Yesu Awo—Sɛnea Ɛde Asomdwoe Ba

ƐNYƐ ‘asomdwoe a nnipa a wɔsɔ Onyankopɔn ani’ benya a abɔfo no kaa ho asɛm no nkutoo ne nkɔmhyɛ a ɛfa Yesu awo ho. Nea abɔfo no ka kyerɛɛ nguanhwɛfo a na wɔn ho adwiriw wɔn akyi no, na Onyankopɔn ama ɔsoro abɔfo aka Yesu a na wɔawo no foforo no ho asɛm nso akyerɛ Maria ne ne kunu Yosef. Nsɛm yi a yebesusuw ho no bɛma yɛate Yesu awo ho nsɛm ase yiye, na ɛbɛboa yɛn ma yɛahu nea abɔfo no bɔhyɛ a ɛfa asomdwoe a nnipa benya ho no kyerɛ ankasa.

Ansa na wɔrewo Yesu, na mpo Maria renyinsɛn no, ɔbɔfo bi a Bible frɛ no Gabriel baa Maria nkyɛn. Ɔbɔfo no kyiaa no sɛ: “Asomdwoe nka wo, wo a wɔadom wo, Yehowa ka wo ho.” Sɛnea ebia a wubesusuw no, eyi haw Maria paa, na mpo ɛbɛyɛ sɛ ɛma ɔbɔɔ hu kakra. Ná nkyia yi kyerɛ dɛn?

Gabriel kyerɛkyerɛɛ mu sɛ: “Hwɛ! wobɛfa yafunu na woawo ɔbabarima, na ɛsɛ sɛ woto ne din Yesu. Ɔbɛyɛ kɛse na wɔbɛfrɛ no Ɔsorosoroni no Ba; na Yehowa Nyankopɔn de n’agya Dawid ahengua bɛma no, na obedi Yakob fie so hene afebɔɔ, na n’ahenni remma awiei.” Maria bisaa nea ɛbɛyɛ a eyi bɛba mu efisɛ na ɔyɛ ɔbaabun a ɔne ɔbarima biara nnae da. Gabriel buae sɛ wɔnam Onyankopɔn honhom kronkron so na wobenyinsɛn abofra no. Ná ɔrenyɛ abofra biara kɛkɛ.—Luka 1:28-35.

Ɔhene a Wɔhyɛɛ Ne Ho Nkɔm

Ɛbɛyɛ sɛ Gabriel nsɛm no boaa Maria ma ohui sɛ ɔbabarima a ɔbɛwo no no bɛma tete nkɔmhyɛ abam. Asɛm a Gabriel kae sɛ Yehowa de “Dawid ahengua” bɛma Maria babarima no bɛma Maria ne Yudani biara a na onim Kyerɛwnsɛm mu no asusuw Onyankopɔn bɔ a ɔhyɛɛ Israel hene Dawid no ho.

Yehowa nam odiyifo Natan so ka kyerɛɛ Dawid sɛ: “Wo fi ne w’ahenni betim akosi daa w’anim, w’ahengua besi pintinn akosi daa.” (2 Samuel 7:4, 16) Yehowa kaa Dawid ho asɛm sɛ: “Mɛma n’asefo atra hɔ daa, ne n’ahengua sɛ ɔsoro nna. N’asefo bɛtra hɔ daa, na n’agua ayɛ m’anim sɛ owia.” (Dwom 89:20, 29, 35, 36) Enti ɛnyɛ nwonwa sɛ na Maria ne Yosef nyinaa fi Dawid abusua mu.

Ɛnyɛ eyinom nkutoo ne nkɔmhyɛ a ɛwɔ Hebri Kyerɛwnsɛm no mu a na ɛfa Dawid aseni bi a obedi n’ade ho. Ɛbɛyɛ sɛ na Maria nim Yesaia nkɔmhyɛ yi: “Wɔawo akokoaa ama yɛn, wɔama yɛn ɔbabanin; na n’ahenni bɛda ne mmati so, na wɔafrɛ ne din sɛ: Nwonwa, Ɔfotufo, Onyankopɔn-tumfoɔ, Daa-agya, Asomdwoe-hene; na n’ahenni mu bɛtrɛw, na asomdwoe a enni awiei aba, Dawid ahengua so ne n’ahenni so, na ɔde atemmu ne trenee awowaw no atim no afi sesɛɛ de akosi daa. Asafo [Yehowa, NW] mmɔdenbɔ na ɛbɛyɛ eyi.”—Yesaia 9:6, 7.

Enti ɛnyɛ ɔbabarima a na wɔbɛwo no anwonwakwan so no ho asɛm nko na Gabriel ka kyerɛɛ Maria. Ná ne babarima no bɛyɛ ɔdehye a obedi Ɔhene Dawid ade. Ná obedi ade wɔ Onyankopɔn Ahenni no mu daa. Dwuma a na Yesu bedi daakye a Gabriel kaa ho asɛm no hia yɛn nyinaa paa.

Bere a Yosef hui sɛ ɔbea a ɔrebɛware no no anyinsɛn no, ɔyɛɛ n’adwene sɛ obetwa  wɔn aware nhyehyɛe no mu. Ná onim sɛ abofra no nyɛ ne de, efisɛ na ɔne ɔbea a ɔbɛware no no nnae da. Wo de, hwɛ sɛnea na ɛbɛyɛ den ama Yosef sɛ obegye Maria nkyerɛkyerɛmu no atom. Kyerɛwtohɔ a ɛwɔ Asɛmpa no mu no ka sɛ: “Yehowa bɔfo yii ne ho adi kyerɛɛ no ɔdae mu sɛ: ‘Yosef, Dawid ba, nsuro sɛ wobɛfa wo yere Maria akɔ fie, na ne nyinsɛn no nam honhom kronkron so. Ɔbɛwo ɔbabarima, na ɛsɛ sɛ woto ne din Yesu, efisɛ ɔno na obegye ne manfo afi wɔn bɔne mu.’”—Mateo 1:20, 21.

Bible no nka sɛnea na Yosef te ɔkwan a abofra no bɛfa so ‘agye ne manfo afi wɔn bɔne mu’ no ase nkyerɛ yɛn. Nanso na asɛm yi ara betumi aboa Yosef ma wahu sɛ Maria nyɛɛ bɔne biara. Otiee ɔbɔfo no asɛm no na ɔfaa Maria kɔɔ ne fie de kyerɛe sɛ waware no.

Nsɛm afoforo a ɛwɔ Kyerɛwnsɛm no mu no betumi aboa yɛn ma yɛate nea na ɔbɔfo no kyerɛ ase. Ɔbɔfo tuatewfo bi sɔre tiaa Yehowa amansan tumidi wɔ adesamma abusua no mfiase pɛɛ. Hebri Kyerɛwnsɛm no ma yehu sɛ otuatewfo yi kaa nsɛm bebree a ebi ne sɛ Onyankopɔn kwan a ɔfa so di tumi no nteɛ, na sɛ onipa biara hyia sɔhwɛ a, ɔrenkɔ so nni Yehowa nokware. (Genesis 3:2-5; Hiob 1:6-12) Sɛ nhwɛso no, Adam anni Onyankopɔn nokware. Esiane Adam bɔne nti, wɔde bɔne woo nnipa nyinaa, na nea efii saa bɔne no mu bae ne owu. (Romafo 5:12; 6:23) Nanso esiane sɛ ɛnyɛ ɔdesani agya na ɔwoo Yesu nti, na bɔne nni ne ho. Yesu  nam ne pɛ mu a ofi de ne desani nkwa a ɛyɛ pɛ no mae sɛ agyede a ebesi nea Adam hweree ananmu no so gyee nnipa fii wɔn bɔne mu, na ɔma wonyaa daa nkwa ho anidaso.—1 Timoteo 2:3-6; Tito 3:6, 7; 1 Yohane 2:25.

Wɔ Yesu asase so som adwuma mu no, ɔma yehuu sɛnea tebea no bɛyɛ bere a wɔayi nea bɔne de ba afi hɔ no. Ɔsaa yare biara bi, na onyan awufo mpo. (Mateo 4:23; Yohane 11:1-44) Anwonwade ahorow a ɔyɛe no ma yehu nea ɔbɛyɛ daakye. Yesu ankasa kae sɛ: “Dɔn no reba a wɔn a wɔwɔ nkae ada mu nyinaa bɛte [me] nne na wɔafi adi.”—Yohane 5:28, 29.

Saa owusɔre a ɛbɛba daakye ho bɔhyɛ no kyerɛkyerɛ nea enti a Yesu awo, ne ne titiriw ne wu ho hia yɛn paa no mu. Yohane 3:17 ka sɛ Onyankopɔn somaa ne Ba no baa wiase “sɛ wɔmfa ne so nnye wiase nkwa.” Anigyesɛm yi ma yɛkae asɛm a abɔfo no ka kyerɛɛ nguanhwɛfo a na wɔrehwɛ wɔn nguan anadwo a wɔwoo Yesu no.

‘Asɛmpa a Ɛyɛ Anigye Kɛse’

Bere a abɔfo no kaa “Agyenkwa a ɔne Awurade Kristo” awo ho asɛm no, na ɛyɛ ‘asɛmpa a ɛyɛ anigye kɛse’ ma adesamma. (Luka 2:10, 11) Ná abofra yi na ɔbɛyɛ Mesia, Odiyifo kɛse ne Sodifo a Onyankopɔn nkurɔfo fi bere tenten ahwɛ no kwan no. (Deuteronomium 18:18; Mika 5:2) Ná n’asetra ne ne wu wɔ asase so no bɛyɛ ade titiriw a wobegyina so atew Yehowa amansan tumidi no ho ma enti abɔfo no kae sɛ: “Anuonyam nka Nyankopɔn wɔ sorosoro.”—Luka 2:14.

Yesu a Bible frɛ no “Adam a odi akyiri” no kyerɛe sɛ onipa betumi adi Yehowa nokware wɔ sɔhwɛ a emu yɛ den paa mpo mu. (1 Korintofo 15:45) Ɔnam saayɛ so maa Satan yɛɛ ɔtorofo ankasa. Eyi na ɛmaa abɔfo anokwafo no ani gyei wɔ soro no.

Nanso, ma yɛnsan nsusuw asɛmmisa a ɛne sɛ, “So biribi wɔ hɔ a ebetumi ama yɛanya anidaso sɛ abɔfo no nsɛm a wɔkae anadwo a wɔwoo Yesu no bɛba mu?” no ho. Mmuae no yɛ yiw! Asomdwoe ho hia na ama Onyankopɔn atirimpɔw ma asase, a Paradise a ɛbɛsan aba no ka ho no abam. Sɛ eyi ba mu wɔ asase so a, nnipa nyinaa de ɔdɔ ne nokwaredi bɛtra ase. Enti Yehowa atirimpɔw a ɛbɛbam nso kyerɛ sɛ wobeyi biribiara a ɛko tia ne tumidi no afi hɔ. Eyi nyɛ asɛmpa mma obiara a ɔwɔ Satan a ɔkyerɛ sɛ Yehowa mmara nyɛ papa no afã no. Eyi kyerɛ sɛ wɔbɛsɛe wɔn a wɔwɔ Satan afã nyinaa.—Dwom 37:11; Mmebusɛm 2:21, 22.

Hyɛ no nsow sɛ abɔfo no anka ankyerɛ nguanhwɛfo no sɛ asomdwoe ne anisɔ wɔ hɔ ma nnipa nyinaa. Mmom no, wɔkae sɛ “asomdwoe nka nnipa a wɔsɔ n’ani.” Nea eyi kyerɛ ne sɛ wɔn a Onyankopɔn gye wɔn tom na wɔsɔ n’ani no wɔ asomdwoe. Wɔn a wɔwɔ Yehowa mu gyidi ankasa no yɛ Yesu akyidifo anokwafo a wosuasua no. Mmarima ne mmea a wɔte saa no wɔ ɔpɛ sɛ wɔbɛda ayamye ne tema adi akyerɛ afoforo da biara da, na ɛnyɛ bere tiaa bi.

So Wɔn a Wosuasua Kristo no Da Asomdwoe Adi Bere Nyinaa?

Tumi a ɛwɔ asɛmpa a Yesu kae no mu no ama nnipa pii ayɛ nsakrae wɔ wɔn asetram. Nnipa pii de Kristofo mmara bɔ wɔn bra wɔ biribiara mu. Nnipa a bere bi na wodwen wɔn nkutoo ho no afi ase bisa wɔn ho nea anka Yesu bɛyɛ wɔ tebea a wɔwom no mu. Ebinom a na wɔde wɔn bere nyinaa di ahonyade ne anigyede akyi no abehu hia a Onyankopɔn asɛm ne sɛnea wɔbɛka akyerɛ afoforo no ho hia fa. Nnipa a wɔyɛ eyi no bɔ mmɔden sɛ wɔbɛyɛ adɔe na wɔada ayamye adi bere nyinaa. So ɛnyɛ saa na wohwɛ kwan sɛ nokware Kristofo bɛyɛ?

 Sɛ nnipa a wɔwɔ koma pa nyinaa gye bere susuw nea asomdwoe nsɛm a abɔfo no kae no kyerɛ ho na wɔde bɔ wɔn bra a, akyinnye biara nni ho sɛ anka wiase mu tra bɛyɛ dɛ.

Nkɔmhyɛ nsɛm a ɛfa Yesu awo ho no ma wɔn a wɔwɔ Onyankopɔn anim dom no awerɛhyem sɛ wobetumi anya asomdwoe ankasa afebɔɔ. So ɛnyɛ saa na wopɛ? Yebetumi anya ahotoso sɛ asomdwoe ho asɛm a abɔfo no kae bere a wɔwoo Yesu no bɛbam ɔkwan biara so. Ɛnyɛ dɛn ara a yebenya asomdwoe daa, na ɛnyɛ nsɛm bi a wɔka ara kwa wɔ Buronya bere mu.

[Mfonini wɔ kratafa 7]

Yebetumi asuasua Yesu su, na ɛsɛ sɛ yɛda no adi bere nyinaa