Ernst Glück Adwuma Kɛse a Ɔyɛe

BƐBORO mfe 300 a atwam ni no, Ernst Glück yɛɛ adwuma bi a abakɔsɛm nyinaa mu no, nnipa kakraa bi na wɔanya akokoduru ayɛ. Ɔbɔɔ ne tirim sɛ ɔbɛkyerɛ Bible no ase akɔ kasa bi a na ɔnte mu.

Wɔwoo Glück wɔ bɛyɛ afe 1654 mu wɔ Wettin, kurow ketewaa bi a ɛbɛn Halle, Germany. Ná ne papa yɛ Lutheran asɔre no sɔfo, na esiane sɛ na abusua no pɛ nyamesom nti, ɛmaa Ernst a saa bere no na ɔyɛ abofra no ani begyee ho sɛ obesua Onyankopɔn Asɛm. Owiee asɔfodi sukuu wɔ Germany bere a na wadi mfe 21, na otu kɔɔ baabi a ɛnnɛ wɔfrɛ hɔ Latvia. Saa bere no na ɔman no mufo dodow no ara nnim nhoma, na na nhoma kakraa bi na ɛwɔ ɔman no kasa mu. Glück kyerɛwee sɛ: “Bere a meyɛ aberante a miduu ɔman no mu no, ade a edi kan a mihui sɛ ɛtɔ sin wɔ hɔ ne sɛ na Latvia asɔre no nni Bible . . . Eyi kaa me ma mebɔɔ Onyankopɔn mpae sɛ ɔmmoa me ma minsua kasa yi na minhu no yiye.” Ná wasi ne bo sɛ ɔbɛma Latviafo no anya Bible wɔ wɔn ankasa kasa mu.

Ahoboa a Ɔyɛe de Kyerɛɛ Ase

Saa bere no na wɔfrɛ baabi a Glück kɔtrae no Livonia, na na Sweden na edi wɔn so. Nea na ogyina Sweden hene ananmu wɔ hɔ ne Johannes Fischer. Ná ɔpɛ sɛ ɔman no nhomasua nya nkɔanim, na na ɔpɛ sika nso. Glück kaa Bible a ɔpɛ sɛ ɔkyerɛ ase kɔ Latvia kasa mu no ho asɛm kyerɛɛ Fischer. Ná Fischer wɔ afiri a wɔde tintim nhoma wɔ ɔman no kuropɔn Riga mu. Sɛ otintim Latvia Bible no a, na obetumi ama adwuma a ɔpɛ sɛ ɔyɛ wɔ nhomasua mu no akɔ so, na bere koro no ara nso wanya sika pii.  Fischer ka kyerɛɛ Sweden hene Charles XI sɛ ɔmma wɔn tumi a wɔde bɛkyerɛ ase. Ɔhene no maa no kwan sɛ wɔnkyerɛ ase na ɔka kaa ho sɛ obetua ho ka. Ɔhene no de ne nsa hyɛɛ krataa ase wɔ August 31, 1681 mu ma wotumi fii ase kyerɛɛ Bible no ase.

Saa bere yi nyinaa na Glück resiesie ne ho afi adwuma no ase. Esiane sɛ na ɔte German kasa nti, na anka obetumi ahwɛ Martin Luther nkyerɛase no so de ayɛ Latvia Bible no. Nanso na Glück pɛ sɛ ɔyɛ Bible nkyerɛase a edi mu sen biara, enti ohui sɛ ebehia sɛ ɔhwɛ tete Hebri ne Hela nkyerɛwee no so de kyerɛ ase. Ná Glück nnim kasa a wɔde kyerɛw Bible no ahe biara, enti ɔkɔɔ Hamburg, Germany kosuaa Hebri ne Hela kasa. Bere a ɔwɔ hɔ no, ɛbɛyɛ sɛ Livonia sɔfo bi a wɔfrɛ no Jānis Reiters kyerɛɛ no Hela kasa a wɔde kyerɛw Bible no ne Latvia kasa.

Mfe a Ɔde Yɛɛ Adwuma ne Mfe a Ɔde Twɛn ma Wotintimii

Bere a Glück wiee ne kasa ho adesua wɔ afe 1680 mu no, ɔsan baa Latvia, na obedii sɔfo. Ankyɛ na ofii ase kyerɛɛ Bible no ase. Wɔ afe 1683 mu no, woyii Glück kɔɔ Alūksne, baabi a na asɔre no yɛ kɛse sɛ onkodi sɔfo wɔ hɔ, na ɛhɔ na ɔkyerɛɛ Bible no ase.

Saa bere no, na wonni Bible mu nsɛm pii wɔ Latvia kasa mu. Enti Glück de German nsɛmfua bi dii dwuma wɔ ne nkyerɛase no mu. Nanso ɔyɛɛ nea obetumi biara sɛ ɔbɛkyerɛ Onyankopɔn Asɛm ase akɔ Latvia kasa mu, na animdefo ka sɛ ne nkyerɛase no di mu paa. Glück bɔɔ ne tirim hyehyɛɛ nsɛmfua foforo pii, na ɛnnɛ wɔde di dwuma kɛse wɔ Latvia kasa mu. Eyinom bi ne nsɛmfua te sɛ “nhwɛso,” “apontow,” “ɔbran,” ne “di adanse” a na enni Latvia kasa mu no.

Ná Johannes Fischer ma Sweden hene no hu sɛnea na adwuma no rekɔ so, na nkitaho a wodii no kyerɛ sɛ eduu afe 1683 no, na Glück akyerɛ Kristofo Hela Kyerɛwnsɛm no ase awie. Eduu afe 1689 no, na wakyerɛ Bible mũ no nyinaa ase awie. Ɔde mfe awotwe pɛ na ɛyɛɛ adwuma kɛse yi. * Ɛkyɛe ansa na wɔretintim Bible a ɔkyerɛɛ ase yi, nanso wɔ afe 1694 mu no,  oduu ne botae ho—aban no maa kwan ma wɔkyekyɛɛ Latvia Bible no maa ɔmanfo.

Abakɔsɛm akyerɛwfo binom nnye nni sɛ Glück nkutoo na ɔkyerɛɛ Latvia Bible no ase. Akyinnye biara nni ho sɛ ɔhwɛɛ Luther nkyerɛase no mu, na ɔde Bible no fã bi a na ɛwɔ Latvia kasa mu dedaw no mu nsɛm bi hyehyɛɛ ne de no mu. Nanso eyi yɛ n’adwuma a ɔyɛe no fã ketewaa bi pɛ. So afoforo boaa no ma ɔkyerɛɛ ase? Bere a na Glück rekyerɛ Bible no ase no, na ɔwɔ ɔboafo a ɔne no yɛ adwuma. Afoforo nso kenkan mu siesiee mu mfomso maa no, na wɔde totoo nea ɔhwɛɛ so kyerɛɛ ase no ho sɛ ɛyɛ pɛpɛɛpɛ anaa. Nanso ɛte sɛ nea na n’aboafo no nsa nni nkyerɛase no ankasa mu. Enti ɛbɛyɛ sɛ Glück nkutoo na ɔkyerɛɛ Bible no ase.

Bible nkyerɛase a Glück yɛe no yɛ ade titiriw a wogyinaa so kyerɛw Latvia kasa no, nanso biribi titiriw a ɛsen saa fii mu bae. Awiei koraa no, Latviafo no nyaa Onyankopɔn Asɛm wɔ wɔn ankasa kasa mu kenkanee na wosuaa emu nkyerɛkyerɛ a ɛma nkwa no. Wɔn werɛ mfii nea Ernst Glück yɛ maa wɔn no. Bɛboro mfe 300 ni, nnipa a wɔwɔ Alūksne no ahwɛ nnua abien a ɛte sɛ odum a wɔfrɛ no Glika ozoli, anaa Glück nnua no so yiye. Glück duaa nnua no na wɔde akae Latvia Bible no. Tete nneɛma akorae ketewaa bi wɔ Alūksne a wɔakora Bible nkyerɛase ahorow so wɔ hɔ; emu biako ne Glück nkyerɛase a wodii kan tintimii no. Bible no ne afe 1689 a Glück wiee ne Bible no wɔ Alūksne ahyɛnsode no so.

N’adwuma a Ɔyɛe Akyiri Yi

Bere a Glück koduu Latvia no, ankyɛ koraa na ofii ase suaa Russia kasa. Wɔ afe 1699 mu no, ɔkyerɛwee sɛ ɔpɛ sɛ ɔyɛ ade foforo a ɛda ne koma so—ɛne sɛ ɔbɛkyerɛ Bible no ase akɔ Russia kasa mu. Ɔkae wɔ krataa bi a ɔkyerɛw no afe 1702 mu no mu sɛ wafi ase rehwɛ Latvia Bible no mu ayɛ no foforo. Nanso na tebea no resesa ma enti na ɛyɛ den sɛ obi bɛkyerɛ Bible ase. Latvia nyaa asomdwoe mfe pii, nanso akyiri yi akodi bɛsɛe hɔ. Russia asraafo dii Sweden so nkonim wɔ afe 1702 mu ma Alūksne bɛhyɛɛ Russia ase. Wotwaa Glück ne n’abusuafo asu kɔɔ Russia. * Wɔ saa mmere a na emu yɛ den mu no, Latvia Bible foforo a na Glück reyɛ ne Russia de a na wakyerɛ ase no yerae. Owui wɔ Moscow wɔ afe 1705 mu.

Latvia ne Russia Bible a akyiri yi ɔyɛe a ɛyerae no ma wɔhweree ade kɛse. Nanso ɛde besi nnɛ no, obiara a ɔkenkan Latvia Bible no nya Bible a Glück dii kan kyerɛɛ ase no so mfaso.

Nnipa pii a wɔyɛɛ adwumaden de kyerɛɛ Bible no ase kɔɔ kasa afoforo mu no mu baako ne Ernst Glück. Eyi nti, ɛkame ayɛ sɛ nnipa a wɔka kasa horow nyinaa bi wɔ asase so no betumi akenkan Onyankopɔn Asɛm na wɔnam so ahu nokwasɛm a ɛsom bo a ɛwom no. Nokwarem no, Yehowa nam Bible nkyerɛase ahorow a ɛwɔ kasa ahorow bɛboro 2,000 mu no so rema nnipa a wɔwɔ baabiara ahu no.

[Ase hɔ nsɛm]

[Mfonini wɔ kratafa 13]

Glück nkyerɛase

[Mfonini wɔ kratafa 14]

Yehowa Adansefo kyerɛkyerɛ Bible no wɔ kurow a Glück kyerɛɛ Bible no ase wom no mu