So Afoforo Nkutoo na Ɛsɛ sɛ Wɔka Nokware?

ABABAA bi a wadi mfe 16 kae sɛ: “Mikyi atoro, na mempɛ obi a ɔnka nokware!” Saa ara na yɛn mu dodow no ara te nka. Nea yɛpɛ ne sɛ nsɛm a afoforo bɛka akyerɛ yɛn biara, sɛ́ wɔde wɔn ano na ɛka anaasɛ wɔkyerɛw no bɛyɛ nokware. Nanso, sɛ yɛreka asɛm akyerɛ afoforo a, so yɛka nokware?

Wɔ nhwehwɛmu bi a wɔyɛe wɔ Germany mu no, nnipa dodow no ara kae sɛ: “Mfomso biara nni ho sɛ wubedi atoro wɔ nsɛm nketenkete mu de abɔ w’ankasa anaa afoforo ho ban afi ɔhaw ho. Na mpo sɛ wubedi atoro na ama wo ne afoforo ntam akɔ so ayɛ papa a, ɛnsɛe hwee.” Ɔsɛnkyerɛwfo bi kyerɛwee sɛ: “Eye sɛ yɛbɛka nokware bere nyinaa de, nanso saa a yɛbɛyɛ no remma yennya anigye wɔ asetra mu.”

So yɛte nka sɛ ɛsɛ sɛ nkurɔfo ka nokware kyerɛ yɛn, nanso yɛn de biribi nti ɛfata sɛ yedi atoro? So nokware a yɛbɛka anaasɛ yɛrenka no ho hia? Sɛ yɛanka nokware a ɔhaw bɛn na ɛde ba?

Sɛnea Atorodi Sɛe Ade

Susuw sɛnea atorodi sɛe ade no ho hwɛ. Atorodi mma awarefo ne abusuafo nnye wɔn ho nni. Nseku bɔne tumi sɛe obi din. Adwumayɛfo a wowiawia nneɛma nso ma adwumakuw no bɔ ka, na ɛma nneɛma a wɔyɛ bo yɛ den. Wɔn a wonni nokware wɔ towtua mu bɔ aban korɔn, na ɛmma aban no nnya sika mfa nyɛ mpɔntudwuma. Nhwehwɛmufo a wɔka atosɛm nso sɛe nkurɔfo nnwuma, na ɛsɛe nnwumakuw a nhwehwɛmufo no yɛ adwuma wom no din. Nnwumakuw a wɔn nso di atoro ka sɛ sɛ obi de ne sika hyɛ wɔn adwuma no mu a obenya sika bum ntɛm ara no ma nkurɔfo a wogye nsɛm nyinaa di a wɔde wɔn sika hyem no dwetiri nyinaa hyew ma nea efi mu ba no yɛ awerɛhosɛm. Enti, ɛnyɛ nwonwa sɛ Bible ka sɛ nneɛma a Yehowa Nyankopɔn kyi no bi ne “atoro tɛkrɛma” ne “ɔdansekurumfo a ohuw atosɛm”!—Mmebusɛm 6:16-19.

Atosɛm a wɔtrɛw mu tumi sɛe ankorankoro ne ɔman mũ nyinaa din. Obiara nni hɔ a obegye eyi ho kyim. Ɛnde, dɛn nti na nkurɔfo hyɛ da di atoro? So asɛm biara a obi ka a ɛnyɛ nokware no yɛ atorodi? Yebesusuw saa nsɛmmisa yi ne afoforo mmuae ho wɔ asɛm a edi hɔ no mu.

[Mfonini wɔ kratafa 3]

Atorodi mma awarefo nnye wɔn ho nni