Wubetumi Agyina Amanehunu Ano

NNIPA pii na wɔregyina amanehunu ahorow a ɛte sɛ mframa a ano yɛ den ano wɔ mmere a emu yɛ den yi mu. Nanso, Kristofo de, Onyankopɔn ho dɔ ne ne nnyinasosɛm ahorow a wɔde yɛ adwuma bere nyinaa no boa wɔn ma wotumi gyina ano. Ɔkwan bɛn so? Yebetumi anya mmuae no wɔ mfatoho bi a Yesu Kristo de yɛɛ adwuma mu. Yesu de n’asuafo a wɔyɛ osetie no totoo “ɔbadwemma bi a osii ne fie sii ɔbotan so ho.” Yesu kae sɛ: “Osu tɔ yirii, na mframa bɔe bɛbɔɔ fie no, nanso ammu, efisɛ na wɔato asi ɔbotan so.”—Mateo 7:24, 25.

Hyɛ no nsow sɛ ɛwom sɛ onipa a wɔkaa ne ho asɛm wɔ mfatoho no mu no yɛ ɔbadwemma de, nanso ohyiaa amanehunu a ɔde osu a ɛtɔ yirii ne mframa a ano yɛ den gyinaa hɔ mae no. Enti, Yesu anka sɛ n’asuafo no benya asomdwoe ne ahotɔ wɔ wɔn asetram a wɔrenhyia amanehunu biara. (Dwom 34:19; Yakobo 4:13-15) Mmom no, nea ɔkae ne sɛ Onyankopɔn asomfo anokwafo betumi anom nsu atwɛn ɔpɛ na ama wɔatumi agyina amanehunu ne ahokyere a emu yɛ den a ɛte saa no ano.

Yesu kaa asɛm a edi so yi de fii ne mfatoho no ase sɛ: “Obiara a ɔte me nsɛm yi na ɔyɛ no, wɔde no bɛtoto ɔbadwemma bi a osii ne fie sii ɔbotan so ho.” Nokwarem no, ɛnyɛ ɔdan ankasa a wobesi ho asɛm na na Yesu reka, mmom no nea na ɔreka ho asɛm ne sɛnea yebenya Kristofo su. Wɔn a wotie Kristo asɛm no de nhumu ne adwempa yɛ adwuma. Wɔnam Kristo nkyerɛkyerɛ a wɔde bɔ wɔn bra wɔ wɔn asetram so de wɔn abrabɔ si ɔbotan no so. Nokwasɛm ne sɛ sɛnkyerɛnne kwan so ɔbotan no hyɛ asase ase. Enti na ɛsɛ sɛ ɔbarima a wɔkaa ne ho asɛm wɔ mfatoho no mu no tutu ‘fam kɔ akyiri’ ansa na wahu ɔbotan no. (Luka 6:48) Saa ara na ɛsɛ sɛ Yesu asuafo kɔ so yɛ adwumaden na ama wɔanya su pa a ɛbɛma wɔabɛn Onyankopɔn kɛse.—Mateo 5:5-7; 6:33.

Sɛ nsɛnnennen a ɛte sɛ mframa a ano yɛ den sɔ nokware a Yesu Kristo akyidifo di no hwɛ a, dɛn na wɔyɛ? Ɔpɛ a wɔwɔ sɛ wobetie Kristo nkyerɛkyerɛ ne Kristofo su a wɔwɔ no kɔ so ma wɔn ahoɔden wɔ ahokyere mmere a ɛte saa mu, na nea ɛsen saa no, ɛbɛboa wɔn wɔ Harmagedon a ɛrebobɔ ba no mu. (Mateo 5:10-12; Adiyisɛm 16:15, 16) Yiw, nnipa pii nam Kristo nkyerɛkyerɛ a wɔde yɛ adwuma so regyina amanehunu a ɛte sɛ mframa a ano yɛ den ano. Wo nso wubetumi agyina amanehunu a ɛte saa ano.—1 Petro 2:21-23.