Abrabɔ Gyinapɛn A Entwam Da Boa Yɛn

NNIPA nyinaa wɔ abrabɔ gyinapɛn a wɔde bɔ wɔn bra. Wunnye ntom sɛ su ahorow te sɛ nokwaredi, ayamye, ne ayamhyehye som bo wɔ wiase nyinaa na yɛn mu dodow no ara ani gye ho?

Hena na Ɔde Ma?

Wɔ afeha a edi kan no mu no, na ɔbarima nhomanimfo bi a wɔfrɛ no Saul te baabi a na Yudafo, Helafo, ne Romafo adi afra. Ná ɛsono wɔn mu biara amammerɛ ne wɔn  abrabɔ ho mmara. Amanne ne mmara pii a na wɔwɔ akyi no, Saul hui sɛ wɔde biribi awo nnipa a ɛma yehu papa ne bɔne. Eyi ne yɛn ahonim. Bere a Saul bɛyɛɛ Kristoni a wɔfrɛɛ no ɔsomafo Paulo akyi no, ɔkyerɛwee sɛ: “Bere biara a amanaman mufo a wonni mmara no fi awosu [“nkate,” The New Testament in Modern Speech] mu yɛ mmara no mu nneɛma no, ɛwom sɛ saa nnipa yi nni mmara de, nanso nea wɔyɛ no yɛ mmara ma wɔn ankasa. Wɔn ankasa na wɔkyerɛ sɛ wɔakyerɛw mmara no nnyinasode agu wɔn komam, bere a wɔn ahonim ka wɔn ho di adanse.”—Romafo 2:14, 15.

Nanso, so ɛfata sɛ yɛma “nkate” nkutoo kyerɛ yɛn kwan bere a yɛresi papa ne bɔne ho gyinae no? Sɛnea ebia woahu no, nneɛma a ankorankoro ne nnipakuw yɛe a ansi wɔn yiye ho nsɛm ahyɛ abakɔsɛm mu ma. Eyi ama nnipa pii ahu sɛ yehia obi a ɔkorɔn sen yɛn na wama yɛn akwankyerɛ ma yɛatumi ahyehyɛ gyinapɛn a eye sen biara a yɛde bɛbɔ yɛn bra. Nnipa pii begye atom sɛ adesamma Yɛfo no nkutoo na obetumi ama yɛn gyinapɛn a ɛte saa a entwam da. Ɔbenfo Carl Jung kae wɔ ne nhoma mu sɛ: “Obi a n’ase ntimii wɔ Onyankopɔn mu no ntumi nnyina n’ankasa ahoɔden so nko ntia wiase no mu sɔhwɛ a emu yɛ den a obehyia wɔ honam fam ne abrabɔ fam no.”—The Undiscovered Self.

Asɛm a ɔkae yi ne nea tete diyifo bi kyerɛwee no hyia: “Onipa kwan nni ne nsam, enni ɔbarima nsam, sɛnea ɔnam a obetutu n’anammɔn.” (Yeremia 10:23) Yɛn Bɔfo no ka sɛ: “Mene nea ɔkyerɛ wo nea eye ma wo, na ogya wo kɔ ɔkwan a fa so no so.”—Yesaia 48:17.

Baabi a Yebenya Abrabɔ Ho Gyinapɛn a Eye

Nsɛm a yɛaka yi wɔ nhoma a wɔakyekyɛ sen biara a ɛne Kyerɛw Kronkron no a abrabɔ ho gyinapɛn wom no mu. Nnipa ɔpepem pii a wɔwɔ wiase nyinaa a wɔn a wɔnyɛ Kristofo ne wɔn a wɔmpɛ nyamesom mpo ka ho ahwehwɛ nyansa ne nhumu afi Kyerɛwnsɛm no mu. German anwensɛm kyerɛwfo Johann Wolfgang von Goethe kyerɛwee sɛ: “Mewɔ obu kɛse ma [Bible no] na m’ani gye ho, efisɛ ɛno na ɛboaa me ma mitumi bɔɔ bra pa.” Wɔkyerɛ sɛ Hindu kannifo Mohandas Gandhi nso kae sɛ: “Ɛsɛ sɛ yɛkenkan Bepɔw so Asɛnka [Yesu Kristo nkyerɛkyerɛ no fã a ɛwɔ Bible mu] no dwennwen ho na yɛde bɔ yɛn bra . . . Efisɛ Bepɔw so Asɛnka no fa yɛn mu biara ho.”

Ɔsomafo Paulo a yɛfaa n’asɛm kae no sii dwuma titiriw a Kyerɛw Kronkron no di wɔ abrabɔ ho gyinapɛn a ɛde ma yɛn no mu so dua sɛ: “Kyerɛwnsɛm nyinaa fi Nyankopɔn honhom mu, na eye ma ɔkyerɛkyerɛ.” (2 Timoteo 3:16) So saa na ɛte ankasa?

Dɛn nti na w’ankasa wonhwehwɛ mu? Hwehwɛ nnyinasosɛm ahorow a ɛwɔ kratafa a edi hɔ no mu. Wubehu sɛ ɛhyɛ abrabɔ pa ho nkuran. Dwennwen sɛnea Bible mu nsɛm a ɛwɔ hɔ no betumi ama w’abrabɔ ne wo ne afoforo ntam abusuabɔ ayɛ papa no ho.

Wubenya so Mfaso?

Nnyinasosɛm a yɛaka ho asɛm yi yɛ nhwɛso kakra a ɛma yehu sɛ mfaso wɔ Kyerɛw Kronkron no mu afotu so. Bio nso, kɔkɔbɔ nsɛm pii wɔ Onyankopɔn Asɛm mu a ɛfa nsusuwii bɔne, kasa, ne nneyɛe a ebetumi asɛe yɛn abrabɔ ho.—Mmebusɛm 6:16-19.

Nokwarem no, Bible nkyerɛkyerɛ ma yenya biribi a nnipa nhyehyɛe biara ntumi mfa mma yɛn. Ɛno ne afotu a ebetumi ama nnipa anya abrabɔ ho gyinapɛn a eye sen biara. Nsakrae kɛse tumi ba wɔn a wogye nkyerɛkyerɛ yi tom na wɔde bɔ wɔn bra no asetra mu. Etumi ma wɔsesa wɔn nsusuwii. (Efesofo 4:23, 24) Ɛma wonya adwempa. Sɛ nnipa pii sua Onyankopɔn gyinapɛn  a ɛwɔ Bible mu no a, ɛma woyi nnipa mu nyiyim, nnipa ho adwemmɔne, ne nnipa ho nitan fi wɔn koma mu. (Hebrifo 4:12) Kyerɛwnsɛm no ne gyinapɛn ahorow a ɛhyɛ ho nkuran no aka nkurɔfo ma wɔagyae basabasayɛ ne nneɛma bɔne biara ma wɔabɛyɛ nnipa pa.

Nokwarem no, Bible gyinapɛn aboa nnipa ɔpepem pii ma wɔadi subammɔne ne nneyɛe a agye ntini wɔ wɔn mu, te sɛ nea asɛe afoforo abrabɔ no so. (1 Korintofo 6:9-11) Ɛnyɛ saafo no suban nko na Bible nkyerɛkyerɛ asesa, na mmom asesa wɔn koma, wɔn anidaso, ne wɔn mmusua nso. Ɛmfa ho sɛnea  wiase no bɛsɛe akodu biara no, nnipa a wɔwɔ wiase nyinaa bɛkɔ so ayɛ nsakrae a ɛbɛboa wɔn. Eyi to rentwa da. “Wura guan, nhwiren twam, na yɛn Nyankopɔn asɛm tim hɔ daa.”—Yesaia 40:8.

So w’ankasa bɛpɛ sɛ wunya “yɛn Nyankopɔn asɛm” no so mfaso? Yehowa Adansefo ani begye ho sɛ wɔbɛboa wo ma woahu sɛnea wubenya Bible gyinapɛn so mfaso. Gyinapɛn a ɛte saa a wode bɛbɔ wo bra no bɛma woanya Onyankopɔn anim dom nnɛ, na woanya asetra a enni awiei bere a Onyankopɔn nnyinasosɛm a entwam da kyerɛ wo kwan no.

[Adaka/​Mfonini wɔ kratafa 6, 7]

NNYINASOSƐM A ENTWAM DA

Sɛnea wo ne afoforo di nsɛm. “Enti nea mopɛ sɛ nnipa nyɛ mo biara no, mo nso monyɛ wɔn saa ara; nokwarem no, saa na Mmara ne Adiyifo no kyerɛ.”—Mateo 7:12.

Dɔ wo yɔnko. “Dɔ wo yɔnko sɛ wo ho.” (Mateo 22:39) “Ɔdɔ nyɛ ne yɔnko bɔne; enti ɔdɔ ne mmara no awiei.”—Romafo 13:10.

Bu afoforo na di wɔn ni. “Momma mo yam nhyehye mo mma mo ho wɔ onuadɔ mu. Munni kan mfa nidi mma mo ho mo ho.”—Romafo 12:10.

Hwehwɛ asomdwoe. “Momma asomdwoe ntra mo ntam.” (Marko 9:50) “Sɛ ɛbɛyɛ yiye a, mo fam de, mo ne nnipa nyinaa ntra asomdwoe mu.” (Romafo 12:18) “Momma yenni nneɛma a ɛde asomdwoe ba . . . akyi.”—Romafo 14:19.

Fa bɔne kyɛ. “Fa yɛn aka firi yɛn, sɛnea yɛn nso de afiri wɔn a wɔde yɛn aka no.” (Mateo 6:12) “Mo ne mo ho nni no ayamye ne ayamhyehye so, na mumfi mo pɛ mu mfa bɔne mfirifiri mo ho.”—Efesofo 4:32.

Di nokware. “Di wo yere nokware na fa wo dɔ ma ɔno nkutoo. . . . Ma w’ani nnye wo yere ho na wo ne ababaa a wowaree no no ani nnye . . . Ma w’ani nnye n’ahoɔfɛ ho; tɔ ne dɔ mu ntintan. . . . Adɛn nti na ɛsɛ sɛ wode wo dɔ ma ɔbea foforo? Adɛn nti na ɛsɛ sɛ woma ɔbarima foforo yere ho yɛ wo fɛ?” (Mmebusɛm 5:15-20, Today’s English Version) “Onipa a odi ade ketewa mu nokware no di pii mu nokware nso, na onipa a ɔnteɛ wɔ ade ketewa mu no nteɛ wɔ pii mu nso.” (Luka 16:10) “Nea wɔhwehwɛ fi ofiehwɛfo hɔ ne sɛ wobehu sɛ odi nokware.”—1 Korintofo 4:2.

Nni amim. “So mo ho bɛtew nsenia bɔne mu anaa foto a nsisi abrammo wɔ mu mu?” (Mika 6:11) “Yegye di sɛ yɛwɔ ahonim pa, efisɛ yɛpɛ sɛ yɛde nokwaredi bɔ yɛn bra wɔ biribiara mu.”—Hebrifo 13:18.

Nni atoro, yɛ nea ɛteɛ. “Montan bɔne na monnɔ papa, na momma atɛmpa ntim kurow apon mu.” (Amos 5:15) “Monkeka nokwasɛm nkyerɛkyerɛ mo ho; nokware ne asomdwoe na momfa mmu atɛn mo nkurow apon mu.” (Sakaria 8:16) “Afei a moayi nkontompo agu yi, mo mu biara nka nokware nkyerɛ ne yɔnko.”—Efesofo 4:25.

Yɛ nsi ne mmɔdenbɔfo. “Sɛ wuhu onipa a ɔyɛ n’adwuma ho nsi a, ahene anim na obegyina.” (Mmebusɛm 22:29) “Monnyɛ mo adwuma anihaw so.” (Romafo 12:11) “Biribiara a moreyɛ no, mumfi ɔkra nyinaa mu nyɛ no sɛ moyɛ ma Yehowa na ɛnyɛ nnipa.”—Kolosefo 3:23.

Nya odwo ne ayamhyehye, na da ayamye adi. “Monhyɛ ayamhyehye, ayamye, ahobrɛase adwene, odwo, ne abodwokyɛre.”—Kolosefo 3:12.

Fa papa di bɔne so. “Monkɔ so nnɔ mo atamfo na mommɔ mpae mma wɔn a wɔtaa mo.” (Mateo 5:44) “Mma bɔne nnni wo so nkonim, na mmom kɔ so fa papa di bɔne so nkonim.”—Romafo 12:21.

Fa nea eye sen biara ma Onyankopɔn. “‘Ɛsɛ sɛ wode wo koma nyinaa ne wo kra nyinaa ne w’adwene nyinaa dɔ Yehowa wo Nyankopɔn.’ Eyi ne ahyɛde a ɛyɛ kɛse sen biara ne nea edi kan.”—Mateo 22:37, 38.

[Mfonini ahorow]

Bible gyinapɛn a yɛde bɛbɔ yɛn bra no betumi aboa ma yɛanya aware pa, abusua a anigye wom, ne nnamfo pa