“So Wunim Onyankopɔn Din?”

ƆBEA bi a ɔwɔ Asia Mfinimfini anafo fam atɔe ani gyee asɛmmisa yi ho. Ná asɛmmisa yi wɔ February 8, 2004, Nyan! nsɛmma nhoma no akyi. Ɔbea no kyerɛw kɔmaa wɔn a wɔyɛɛ nsɛmma nhoma no sɛ: “Bere a m’ani bɔɔ mo nsɛmma nhoma no so pɛ na m’ani gyee ho, na ɛboaa me ma mebɔɔ bra pa. Merenya anigye kɛse wɔ asetra mu. Mereka yɛn Nyankopɔn no ne asomdwoe a ne ho nimdeɛ ma yenya no ho asɛm akyerɛ obiara.”

Nokwarem no, nnipa rehu Onyankopɔn din, Yehowa no wɔ mmeae pii ‘de kɔ asase ano nohoa.’ (Asomafo Nnwuma 1:8) Sɛ nhwɛso no, wohu edin Yehowa yi a ɛwɔ Turkmen kasa mu no wɔ Kyerɛw Kronkron a wɔakyerɛ ase kɔ Turkmen kasa mu no mu. Dwom 8:1 kenkan sɛ: “Yehowa yɛn Awurade, wo din yɛ kɛse dɛn ara asase nyinaa so!”

Sɛnea ɛbɛyɛ a ɔbea no besua Onyankopɔn ho ade pii no, ɔsrɛe sɛ wɔmmrɛ no The Divine Name That Will Endure Forever nhomawa a ekura kratafa 32 no bi. Wo nso wubetumi aka kyerɛ Yehowa Adansefo ma wɔabrɛ wo nhomawa yi bi.