So Onyankopɔn Ani Wɔ Wo So?

SO Yehowa a ɔyɛ Ɔbɔadeɛ a ne nsa ano adwuma yɛ fɛ no tumi hu ade? Akyinnye biara nni ho sɛ ohu ade! Bible ka no pefee sɛ: “Nea ɔnwenee aniwa no, ɔrenhu ade?” (Dwom 94:9) Yehowa hu ade kɔ akyiri koraa sen nnipa. Ɛnyɛ nea yɛyɛ nko na ohu, na mmom “ɔhwehwɛ koma mu,” na otumi ‘kari koma’ nso. (Mmebusɛm 17:3, NW; 21:2) Nokwasɛm ne sɛ, ɔwɔ tumi a obetumi de ahu yɛn adwenem, nea ɛkanyan yɛn, ne nea ɛwɔ yɛn komam ankasa.

Yehowa nim ɔhaw ahorow a yebetumi ahyia wɔ yɛn asetram, na otie yɛn adesrɛ. Odwontofo no kyerɛwee sɛ: “[Yehowa, NW] ani wɔ treneefo so, na n’aso tie wɔn sufrɛ. [Yehowa, NW] bɛn wɔn a wɔn koma abubu, na ogye wɔn a wɔn honhom apɛtɛw.” (Dwom 34:15, 18) Hwɛ sɛnea ɛyɛ awerɛkyekye sɛ yebehu sɛ Yehowa te yɛn asɛm ase, na otie nea yefi yɛn komam bisa no no!

Yehowa Nyankopɔn hu nneɛma a yɛyɛ wɔ kokoam no. Yiw, “nneɛma nyinaa ho da hɔ, na ɛso abue pefee, nea yɛne no wɔ akontaabu no anim.” (Hebrifo 4:13) Enti, Onyankopɔn hu nea yɛyɛ nyinaa, sɛ́ ɛyɛ papa anaa bɔne no. (Mmebusɛm 15:3) Sɛ nhwɛso no, Genesis 6:8, 9 ka sɛ: “Noa de, onyaa ɔdom wɔ [Yehowa, NW] anim” na ɔne “Onyankopɔn na ɛnantewee.” Yiw, esiane sɛ Noa tiee Onyankopɔn na ɔde n’asɛntrenee yɛɛ adwuma nti, onyaa Yehowa anim dom na Yehowa hyiraa no. (Genesis 6:22) Nanso, na nnipa a wɔwɔ Noa bere so no yɛ basabasa, na na wɔn bra asɛe. Onyankopɔn ammu n’ani angu nea na ɛrekɔ so no so. Onyankopɔn “hui sɛ nnipa bɔne dɔɔso pii asase so, na wɔn komam adwene nyinaa yɛ bɔne nko daa nyinaa.” Awiei koraa no, Yehowa sɛee abɔnefo no, na ɔkoraa Noa ne n’abusua so.—Genesis 6:5; 7:23.

So Yehowa ani bɛsɔ wo? Nokwasɛm ne sɛ Yehowa “de n’aniwa kyini fa asase nyinaa so, sɛ ɔde ne denyɛ bedi ama wɔn a wɔn koma di mũ wɔ ne ho no.” (2 Beresosɛm 16:9) Ɛrenkyɛ, ɔbɛsɛe abɔnefo nyinaa afi asase so bio, na obegye wɔn a wɔbrɛ wɔn ho ase komam no nkwa.—Dwom 37:10, 11.