Yehowa De ‘Honhom Kronkron Ma Wɔn A Wobisa No’
Yehowa De ‘Honhom Kronkron Ma Wɔn A Wobisa No’
“Sɛ mo a moyɛ abɔnefo mpo nim sɛnea mode akyɛde pa ma mo mma a, hwɛ mpɛn dodow ara a Agya a ɔwɔ soro no de honhom kronkron bɛma wɔn a wobisa no!”—LUKA 11:13.
1. Bere bɛn paa na yehia honhom kronkron no mmoa?
‘ASƐM yi de, ɛso sen me. Sɛ mannya honhom kronkron no mmoa a, mintumi nnyina sɔhwɛ yi ano!’ Woaka asɛm bi a ɛte saa pɛn? Kristofo dodow no ara aka biribi a ɛte saa pɛn. Ebia bere a wuhui sɛ yare a emu yɛ den bi abɔ wo no, wokaa saa. Anaasɛ ebia wokaa saa bere a w’aware mu hokafo a wo ne no atra akyɛ wui no. Anaa ebetumi aba sɛ ɛyɛ bere a adwennwene hyɛɛ wo so araa ma w’anigye nyinaa dan awerɛhow no. Bere a wuhyiaa nsɛnnennen wɔ asetram no, ebia wotee nka sɛ Yehowa honhom kronkron nkutoo na ɛmaa wo “tumi a ɛboro nnipa de so” ma wode gyinaa ano.—2 Korintofo 4:7-9; Dwom 40:1, 2.
2. (a) Nsɛnnennen bɛn na nokware Kristofo hyia? (b) Nsɛmmisa bɛn na yebesusuw ho wɔ adesua yi mu?
2 Sɛ́ nokware Kristofo no, ɛsɛ sɛ yegyina wiase bɔne yi mu nhyɛso ne ɔsɔretia a ano yɛ den no ano. (1 Yohane 5:19) Bio nso, Satan Ɔbonsam ankasa a ɔne wɔn a “wodi Nyankopɔn ahyɛde so na wokura Yesu ho adansedi adwuma mu no” reko no de n’ani asi Kristo akyidifo so. (Adiyisɛm 12:12, 17) Enti ɛnyɛ nwonwa sɛ yehia Onyankopɔn honhom no mmoa nnɛ sen bere biara. Dɛn na yebetumi ayɛ na yɛakɔ so anya Onyankopɔn honhom kronkron ma aboro so? Na dɛn nti na yebetumi anya awerɛhyem sɛ Yehowa wɔ ɔpɛ a emu yɛ den sɛ ɔbɛma yɛn ahoɔden a yehia bere a yɛahyia sɔhwɛ no? Yebenya nsɛmmisa yi ho mmuae wɔ Yesu mfatoho abien bi mu.
Kɔ so Bɔ Mpae
3, 4. Mfatoho bɛn na Yesu mae, na ɔkyerɛkyerɛɛ mu sɛ ɛfa mpaebɔ ho dɛn?
3 Yesu asuafo no mu baako bisaa no bere bi sɛ: “Awurade, kyerɛ yɛn sɛnea wɔbɔ mpae.” (Luka 11:1) Yesu maa n’asuafo no mfatoho abien bi de buaa asɛm no. Nea edi kan no fa ɔbarima bi a onyaa ɔhɔho ho, na nea ɛto so abien no fa agya bi a otiee ne ba ho. Ma yensusuw mfatoho abien no mu biara ho nhwɛ.
4 Yesu kae sɛ: “Mo mu hena na ɔwɔ adamfo a ɔbɛkɔ ne nkyɛn ɔdasum akɔka akyerɛ no sɛ, ‘Damfo, fɛm me paanoo abiɛsa, na seesei ara na m’adamfo bi fi kwan so aba me nkyɛn, na minni hwee a mede besi n’anim’? Na onii no fi mu bua sɛ, ‘Gyae me haw. Yɛato pon no mu dedaw, na me mma nkumaa ada wɔ me nkyɛn; mintumi nsɔre mmɛma wo hwee.’ Mise mo sɛ, ɛwom sɛ ɔrensɔre mmɛma no hwee esiane sɛ ɔyɛ n’adamfo nti de, nanso esiane sɛ oguan ne ho nti ɔbɛsɔre abɛma no nea ohia.” Afei Yesu kyerɛkyerɛɛ sɛnea mfatoho yi fa mpae a yɛbɛbɔ daa ho mu sɛ: “Enti mise mo sɛ, monkɔ so mmisa, na wɔde bɛma mo; monkɔ so nhwehwɛ, na mubehu; monkɔ so mmom na wobebue ama mo. Na obiara a obisa no nya, na obiara a ɔhwehwɛ no hu, na obiara a obom no wobebue ama no.”—Luka 11:5-10.
5. Dɛn na mfatoho a ɛfa ɔbarima a oguan ne yɔnko ho no ma yehu wɔ su a ɛsɛ sɛ yɛda no adi bere a yɛrebɔ mpae no ho?
5 Mfatoho a ɛfa ɔbarima a oguan ne yɔnko ho yi ma yehu su a ɛsɛ sɛ yɛda no adi bere a yɛbɔ mpae no. Hyɛ no nsow sɛ Yesu kae sɛ “esiane sɛ oguan ne [yɔnko no] ho nti” na ne nsa kaa nea ohia no. (Luka 11:8) Asɛm “oguan ne ho” pue pɛnkoro pɛ wɔ Bible mu. Wɔkyerɛɛ ase fii Hela asɛmfua a ɛkyerɛ “ani a enwu ade” mu. Mpɛn pii no, sɛ obi ani nwu ade a, ɛkyerɛ sɛ ɔwɔ subammɔne. Nanso sɛ adepa bi nti na obi ani nwu ade anaa oguan obi ho a, ɛnde yebetumi aka sɛ ɛyɛ su pa. Saa ara na ɛte wɔ mfatoho a ɛfa ɔbarima a onyaa ɔhɔho no ho. Ná ɛnyɛ no aniwu koraa sɛ ɔkɔɔ so bisaa nea ohia no. Esiane sɛ Yesu de ɔbarima yi asɛm yɛ nhwɛso ma yɛn nti, ɛsɛ sɛ yɛn nso yɛkɔ so bɔ mpae saa ara. Yehowa pɛ sɛ ‘yɛkɔ so bisa, yɛkɔ so hwehwɛ, yɛkɔ so bom,’ na ɔde “honhom kronkron bɛma wɔn a wobisa no” no.
6. Wɔ Yesu bere so no, na wobu ahɔhoyɛ a wɔda no adi no dɛn?
6 Ɛnyɛ sɛnea ɛsɛ sɛ yɛkɔ so bɔ mpae nko na Yesu kyerɛɛ yɛn, ɔkyerɛɛ yɛn nea enti a ɛsɛ sɛ yɛyɛ saa nso. Sɛ yɛbɛte asɛm no ase yiye a, ɛsɛ sɛ yesusuw sɛnea wɔn a wotiee Yesu mfatoho a ɛfa ɔbarima a oguan ne yɔnko ho no buu sɛnea na wɔda ahɔhoyɛ adi saa bere no ho. Bible mu nsɛm pii ma yehu sɛ wɔ tete mmere mu no, na Onyankopɔn asomfo titiriw bu ahɔho a wogye wɔn fɛw so no ahiasɛm. (Genesis 18:2-5; Hebrifo 13:2) Sɛ obi antumi anna ahɔhoyɛ adi a, na ɛyɛ animguase. (Luka 7:36-38, 44-46) Bere a eyi wɔ yɛn adwene mu no, ma yɛnhwɛ Yesu asɛm no bio.
7. Dɛn nti na anyɛ ɔbarima a ɔwɔ Yesu mfatoho no mu no aniwu sɛ obenyan ne yɔnko no?
7 Ɔbarima a mfatoho no fa no ho no nyaa ɔhɔho anadwo dasum. Ɔbarima no te nka sɛ ɛsɛ sɛ ɔma ne hɔho no aduan, nanso ‘onni hwee a ɔde besi n’anim.’ Wɔ ne fam no, ɛyɛ aniberesɛm! Ɛsɛ sɛ ɔkwan biara so onya paanoo ma no. Enti anyɛ no aniwu koraa sɛ ɔbɛkɔ n’adamfo bi nkyɛn akonyan no. Ɔbarima no teɛɛm sɛ: “Damfo, fɛm me paanoo abiɛsa.” Ɔkɔ so bisa kosi sɛ onya nea ɔpɛ. Sɛ ne nsa ka paanoo no nkutoo a na obetumi asom ne hɔho no yiye.
Kɔ so Bɔ Nea Ehia Wo no Ho Mpae
8. Dɛn na ɛbɛka yɛn ma yɛakɔ so abɔ mpae asrɛ honhom kronkron?
8 Dɛn na mfatoho yi ma yehu wɔ nea enti a ɛsɛ sɛ yɛkɔ so bɔ mpae no ho? Ɔbarima no kɔɔ so bisaa paanoo efisɛ na osusuw sɛ, sɛ obetumi asom ne hɔho no yiye a, na ehia sɛ ɔkwan biara so no onya saa paanoo no. (Yesaia 58:5-7) Sɛ wannya paanoo a, n’anim begu ase. Saa ara na esiane sɛ yenim sɛ yehia Onyankopɔn honhom ɔkwan biara so na yɛatumi ayɛ yɛn som adwuma sɛ nokware Kristofo nti, yɛkɔ so bɔ mpae de hwehwɛ Onyankopɔn honhom. (Sakaria 4:6) Sɛ yɛannya honhom no a, yɛrentumi nyɛ adwuma no. (Mateo 26:41) So wuhu aba a yebetumi afa afi mfatoho yi mu no? Sɛ yebu Onyankopɔn honhom sɛ biribi a yehia denneennen a, ɛda adi sɛ yɛbɛkɔ so abisa.
9, 10. (a) Fa mfatoho kyerɛkyerɛ nea enti a ɛsɛ sɛ yɛkɔ so bisa Onyankopɔn na ɔma yɛn ne honhom no mu. (b) Asɛm bɛn na ɛsɛ sɛ yebisa yɛn ho, na dɛn ntia?
9 Ma yɛmfa asɛm yi ntoto yɛn tebea ho nnɛ nhwɛ. Fa no sɛ w’abusua muni bi yare anadwo dasum. So wobɛkɔ akonyan oduruyɛfo bi ahwehwɛ ne hɔ mmoa? Sɛ yare no mu nyɛ den a, worenyɛ saa, nanso sɛ wanya koma yare a, ɛrenyɛ wo aniwu sɛ wobɛfrɛ oduruyɛfo. Dɛn ntia? Efisɛ ɛyɛ tebea a ɛsɛ sɛ wudi ho dwuma ntɛm. Wuhu sɛ ɔkwan biara so no, wuhia obi a ne ho akokwaw. Sɛ woanhwehwɛ mmoa a, onipa no betumi awu. Saa ara na sɛ yɛbɛka a, nokware Kristofo kɔ so hyia tebea bi a ɛsɛ sɛ wodi ho dwuma ntɛm. Nokwasɛm ne sɛ, Satan nenam te sɛ “gyata a ɔbobom” repɛ yɛn amene. (1 Petro 5:8) Sɛ yɛbɛkɔ so ne Yehowa anya abusuabɔ a, yehia Onyankopɔn honhom kronkron no mmoa ɔkwan biara so. Sɛ yɛanhwehwɛ Onyankopɔn nkyɛn mmoa a, ebetumi de yɛn nkwa ato asiane mu. Enti ɛsɛ sɛ yɛkɔ so guan Onyankopɔn ho de hwehwɛ ne honhom kronkron. (Efesofo 3:14-16) Sɛ yɛyɛ saa nkutoo a na yebetumi anya ahoɔden a yehia de ‘agyina mu akosi awiei.’—Mateo 10:22; 24:13.
10 Enti ɛho hia paa sɛ ɛtɔ mmere bi a yegye bere bisa yɛn ho sɛ, ‘Nokwarem no, mekɔ so bɔ mpae?’ Kae sɛ, sɛ yehu no yiye sɛ yehia Onyankopɔn mmoa a, yɛbɛkɔ so abɔ mpae de ahwehwɛ honhom kronkron.
Dɛn na Ɛka Yɛn Ma Yɛde Ahotoso Bɔ Mpae?
11. Yesu de mfatoho a ɛfa agya bi ne ne ba ho no kyerɛkyerɛɛ mpaebɔ mu dɛn?
11 Yesu mfatoho a ɛfa ɔbarima a oguan ne yɔnko ho no si su a gyidini a ɔrebɔ mpae wɔ no so dua. Mfatoho a edi hɔ no si su a Yehowa Nyankopɔn a otie mpaebɔ no wɔ so dua. Yesu bisae sɛ: “Mo mu hena paa na ɔyɛ agya a sɛ ne ba bisa no apataa a, ɔde ɔwɔ bɛhyɛ ne nsam sen sɛ ɔbɛma no apataa? Anaasɛ sɛ obisa kesua nso a, ɔde akekantwɛre bɛhyɛ ne nsam?” Yesu kɔɔ so kyerɛkyerɛɛ mu sɛ: “Enti, sɛ mo a moyɛ abɔnefo mpo nim sɛnea mode akyɛde pa ma mo mma a, hwɛ mpɛn dodow ara a Agya a ɔwɔ soro no de honhom kronkron bɛma wɔn a wobisa no!”—Luka 11:11-13.
12. Ɔkwan bɛn so na mfatoho a ɛfa agya a ɔde ne ba abisade ma no no si ɔpɛ a Yehowa wɔ sɛ obetie yɛn mpaebɔ no so dua?
12 Yesu de agya a ɔde ne ba abisade ma no ho nhwɛso yi kyerɛ sɛnea Yehowa te nka wɔ wɔn a wɔba ne nkyɛn wɔ mpaebɔ mu no ho. (Luka 10:22) Nea edi kan no, hyɛ nsonsonoe a ɛwɔ mfatoho abien yi mu no nsow. Yehowa nte sɛ ɔbarima a ɔwɔ mfatoho a edi kan no mu a na ɔmpɛ sɛ otie obi sufrɛ no, mmom ɔte sɛ ɔwofo a ɔwɔ ɔdɔ a ɔpɛ sɛ ɔde ne ba abisade ma no no. (Dwom 50:15) Bio nso, Yesu de sɛnea onipa a ɔba fam yɛ n’ade no toto yɛn soro Agya a ɔkorɔn no ho ma yehu sɛnea Yehowa wɔ ɔpɛ sɛ ɔbɛboa yɛn no. Ɔka sɛ, sɛ onipa mpo a ‘ɔyɛ ɔbɔnefo’ esiane ne sintɔ nti ma ne ba akyɛde pa a, hwɛ mpɛn dodow ara a yebetumi ahwɛ kwan sɛ yɛn Agya a ɔwɔ soro a ne yam ye no de honhom kronkron bɛma n’asomfo!—Yakobo 1:17.
13. Sɛ yɛbɔ Yehowa mpae a, awerɛhyem bɛn na yebetumi anya?
13 Dɛn na yesua fi mu? Yebetumi anya awerɛhyem sɛ, sɛ yebisa honhom kronkron fi yɛn soro Agya no hɔ a, ɔbɛyɛ yɛn abisade no ama yɛn ma aboro so. (1 Yohane 5:14) Sɛ yɛkɔ so kɔ Yehowa nkyɛn wɔ mpaebɔ mu a, ɔrenka da sɛ: “Gyae me haw. Yɛato pon no mu dedaw.” (Luka 11:7) Mmom no, Yesu kae sɛ: “Monkɔ so mmisa, na wɔde bɛma mo; monkɔ so nhwehwɛ, na mubehu; monkɔ so mmom na wobebue ama mo.” (Luka 11:9, 10) Nokwarem no, Yehowa ‘betie yɛn, da a yɛfrɛ no no ara mu.’—Dwom 20:9; 145:18.
14. (a) Adwene a ɛnteɛ bɛn na ebinom a wohyia sɔhwɛ nya? (b) Sɛ yɛrehyia sɔhwɛ a, dɛn nti na yebetumi de ahotoso abɔ Yehowa mpae?
14 Yesu mfatoho a ɛfa agya a ɔwɔ ɔdɔ ho no nso si so dua sɛ Yehowa papayɛ sõ sen papayɛ a onipa biara da no adi koraa. Enti ɛnsɛ sɛ yɛn mu biara te nka da sɛ sɔhwɛ ahorow a ebia yɛrehyia no kyerɛ sɛ Onyankopɔn bo afuw yɛn. Ɛyɛ yɛn tamfo kɛse, Satan, na ɔpɛ sɛ yenya adwene a ɛte saa. (Hiob 4:1, 7, 8; Yohane 8:44) Biribiara nni Kyerɛwnsɛm mu a obi betumi agyina so abu ne ho fɔ saa. Yehowa mfa “nnebɔne” nsɔ yɛn nhwɛ. (Yakobo 1:13) Ɛnyɛ ɔno na ɔde sɔhwɛ ahorow ba yɛn so. Yɛn soro Agya no de ‘nnepa ma wɔn a wobisa no no.’ (Mateo 7:11; Luka 11:13) Nokwarem no, dodow a yɛte Yehowa papayɛ ne ɔpɛ a ɔwɔ sɛ ɔbɛboa yɛn ase no, dodow no ara na ɛbɛka yɛn ma yɛafi ahotoso mu abɔ mpae. Bere a yɛreyɛ saa no, yɛn nso yebetumi aka nea odwontofo no kyerɛwee yi bi: “Ampa ne ampa, Onyankopɔn atie me, wayɛ aso atie me mpaebɔ.”—Dwom 10:17; 66:19.
Sɛnea Honhom Kronkron no Yɛ Yɛn Boafo
15. (a) Honhom kronkron ho bɔ bɛn na Yesu hyɛe? (b) Honhom kronkron no boa yɛn wɔ ɔkwan titiriw bɛn so?
15 Bere tiaa bi ansa na Yesu rewu no, otĩĩ awerɛhyem a ɔde mae wɔ ne mfatoho no mu mu. Ɔkaa honhom kronkron no ho asɛm kyerɛɛ n’asomafo no sɛ: “Mɛsrɛ Agya no na wama mo ɔboafo foforo a ɔne mo bɛtra daa.” (Yohane 14:16) Enti Yesu hyɛɛ bɔ sɛ ɔboafo anaa honhom kronkron ne n’akyidifo bɛtra akyiri yi, a yɛn nnɛ bere yi nso ka ho. Yenya saa mmoa no wɔ ɔkwan titiriw bɛn so nnɛ? Ɛne sɛ honhom kronkron no boa yɛn ma yegyina sɔhwɛ ahorow ano. Ɔkwan bɛn so? Ɔsomafo Paulo a n’ankasa hyiaa sɔhwɛ no kaa sɛnea Onyankopɔn honhom boaa no ho asɛm wɔ krataa a ɔde kɔmaa Kristofo a wɔwɔ Korinto no mu. Ma yensusuw nea ɔkyerɛwee no ho tiawa.
16. Ɔkwan bɛn so na yɛn tebea betumi ayɛ te sɛ Paulo de no?
16 Nea edi kan no, Paulo ka kyerɛɛ ne mfɛfo agyidifo no pefee sɛ na ɔwɔ “ɔhonam mu nsɔe,” sɔhwɛ bi a na ɔrehyia. Afei ɔkae sɛ: “Mesrɛɛ Awurade [Yehowa] mprɛnsa sɛ emfi me so.” (2 Korintofo 12:7, 8) Ɛmfa ho mpo sɛ Paulo srɛɛ Onyankopɔn sɛ onyi ne haw no mfi ne so no, ankɔ. Ebia wo nso worehyia tebea bi a ɛte saa nnɛ. Ebia wode ahotoso akɔ so abɔ mpae asrɛ Yehowa sɛ onyi sɔhwɛ no mfi wo so sɛnea Paulo yɛe no. Nanso kɔ a woakɔ so asrɛ nyinaa akyi no, ɔhaw no da so ara wɔ hɔ. So ɛno kyerɛ sɛ Yehowa antie wo mpaebɔ, na ne honhom no mmoa wo? Ɛnte saa koraa! (Dwom 10:1, 17) Hyɛ nea ɔsomafo Paulo san kae yi nsow.
17. Yehowa buaa Paulo mpaebɔ no dɛn?
17 Onyankopɔn buaa Paulo mpaebɔ no sɛ: “Me dom no ara dɔɔso ma wo; me tumi wie pɛyɛ wɔ mmerɛwyɛ mu.” Paulo kae sɛ: “Enti mede anigye kɛse bɛhoahoa me ho me mmerɛwyɛ ho mmom, na Kristo ahoɔden atra me so sɛ ntamadan.” (2 Korintofo 12:9; Dwom 147:5) Enti Paulo hui sɛ Onyankopɔn nam Kristo so de n’ahobammɔ kɛse no kataa no so sɛ ntamadan. Ɛnnɛ, Yehowa tie yɛn mpaebɔ wɔ ɔkwan a ɛte saa ara so. Ɔde n’ahobammɔ kata n’asomfo so sɛ ntamadan.
18. Dɛn na ɛma yetumi gyina sɔhwɛ ano?
18 Nokwarem no, ntamadan ntumi nsiw nsu a ɛbɛtɔ anaa mframa a ɛbɛbɔ kwan, nanso ɛma nnipa nya ahobammɔ bi fi saa nneɛma yi ho. Saa ara na ahobammɔ a yenya fi “Kristo ahoɔden” mu no ntumi nsiw sɔhwɛ anaa ahokyere a ɛba yɛn so no kwan. Nanso, sɛ́ Yehowa asomfo no, ɛbɔ yɛn ho ban fi wiase yi mu nneɛma a ebetumi apira yɛn ne ɔhaw a wiase no sodifo, Satan de ba yɛn so no ho. (Adiyisɛm 7:9, 15, 16) Ne saa nti, sɛ worehyia sɔhwɛ bi a ‘emmfi wo so’ a, wubetumi anya awerɛhyem sɛ Yehowa nim brɛ a worebrɛ, na watie “wo nteɛm no.” (Yesaia 30:19; 2 Korintofo 1:3, 4) Paulo kyerɛwee sɛ: “Onyankopɔn yɛ ɔnokwafo, na ɔremma wɔnsɔ mo nhwɛ ntra nea mubetumi, na mmom ɔbɛma kwan abɛda sɔhwɛ no ho a mode befi mu, na moatumi agyina ano.”—1 Korintofo 10:13; Filipifo 4:6, 7.
19. Dɛn na woasi wo bo sɛ wobɛyɛ, na dɛn ntia?
19 Nokwarem no, yɛwɔ “mmere a emu yɛ den” mu wɔ wiase bɔne yi “nna a edi akyiri” mu nnɛ. (2 Timoteo 3:1) Ɛno mpo no, Onyankopɔn asomfo betumi agyina ano. Dɛn ntia? Esiane Onyankopɔn honhom kronkron no mmoa ne ahobammɔ a Yehowa fi ne pɛ mu de ma wɔn a wɔde ahotoso kɔ so bisa no ma ɛboro so no nti. Ɛnde, momma yensi yɛn bo nkɔ so mmɔ mpae mmisa honhom kronkron da biara da.—Dwom 34:6; 1 Yohane 5:14, 15.
Wubebua Dɛn?
• Dɛn na ehia sɛ yɛyɛ na yɛanya Onyankopɔn honhom kronkron?
• Dɛn nti na yebetumi anya ahotoso sɛ Yehowa betie mpae a yɛbɔ hwehwɛ honhom kronkron no?
• Ɔkwan bɛn so na honhom kronkron no boa yɛn ma yegyina sɔhwɛ ahorow ano?
[Adesua no ho Nsɛmmisa]
[Mfonini wɔ kratafa 21]
Dɛn na yebetumi asua afi Yesu mfatoho a ɛfa ɔbarima a oguan ne yɔnko ho no mu?
[Mfonini wɔ kratafa 22]
Wokɔ so bɔ mpae hwehwɛ Onyankopɔn honhom kronkron?
[Mfonini wɔ kratafa 23]
Dɛn na yesua fa Yehowa ho wɔ agya a ɔwɔ ɔdɔ no ho mfatoho no mu?