Suro Yehowa Na Nya Anigye
Suro Yehowa Na Nya Anigye
“[Yehowa, NW] akronkronfo, munsuro no! na biribiara remmɔ wɔn a wosuro no.”—DWOM 34:9.
1, 2. (a) Nkyerɛkyerɛ a enhyia bɛn na Kristoman mufo wɔ wɔ Onyankopɔn suro ho? (b) Nsɛmmisa bɛn na yɛrebesusuw ho?
KRISTOMAN mu asɔfo a wɔkyerɛkyerɛ nkurɔfo sɛ wonsuro Onyankopɔn no taa de wɔn nkyerɛkyerɛ no gyina asɛm bi a enni Kyerɛwnsɛm mu so. Wɔka sɛ Onyankopɔn twe abɔnefo aso daa wɔ hellgya mu. Nkyerɛkyerɛ a ɛte saa no ne nea Bible ka fa Yehowa ho sɛ ɔyɛ Onyankopɔn a ɔwɔ ɔdɔ na obu atɛntrenee no nhyia koraa. (Genesis 3:19; Deuteronomium 32:4; Romafo 6:23; 1 Yohane 4:8) Kristoman mu asɔfo binom nso kyerɛkyerɛ biribi foforo koraa. Wɔn de wɔnka Onyankopɔn suro ho asɛm mpo. Mmom no, wɔkyerɛkyerɛ sɛ Onyankopɔn ma biribiara hokwan, na ɛkame ayɛ sɛ ogye obiara tom a ɔnhwɛ onii no abrabɔ. Ɛno nso nyɛ Bible nkyerɛkyerɛ.—Galatifo 5:19-21.
2 Nokwarem no, Bible hyɛ yɛn nkuran sɛ yensuro Onyankopɔn. (Adiyisɛm 14:7) Saa Bible mu asɛm yi ma nsɛmmisa bi sɔre. Ebi ne, Dɛn nti na Onyankopɔn a ɔwɔ ɔdɔ no pɛ sɛ yesuro no? Osuro bɛn na Onyankopɔn hwehwɛ? Na mfaso bɛn na yenya fi Onyankopɔn suro so? Yebesusuw saa nsɛmmisa yi ho bere a yegu so resusuw Dwom 34 ho no.
Nea Enti a Ɛsɛ sɛ Yesuro Onyankopɔn
3. (a) Wubu ahyɛde a ɛka sɛ yensuro Onyankopɔn no dɛn? (b) Dɛn nti na wɔn a wosuro Yehowa no ani gye?
3 Esiane sɛ Yehowa yɛ Ɔbɔadeɛ ne amansan Hene nti, ɛfata sɛ yesuro no. (1 Petro 2:17) Nanso, osuro a ɛte saa no nte sɛ osuro a wɔde ma onyame bi a ne tirim yɛ den no. Mmom no, sɛnea Yehowa te no nti, osuro a yɛwɔ ma no no yɛ osuro pa. Ɛsan nso kyerɛ sɛ yɛmpɛ sɛ yɛyɛ biribi a n’ani nnye ho. Onyankopɔn suro nyɛ ade a ɛhyɛ obi so anaa ɛma no bɔ hu, na mmom ɛyɛ ade pa, na ɛma obi bo tɔ ne yam. Yehowa, “anigye Nyankopɔn no” pɛ sɛ nnipa ani gye wɔ wɔn asetra mu. (1 Timoteo 1:11) Nanso, sɛ yebenya anigye a ɛte saa a, ɛsɛ sɛ yɛbɔ yɛn bra sɛnea Onyankopɔn pɛ. Wɔ nnipa pii fam no, ɛno hwehwɛ sɛ wɔyɛ nsakrae wɔ wɔn abrabɔ mu. Wɔn a wɔyɛ nsrakrae a ɛho hia yi no hu sɛ odwontofo Dawid asɛm a ɔkae yi yɛ nokware. Ɔkae sɛ: “Monka nhwɛ na munhu sɛ [Yehowa, NW] ye, nhyira ne onipa a oguan toa no. [Yehowa, NW] akronkronfo, munsuro no! na biribiara remmɔ wɔn a wosuro no.” (Dwom 34:8, 9) Ade pa biara remmɔ wɔn a wosuro Yehowa no nyinaa efisɛ wɔne Onyankopɔn ntam yɛ papa.
4. Awerɛhyem bɛn na Dawid ne Yesu nyinaa de mae?
4 Hyɛ no nsow sɛ Dawid frɛɛ ne mmarima no “akronkronfo” de dii wɔn ni sɛnea na wɔde asɛmfua no di dwuma wɔ ne bere so no. Ná wɔyɛ Onyankopɔn man kronkron no mufo. Wɔde wɔn nkwa nso too asiane mu dii Dawid akyi. Ɛwom sɛ na wɔreguan afi Ɔhene Saul anim de, nanso na Dawid wɔ ahotoso sɛ Yehowa bɛkɔ so ama wɔn nsa aka wɔn ahiade. Enti, Dawid kyerɛwee sɛ: “Gyataforo bedi hia na ɔkɔm ade wɔn, na wɔn a wɔhwehwɛ [Yehowa, NW] no, ade pa biara remmɔ wɔn.” (Dwom 34:10) Yesu nso maa n’akyidifo no awerɛhyem saa ara.—Mateo 6:33.
5. (a) Ná nnipa a wodi Yesu akyi no mu pii asetra te dɛn? (b) Osuro ho afotu bɛn na Yesu de mae?
5 Ná nnipa a wotie Yesu asɛm no mu pii yɛ Yudafo a ahia wɔn. Enti “wɔyɛɛ [Yesu] mmɔbɔ, efisɛ na wɔapirapira wɔn na wɔagyaw wɔn agu hɔ te sɛ nguan a wonni hwɛfo.” (Mateo 9:36) So na saa ahiafo yi benya akokoduru adi Yesu akyi? Sɛ wobetumi ayɛ saa a, na ɛsɛ sɛ woyi nnipa ho suro biara fi wɔn mu na wosuro Yehowa mmom. Yesu kae sɛ: “Munnsuro wɔn a wokum nipadua na ɛno akyi no wontumi nyɛ hwee bio no. Na mmom mɛkyerɛ mo nea munsuro no: Munsuro nea okum wie a ɔwɔ tumi sɛ ɔbɛtow ato Gehenna. Yiw, mise mo sɛ, Oyi na munsuro no. Wɔtɔn nkasanoma anum gye mman abien a ɛnsom bo, ɛnyɛ saa? Nanso wɔn mu biako mpo nni hɔ a Onyankopɔn werɛ fi no. Na mo ti nhwi mpo wɔakan ne nyinaa. Munnsuro; mosom bo sen nkasanoma bebree.”—Luka 12:4-7.
6. (a) Asɛm bɛn na Yesu kae a ahyɛ Kristofo den? (b) Dɛn nti na Yesu ne obi a ɔyɛ nhwɛso a ɛsen biara wɔ Onyankopɔn suro mu?
6 Sɛ atamfo hyɛ wɔn a wosuro Yehowa sɛ wonnyae Onyankopɔn som a, wobetumi akae Yesu afotu yi: “Obiara a ɔbɔ me din nnipa anim no, onipa Ba no nso bɛbɔ ne din Onyankopɔn abɔfo anim. Na nea ɔpa me nnipa anim no, mɛpa no Onyankopɔn abɔfo anim.” (Luka 12:8, 9) Saa asɛm no ahyɛ Kristofo nkuran titiriw wɔ aman a wɔabara nokware som wɔ hɔ no. Saafo yi yɛ anifere, na woyi Yehowa ayɛ wɔ Kristofo nhyiam ase ne asɛnka mu. (Asomafo Nnwuma 5:29) Yesu yɛɛ nhwɛso a ɛsen biara wɔ ‘Onyankopɔn suro’ mu. (Hebrifo 5:7) Onyankopɔn Asɛm hyɛɛ Yesu ho nkɔm sɛ: ‘Yehowa honhom besi no so, Yehowa suro honhom. Na Yehowa suro bɛyɛ no huam.’ (Yesaia 11:2, 3) Enti, Yesu fata koraa sɛ ɔkyerɛkyerɛ yɛn mfaso a ɛwɔ Onyankopɔn suro so.
7. (a) Ɔkwan bi so no, dɛn na Kristofo yɛ a ɛkyerɛ sɛ wɔregye ɔfrɛ bi a ɛte sɛ Dawid de no so? (b) Dɛn na awofo betumi ayɛ de asuasua Dawid nhwɛso pa no?
7 Yebetumi aka sɛ wɔn a wosuasua Yesu nhwɛso na wɔde ne nkyerɛkyerɛ yɛ adwuma no nyinaa regye ɔfrɛ bi a ɛte sɛ Dawid de no so: “Mma, mommra, monyɛ aso mma me! Mɛkyerɛ mo [Yehowa, NW] suro.” (Dwom 34:11) Ɛnyɛ nwonwa sɛ na Dawid frɛ ne mmarima no sɛ “mma” efisɛ na wobu no sɛ wɔn kannifo. Dawid nso boaa wɔn a wɔka no ho no ma wonyaa Onyankopɔn suro sɛnea ɛbɛyɛ a wɔn nyinaa bɛyɛ biako, na wɔanya Onyankopɔn anim dom. Hwɛ sɛnea eyi yɛ nhwɛso pa ma Kristofo a wɔyɛ awofo! Yehowa ama awofo tumi wɔ wɔn mmabarima ne wɔn mmabea so sɛ ‘wɔnkɔ so ntete wɔn wɔ Yehowa nteɛso ne nyansakyerɛ mu.’ (Efesofo 6:4) Sɛ awofo ne wɔn mma susuw nneɛma a ɛfa Onyankopɔn som ho daa, na wɔne wɔn sua Bible a, wɔboa mmofra no ma wosuro Yehowa, na wɔn ani gye wɔn asetra mu.—Deuteronomium 6:6, 7.
Sɛnea Yɛde Onyankopɔn Suro Bɛbɔ Yɛn Bra
8, 9. (a) Dɛn na ɛma ɛyɛ anigye sɛ yɛde Onyankopɔn suro bɛbɔ yɛn bra? (b) Yɛn tɛkrɛma a yɛbɛkora so no kyerɛ dɛn?
8 Sɛnea yɛadi kan aka no, sɛ yesuro Yehowa a, ɛnsɛe yɛn anigye. Dawid bisae sɛ: “Mo mu hena na ɔhwehwɛ nkwa, na ɔpɛ onyinkyɛ sɛ obehu papa?” (Dwom 34:12) Ɛda adi pefee sɛ, Yehowa suro ne ade titiriw a ɛma obi nyin kyɛ na onya anigye. Nanso, ɛnyɛ den sɛ wobɛka sɛ, “Misuro Onyankopɔn.” Na mmom sɛ́ wode Onyankopɔn suro bɛbɔ wo bra no ne asɛm no. Enti, Dawid toaa so kyerɛkyerɛɛ nea yɛyɛ a ɛkyerɛ sɛ yesuro Onyankopɔn no mu.
9 “Kora wo tɛkrɛma, bɔne ho, ɛne w’ano, nnaadaasɛm ho.” (Dwom 34:13) Bere a ɔsomafo Petro tuu Kristofo fo sɛ wɔnnodɔ wɔn ho sɛ anuanom wiei no, Onyankopɔn ma ɔfaa Dwom 34 mu afotu yi de kaa n’afotu no ho. (1 Petro 3:8-12) Yɛn tɛkrɛma a yɛbɛkora so wɔ bɔne ho no kyerɛ sɛ yɛrentrɛw nseku bɔne mu. Mmom no, bere nyinaa sɛ yɛne afoforo rekasa a, yɛbɛbɔ mmɔden sɛ yɛbɛhyɛ wɔn nkuran. Afei nso, yɛbɛbɔ mmɔden anya akokoduru na yɛaka nokware.—Efesofo 4:25, 29, 31; Yakobo 5:16.
10. (a) Kyerɛkyerɛ nea yɛn ho a yɛbɛtwe afi nneɛma bɔne ho no kyerɛ mu. (b) Nneɛma bɛn na sɛ yɛyɛ a ɛkyerɛ sɛ yɛreyɛ ade pa?
10 “Yi bɔne ho akwa, na yɛ papa, hwehwɛ asomdwoe, na tiw no.” (Dwom 34:14) Yɛtwe yɛn ho fi abrabɔ a Onyankopɔn kasa tia te sɛ aguamammɔ, korɔnbɔ, ahonhonsɛmdi, basabasayɛ, asabow, ne nnubɔnenom ho. Na yɛtwe yɛn ho nso fi aniwude a ɛtete saa a ebi ne ɔbarima ne ɔbea nna ho mfonini a wɔhwɛ ho. (Efesofo 5:10-12) Na yɛde yɛn bere yɛ ade pa. Ade pa a ɛsen biara a yebetumi ayɛ ne sɛ yɛbɛka Ahenni no ho asɛm, na yɛayɛ asuafoyɛ adwuma no bere nyinaa de aboa afoforo ma wɔanya nkwa. (Mateo 24:14; 28:19, 20) Nneɛma pa a ɛsɛ sɛ yɛyɛ no bi nso ne sɛ yebesua ade ansa na yɛakɔ Kristofo nhyiam ase, yebeyi ntoboa de aboa wiase nyinaa som adwuma no, yebesiesie yɛn Ahenni Asa so yiye, na yɛaboa Kristofo a ahia wɔn no.
11. (a) Ɔkwan bɛn so na Dawid de asomdwoe ho asɛm a na ɔka no bɔɔ ne bra? (b) Dɛn na wubetumi ayɛ de ‘ahwehwɛ asomdwoe’ wɔ asafo no mu?
11 Dawid yɛɛ nhwɛso pa wɔ sɛnea wɔhwehwɛ asomdwoe no mu. Onyaa hokwan mprenu a anka obetumi akum Saul, nanso ne nyinaa mu no, wanyɛ bɔne. Na akyiri yi, ɔne Saul kasae wɔ obu so a na ɔhwɛ kwan sɛ ɔnam so bɛma asomdwoe aba wɔn ntam. (1 Samuel 24:8-11; 26:17-20) Sɛ asɛm bi a ebetumi asɛe asafo no asomdwoe ba asafo no mu nnɛ a, dɛn na yebetumi ayɛ wɔ ho? Ɛsɛ sɛ ‘yɛhwehwɛ asomdwoe, na yedi akyiri.’ Enti, sɛ yehu sɛ yɛne yɛn yɔnko gyidini bi ntam nyɛ papa a, yebetie Yesu afotu yi. Ɔkae sɛ: “Di kan ne wo nua no nkosiesie mo ntam.” Na sɛ yɛyɛ saa wiei a, afei yɛakɔ so ayɛ yɛn nnwuma foforo a yɛyɛ wɔ nokware som mu no.—Mateo 5:23, 24; Efesofo 4:26.
Onyankopɔn Suro Ma Yenya Nhyira Pii
12, 13. (a) Nhyira bɛn na wɔn a wosuro Onyankopɔn no nya nnɛ? (b) Nhyira kɛse bɛn na wɔn a wɔsom Onyankopɔn nokware mu no benya nnansa yi ara?
12 “[Yehowa, NW] ani wɔ treneefo so, na n’aso tie wɔn sufrɛ.” (Dwom 34:15) Sɛnea Onyankopɔn ne Dawid dii nsɛm no ho kyerɛwtohɔ a ɛwɔ hɔ no da no adi sɛ saa asɛm no yɛ nokware. Ɛnnɛ nso, yenya anigye kɛse ne asomdwoe, efisɛ yenim sɛ Yehowa rehwɛ yɛn so. Yɛwɔ ahotoso sɛ ɔbɛkɔ so de nea yehia ama yɛn bere mpo a yɛwɔ ahokyere kɛse mu no. Yenim sɛ ɛrenkyɛ na Gog a ofi Magog no atow ahyɛ nokware asomfo nyinaa so ma “[Yehowa, NW] da kɛse a ɛyɛ hu no aba.” (Yoel 2:11, 31; Hesekiel 38:14-18, 21-23) Nea ebesi biara no, ɛsɛ sɛ yegyina mu. Na Dawid asɛm yi bɛbam wɔ yɛn so sɛ: “Treneefo su frɛ, na [Yehowa, NW] tie, na ogye wɔn fi wɔn ahohia nyinaa mu.”—Dwom 34:17.
13 Hwɛ sɛnea ɛyɛ anigye sɛ saa bere no Yehowa bɛma obiara ahu ne din kɛse no! Yehowa ho suro pa bɛhyɛ yɛn koma ma asen bere biara, na ɔbɛsɛe wɔn a wɔsɔre tia no no nyinaa pasaa. “[Yehowa, NW] ani sa nnebɔneyɛfo, sɛ obegu wɔn ase, asase so.” (Dwom 34:16) Hwɛ nhyira kɛse a yebenya sɛ wobegye yɛn akɔ Onyankopɔn wiase foforo a trenee te mu no mu!
Bɔhyɛ Ahorow a Ɛboa Yɛn Ma Yenya Boasetɔ
14. Dɛn na ɛbɛboa yɛn ma yɛatumi agyina amanehunu biara a ɛbɛto yɛn no ano?
14 Ansa na saa bere no bɛba no, ɛsɛ sɛ yenya boasetɔ na ama yɛatumi akɔ so ayɛ osetie ama Yehowa wɔ wiase a ɔbrasɛe ne nitan ahyɛ mu ma yi mu. Onyankopɔn suro boa yɛn kɛse ma yɛyɛ osetie. Esiane sɛ yɛte mmere a emu yɛ den mu nti, Yehowa asomfo binom kɔ ahohia a emu yɛ den mu, na ɛma wɔn werɛ how, na wɔn abam bu mpo. Nanso, wobetumi anya ahotoso koraa sɛ, sɛ wɔde wɔn ho to Yehowa so a, ɔbɛboa wɔn ama wɔagyina ano. Dawid asɛm yi ma yenya awerɛkyekye: “[Yehowa, NW] bɛn wɔn a wɔn koma abubu, na ogye wɔn a wɔn honhom apɛtɛw.” (Dwom 34:18) Dawid kɔɔ so hyɛɛ yɛn nkuran sɛ: “Ɔtreneeni amane dɔɔso, na [Yehowa, NW] gye no ne nyinaa mu.” (Dwom 34:19) Yehowa wɔ ahoɔden a obetumi de agye yɛn, ɛmfa ho amanehunu biara ɛbɛto yɛn no.
15, 16. (a) Bere a Dawid hyehyɛɛ Dwom 34 wiei akyi pɛɛ no, asɛmmɔne bɛn na ɔtee? (b) Dɛn na ɛbɛboa yɛn ma yɛagyina sɔhwɛ ahorow ano?
15 Bere a Dawid hyehyɛɛ Dwom 34 wiei no, ankyɛ na ɔtee sɛ asɛm ato Nobfo no. Ɔtee sɛ Saul akunkum Nobfo ne asɔfo no mu dodow no ara. Hwɛ sɛnea ɛbɛyɛ sɛ asɛm no haw no, bere a ɔkaee sɛ ɛyɛ kɔ a ɔkɔɔ Nob no na ama Saul de n’anibere akɔsoɛ wɔn so no! (1 Samuel 22:13, 18-21) Akyinnye biara nni ho sɛ Dawid hwehwɛɛ Yehowa mmoa, na anidaso a na ɔwɔ sɛ wɔn a “wɔteɛ” benya owusɔre daakye no kyekyee ne werɛ.—Asomafo Nnwuma 24:15.
16 Ɛnnɛ, owusɔre ho anidaso a yɛwɔ no hyɛ yɛn nso den. Yenim sɛ, nea atamfo de bɛyɛ yɛn biara renkɔ so nhaw yɛn afebɔɔ. (Mateo 10:28) Dawid asɛm a edi hɔ yi kyerɛ sɛ na ɔwɔ ahotoso a ɛte saa. Ɔkae sɛ: “Ɔhwɛ [treneefo] nnompe nyinaa, emu biako po mmu.” (Dwom 34:20) Saa asɛm yi baa mu ankasa wɔ Yesu so. Ɛwom sɛ wokum Yesu yayaayaw de, nanso ‘wɔammu’ ne nnompe biako mpo mu. (Yohane 19:36) Sɛ yɛbɛkyerɛkyerɛ Dwom 34:20 mu akɔ akyiri a, ɛma yɛn awerɛhyem sɛ ɛmfa ho sɔhwɛ biara a Kristofo a wɔasra wɔn no ne wɔn ahokafo “nguan foforo” no behyia no, ɛrentumi nsɛe wɔn afebɔɔ. Wɔ sɛnkyerɛnne kwan so no, yebetumi aka sɛ wɔremmubu wɔn nnompe mu da.—Yohane 10:16.
17. Adebɔne bɛn na ɛbɛto wɔn a wɔtan Yehowa nkurɔfo na wonnu wɔn ho no?
17 Nanso, abɔnefo de nea ɛbɛto wɔn no yɛ soronko koraa. Wobetwa wɔn bɔne so aba nnansa yi ara. “Bɔne bekum ɔbɔnefo, na wɔn a wɔtan ɔtreneeni no bɛbrɛ mu.” (Dwom 34:21) Wɔn a wɔkɔ so sɔre tia Onyankopɔn nkurɔfo nyinaa behyia adebɔne ɔkwan biara so. Wɔ Yesu Kristo ahoyi mu no, “wɔde daa ɔsɛe bɛyɛ asotwe ama wɔn.”—2 Tesalonikafo 1:9.
18. Ɔkwan bɛn so na yebetumi aka sɛ “nnipakuw kɛse” no anya ogye dedaw, na dɛn na wɔbɛyɛ ama wɔn daakye?
18 Dawid de asɛm a ɛhyɛ nkuran yi na ewiee ne dwom no. “[Yehowa, NW] gye ne nkoa kra, na wɔn a woguan toa no nyinaa remmrɛ mu.” (Dwom 34:22) Aka kakra ma mfe 40 a Ɔhene Dawid de dii hene no aba awiei no, ɔkae sɛ: ‘Onyankopɔn gyee me kra fii ahohia nyinaa mu.’ (1 Ahene 1:29) Ɛrenkyɛ, wɔn a wosuro Yehowa no bɛkaakae nneɛma a wɔafa mu no, na wobedi ahurusi sɛ wɔagye wɔn afi bɔne afobu biara ne sɔhwɛ ahorow a wohyiae no mu te sɛ Dawid. Kristofo a wɔasra wɔn no mu dodow no ara anya wɔn akatua wɔ soro dedaw. Seesei, “nnipakuw kɛse” a wofi aman nyinaa mu de wɔn ho rebɔ Yesu nuanom a wɔaka wɔ asase so no ho, na wɔne wɔn resom Onyankopɔn, sɛnea ɛbɛyɛ a wobenya gyinabea a ɛfata wɔ Yehowa anim. Nea ama eyi atumi ayɛ yiye ne sɛ wɔanya Yesu Kristo mogya a wohwie gui a etumi gye nkwa no mu gyidi. Wɔ Kristo Mfirihyia Apem Nniso no mu no, wɔde agyede afɔrebɔ no mu nhyira no bɛtete wɔn, na wɔde wɔn akɔ pɛyɛ mu.—Adiyisɛm 7:9, 14, 17; 21:3-5.
19. Dɛn na “nnipakuw kɛse” no asi wɔn bo sɛ wɔbɛyɛ?
19 Dɛn nti na “nnipakuw kɛse” a wɔresom Onyankopɔn no benya saa nhyira yi nyinaa? Efisɛ wɔasi wɔn bo sɛ wɔbɛkɔ so asuro Yehowa, na wɔde osetie ne osuro pa asom no. Nokwarem no, Yehowa suro ma asetra yɛ anigye nnɛ, na ɛboa yɛn ma ‘yetumi so nkwa ankasa’ a ɛne daa nkwa wɔ Onyankopɔn wiase foforo mu no mu “denneennen.”—1 Timoteo 6:12, 18, 19; Adiyisɛm 15:3, 4.
So Wokae?
• Dɛn nti na ɛsɛ sɛ yesuro Onyankopɔn, na Onyankopɔn suro kyerɛ dɛn?
• Ɛsɛ sɛ Onyankopɔn suro ka yɛn abrabɔ dɛn?
• Sɛ yesuro Onyankopɔn a, nhyira bɛn na yenya?
• Bɔhyɛ ahorow bɛn na ɛboa yɛn ma yenya boasetɔ?
[Adesua no ho Nsɛmmisa]
[Mfonini wɔ kratafa 26]
Sɛ wɔbara wɔn a wosuro Yehowa no a, wɔde anifere som Yehowa
[Mfonini wɔ kratafa 28]
Ade pa a ɛsen biara a yebetumi ayɛ ama yɛn afipamfo ne sɛ yɛbɛka Ahenni no ho asɛmpa akyerɛ wɔn