Nokwaredi Ho Nhwɛso

NELMA, a ɔyɛ Kristoni a ɔyɛ nkurɔfo ti wɔ Cruzeiro do Sul, Brazil, no hyiaa ne nokwaredi ho sɔhwɛ nnansa yi. Bere a nsu yiri faa baabi a Nelma te no, ɔbea bi a ɔyɛ ne ti wɔ Nelma hɔ brɛɛ no ntade. Bere a ɔreyiyi ntade no, ohuu Amerika sika dɔla 1,000 wɔ trɔsa bi kotoku mu.

Sika a Nelma hui no bɛyɛ sɛ sika a onya no abosome ason, na na ɛyɛ sika a ohia paa. Ná nsu no ayiri asɛe ne fie, na ɛfaa ne papa ne ne nuanom nneɛma pii kɔe. Ná obetumi de sika no asiesie ne fie no ma ebi aka ma ɔde aboa n’abusuafo. Nanso Bible a Nelma de atete n’ahonim nti, wamfa sika no.—Hebrifo 13:18.

Adekyee anɔpatutuutu no, Nelma kɔɔ adwuma ntɛm sen sɛnea ɔyɛ daa no, na okohuu ɔbea a ɔba ne nkyɛn bɛyɛ ne ti a ɔde ntade brɛɛ no no. Nelma daa ɔbea no ase, nanso ɔka kyerɛɛ no sɛ ohuu biribi wɔ ntade no mu a ɔrentumi mfa. Ɔbea no ani gyei paa sɛ ɔde sika no brɛɛ no. Ná wayi ato hɔ sɛ ɔde betua n’adwumayɛfo ka. Ɔbea a ɔyɛ oguadini yi kae sɛ: “Ɛyɛ den sɛ wubenya nnipa a wodi nokware.”

Nokwasɛm ni, ebia ebinom besusuw sɛ nokwaredi so nni mfaso biara. Nanso wɔn a wɔrebɔ mmɔden sɛ wɔbɛsɔ Yehowa, nokware Nyankopɔn no ani no bu nokwaredi sɛ su a ɛsom bo paa. (Efesofo 4:25, 28) Nelma kae sɛ, “Sɛ mamfa sika yi amma a, anka mintumi nna anadwo.”