Ɔboro Mfe Ɔha Nanso Ɔwɔ Atirimpɔw

ELIN ka nnipa 60 a nnansa yi ara wɔyɛɛ wɔn ho kyerɛwtohɔ wɔ Sweden sɛ wɔadi boro mfe 105 anaa nea ɛboro saa no ho. Ɔno ankasa adi mfe 105. Ɔte baabi a wɔhwɛ nkwakoraa ne mmerewa. Ɛwom sɛ waka dan mu de, nanso ahoɔden a ɔwɔ no ma otumi kɔ so som sɛ Yehowa Dansefo mapa. Bɛboro mfe 60 ni na ɔbɛyɛɛ Yehowa Dansefo.

Sɛ Elin redi nkurɔfo adanse a, odi nhwɛso a ɔsomafo Paulo yɛe no akyi bere a na wɔaka no ahyɛ fie a ɔwɛmfo wɛn no no. Paulo kaa asɛm no kyerɛɛ ahɔho a wɔbaa ne nkyɛn nyinaa. (Asomafo Nnwuma 28:16, 30, 31) Elin nso fa hokwan a onya biara so ka asɛmpa a ɛwɔ Bible mu no kyerɛ wɔn a wosiesie baabi a ɔte no, nnuruyɛfo, wɔn a wɔyɛ ti, ayarehwɛfo, ne afoforo a ohyia wɔn wɔ hɔ no. Wɔ bere ne bere mu no, Elin mfɛfo gyidifo a wɔne no wɔ asafo mu no mpo ma wɔn Bible asuafo bɛsra Elin sɛnea ɛbɛyɛ a wobenya ne nimdeɛ ne ne suahu so mfaso.

Elin asafo mufo ani gye sɛnea ɔwɔ anigye ne sɛnea ɔpɛ sɛ ohu nneɛma mu no ho. Ɔdansefo bi ka sɛ: “Sɛnea otumi ne asafo no bɔ anan no yɛ nwonwa paa. Ɔkae mmofra a wɔwɔ asafo no mu ne wɔn a wofi baabi aba asafo no mu nnansa yi no nyinaa din.” Wonim Elin yiye nso sɛ obi a ɔpɛ ahɔhoyɛ, oyi aseresɛm, na ɔwɔ adwempa wɔ asetra ho.

Dɛn na ɛboa Elin ma ɔkɔ so nya anigye na ɔde n’adwene si atirimpɔw a ɔwɔ wɔ asetram no so? Ɔkenkan kyerɛwsɛm bi fi Kyerɛwnsɛm no mu a Wobɛhwehwɛ Daa nhomawa a Yehowa Adansefo tintimii no mu da biara. Ɔde ahwehwɛ aniwa bi a etumi ma nneɛma yɛ akɛse paa nso kenkan Bible no fã bi da biara. Elin siesie ne ho ma nhyiam ahorow a Yehowa Adansefo yɛ no dapɛn biara no, na ɛmfa ho mpo sɛ n’ankasa ntumi nkɔ no, otie nhyiam ahorow yi a wɔakyere agu kasɛt so. Ɛmfa ho mfe a yɛadi no, Bible ne Bible ho nhoma a yɛbɛkenkan daa, na yɛrenkwati Kristofo nhyiamkɔ no betumi aboa yɛn ma yɛanya asetra a atirimpɔw ne akomatɔyam wom.—Dwom 1:2; Hebrifo 10:24, 25.