Asetram Nsɛm

Nea Enti A M’ani Gye Asuafoyɛ Adwuma No Ho

Sɛnea Pamela Moseley Ka Kyerɛe

Bere a me maame de me kɔɔ nhyiam bi a Yehowa Adansefo yɛe wɔ Leicester wɔ afe 1941 mu no, na Englandfo de wɔn ho ahyɛ Wiase Ko II no mu denneennen. Yetiee Joseph Rutherford kasa titiriw a na ɛfa mmofra ho no. Bere a wɔbɔɔ me ne Maame asu wɔ saa nhyiam no ase no, mihui sɛ wɔn a na wɔaboa yɛn ma yɛanya nkɔso wɔ Onyankopɔn som mu no ani agye paa. Saa bere no, na minnim anigye a obi nya bere a waboa afoforo ma wɔabɛyɛ Yesu Kristo asuafo no.

YEFII ase suaa nokware no wɔ afe 1940 mu. Meda so ara kae saa da a ɛyɛ hu a Wiase Ko II fii ase wɔ September 1939 mu no. Mihui sɛ na Maame de nusu rebisa sɛ, “Dɛn nti koraa na asomdwoe nni wiase?” Wɔ Wiase Ko I mu no, na m’awofo yɛ asraafo, na wohuu aninyanne a ɛkɔɔ so wɔ ɔko no mu no. Maame kobisaa Anglikan sɔfo a ɔwɔ Bristol no asɛnkoro no ara. Nea ɔsɔfo no kae ara ne sɛ: “Efi tete nyinaa akodi akɔ so, na ɛbɛkɔ so bere nyinaa.”

Nanso, ankyɛ na ɔbaa panyin bi baa yɛn fie. Ná ɔyɛ Yehowa Dansefo. Me maame bisaa no asɛnkoro no ara sɛ: “Dɛn nti koraa na asomdwoe nni wiase?” Ɔdansefo no kyerɛkyerɛɛ mu sɛ, akokoakoko yɛ sɛnkyerɛnne a ɛkyerɛ sɛ yɛte nneɛma nhyehyɛe a basabasayɛ wom yi awiei. (Mateo 24:3-14) Ankyɛ koraa na ɔbaa panyin no babea ne yɛn fii Bible adesua ase. Ɔbaa panyin no ne ne babea no ka wɔn a yɛbɔɔ asu no wɔn ani gyei no ho. Dɛn nti na nkurɔfo ani gye paa bere a wɔboa afoforo ma wɔbɛyɛ asuafo no? Akyiri yi na mibehuu nea enti a ɛte saa. Ma menka nea mahu wɔ bɛboro mfe 65 a mede ayɛ asuafoyɛ adwuma no mu bi nkyerɛ wo.

 Manya Anigye wɔ Ɔkyerɛkyerɛ Adwuma no Mu

Mifii ase kaa Ahenni no ho asɛm bere a na madi mfe 11 wɔ Bristol. Onuabarima bi maa me gramafon ne adansedi krataa, na ɔka kyerɛɛ me sɛ: “Kɔ ɔkwan no agya na kɔka asɛm no wɔ afie a ɛwɔ hɔ no nyinaa mu.” Ɛhɔ ara na me nkutoo mifii asɛnka ase. Nokwarem, na misuro paa. Sɛ mebɔ Bible ho ɔkasa a wɔakyere agu apaawa so kyerɛ afiewuranom wie a, na mede adansedi krataa a ɛkyerɛ sɛ wonnye Bible ho nhoma no kyerɛ wɔn.

Wɔ afe 1950 mfe no mu no, wosii so dua paa sɛ sɛ yɛreyɛ afie afie asɛnka a, yɛnkenkan Bible no. Esiane sɛ meyɛ obi a na mefɛre ade nti, mfiase no na ɛyɛ den ma me sɛ me ne nnipa a minnim wɔn bɛbɔ nkɔmmɔ na makyerɛkyerɛ Bible mu akyerɛ wɔn. Nanso, nkakrankakra no, minyaa akokoduru. Saa bere no na mifii ase nyaa asɛnka adwuma no mu anigye ankasa. Ná ebinom susuw sɛ yɛtɔn nhoma ara kwa, nanso sɛ yɛnkenkan Bible no na yɛkyerɛkyerɛ mu kyerɛ wɔn a, na ɛma wohu sɛ yɛyɛ nkurɔfo a yɛka Onyankopɔn Asɛm. M’ani begyee adwuma no ho yiye araa ma enti mepɛe sɛ meyɛ pii. Enti, wɔ September 1955 mu no, mede me ho hyɛɛ bere nyinaa som adwuma no mu sɛ ɔkwampaefo.

Animia Ama Manya Anigye Pii

Asuade a midii kan nyae no mu biako ne sɛ sɛ obi fi ayamye mu mia n’ani yɛ biribi a otumi nya anigye pii. Bere bi, memaa ɔbea bi a wɔfrɛ no Violet Morice Ɔwɛn-Aban nsɛmma nhoma no bi. Bere a mesan kɔsraa no no, obuee ne pon too hɔ pantann gyinaa ano, na ɔbobɔɔ ne nsa guu ne bo yɛɛ dinn tiee Kyerɛwnsɛm mu nkyerɛkyerɛmu no. Bere biara a mɛkɔ ne nkyɛn no, na mihu sɛ ɛte sɛ nea n’ani gye asɛm no ho paa. Nanso, bere a mekae sɛ mepɛ sɛ me ne no yɛ Bible adesua daa no, ɔkae sɛ: “Dabi. Twɛn, sɛ me mma no nyinyin a, mesua.” M’abam bui yiye! Bible ka sɛ “ɔhwehwɛ wɔ ne bere, na ɔyera wɔ ne bere.” (Ɔsɛnkafo 3:6) Enti, meyɛɛ m’adwene sɛ merempa abaw.

Ɔsram akyi no, mesan kɔɔ Violet nkyɛn ne no kosusuw kyerɛw nsɛm bi ho. Ankyɛ koraa na yefii ase yɛɛ Bible adesua wɔ ne pon ano dapɛn biara. Awiei koraa no, Violet kae sɛ: “Ma yɛntra ase ɛ, anaa?” Wɔbɔɔ Violet asu ma ɔbɛyɛɛ Yehowa Dansefo. Hwɛ sɛnea Violet bɛyɛɛ yɔnko gyidini ne m’adamfo pa!

Da koro bi, Violet ho dwiriw no bere a ɔtee sɛ ne kunu atɔn wɔn fie a wanka ankyerɛ no na waguan agyaw no no. Anigyesɛm ne sɛ, Ɔdansefo bi a ɔyɛ n’adamfo boaa no ma onyaa ofie no bi saa awia no ara. Violet ani sɔɔ nea Yehowa yɛ maa no no araa ma osii gyinae sɛ ɔde ne nkwa nna a aka nyinaa bɛyɛ akwampae adwuma. Bere a mihuu sɛnea Yehowa honhom aboa Violet ma wayɛ nsi wɔ nokware som mu no, mibehuu nea enti a sɛ nkurɔfo boa obi ma ɔbɛyɛ osuani a wɔn ani gye no. Yiw, eyi ne adwuma a mɛyɛ me nkwa nna nyinaa!

Wɔ afe 1957 mu no, wɔmaa me ne Mary Robinson kɔyɛɛ akwampae adwuma wɔ asasesin bi a wɔyɛ mfiridwuma wom mu wɔ Rutherglen a ɛwɔ Glasgow, Scotland. Osu mu oo, awia mu oo, na yɛfa mu kɔka asɛm no, nanso na mfaso wɔ so sɛ yɛyɛɛ saa. Da bi, mihyiaa ɔbea bi a wɔfrɛ no Jessie. M’ani gyee Bible adesua a na me no yɛ no ho. Ná ne kunu Wally yɛ Komunisni, na mfiase no, na ɔmpɛ sɛ otie asɛm no. Nanso, bere a osuaa Bible no na ohui sɛ Onyankopɔn Ahenni nkutoo na ɛbɛma nnipa anya asetra pa no, n’ani gyei kɛse. Bere bi akyi no, Jessie ne ne kunu Wally nyinaa nso kɔboaa nkurɔfo ma wɔbɛyɛɛ asuafo.

Mfa W’adwene Nsi Nea Obi Yɛ wɔ Ɛda a Edi Kan no So

Akyiri yi, wɔmaa yɛn dwumadi foforo wɔ Paisley, Scotland. Da koro bi a na mereka asɛm no wɔ hɔ no, awuraa bi  kaa ne pon hwee mu a wanhwɛ m’anim. Nanso, ankyɛ na okyinkyin hwehwɛɛ me sɛ ɔrebɛpa me kyɛw. Bere a mesan kɔɔ ne nkyɛn dapɛn a edi hɔ no, ɔkae sɛ: “Metee nka te sɛ nea maka pon no ahwe mu wɔ Onyankopɔn anim. Ná ɛsɛ sɛ mebɛhwehwɛ wo.” Ná ɔbea no din de Pearl. Ɔka kyerɛɛ me sɛ nnamfo ne abusuafo ama n’abam abu araa ma enti na wabɔ Onyankopɔn mpae sɛ ɔmmoa no mma onnya adamfo pa. Pearl kae sɛ: “Mebɔɔ mpae no araa na wobae. Na afei na mahu sɛ ɛbɛyɛ sɛ wone saa adamfo pa no.”

Ná ɛyɛ den sɛ mɛfa Pearl adamfo. Na ɔte bepɔw bi a ne foro yɛ den so, na na ɛsɛ sɛ menantew foro bepɔw no. Bere a edi kan a mekɔe sɛ merekɔfa no akɔ asafo nhyiam no, ɛkaa kakra ma anka mframa ne osu a ano yɛ den a na ɛretɔ no rema me so ahwe fam. Bere a mframa no sunsuanee me kyinii mu no, metow kyenee. Pearl kaa pon hwee mu wɔ m’anim akyi asram asia no, ɔbɔɔ asu de yɛɛ ne ho so a wahyira ama Onyankopɔn no ho sɛnkyerɛnne.

Ɛno akyi no, ankyɛ na Pearl kunu no yɛe sɛ obesua Bible no, na bere tiaa bi akyi no, ɔne me kɔyɛɛ afie afie asɛnka. Osu tɔɔ saa da no. Owura no kae sɛ: “Mma ɛnhaw wo sɛ osu rehwe me. Migyina osu mu hwɛ bɔɔl nnɔnhwerew pii, enti metumi agyina osu mu ama Yehowa.” M’ani gye sɛnea Scotlandfo yɛ nsi no ho.

M’ani gyei paa sɛ mfe pii akyi a mesan kɔɔ Scotland no, mihui sɛ wɔn a me ne wɔn suaa Bible no mu dodow no ara da so kura wɔn gyidi mu! Eyi ne anigye a sɛ obi yɛ asuafo a onya no. (1 Tesalonikafo 2:17-20) Wɔ afe 1966 mu no, bere a na mayɛ akwampae adwuma bɛboro mfe awotwe wɔ Scotland no, wɔmaa me kɔɔ Ɔwɛn Aban Gilead Bible Sukuu ma wɔkɔtetee me sɛ ɔsɛmpatrɛwfo.

Mekɔsomee wɔ Amannɔne

Wɔmaa mekɔyɛɛ adwuma wɔ Bolivia kurow Santa Cruz a osu tɔ na owia bɔ kɛse wɔ hɔ no. Ná asafo a ɛwɔ hɔ no mufo bɛyɛ 50. Kurow no ma mekaee sɛnea na tete Amerika Atɔe fam a Hollywoodfo yɛ ho sini no te. Sɛ mekaakae m’asetra bere a atwam a, mete nka sɛ meyɛ ɔsɛmpatrɛwfo a minhyiaa nsɛnnennen pii. Adɛnkyɛm ntaataa me da, basabasayɛfo nhaw me da, menyerae wɔ anhweatam so da, na saa ara na minhyiaa po so asiane biara da. Nanso, asuafoyɛ adwuma a meyɛ no ama m’ani agye paa.

Mmea a midii kan ne wɔn suaa Bible wɔ Santa Cruz no mu biako ne Antonia. Ná ɛyɛ den ma me sɛ me de Spania kasa bɛkyerɛkyerɛ Bible mu wɔ asɛnka mu. Bere bi, Antonia ba abarimaa bi kae sɛ: “Maame, adɛn, maame no ahyɛ da na ɔkasa saa sɛnea ɛbɛyɛ a yɛbɛserew?” Awiei koraa no, Antonia ne ne babea Yolanda bɛyɛɛ asuafo. Ná Yolanda wɔ adamfo bi a ɔresua mmara a wɔbɔ no mmeran sɛ Dito. Dito nso fii ase suaa Bible, na ɔkɔɔ asafo nhyiam. Bere a me ne Dito resua ade no, misuaa biribi foforo wɔ Bible mu nokware no a yɛde kyerɛkyerɛ afoforo no ho: Ɛtɔ mmere bi a ɛho hia sɛ yɛne nkurɔfo kasa anibere so kakra.

Bere a Dito fii ase sɛ ɔretoto n’adesua mu no, meka kyerɛɛ no sɛ: “Dito, Yehowa nhyɛ wo sɛ yɛ Ahenni no ho adwuma. Ɛsɛ sɛ wufi wo pɛ mu som no.” Bere a ɔkae sɛ ɔpɛ sɛ ɔsom Onyankopɔn no, meka kyerɛɛ no sɛ: “Hwɛ sɛnea wode ɔman mu atuatewfo kannifo mfonini atetare wo dan mu ha nyinaa. Enti, wugye di sɛ sɛ obi bɛsra wo na ohu saa mfonini yi a ɔbɛka sɛ wowɔ Onyankopɔn Ahenni no afã?” Ɛno ne aniberesɛm kakra a me ne no kae no.

Adapɛn abien akyi, bere a atuatew bi fii ase no, sukuufo a wɔwɔ sukuupɔn mu ne polisifo de sii ani totow atuo. Dito teɛɛm ka kyerɛɛ n’adamfo bi sɛ: “Ma yemfi ha nkɔ!” N’adamfo no kae sɛ: “Dabi! Ɛda a yefi bere tenten atwɛn no na aba yi.” N’adamfo no faa tuo foro kogyinaa sukuudan no atifi. Ná ɔka Dito nnamfo baawɔtwe a wowui saa da no ho. So wubetumi de w’adwene abu sɛnea m’ani gye sɛ mihu Dito a sɛ anka wammɛyɛ nokware Kristoni a ebia anka wawu no?

Mihu sɛ Yehowa Honhom Reboa Adwuma No

Bere bi a na menam asɛnka mu no, misian ofie bi ho, na na ɛyɛ me sɛ gyama yɛakɔ hɔ dedaw. Ɔbea bi a na ɔwɔ ofie hɔ frɛɛ me. Ne din de Ignacia. Ná ɔne Yehowa Adansefo abɔ kakra.  Nanso ne kunu a wɔfrɛ no Adalberto a ɔyɛ polisini bran no sɔre tiaa no denneennen ma wannya nkɔso wɔ Onyankopɔn som mu. Ná ɔnte Bible mfitiase nkyerɛkyerɛ pii ase, enti me no fii ase suaa Bible no. Ɛwom sɛ na Adalberto ayɛ n’adwene sɛ ɔremma me ne ne yere ntoa Bible adesua no so de, nanso mitumi ne Adalberto bɔɔ nsɛm foforo ho nkɔmmɔ bere tenten bi. Na ɛno ne ade a edi kan a ɛma yɛbɛyɛɛ nnamfo.

Hwɛ anigye a minyae sɛ mihui sɛ Ignacia bɛyɛɛ asafo no muni a odwen afoforo ho na ɔboa nnipa pii a wohia awerɛkyekye wɔ honhom fam ne honam fam nyinaa no. Bere bi akyi no, Ignacia kunu ne ne mma no mu baasa bɛyɛɛ Adansefo. Nokwasɛm ne sɛ, awiei koraa no, bere a Adalberto tee Ahenni asɛm no ase no, ɔkɔɔ polisifo adwumam, na ɔde anigye kaa asɛm no kyerɛɛ wɔn maa polisifo no kraa Ɔwɛn-Aban ne Nyan! 200.

Yehowa na Ɔma Enyin

Bere a me de mfe asia yɛɛ adwuma wɔ Santa Cruz no, wɔma me kɔɔ Bolivia ahenkurow La Paz mu, na mede mfe 25 yɛɛ adwuma wɔ hɔ nso. Wɔ afe 1970 mfe no mfiase no, na nnipa 12 pɛ na wɔyɛ adwuma wɔ Yehowa Adansefo adwumayɛbea a na ɛwɔ La Paz no mu. Bere a asɛnka adwuma no mu trɛwee na wobehiaa adan pii wɔ baa dwumadibea hɔ no, wosii baa dwumadibea foforo wɔ Santa Cruz kurow a na ɛretrɛw ntɛmntɛm no mu. Wɔ afe 1998 mu no, woyii baa dwumadibea no kɔɔ hɔ, na wɔfrɛɛ me ma mekɔyɛɛ adwuma wɔ hɔ. Seesei yɛyɛ nnipa bɛboro 50 na yɛyɛ adwuma wɔ hɔ.

Asafo biako a na ɛwɔ Santa Cruz wɔ afe 1966 mu no abɛdan asafo ahorow bɛboro 50. Adansefo 640 a na wɔwɔ Bolivia man mũ no nyinaa mu no reyɛ adu 18,000 nnɛ!

Anigyesɛm ne sɛ, adwuma a mayɛ wɔ Bolivia no asow aba. Nanso, me mfɛfo Kristofo a wɔwɔ mmaa nyinaa no nokwaredi hyɛ me nkuran bere nyinaa. Yɛn nyinaa ani gye sɛ yehu sɛ Yehowa rehyira Ahenni asɛnka adwuma no so. Akyinnye biara nni ho sɛ sɛ woyɛ asuafoyɛ adwuma no bi a, w’ani gye ampa.—Mateo 28:19, 20.

[Mfonini wɔ kratafa 13]

Mereyɛ akwampae adwuma wɔ Scotland

[Mfonini wɔ kratafa 15]

Meresom wɔ baa dwumadibea wɔ Bolivia; (mfinimfini mfonini) Gilead adesuakuw a ɛto so 42 adesua awiei