Dɛn Nti na Ɛsɛ sɛ Woka Nokware?

BERE a Manfred dii mfe 18 no, na osua krakyedwuma. * N’adwumakuw no yɛɛ nhyehyɛe maa ɔno ne adwumayɛfo afoforo de nnanu kɔɔ adwuma no ho kɔlege dapɛn biara. Da koro bi de, wɔpɔn adesuafo no ntɛm. Sɛnea adwuma no mmara kyerɛ no, na ɛsɛ sɛ adesuafo no san kɔ adwumam kɔyɛ adwuma ansa na wɔapɔn. Sɛ́ anka wɔbɛkɔ adwumam no, wɔn nyinaa kogyee wɔn ani mmom. Gye Manfred nkutoo na ɔsan kɔɔ adwumam. Nanso, adwumakuw no panyin a ɔhwɛ sukuufo no so kopuee adwumam hɔ a na wɔnhwɛ kwan. Bere a ohuu Manfred no, obisaa no sɛ: “Dɛn nti na woankɔ sukuu nnɛ? Na wɔn a wɔaka no wɔ he?” Ná Manfred bebua dɛn?

Nnipa pii na wohyia ɔhaw a Manfred hyiae no bi: So ɛsɛ sɛ ɔka nokware anaa odi atoro de twitwa gye ne mfɛfo sukuufo no? Sɛ ɔka nokware a, wɔn a wɔaka no ho bɛkyere wɔn na wɔrempɛ n’asɛm. So ɛyɛ papa sɛ yedi atoro wɔ tebea a ɛtete saa mu? Sɛ ɛyɛ wo a, anka wobɛyɛ dɛn? Yɛbɛka nea Manfred yɛe no ho asɛm akyiri yi, nanso momma yenni kan nsusuw nea nokware anaa atoro a yebedi no kyerɛ ankasa ho nhwɛ.

Nokware ne Atoro—Akameakame a Efi Teteete

Wɔ adesamma mfiase pɛɛ no, na biribiara gyina nokware so. Na nokwasɛm a wɔakyinkyim no adan ani, anaa atosɛm biara nni hɔ. Yehowa, Ɔbɔadeɛ no yɛ “nokware Nyankopɔn.” N’asɛm yɛ nokware; ɔrentumi nni atoro, na ɔkasa tia atorodi ne atorofo nyinaa.—Dwom 31:5; Yohane 17:17; Tito 1:2.

Sɛ saa na asɛm no te a, ɛnde ɛyɛɛ dɛn na atorodi baa wiase? Yesu Kristo maa mmuae a ɛyɛ nokware bere a na ɔrekasa akyerɛ nyamesomfo a wɔsɔre tiaa no a na wɔrehwehwɛ no akum no no. Ɔka kyerɛɛ wɔn sɛ: “Mufi mo agya Bonsam hɔ, na mopɛ sɛ moyɛ mo agya no apɛde. Ɔno na ɔyɛ owudifo fi mfiase, na wannyina nokware no mu, efisɛ nokware nni ne mu. Sɛ ɔka atosɛm a, efi n’ankasa suban, efisɛ ɔyɛ ɔtorofo ne atoro agya.” (Yohane 8:44) Nokwarem no, nea na Yesu reka ho asɛm no ne asɛm a esii wɔ Eden turom hɔ  no. Saa bere no na Satan daadaa nnipa baanu a wodi kan no ma wɔyɛɛ Onyankopɔn so asoɔden, na ɛnam so ma wɔbɛyɛɛ abɔnefo, na ɛde owu baa wɔn so.—Genesis 3:1-5; Romafo 5:12.

Yesu nsɛm no ma ɛda adi pefee sɛ Satan ne “atoro agya,” nea ɔde atosɛm ne atorodi bae no. Satan ne onipa titiriw a ɔda so hyɛ atorodi ho nkuran, nokwarem no, ɔno na “ɔredaadaa asase sofo nyinaa.” Satan na nea adesɛe a atorodi a ɛrekɔ so wɔ wiase de aba nnipa so nnɛ no fi no.—Adiyisɛm 12:9.

Akameakame a ɛwɔ nokware ne atoro ntam a Satan Ɔbonsam kɔfa bae no fi teteete, na ɛda so ara rekɔ so nnɛ. Ɛwɔ nnipa asetram biribiara mu, na ɛka onipa biara. Sɛnea onipa biara bɔ ne bra no ma ɔyɛ ɔnokwafo anaa ɔtorofo. Wɔn a wɔwɔ Onyankopɔn afã no de Onyankopɔn Asɛm Bible mu nokware no na ɛbɔ wɔn bra. Obiara a ɔmfa nokware no mmɔ ne bra, sɛ́ onim anaa onnim no kɔ Satan afã, efisɛ “wiase nyinaa da ɔbɔnefo no tumi mu.”—1 Yohane 5:19; Mateo 7:13, 14.

Dɛn na Ɛka Yɛn Ma Yedi Atoro?

“Wiase nyinaa” a ɛda Satan tumi mu no ma yehu nea enti a nnipa pii di atoro no. Nanso, ebia yebebisa sɛ, Dɛn nti na Satan a ɔyɛ “atoro agya” no dii atoro? Ná Satan nim sɛ Yehowa na Ɔyɛ nneɛma a wabɔ nyinaa, a nnipa baanu a wodi kan no nso ka ho no Sodifo a ɔfata. Nanso, Satan pɛe sɛ onya dibea soronko a ɛkorɔn yi, biribi a na onni hokwan sɛ onya. Anibere ne pɛsɛmenkominya ma ɔbɔɔ pɔw bɔne a ɔnam so benya Yehowa dibea no. Satan faa atorodi ne nnaadaa so sɛnea ɛbɛyɛ a ne nsa bɛka dibea yi.—1 Timoteo 3:6.

Ɛnnɛ nso ɛ? So wunnye ntom sɛ anibere ne pɛsɛmenkominya ne su horow a ɛda so ara ma nkurɔfo pii di atoro? Nnaadaa, atorodi, ne amimdi ahyɛ nnwumayɛfo a wɔyɛ adifudepɛ, amanyɔfo a wɔbɔ nyansakorɔn, ne atoro som mufo ma. Dɛn nti na ɛte saa? Mpɛn pii no, so ɛnyɛ anibere ne pɛsɛmenkominya na ɛkanyan nkurɔfo ma wɔpere sɛ wobedi afoforo anim anaasɛ wobenya ahonyade, tumi, anaa dibea a wonni hokwan sɛ wonya no? Tete Israel hene nyansafo Salomo bɔɔ kɔkɔ sɛ: “Nea ɔpɛ ntɛm anya ne ho renyɛ tɔtorɔtɔɔ.” (Mmebusɛm 28:20) Ɔsomafo Paulo nso kyerɛwee sɛ: “Sikanibere yɛ bɔne nyinaa nhin.” (1 Timoteo 6:10) Saa pɛpɛɛpɛ na yebetumi aka afa wɔn a wɔde anibere hwehwɛ tumi anaa dibea no ho.

Ehu nso ne ade foforo a ɛma nkurɔfo di atoro. Efisɛ wosuro sɛ sɛ wɔka nokware a, afoforo ani rennye wɔn ho. Nea nkurɔfo pɛ ne sɛ afoforo bɛpɛ wɔn asɛm anaa wɔn ani begye wɔn ho. Ɔpɛ a ɛte saa betumi ama wɔakyinkyim nokwasɛm kakra sɛnea ɛbɛyɛ a wɔbɛkata afoforo mfomso so, na wɔrempɛ sɛ wɔbɛka nsɛm a ɛremma nkurɔfo ani nnye wɔn ho, anaa wɔbɛpɛ sɛ nkurɔfo nya wɔn ho adwempa bere nyinaa. Ɛfata sɛ Salomo kyerɛwee sɛ: “Onipa ho suro sum afiri, na nea ɔde ne ho to [Yehowa, NW] so no ho bɛyɛ sonn.”—Mmebusɛm 29:25.

Di Nokware Nyankopɔn no Nokware

Dɛn na Manfred kae bere a adwuma no mu panyin no bisaa no asɛm no? Manfred kaa nokware. Ɔkae sɛ: “Ɔkyerɛkyerɛfo no pɔn yɛn ntɛm nnɛ nti na mebaa adwumam. Wɔn a wɔaka no de, merentumi nkasa mma wɔn, gye sɛ w’ankasa wubisa wɔn.”

Ná anka Manfred betumi ate asɛm no ani ayera na ama sukuufo a wɔaka no ani agye no ho. Nanso, na Manfred nim nea enti a ɔkaa nokware no. Manfred yɛ Yehowa Dansefo. Nokware a ɔkae no amma n’ahonim  anhaw no. Ɛmaa adwumawura no nyaa ne mu ahotoso nso. Wɔmaa Manfred kɔyɛɛ adwuma wɔ baabi a wɔyɛ agude, beae a na wɔmma wɔn a wɔresua adwuma nkɔyɛ adwuma wɔ hɔ. Bɛyɛ mfe 15 akyi, bere a wɔmaa Manfred dibea wɔ adwuma no mu no, adwumam panyin koro no ara frɛɛ Manfred wɔ telefon so bɔɔ n’abaso, na ɔkaa nokware a odii bere bi no ho asɛm.

Esiane sɛ Yehowa yɛ nokware Nyankopɔn nti, ɛsɛ sɛ obiara a ɔpɛ sɛ ɔbɛn no no ‘yi nkontompo gu’ na ‘ɔka nokware.’ Ɛsɛ sɛ Onyankopɔn somfo yɛ ɔnokwafo. Onyansafo no kyerɛwee sɛ: “Ɔdansefo nokwafo renni atoro.” Ɛnde, dɛn ne atoro?—Efesofo 4:25; Mmebusɛm 14:5.

Dɛn ne Atoro?

Atoro biara yɛ asɛm a ɛnyɛ nokware, nanso ɛnyɛ asɛm a ɛnyɛ nokware biara na ɛyɛ atoro. Dɛn ntia? Nsɛm asekyerɛ nhoma bi kyerɛ atoro ase sɛ, “ɛyɛ biribi ho asɛm a obi ka a onim sɛ nea ɔreka no nyɛ nokware na ɔde redaadaa afoforo.” Yiw, sɛ obi hyɛ da daadaa afoforo a, ɛno nso yɛ atoro. Enti sɛ obi anhyɛ da na ɔka asɛm a ɛnyɛ nokware te sɛ ebia odi mfomso wɔ akontaabu bi mu a, yɛrentumi nka sɛ wadi atoro.

Bio nso, ɛsɛ sɛ yesusuw ho sɛ ɛfata sɛ yɛma onipa a ɔrebisa asɛm no mmuae a ɛkɔ akyiri anaa? Fa no sɛ adwuma foforo bi mu panyin na obisaa Manfred asɛm koro no ara, so anka ɛbɛyɛ nhyɛ sɛ Manfred ka biribiara kyerɛ no? Ɛnte saa. Esiane sɛ saa ɔpanyin no nni hokwan sɛ ɔte asɛm a ɛte saa nti, na anka ɛrenyɛ nhyɛ sɛ Manfred ma no mmuae. Nanso, ɛno mpo anka ɛbɛyɛ mfomso sɛ obedi atoro.

Nhwɛso bɛn na Yesu Kristo yɛe wɔ asɛm a ɛte saa ho? Bere bi, na Yesu ne nkurɔfo bi a wɔnyɛ n’asuafo a na wɔpɛ sɛ wohu Yesu akwantu ho nsɛm rebɔ nkɔmmɔ. Wɔka kyerɛɛ Yesu sɛ: “Fi ha kɔ Yudea.” Dɛn na Yesu ka kyerɛɛ wɔn? Ɔkae sɛ: “Monkɔ afahyɛ no ase [wɔ Yerusalem]; me de, minnya nkɔɔ afahyɛ yi ase, efisɛ me bere nnui.” Ɛno akyi bere tiaa bi no, Yesu tuu kwan kɔɔ Yerusalem afahyɛ no ankasa. Dɛn nti na Yesu maa wɔn mmuae a ɛte saa? Efisɛ na ɛnyɛ nkurɔfo no asɛm sɛ wobehu baabi a na Yesu wɔ bere nyinaa. Ɛwom sɛ Yesu anni atoro de, nanso wankyerɛkyerɛ biribiara mu ankyerɛ wɔn sɛnea ɛbɛyɛ a wɔrenyɛ ɔno anaa n’akyidifo no bɔne bi. Ná eyi nyɛ atorodi efisɛ ɔsomafo Petro kyerɛw Kristo ho asɛm sɛ: “Wanyɛ bɔne biara, na wɔanhu nnaadaasɛm nso wɔ n’anom.”—Yohane 7:1-13; 1 Petro 2:22.

Na Petro ankasa nso ɛ? Wɔ anadwo a wɔkyeree Yesu no, so Petro anni atoro mprɛnsa bere a ɔkae sɛ onnim Yesu no? Ɛwom sɛ nnipa ho suro kaa Petro ma odii atoro de, nanso,  onuu ne ho ntɛm ara “kosui pii,” na wɔde ne bɔne firii no. Afei nso, osuaa biribi fii mfomso a odii no mu. Nna bi akyi no, ɔkaa Yesu ho asɛm wɔ baguam, na bere a Yudafo mpanyimfo a wɔwɔ Yerusalem no kae sɛ onnyae Yesu ho asɛm ka no, wannyae da. Nokwarem no, ɛsɛ sɛ mfomso a Petro dii no bere tiaa mu ne nsakrae a ɔyɛɛ no ntɛm no hyɛ yɛn nyinaa a ɛnyɛ den koraa sɛ yɛn mmerɛwyɛ tumi bunkam yɛn so wɔ bere tiaa bi mu ma yedi mfomso wɔ kasa ne nneyɛe mu no nkuran.—Mateo 26:69-75; Asomafo Nnwuma 4:18-20; 5:27-32; Yakobo 3:2.

Nokware Betim Hɔ Daa

Mmebusɛm 12:19 ka sɛ: “Nokware ano tim hɔ daa, na atoro tɛkrɛma nkyɛ koraa.” Yiw, nokwasɛm tumi tim hɔ daa. Na sɛ nkurɔfo ka nokware kyerɛ wɔn ho wɔn ho na wɔbɔ wɔn bra ma ɛne nsɛm a wɔka no hyia a, ɛma wɔn abusuabɔ mu tumi yɛ den na wonya abotɔyam. Nokwarem no, yenya nokwaredi so akatua ntɛm ara. Akatua no bi ne ahonim pa, din pa, ne awaresɔ, biakoyɛ a ɛba mmusua ne nnamfo ntam ne adwumam mpo.

Nanso, sɛ wudi atoro a wo ho bɛda hɔ wɔ ɔkwan biara so. Obi a odi atoro betumi adaadaa afoforo bere tiaa bi mu de, nanso ɔrentumi nkɔ so nnaadaa afoforo afebɔɔ. Afei nso, Yehowa, nokware Nyankopɔn no ahyɛ bere bi ato hɔ a obeyi wɔn a wodi atoro ne wɔn a wɔhyɛ ho nkuran nyinaa afi hɔ. Bible hyɛ bɔ sɛ, Yehowa bɛpopa Satan Ɔbonsam a ɔyɛ atoro agya, nea ɔredaadaa asase sofo nyinaa no nnwuma bɔne no afi hɔ. Ɛrenkyɛ, Yehowa beyi atoro ne atorofo nyinaa afi hɔ.—Adiyisɛm 21:8.

Hwɛ sɛnea yɛn bo bɛtɔ yɛn yam bere a awiei koraa no “nokware ano” atim hɔ daa no!

[Ase hɔ asɛm]

[Mfonini wɔ kratafa 5]

Anibere ne pɛsɛmenkominya ne su horow a ɛma nnipa pii di atoro

[Mfonini wɔ kratafa 6]

Atoro biara yɛ asɛm a ɛnyɛ nokware, nanso ɛnyɛ asɛm a ɛnyɛ nokware biara na ɛyɛ atoro

[Mfonini wɔ kratafa 6]

Dɛn na yesua fi ka a Petro kae sɛ onnim Kristo no mu?

[Mfonini wɔ kratafa 7]

Sɛ yɛka nokware a, ɛma yɛn abusuabɔ mu tumi yɛ den, na yenya abotɔyam