Amos—So na Ɔyɛ Obi a Ɔtetew Borɔdɔma Anaa Otuetue Ho?

WƆ AFEHA a ɛto so akron A.Y.B. mu no, Amasia a na ɔyɛ wɔn a wɔsom nantwi ba sɔfo no hyɛɛ odiyifo Amos sɛ mma ɔnhyɛ nkɔm wɔ Israel bio. Amos ampene so, na ɔkae sɛ: “Meyɛ mmoahwɛfo a metew ɔdɔma midi; na [Yehowa, NW] faa me fii nguan akyidi, na [Yehowa, NW] ka kyerɛɛ me sɛ: Kɔ na kɔhyɛ nkɔm kyerɛ me man Israel.” (Amos 7:14, 15) Nokwarem no, ɛyɛ Yehowa na ɔpaw Amos sɛ odiyifo; ɛnyɛ Amos ankasa na ɔhyɛɛ ne ho odiyifo. Nanso, dɛn na na Amos repɛ akyerɛ bere a ɔkae sɛ na ‘ɔtetew’ ɔdɔma anaa borɔdɔma no?

Hebri asɛmfua a wɔkyerɛɛ ase no pue pɛnkoro pɛ wɔ New World Translation no mu. Nanso, sɛ́ anka Bible nkyerɛase afoforo bɛka sɛ ‘otuetue’ borɔdɔma ho no, wɔde asɛmfua bi te sɛ obi a ‘ɔtetew,’ ‘ɔdɔw,’ ‘osiesie,’ anaasɛ ‘odua,’ mmom na ɛyɛ adwuma. Nanso, nsɛmma nhoma a wɔfrɛ no Economic Botany ka sɛ, asɛm no nkyerɛase a ɛfata paa bɛyɛ “nea otuetue” borɔdɔma ho, efisɛ saa asɛmfua no kyerɛ adwuma titiriw bi a obi a odua borɔdɔma yɛ wɔ borɔdɔma no ho.

Efi teteete na wonim sɛ wotuetue borɔdɔma aba ho anaa wofitifiti ho wɔ Misraim ne Kipro. Esiane sɛ borɔdɔma ahorow ahorow na wodua wɔ Israel asase so nnɛ nti, wontuetue aba no ho bio. Nanso, na Israelfo tuetue borɔdɔma ho wɔ Amos bere so, efisɛ na wɔkɔfa borɔdɔma ahorow a na wodua wɔ Israel saa bere no fi Misraim.

Ɛda adi sɛ, borɔdɔma aba a na wotuetue ho no ma aba no tumi twetwe nsu ma nsu ba aba no mu. Afei nso, ɛma mframa a etumi ma aduaba bere ntɛmntɛm ba aduaba no mu ma ɛsow akɛse na ɛyɛ dɛ yiye. Bio nso, esiane sɛ ɛbere ntɛmntɛm nti na ɛmma kotokurodu nsɛe no.

Ɛmfa ho sɛ na Amos akyi nni bi na ɔyɛ oguanhwɛfo a otuetue borɔdɔma ho no, wamma n’atamfo ho hu anhyɛ no so. Na mmom, ɔde akokoduru kaa Yehowa atemmusɛm a etia Israel no kyerɛɛ wɔn. Hwɛ sɛnea eyi yɛ nhwɛso pa ma Onyankopɔn asomfo a wɔwɔ hɔ nnɛ a ɛsɛ sɛ wɔn nso ka asɛm a nkurɔfo pii ani nnye ho no!—Mateo 5:11, 12; 10:22.