Bere A Wohuw Kristofo so sɛ Awi

AKA bere tiaa bi ma Yesu awu no, ɔbɔɔ n’asuafo no kɔkɔ sɛ: “Hwɛ! Satan repɛ mo ahuw mo so sɛ awi.” (Luka 22:31) Dɛn na na Yesu rekyerɛ?

Wɔ Yesu bere so no, ná awi a wotwa gye bere ne ahoɔden pii. Nea edi kan no, na atwafo no boaboa awi no ano afiafi fi afuw mu. Afei, na wɔboro afiafi no wɔ awiporowbea, anaasɛ na wɔma mmoa twe ɔporow afiri fa afiafi no so ma ɛporow awi no fi afiafi no mu. Ná saa kwan yi na wɔfa so yi awi no fi afiafi ne ntɛtɛw no mu. Afei, na okuafo no huw so. Ná aba no begu awiporowbea hɔ ma mframa huw ntɛtɛw no kɔ. Awiei koraa no, na woyiyi wura biara fi awi no mu.

Sɛnea Yesu kae no, Satan de n’ani sii Yesu asuafo no so denneennen saa bere no, na ɔde n’ani asi yɛn so ɛnnɛ nso. (Efe. 6:11) Ɛyɛ nokware sɛ, ɛnyɛ ɔhaw biara a yehyia no na efi Satan hɔ tẽẽ. (Ɔsɛnk. 9:11) Nanso, Satan ani gye ho sɛ ɔbɛfa akwannuasa nyinaa so ama yɛagyae Onyankopɔn som. Sɛ nhwɛso no, Satan betumi ama yɛn ani abere honam fam nneɛma, na wama yɛde yɛn ho ahyɛ anigyede a ɛmfata anaa nna mu ɔbrasɛe mu. Obetumi nso afa yɛn mfɛfo sukuufo anaa adwumayɛfo, ne yɛn abusuafo a wɔnyɛ Adansefo so ahyɛ yɛn sɛ yɛnkɔ sukuu nkɔ akyiri anaa yɛnyɛ nnwuma akɛse a ɛwɔ wiase yi mu no bi. Bio nso, Satan betumi de ɔtaa aba yɛn so tẽẽ de abɔ mmɔden sɛ ɔbɛma yɛagyae Onyankopɔn som. Nokwarem no, akwan foforo pii wɔ hɔ a Satan fa so huw yɛn so.

Yɛbɛyɛ dɛn atumi ne ɔtamfo a ɔwɔ tumi yi adi asi? Yentumi mfa yɛn ankasa ahoɔden ne no nni asi. Satan ho yɛ den sen yɛn; nanso, yenim sɛ Yehowa ho yɛ den sen Satan koraa. Sɛ yɛde yɛn ho to Yehowa so koraa, fi yɛn komam bɔ mpae hwehwɛ nyansa ne akokoduru, na yɛde Yehowa akwankyerɛ yɛ adwuma kosi ase a, ɔbɛhyɛ yɛn den ma yɛatumi agyina Satan nhyɛso ano.—Dw. 25:4, 5.

Sɛ yɛrehyia sɔhwɛ a, ɛsɛ sɛ yenya nyansa a ɛbɛma yɛatumi ‘ahu papa ne bɔne mu nsonsonoe,’ sɛnea ɛbɛyɛ a Satan ntumi nnaadaa yɛn. (Heb. 5:13, 14) Yehowa betumi aboa yɛn ma yɛanya nyansa a ɛte saa. Afei, nea ɛbɛba biara no, ɛsɛ sɛ yɛkɔ so nantew ɔkwantrenee no so. Sɛ yɛde Yehowa akwankyerɛ yɛ adwuma a, akyinnye biara nni ho sɛ ɔbɛboa yɛn wɔ yɛn bo a yɛasi sɛ yɛde akokoduru bɛyɛ nea ɛteɛ no mu.—Efe. 6:10.

Satan bɛbɔ mmɔden sɛ obehuw yɛn so te sɛ awi. Nanso, Yehowa bɛhyɛ yɛn den ma yɛatumi agyina pintinn wɔ gyidi mu na yɛne Satan adi asi. (1 Pet. 5:9) Nokwarem no, Yehowa Asɛm ma yɛn awerɛhyem sɛ: “Munsiw Ɔbonsam kwan na obeguan afi mo ho.”—Yak. 4:7.