmufo bi wɔ kurow bi mu a onsuro Nyankopɔn na ommu nipa biara. Na na okunafo bi wɔ saa kurow no mu a ɔtaa kɔ ne nkyɛn ka sɛ, ‘Hwɛ sɛ wubebu atɛntrenee ama me wɔ me nkurobɔfo ho.’ Ɔtwentwɛnee ne nan ase kakra, nanso akyiri yi ɔkaa no ne tirim sɛ, ‘Ɛwom sɛ minsuro Nyankopɔn na mimmu onipa de, nanso, sɛnea okunafo yi kɔ so haw me nti, mɛhwɛ ma wanya atɛntrenee, na wamma ammeguan me ho koraa.’”
8 Yesu maa mfatoho yi wiei no, ɔkyerɛkyerɛɛ mu sɛ: “Muntie nea ɔtemmufo a ɔnteɛ mpo no kae! Nokwasɛm ni, ɛwom sɛ Onyankopɔn ma ne bo dwo kyɛ ma wɔn de, nanso so ɔremmu atɛntrenee mma wɔn a wɔapaw wɔn a wɔteɛm frɛ no awia ne anadwo no? Mise mo sɛ, Obebu atɛntrenee ama wɔn ntɛm so. Nanso sɛ onipa Ba no ba a, obehu gyidi ankasa wɔ asase so?”—Luka 18:1-8.
“Hwɛ sɛ Wubebu Atɛntrenee Ama Me”
9. Asɛntitiriw bɛn na ɛda adi wɔ mfatoho a ɛfa okunafo ne ɔtemmufo no ho mu?
9 Asɛntitiriw a ɛwɔ mfatoho yi mu no da adi pefee. Nnipa baanu a wɔwɔ mfatoho no mu no ne Yesu nyinaa kaa ho asɛm. Okunafo no srɛe sɛ: “Hwɛ sɛ wubebu atɛntrenee ama me.” Ɔtemmufo no kae sɛ: “Mɛhwɛ ma wanya atɛntrenee.” Yesu bisae sɛ: ‘So Onyankopɔn remmu atɛntrenee?’ Na Yesu kaa Yehowa nso ho asɛm sɛ: “Obebu atɛntrenee ama wɔn ntɛm so.” (Luka 18:3, 5, 7, 8) Bere bɛn pɔtẽẽ na Onyankopɔn ‘bebu atɛntrenee’?
10. (a) Bere bɛn na aweredi nna no bae wɔ afeha a edi kan no mu? (b) Bere bɛn na wobebu atɛntrenee ama Onyankopɔn asomfo nnɛ, na wɔbɛyɛ no ɔkwan bɛn so?
10 Wɔ afeha a edi kan no mu no, “aweredi nna” no bae wɔ afe 70 Y.B. bere a wɔsɛe Yerusalem ne n’asɔrefie no. (Luka 21:22) Wobebu atɛntrenee ama Onyankopɔn nkurɔfo a wɔwɔ hɔ nnɛ wɔ ‘Yehowa da kɛse no’ mu. (Sefania 1:14; Mateo 24:21) Saa bere no, Yehowa de “ahohiahia betua wɔn a wohiahia” ne nkurɔfo ho no “so ka,” “na [Yesu Kristo de] aweredi aba wɔn a wonnim Nyankopɔn ne wɔn a wontie yɛn Awurade Yesu ho asɛmpa no so.”—2 Tesalonikafo 1:6-8; Romafo 12:19.
11. Ɔkwan bɛn so na wobebu atɛntrenee “ntɛm so”?
11 Nanso ɛsɛ sɛ yɛte awerɛhyem a Yesu de mae sɛ Yehowa bebu atɛntrenee “ntɛm so” no ase dɛn? Onyankopɔn Asɛm da no adi sɛ “ɛwom sɛ [Yehowa] ma ne bo dwo kyɛ de,” nanso sɛ bere no so a, obebu atɛntrenee ntɛm so. (Luka 18:7, 8; 2 Petro 3:9, 10) Bere a Nsuyiri no bae wɔ Noa bere so no, wɔsɛee abɔnefo no ntɛm ara. Saa ara nso na wɔsɛee abɔnefo no wɔ Lot bere so bere a ogya tɔ fii soro no. Yesu kae sɛ: “Saa ara na ɛbɛyɛ da a wobeyi onipa Ba no adi no.” (Luka 17:27-30) ‘Mpofirim ara, ɔsɛe bɛba’ abɔnefo so bio. (1 Tesalonikafo 5:2, 3) Nokwarem no, yebetumi anya ahotoso koraa sɛ Yehowa remma atɛn a obebu Satan wiase no mpa ho da koro mpo.
“Obebu Atɛntrenee”
12, 13. (a) Dɛn na yesua fi Yesu mfatoho a ɛfa okunafo ne ɔtemmufo no ho mu? (b) Dɛn nti na yebetumi anya awerɛhyem sɛ Yehowa betie yɛn mpaebɔ na wabu atɛntrenee ama yɛn?
12 Yesu mfatoho a ɛfa okunafo ne ɔtemmufo no ho no ma nokwasɛm afoforo a ɛho hia nso da adi. Bere a Yesu rekyerɛkyerɛ mfatoho no mu no, ɔkae sɛ: ‘Muntie nea ɔtemmufo a ɔnteɛ mpo no kae! Nokwasɛm ni, so Onyankopɔn remmu atɛntrenee mma wɔn a wɔapaw wɔn no?’ Nokwarem no, na ɛnyɛ sɛ Yesu de Yehowa retoto ɔtemmufo no ho te sɛ nea saa ara na Onyankopɔn ne gyidifo bedi nsɛm. Mmom no, Yesu maa nsonsonoe a ɛda ɔtemmufo no ne Onyankopɔn ntam daa adi de kyerɛɛ n’akyidifo no biribi faa Yehowa ho. Nsonsonoe a ɛda wɔn ntam no bi ne nea ɛwɔ he?
13 Ná ɔtemmufo a ɔwɔ Yesu mfatoho no mu no ‘nteɛ’ nanso ‘Onyankopɔn yɛ ɔtemmufo a ɔteɛ.’ (Dwom 7:11; 33:5) Ná okunafo no ho asɛm biara nhia ɔtemmufo no, nanso Yehowa dwen ankorankoro biara ho. (2 Beresosɛm 6:29, 30) Ɔtemmufo no ampɛ sɛ ɔboa okunafo no, nanso Yehowa wɔ ɔpɛ, na ne ho pere no mpo sɛ ɔbɛboa wɔn a wɔresom No no. (Yesaia 30:18, 19) Dɛn na yesua fi mu? Sɛ ɔtemmufo a ɔnteɛ no mpo tiee okunafo no abisade buu atɛntrenee maa no a, hwɛ mpɛn dodow ara a Yehowa betie ne nkurɔfo mpaebɔ na wabu atɛntrenee ama wɔn!—Mmebusɛm 15:29.
14. Dɛn nti na ɛnsɛ sɛ yɛhwere gyidi a yɛwɔ wɔ Onyankopɔn atemmu da a ɛreba no mu?
14 Ne saa nti, wɔn a wɔhwere gyidi wɔ Onyankopɔn atemmu da a ɛreba no mu no di mfomso kɛse. Dɛn ntia? Wɔnam gye a wonnye nni bio sɛ ‘Yehowa da kɛse’ no abɛn no so de wɔn nneyɛe kyerɛ sɛ wonni Yehowa mu ahotoso sɛ obedi ne bɔhyɛ so pɛpɛɛpɛ. Nanso obiara nni hɔ a obetumi agye Onyankopɔn nokwaredi ho kyim. (Hiob 9:12) Asɛm a ɛho hia ne sɛ, So yɛbɛkɔ so adi nokware? Ɛno ne asɛm a Yesu bisae bere a ɔde mfatoho a ɛfa okunafo ne ɔtemmufo no ho baa awiei no.
“Obehu Gyidi Ankasa Wɔ Asase So?”
15. (a) Asɛm bɛn na Yesu bisae, na dɛn ntia? (b) Dɛn na ɛsɛ sɛ yebisa yɛn ho?
15 Yesu bisaa asɛm a ɛho hia yi: “Sɛ onipa Ba no ba a, obehu gyidi ankasa wɔ asase so?” (Luka 18:8) Ɛnyɛ gyidi biara kɛkɛ na na Yesu reka ho asɛm, na mmom na ɛyɛ gyidi pɔtẽẽ a ɛte sɛ okunafo no de no. Yesu amma n’asɛmmisa no ho mmuae. Obisae sɛnea ɛbɛyɛ a n’asuafo no bedwen sɛnea wɔn ankasa gyidi te ho. So na wɔn gyidi reyɛ mmerɛw ma enti ebetumi ama wɔasan akɔ nneɛma a wɔagyaw wɔ akyi no ho? Anaasɛ na wɔwɔ gyidi a ɛte sɛ okunafo no de no bi? Ɛnnɛ, ɛsɛ sɛ yɛn nso yebisa yɛn ho sɛ, ‘Gyidi bɛn na “onipa Ba no” hu wɔ me koma mu?’
16. Gyidi bɛn na na okunafo no wɔ?
16 Sɛ yɛbɛka wɔn a Yehowa bebu atɛntrenee ama wɔn no ho a, ɛsɛ sɛ yesuasua okunafo no. Gyidi bɛn na na ɔwɔ? Ɔkɔɔ so kɔɔ ɔtemmufo no nkyɛn kɔkae sɛ, “Hwɛ sɛ wubebu atɛntrenee ama me” de daa ne gyidi adi. Okunafo no kɔɔ so hwehwɛe sɛ onipa a ɔnteɛ yi bebu atɛntrenee ama no. Saa ara na Onyankopɔn asomfo a wɔwɔ hɔ nnɛ betumi anya ahotoso sɛ Yehowa bebu atɛntrenee ama wɔn—ɛmfa ho sɛ ebia ɛbɛkyɛ asen sɛnea wɔahwɛ kwan mpo no. Bio nso, wɔkɔ so bɔ mpae ‘teɛm frɛ Yehowa awia ne anadwo’ de kyerɛ sɛ wɔwɔ Onyankopɔn bɔhyɛ ahorow mu ahotoso. (Luka 18:7) Nokwarem no, sɛ Kristoni bi gyae sɛ ɔbɛbɔ mpae de ahwehwɛ atɛntrenee a, ɛbɛkyerɛ sɛ onni ahotoso bio sɛ Yehowa bedi ama n’asomfo.
17. Nneɛma bɛn nti na ɛsɛ sɛ yɛkɔ so bɔ mpae na yekura yɛn gyidi mu wɔ Yehowa atemmu da a ɛbɛba ɔkwan biara so no mu?
17 Okunafo no tebea no ma yehu sɛ yɛwɔ nneɛma afoforo a enti ɛsɛ sɛ yɛkɔ so bɔ mpae. Susuw nsonsonoe a ɛwɔ ne tebea no ne yɛn de mu no bi ho hwɛ. Okunafo no kɔɔ so kɔɔ ɔtemmufo no nkyɛn ɛmfa ho mpo sɛ obiara anhyɛ no nkuran sɛ ɔnyɛ saa no, nanso yɛn de, Onyankopɔn Asɛm hyɛ yɛn nkuran sɛ ‘yenkura mpaebɔ mu denneennen.’ (Romafo 12:12) Ná okunafo no nni awerɛhyem biara sɛ wobedi n’abisade ho dwuma ama no, nanso yɛn de, Yehowa ama yɛn awerɛhyem sɛ obebu atɛntrenee ama yɛn. Yehowa nam ne diyifo so kae sɛ: “Sɛ ɛtwentwɛn ase nso a, twɛn no ara, na ɔba de, ɛbɛba, ɛrenka akyiri.” (Habakuk 2:3; Dwom 97:10) Ná okunafo no nni ɔboafo biara a ɔbɛka n’asɛm ama no. Nanso yɛn de yɛwɔ ɔboafo kɛse, Yesu a “ɔte Nyankopɔn nifa, na ɔsrɛ ma yɛn nso.” (Romafo 8:34; Hebrifo 7:25) Enti, ɛmfa ho mpo sɛ na okunafo no wɔ tebea a ɛyɛ den mu no, ɔkɔɔ so srɛɛ ɔtemmufo no bere a na ɔwɔ anidaso sɛ obebu atɛntrenee ama no. Ɛnde hwɛ mpɛn dodow ara a ɛsɛ sɛ yekura yɛn gyidi mu wɔ Yehowa atemmu da a ɛbɛba ɔkwan biara so no mu!
18. Ɛbɛyɛ dɛn na mpaebɔ ahyɛ yɛn gyidi den na aboa yɛn ma wɔabu atɛntrenee ama yɛn?
18 Okunafo no ho mfatoho no ma yehu sɛ abusuabɔ kɛse da mpaebɔ ne gyidi ntam, na sɛ yɛkɔ so bɔ mpae a, ebeyi nneɛma a ebetumi ama yɛn gyidi ayɛ mmerɛw no afi hɔ. Nanso eyi nkyerɛ sɛ mpae a yɛbɛbɔ ama afoforo ahu yɛn ara kɛkɛ no yɛ biribi a ebetumi ahyɛ yɛn gyidi den. (Mateo 6:7, 8) Sɛ yehu sɛ dan a yɛdan Onyankopɔn koraa no nti na yɛbɔ mpae a, ɛnde na mpaebɔ ma yɛbɛn Onyankopɔn na ɛhyɛ yɛn gyidi den. Na esiane sɛ gyidi ho hia na ama obi anya nkwagye nti, ɛnyɛ nwonwa sɛ Yesu hyɛɛ n’asuafo no nkuran sɛ ‘wɔmmɔ mpae daa a wɔmpa abaw’! (Luka 18:1; 2 Tesalonikafo 3:13) Nokwarem no, ‘Yehowa da kɛse no’ nnyina yɛn mpaebɔ so—sɛ yɛbɔ ho mpae anaasɛ yɛammɔ a, ɛbɛba. Nanso sɛ́ wobebu atɛntrenee ama yɛn na yɛanya nkwa anaa yennya nkwa wɔ Onyankopɔn ko no mu no gyina yɛn gyidi ne yɛn mpaebɔ so.
19. Dɛn na yɛyɛ de da no adi sɛ yegye di paa sɛ Onyankopɔn ‘bebu atɛntrenee’?
19 Sɛ yɛbɛkae a, Yesu bisae sɛ: “Sɛ onipa Ba no ba a, obehu gyidi ankasa wɔ asase so?” N’asɛmmisa a ɛho hia yi ho mmuae ne dɛn? Hwɛ anigye ara a yɛwɔ sɛ nnɛ, Yehowa asomfo anokwafo ɔpepem pii a wɔwɔ wiase nyinaa nam wɔn mpaebɔ, wɔn boasetɔ ne animia so kyerɛ sɛ wɔwɔ gyidi yi bi! Enti wobetumi abua Yesu asɛm yi sɛ, yiw. Nokwarem no, ɛmfa ho nneɛma bɔne a Satan wiase no de ba yɛn so seesei no, yegye di paa sɛ Onyankopɔn ‘bebu atɛntrenee ama wɔn a wɔapaw wɔn no.’
[Ase hɔ asɛm]
^ nky. 3 Sɛ wobɛte adwene a ɛwɔ mfatoho yi mu ase yiye a, kenkan Luka 17:22-33. Hyɛ sɛnea nsɛm a ɛwɔ Luka 17:22, 24, 30 a ɛtwe adwene si “onipa Ba no” so no boa yɛn ma yebua asɛmmisa a ɛwɔ Luka 18:8 no nsow.
So Wokae?
• Dɛn na ama Kristofo binom ahwere wɔn gyidi?
• Dɛn nti na yebetumi anya gyidi a emu yɛ den wɔ Yehowa atemmu da a ɛreba no mu?
• Nneɛma bɛn nti na ɛsɛ sɛ yɛkɔ so bɔ mpae?
• Ɔkwan bɛn so na mpae a yɛbɛkɔ so abɔ no bɛboa yɛn na yɛakɔ so akura yɛn gyidi mu?
[Adesua no ho Nsɛmmisa]
[Mfonini wɔ kratafa 26]
Dɛn na wosi so dua wɔ okunafo ne ɔtemmufo no ho mfatoho no mu?
[Mfonini wɔ kratafa 29]
Ɛnnɛ, nnipa ɔpepem pii gye di paa sɛ Onyankopɔn ‘bebu atɛntrenee’