Ne Kenkan Yɛ Mmerɛw De, Nanso So Ɛyɛ Nokware?

WƆ September 2005 mu no, the Church of England de anigye gyee The 100-Minute Bible no too mu. Wɔ Bible a wɔyɛe sɛ wɔmfa simma 100 nkenkan yi mu no, wɔabɔ Hebri Kyerɛwnsɛm no mua ma abɛyɛ nkratafa 17, na Hela Kyerɛwnsɛm no nso abɛyɛ nkratafa 33. Sɛnea obi a ɔhwɛ nhoma foforo a wɔayɛ mu kyerɛ no, wɔayiyi Bible no afã a “ne kenkan nyɛ dɛ” no afi mu. Ɛyɛ nokware sɛ ne kenkan yɛ mmerɛw de, nanso so emu nsɛm no yɛ nokware?

Sɛ yɛde Onyankopɔn din Yehowa a wɔayi afi mu to nkyɛn a, Bible asuafo a wɔn ani kũ Bible sua ho no behu sɛ wɔadi mfomso afoforo nso wom. (1 Samuel 12:13, Asante Twi Bible) Sɛ nhwɛso no, ɔfã 1 no ka sɛ Onyankopɔn “de bɛboro nnafua nsia na ɛbɔɔ ɔsoro ne asase.” Nanso, nea Genesis 1:1 ka ara ne sɛ: “Mfiase no Onyankopɔn bɔɔ ɔsoro ne asase.” Ɛno akyi no, Bible a wodii kan kyerɛwee no kyerɛkyerɛ nneɛma a wɔbɔe wɔ asase so a edii ‘nnansia’ anaa bere bi no mu. Afei, Genesis 2:4 bɔ nna a wɔde bɔɔ nneɛma nyinaa no mua, na ɛfrɛ no ‘ɛda a Yehowa Nyankopɔn yɛɛ asase ne ɔsoro no.’

The 100-Minute Bible no ka sɛ, na Hiob yɛ ɔbarima nokwafo a “[Onyankopɔn] asomfo mu biako a wɔfrɛ no Satan a . . . na n’adwuma ne sɛ ɔbɛtoto adesamma ano no no” kasa tiaa no. So wuhu nsonsonoe a ɛwɔ asɛm yi mu no? Asɛmfua “Satan” kyerɛ “Ɔsɔretiafo.” Nokwasɛm ne sɛ, Satan nyɛ Onyankopɔn somfo, na mmom ɔyɛ Onyankopɔn tamfo kɛse a ɔno ankasa na ɔyɛɛ ne ho adesamma ɔnototofo.—Adiyisɛm 12:7-10.

Na Kristofo Hela Kyerɛwnsɛm a ɛwɔ The 100-Minute Bible mu no nso ɛ? Wɔ Yesu bɛ a ɛfa nguanten ne mmerekyi ho mu no, Bible foforo yi ka sɛ Yesu ani gyee wɔn a wɔboa “onipa biara, ɛmfa ho sɛ ɔnyɛ onipa titiriw no ho.” Nanso, nea na Yesu reka ankasa ne sɛ ɛyɛ wɔn a wɔyɛ ne “nuanom” a wodi n’akyi wɔ baabiara a ɔkɔ no papa no na ohyira wɔn. (Mateo 25:40) Nea Adiyisɛm a wɔabɔ no mua no reka akyerɛ n’akenkanfo ne sɛ “wɔbɛsɛe Roma, Babilon kɛse no pasaa.” Nanso, Bible asuafo nim sɛ, biribiara nni Bible a edi kan no mu a ɛkyerɛ sɛ “Babilon Kɛse no” ne Roma.—Adiyisɛm 17:15–18:24.

Ɛsɛ sɛ wɔn a wɔpɛ sɛ wohu yɛn Bɔfo no na wohu n’atirimpɔw no hu sɛ ɛyɛ papa sɛ wɔkenkan Bible mũ no nyinaa. Nokwarem no, worentumi mfa simma 100 nkenkan Bible no, nanso sɛ wobɔ mmɔden kenkan a, wubenya nhyira a enni ano. (Yohane 17:3) Mia w’ani kenkan na wubenya so mfaso pii.—2 Timoteo 3:16, 17.