Yɛte Wiase Bi a Ne Gyinapɛn Resesa Mu

ATETESƐM bi a nnipa pii nim ka sɛ ɔbarima bi de kanea nantew awia ketee a na n’ani abere rehwehwɛ obi a obu bra pa, nanso wanhu bi. Ná wɔfrɛ ɔbarima no Diogenes, nyansapɛfo bi a ɔtraa ase wɔ Athens wɔ afeha a ɛto so anan A.Y.B. mu.

Sɛ́ saa atetesɛm no yɛ nokware anaa ɛnte saa no, yɛrentumi nkyerɛ. Nanso, sɛ anka Diogenes te ase nnɛ a n’ani abere paa rehwehwɛ nnipa a wobu bra pa a, anka ɛrenyɛ nwonwa. Ɛte sɛ nea nnipa pii nnye ntom sɛ ɛsɛ sɛ nnipa de abrabɔ gyinapɛn a wɔahyehyɛ bɔ wɔn bra. Nsɛm ho amanneɛbɔfo taa ka ɔbrasɛe a ɛkɔ so wɔ nnipa abrabɔ mu, aban mu, nnwuma mu, agodi mu, aguadi ne nneɛma afoforo mu ho asɛm. Nnipa mmu abrabɔ gyinapɛn no mu pii a eye a tetefo no de bɔɔ wɔn bra no bio. Ɛyɛ a wɔsan susuw gyinapɛn ahorow a wɔahyehyɛ ho, nanso mpɛn pii no enkosi hwee. Wobu abrabɔ gyinapɛn afoforo sɛ eye nanso wɔmfa nyɛ adwuma.

Alan Wolfe a ɔyɛ nyamesom mu nimdefo ka sɛ, “Ɛnnɛ, nnipa dodow no ara nnye abrabɔ gyinapɛn biako ntom bio.” Wɔkyerɛ sɛ ɔsan kae sɛ: “Ɛnnɛ, nnipa pii te nka sɛ wontumi mfa wɔn ho nto amammerɛ anaa ahyehyɛde ahorow so sɛ ɛnkyerɛ wɔn sɛnea wɔbɛbɔ wɔn bra.” Nyansapɛfo Jonathan Glover kaa mfe 100 a atwam no ho asɛm sɛ, nyamesom ne abrabɔ pa ho mmara a wogye tom wɔ baabiara a nnipa mfa nyɛ adwuma yiye no ka ho bi paa na basabasayɛ ne awudisɛm abu so saa wɔ wiase no.—Los Angeles Times.

Nanso ɛmfa ho sɛ nnipa dodow no ara adwene nhyia wɔ abrabɔ gyinapɛn a ɛsɛ sɛ wogye tom ho no, ebinom da so ara rehwehwɛ abrabɔ pa ho mmara a wɔde bɛbɔ wɔn bra. Mfe kakra a atwam no, Federico Mayor, a na kan ɔyɛ Amanaman Nkabom no asoɛe bi kwankyerɛfo panyin no kae sɛ “seesei abrabɔ ho mmara ho abehia wiase no paa sen bere biara.” Nanso abrabɔ pa ho gyinapɛn a wiase no apo no  nkyerɛ sɛ abrabɔ pa ho mmara biara nni hɔ a yebetumi agye atom na yɛde abɔ yɛn bra.

So nnipa nyinaa adwene betumi ahyia wɔ abrabɔ gyinapɛn pɔtee a ɛsɛ sɛ wɔde yɛ adwuma ho? Dabida. Na sɛ nnipa adwene nhyia wɔ papa ne bɔne mmara ho a, ɛbɛyɛ dɛn na obi atumi ahu sɛ biribi ye anaa enye? Ɛnnɛ nea aba ne sɛ obiara yɛ nea ɔpɛ. Nanso wubetumi ahu sɛ saa su yi mmaa nnipa abrabɔ nyɛɛ yiye ankasa.

Britain abakɔsɛm kyerɛwfo Paul Johnson gye di yiye sɛ adwene a ɛne sɛ yɛ nea wo ara wopɛ no ama “nnipa toto wɔn asɛyɛde ase, na wɔmfa abrabɔ gyinapɛn a eye a wogye tom” a na ɛte sɛ nea ɛwɔ hɔ ansa na afeha a ɛto so 20 no refi ase no “nyɛ adwuma bio.”

Ɛnde, so ebetumi ayɛ yiye sɛ yebenya “abrabɔ gyinapɛn a eye” anaa yebenya “abrabɔ pa ho mmara a wogye tom wɔ baabiara” de abɔ yɛn bra? So biribi wɔ hɔ a ebetumi ama yɛanya abrabɔ gyinapɛn a entwam da a ebetumi ama yɛn asetra adi mu na yɛanya daakye ho anidaso? Asɛm a edi hɔ no bebua nsɛmmisa yi.