“Honhom No Hwehwɛ . . . Onyankopɔn Nneɛma A Emu Dɔ No” Mu

“Honhom no hwehwɛ nneɛma nyinaa mu, Onyankopɔn nneɛma a emu dɔ no mpo.”—1 KOR. 2:10.

1. Adwuma a honhom kronkron yɛ bɛn na Paulo kaa ho asɛm wɔ 1 Korintofo 2:10, na nsɛmmisa bɛn na ɛsɔre?

HWƐ sɛnea yɛn ani betumi agye sɛ Yehowa honhom kronkron reyɛ adwuma! Kyerɛwnsɛm no ka sɛ honhom no yɛ ɔboafo, ɛyɛ akyɛde, edi adanse, na ɛsrɛ ma yɛn. (Yoh. 14:16; Aso. 2:38; Rom. 8:16, 26, 27) Ɔsomafo Paulo kaa adwuma foforo a ɛho hia a honhom kronkron yɛ ho asɛm sɛ: “Honhom no hwehwɛ nneɛma nyinaa mu, Onyankopɔn nneɛma a emu dɔ no mpo” mu. (1 Kor. 2:10) Nokwarem no, Yehowa de ne honhom kronkron da N’Asɛm mu nokwasɛm a emu dɔ adi. Sɛ ɛnyɛ honhom kronkron na ɛboa yɛn a, anka yɛbɛyɛ dɛn ate Yehowa atirimpɔw ahorow ase? (Monkenkan 1 Korintofo 2:9-12.) Nanso, nsɛmmisa bi sɔre sɛ: Ɔkwan bɛn so na ‘honhom no hwehwɛ Onyankopɔn nneɛma a emu dɔ no’ mu? Henanom na Yehowa faa wɔn so daa saa nneɛma yi adi wɔ afeha a edi kan Y.B. mu? Ɔkwan bɛn so na honhom no hwehwɛ saa nneɛma a emu dɔ no mu wɔ yɛn bere yi so, na henanom na ɛfa wɔn so yɛ saa?

2. Akwan abien bɛn na na honhom no bɛfa so ayɛ adwuma?

² Yesu kyerɛɛ akwan abien a na honhom no bɛfa so ayɛ adwuma. Aka bere tiaa bi ma Yesu awu no, ɔka kyerɛɛ n’asomafo no sɛ: “Ɔboafo no, honhom kronkron no, a Agya no bɛsoma no me din mu no, ɔno na ɔbɛkyerɛ mo biribiara akaakae mo nea maka akyerɛ mo nyinaa.” (Yoh. 14:26) Enti, na honhom kronkron bɛyɛ adwuma sɛ ɔkyerɛkyerɛfo ne ɔkaakaefo. Sɛ́ ɔkyerɛkyerɛfo no, na ɛbɛboa Kristofo ma wɔate nneɛma a bere bi na wɔnte ase no ase. Sɛ́ ɔkaakaefo no, na ɛbɛboa wɔn ma wɔakae nneɛma a na wɔakyerɛkyerɛ  mu akyerɛ wɔn no na wɔde adi dwuma yiye.

Wɔ Afeha a Edi Kan no Mu

3. Asɛm bɛn na Yesu kae a ɛkyerɛ sɛ na wɔbɛda “Onyankopɔn nneɛma a emu dɔ no” adi nkakrankakra?

³ Yesu ankasa kyerɛkyerɛɛ n’asuafo no nokware ahorow pii a na wɔntee ho asɛm da. Nanso, na nneɛma pii da so wɔ hɔ a ɛsɛ sɛ wosua. Yesu ka kyerɛɛ asomafo no sɛ: “Mewɔ nsɛm pii ka kyerɛ mo, nanso morentumi nsoa seesei. Nanso sɛ ɔno, nokware no honhom no, ba a, ɔbɛkyerɛ mo kwan akɔ nokware no nyinaa mu.” (Yoh. 16:12, 13) Yesu nam asɛm a ɔkae yi so kyerɛe sɛ wɔnam honhom kronkron so bɛda Onyankopɔn nneɛma a emu dɔ no adi nkakrankakra.

4. Wɔ Pentekoste afe 33 Y.B. mu no, ɔkwan bɛn so na honhom kronkron yɛɛ adwuma sɛ ɔkyerɛkyerɛfo ne ɔkaakaefo?

⁴ “Nokware no honhom no” bae wɔ Pentekoste afe 33 Y.B. mu bere a wohwiee honhom no guu Kristofo bɛyɛ 120 a na wɔahyiam wɔ Yerusalem so no. (Aso. 1:4, 5, 15; 2:1-4) Wonyaa adanse a wɔde wɔn ani hui ne nea wɔde wɔn aso nso tee. Asuafo no kaa “Onyankopɔn nneɛma akɛse no ho asɛm” wɔ kasa horow mu. (Aso. 2:5-11) Afei, na bere adu sɛ wɔda biribi foforo adi. Ná odiyifo Yoel ahyɛ honhom kronkron a na wobehwie agu asuafo no so ho nkɔm dedaw. (Yoel 2:28-32) Ná nnipa a wɔwɔ hɔ no rehu saa nkɔmhyɛ no mmamu a na wɔn mu biara nhwɛɛ kwan saa da, na ɔsomafo Petro dii anim kyerɛkyerɛɛ nea na ɛrekɔ so no mu. (Monkenkan Asomafo Nnwuma 2:14-18.) Wɔ saa kwan yi so no, honhom kronkron yɛɛ adwuma sɛ ɔkyerɛkyerɛfo maa Petro tee ase sɛ nkɔm a wɔhyɛɛ no tete no na na ɛrenya mmamu wɔ asuafo no so no. Honhom no san yɛɛ adwuma sɛ ɔkaakaefo, efisɛ ɛnyɛ Yoel nkɔmhyɛ no mu nsɛm nkutoo na Petro fa kaa asɛm, na mmom ɔfaa Dawid nnwom abien mu nsɛm nso kae. (Dw. 16:8-11; 110:1; Aso. 2:25-28, 34, 35) Ná nneɛma a nnipa a wɔahyiam wɔ hɔ nyinaa hui na wɔtee no yɛ Onyankopɔn nneɛma a emu dɔ ampa.

5, 6. (a) Wɔ Pentekoste afe 33 Y.B. mu akyi no, apam foforo no ho nsɛmmisa a ɛho hia bɛn na na ɛsɛ sɛ wonya ho mmuae? (b) Henanom na wɔfaa wɔn so de saa nsɛm yi bae ma wosusuw ho, na ɔkwan bɛn so na wosisii ho gyinae?

⁵ Ná nneɛma pii da so wɔ hɔ a ɛsɛ sɛ wɔma Kristofo a wɔtenaa ase wɔ afeha a edi kan no mu no te ase. Sɛ nhwɛso no, na wɔwɔ apam foforo a na afi ase reyɛ adwuma saa Pentekoste da no ho nsɛmmisa. So na Yudafo ne wɔn a na wɔasakra abɛyɛ Yudafo nkutoo na na wɔbɛyɛ apam foforo no mufo? So na wobetumi agye Amanaman mufo nso aba apam foforo no mu na wɔde honhom kronkron asra wɔn? (Aso. 10:45) So na ɛho behia sɛ Amanaman mufo mmarima di kan twa twetia na wodi Mose Mmara so? (Aso. 15:1, 5) Ná eyinom yɛ nsɛmmisa a ɛho hia paa. Ná wohia Yehowa honhom na ama wɔatumi ahwehwɛ nneɛma a emu dɔ yi mu. Nanso, na henanom na honhom no bɛfa wɔn so ayɛ adwuma?

⁶ Ɛyɛ anuanom a na wodi asafo no anim no na wɔde saa nsɛm no mu biara bae ma wosusuw ho. Ná Petro, Paulo, ne Barnaba wɔ nhyiam a sodikuw no yɛe no ase, na wɔkaa sɛnea na Yehowa adan n’ani aba Amanaman mufo a wontwaa twetia no so ho asɛm. (Aso. 15:7-12) Bere a sodikuw no susuw adanse yi ne Hebri Kyerɛwnsɛm no mu nsɛm ho wiei no, honhom kronkron boaa wɔn ma wosii gyinae bi. Afei wɔkyerɛw krataa de kaa gyinae a na wɔasi no ho asɛm kyerɛɛ asafo ahorow no.—Monkenkan Asomafo Nnwuma 15:25-30; 16:4, 5; Efe. 3:5, 6.

7. Akwan bɛn na wɔfaa so daa nokware ahorow a emu dɔ no adi?

⁷ Wɔnam nhoma a honhom no maa Yohane, Petro, Yakobo, ne Paulo kyerɛwee no so kyerɛkyerɛɛ nneɛma foforo pii mu. Nanso, bere a wɔkyerɛw Kristofo Kyerɛwnsɛm no wiei akyi bere bi no, nkɔmhyɛ dom akyɛde ne nimdeɛ a na wɔnam anwonwakwan so da no adi no gyaee. (1 Kor. 13:8) So na honhom no bɛkɔ so ayɛ adwuma sɛ ɔkyerɛkyerɛfo ne ɔkaakaefo? So na ɛbɛkɔ so aboa Kristofo ma wɔahwehwɛ Onyankopɔn nneɛma a emu dɔ no mu? Ná nkɔmhyɛ bi wɔ hɔ a ɛkyerɛ sɛ ɛbɛkɔ so ayɛ saa.

 Wɔ Awiei Bere no Mu

8, 9. Henanom na ‘wɔbɛhyerɛn’ sɛ mmadwemma wɔ awiei bere no mu?

⁸ Bere a ɔbɔfo bi reka awiei bere no ho asɛm no, ɔhyɛɛ nkɔm sɛ: “Mmadwemma no bɛhyerɛn sɛnea wim hyerɛn, na wɔn a wɔde nnipa bebree ba trenee mu no bɛyɛ sɛ nsoromma daa daa. . . . Na nimdeɛ a edi mu bɛdɔɔso.” (Dan. 12:3, 4) Ná henanom ne mmadwemma a wɔbɛhyerɛn no? Yesu ma yehuu eyi ho biribi wɔ ne mfatoho a ɛfa awi ne nwura bɔne ho no mu. Bere a na ɔreka “wiase nhyehyɛe awiei” ho asɛm no, ɔkae sɛ: “Saa bere no treneefo bɛhyerɛn paa sɛ owia wɔ wɔn Agya ahenni mu.” (Mat. 13:39, 43) Bere a Yesu rekyerɛkyerɛ mu no, ɔdaa no adi sɛ “treneefo” no ne “ahenni mma no,” na wɔne Kristofo a wɔasra wɔn no.—Mat. 13:38.

⁹ So na Kristofo a wɔasra wɔn nyinaa “bɛhyerɛn”? Yebetumi aka sɛ wɔn nyinaa bɛhyerɛn, efisɛ na Kristofo nyinaa bɛyɛ asɛnka ne asuafoyɛ adwuma no bi, na wɔahyehyɛ wɔn ho nkuran wɔ asafo nhyiam ase. Na wɔn a wɔasra wɔn no na wobedi kan ayɛ eyi ho nhwɛso. (Sak. 8:23) Nanso, nea ɛka eyinom ho no, na wɔbɛsan ada nneɛma a emu dɔ adi wɔ awiei bere no mu. ‘Wɔsɔɔ’ nkɔm a Daniel hyɛe no “ano” kosii awiei bere no. (Dan. 12:9) Ná ɔkwan bɛn na honhom no bɛfa so ahwehwɛ saa nneɛma a emu dɔ no mu, na na henanom na ɛbɛfa wɔn so ayɛ saa?

10. (a) Henanom na honhom no fa wɔn so ma yehu nokware ahorow a emu dɔ no wɔ nna a edi akyiri no mu? (b) Kyerɛ ɔkwan a wɔfaa so kyerɛkyerɛɛ Yehowa honhom fam asɔrefie kɛse no mu.

 ¹⁰ Sɛ bere du sɛ wɔma yɛte Bible mu asɛm bi ase wɔ yɛn bere yi so a, honhom kronkron boa “akoa nokwafo ne ɔbadwemma” no ananmusifo a wodi asafo no anim a wɔwɔ wiase nyinaa adwumayɛbea ti no ma wɔte nokware ahorow a emu dɔ a bere bi na yɛnte ase no ase. (Mat. 24:45; 1 Kor. 2:13) Ɛyɛ Sodikuw no mufo nyinaa na wosusuw nsakrae a wɔyɛ wɔ nsɛm bi mu no ho. (Aso. 15:6) Wotintim nea wohu no ma obiara nya so mfaso. (Mat. 10:27) Bere rekɔ so no, ebia ɛho behia sɛ wɔde nkyerɛkyerɛmu foforo ma, na wɔde nokwaredi kyerɛkyerɛ eyi nso mu.—Hwɛ adaka a ɛne  “Sɛnea Honhom no Ma Yehuu Nea Honhom Fam Asɔrefie no Kyerɛ” no.

Sɛnea Yenya Dwuma a Honhom no Di so Mfaso Nnɛ

11. Ɔkwan bɛn so na Kristofo a wɔwɔ hɔ nnɛ nyinaa nya dwuma a honhom kronkron di de da Onyankopɔn nneɛma a emu dɔ no adi so mfaso?

¹¹ Nokware Kristofo nyinaa nya dwuma a honhom kronkron di de da Onyankopɔn nneɛma a emu dɔ no adi so mfaso. Sɛnea Kristofo a wɔtenaa ase wɔ afeha a edi kan no mu yɛe no, ɛnnɛ yɛn nso yesua ade, na akyiri yi yɛkae, na yɛde nsɛm a honhom kronkron boa yɛn ma yɛte ase no yɛ adwuma. (Luka 12:11, 12) Ɛho nhia sɛ yesua nhoma kɔ akyiri ansa na yɛatumi ate Onyankopɔn Asɛm mu nokware ahorow a emu dɔ a wɔatintim no ase. (Aso. 4:13) Yɛbɛyɛ dɛn atumi ate Onyankopɔn nneɛma a emu dɔ no ase yiye? Momma yensusuw nyansahyɛ krakra bi ho nhwɛ.

12. Bere bɛn na ɛsɛ sɛ yɛbɔ mpae hwehwɛ honhom kronkron?

¹² Bɔ mpae hwehwɛ honhom kronkron. Sɛ yɛrebesusuw Kyerɛwnsɛm mu asɛm bi ho a, ɛsɛ sɛ yedi kan bɔ mpae hwehwɛ honhom kronkron mmoa ma ɛkyerɛ yɛn kwan. Sɛ yɛn nkutoo na yɛwɔ hɔ anaa bere a yɛde besua ade no sua mpo a, ɛsɛ sɛ yɛyɛ saa. Akyinnye biara nni ho sɛ sɛ yefi ahobrɛase mu de yɛn adesrɛ a ɛte saa to yɛn soro Agya no anim a, ɛbɛma n’ani agye. Sɛnea Yesu daa no adi no, sɛ yefi yɛn komam srɛ Yehowa a, obeyi ne yam de ne honhom kronkron ama yɛn.—Luka 11:13.

13, 14. Sɛ yedi kan sua nea yebesusuw ho wɔ asafo nhyiam ase ansa na yɛakɔ a, ɔkwan bɛn so na ɛboa yɛn ma yɛte Onyankopɔn nneɛma a emu dɔ no ase?

¹³ Di kan sua nea yebesusuw ho wɔ asafo nhyiam ase ansa na woakɔ. Akoa kuw no ma yɛn nsa ka “aduan bere a ɛsɛ mu.” “Akoa” no kyerɛkyerɛ Kyerɛwnsɛm no mu wɔ nhoma ahorow mu ma yɛn, na ɔyɛ nhyehyɛe ma yesua nhoma no wɔ asafo nhyiam ahorow ase, na ɔyɛ saa de di n’asɛyɛde ahorow ho dwuma. Akoa no susuw nneɛma ho kɔ akyiri ansa na waka akyerɛ “anuanom nyinaa” sɛ wonsusuw asɛm pɔtẽẽ bi ho. (1 Pet. 2:17; Kol. 4:16; Yuda 3) Sɛ yɛyɛ nea yebetumi biara de nyansahyɛ ahorow a ɔde ma yɛn no yɛ adwuma a, na yɛretie honhom kronkron akwankyerɛ.—Adi. 2:29.

¹⁴ Sɛ yɛresua ade ansa na yɛakɔ Kristofo nhyiam a, ɛyɛ papa sɛ yɛkenkan kyerɛw nsɛm a emu nsɛm nni nhoma no mu no, na yɛbɔ mmɔden sɛ yebehu sɛnea emu biara fa asɛm a yɛresusuw ho no ho. Sɛ yɛyɛ eyi a, yɛde nkakrankakra bɛte Bible no ase yiye. (Aso. 17:11, 12) Sɛ yɛkenkan kyerɛw nsɛm a emu nsɛm nni nhoma no mu no a, ɛma nsɛm a yɛkenkan no ka yɛn  adwenem, na sɛ ɛho behia a, honhom kronkron betumi aboa yɛn ma yɛakae. Afei nso, sɛ yɛde yɛn ani hu kratafa a asɛm no wɔ wɔ Bible mu a, bere a yehia no, ebetumi aboa yɛn ma yɛahu baabi a ɛwɔ.

15. Dɛn nti na ɛsɛ sɛ yehu nhoma biara a ɛba mu nsɛm nyinaa, na woyɛ dɛn yɛ saa?

¹⁵ Hu nhoma biara a ɛba mu nsɛm nyinaa. Ɛnyɛ yɛn nhoma ahorow no mu nsɛm nyinaa na yesusuw ho wɔ yɛn asafo nhyiam ase, nanso wɔayɛ ama yɛn sɛ ɛmmoa yɛn. Yɛn nsɛmma nhoma a yɛde kɔma ɔmanfo no mpo, yɛn ankasa nti na wɔyɛ. Wɔ wiase a adagyew nnim yi mu no, yɛtaa twɛn obi anaa biribi. Sɛ yɛfa nhoma a yɛnkenkanee anaa nea yennya nkenkan nwiei hyɛ yɛn ho a, ebia yebetumi de bere a yɛde retwɛn no akenkan kakra. Ebinom tie yɛn nhoma no mu nsɛm a wɔakyere agu afiri so bere a wɔnam anaasɛ wɔte kar mu, na ɛma wohu yɛn nhoma biara a ɛba mu nsɛm nyinaa. Wɔyɛ nhwehwɛmu yiye ansa na wɔakyerɛw yɛn nhoma ahorow no, nanso obiara a otumi kenkan ade kenkan ma n’ani gye, na emu nsɛm no nyinaa boa ma yenya Onyankopɔn som ho anisɔ kɛse.—Hab. 2:2.

16. Sɛ yɛkyerɛw nsɛmmisa bi a ɛba yɛn adwenem to hɔ na yɛhwehwɛ mu a, mfaso bɛn na yenya?

¹⁶ Dwinnwen nea wokenkan ho. Sɛ worekenkan Bible anaa Bible ho nhoma a, gye bere fa dwinnwen nea worekenkan no ho. Sɛ wode w’adwene di nea worekenkan no akyi yiye a, nsɛmmisa bi betumi aba w’adwenem. Wubetumi akyerɛw nsɛmmisa a ɛtete saa ato hɔ na akyiri yi woahwehwɛ mu akɔ akyiri. Mpɛn pii no, sɛ yɛreyɛ nneɛma a yɛn ani gye ho ho nhwehwɛmu a, ɛnna yesua ade kɔ akyiri. Yɛde ntease a yenya no ka nimdeɛ a yɛwɔ dedaw no ho, na sɛ yehia a, yɛatumi de ayɛ adwuma.—Mat. 13:52.

17. Nhyehyɛe bɛn na w’abusua anaa w’ankasa woayɛ a wode sua ade?

¹⁷ Yi bere si hɔ fa yɛ abusua som. Sodikuw no ahyɛ yɛn nyinaa nkuran sɛ yenyi anwummere bi anaa bere foforo nsi hɔ dapɛn biara na yɛn ankasa anaa yɛn abusua mfa nsua ade. Nsakrae a wɔayɛ wɔ bere a yɛde kɔ asafo nhyiam mu no ma yenya hokwan de saa afotu yi yɛ adwuma. Dɛn na mususuw ho wɔ Abusua Som a moyɛ no anwummere no ase? Ebinom kenkan Bible, na wɔyɛ Bible mu nsɛm bi a ɛma nsɛmmisa bi sɔre wɔ wɔn adwenem ho nhwehwɛmu, na wɔkyerɛkyerɛw nsɛm ntiantiaa a emu da hɔ gu wɔn Bible mu. Mmusua pii gye bere susuw sɛnea wɔn abusua no de nea wɔasua no bɛyɛ adwuma ho. Mmusua ti binom paw nneɛma bi a wosusuw sɛ ɛho hia sɛ abusua no susuw ho anaasɛ nsɛm bi anaa nsɛmmisa bi a abusua no mufo aka sɛ wonsusuw ho ho. Akyinnye biara nni ho sɛ bere rekɔ so no, mubehu nneɛma foforo a ɛsɛ sɛ mususuw ho. *

18. Dɛn nti na ɛnsɛ sɛ yɛyɛ yɛn adwene sɛ yɛrensua Onyankopɔn Asɛm mu nokware ahorow a emu dɔ no ho ade?

¹⁸ Yesu kae sɛ honhom no bɛyɛ ɔboafo. Enti ɛnsɛ sɛ yɛyɛ yɛn adwene sɛ yɛrensua Onyankopɔn Asɛm mu nokware a emu dɔ no. Nokware a ɛtete saa no ka “Onyankopɔn ho nimdeɛ” a ɛsom bo no ho, na wɔhyɛ yɛn nkuran sɛ yɛnhwehwɛ mu. (Monkenkan Mmebusɛm 2:1-5.) Ɛma yehu nneɛma pii fa “nneɛma a Onyankopɔn asiesie ama wɔn a wɔdɔ no no” ho. Sɛ yɛbɔ mmɔden sɛ yebesua Yehowa Asɛm ho ade pii a, honhom kronkron bɛboa yɛn, efisɛ “honhom no hwehwɛ nneɛma nyinaa mu, Onyankopɔn nneɛma a emu dɔ no mpo” mu.—1 Kor. 2:9, 10.

[Ase hɔ asɛm]

Wubebua Dɛn?

• Akwan abien bɛn na honhom no fa so boa yɛn ma yɛhwehwɛ “Onyankopɔn nneɛma a emu dɔ no” mu?

• Henanom na honhom kronkron faa wɔn so daa nokware ahorow a emu dɔ no adi wɔ afeha a edi kan no mu?

• Ɔkwan bɛn na honhom kronkron fa so yɛ adwuma ma yɛte nneɛma ase wɔ yɛn bere yi mu?

• Dɛn na wubetumi ayɛ na ama woanya dwuma a honhom no di so mfaso?

[Adesua no ho Nsɛmmisa]

[Adaka wɔ kratafa 22]

 Sɛnea Honhom no Ma Yehuu Nea Honhom Fam Asɔrefie no Kyerɛ

“Onyankopɔn nneɛma a emu dɔ no” a wɔma wohui wɔ afeha a edi kan no mu no bi ne ntamadan no ne asɔrefie a wosisii no akyiri yi a na egyina hɔ ma honhom fam ade kɛse ankasa a na ɛbɛba daakye no. Paulo frɛɛ nea na egyina hɔ ankasa ma ntamadan ne asɔrefie no sɛ “nokware ntamadan a nea ɔyɛe ne Yehowa, na ɛnyɛ onipa.” (Heb. 8:2) Ná eyi yɛ honhom fam asɔrefie kɛse bi, a ɛno ne nhyehyɛe a ɛma yetumi fa Yesu Kristo afɔrebɔ ne n’asɔfodi so kɔ Onyankopɔn anim no.

Wɔde “nokware ntamadan” no sii hɔ wɔ afe 29 Y.B. mu, bere a wɔbɔɔ Yesu asu na Yehowa gyee no toom sɛ nea ɔbɛbɔ afɔre a ɛyɛ pɛ no. (Heb. 10:5-10) Yesu wui na ɔsɔree akyi no, ɔkɔɔ honhom fam asɔrefie no Kronkron mu Kronkronbea hɔ, na ɔde n’afɔrebɔ no bo kɔɔ “Onyankopɔn anim.”—Heb. 9:11, 12, 24.

Ɔsomafo Paulo kyerɛw Kristofo a wɔasra wɔn no ho asɛm wɔ baabi foforo sɛ “ɛrepagyaw ayɛ asɔrefie kronkron ama Yehowa.” (Efe. 2:20-22) So na saa asɔrefie yi ne “nokware ntamadan” a ɔkaa ho asɛm akyiri yi wɔ ne krataa a ɔde kɔmaa Hebrifo no mu no yɛ ade koro? Mfe pii a atwam no, na Yehowa asomfo susuw sɛ ɛyɛ ade koro. Ná wosusuw sɛ wɔresiesie Kristofo a wɔasra wɔn no wɔ asase so ma wɔabɛyɛ “abo” wɔ Yehowa asɔrefie a ɛwɔ soro no mu.—1 Pet. 2:5.

Nanso, aka kakra ma afe 1971 aba no, akoa kuw no mufo a wodi asafo no anim no fii ase hui sɛ asɔrefie a Paulo kaa ho asɛm wɔ Efesofo nhoma no mu no rentumi nyɛ Yehowa honhom fam asɔrefie kɛse no. Sɛ na Kristofo a wɔasra wɔn a wɔanyan wɔn no na wɔbom yɛ “nokware ntamadan” no a, anka wodii kan de sii hɔ wɔ wɔn wusɔre a efii ase wɔ “Awurade mmae mu” no akyi. (1 Tes. 4:15-17) Nanso, bere a Paulo reka ntamadan no ho asɛm no, ɔkyerɛwee sɛ: “Saa ntamadan yi yɛ mfatoho ma bere a ɛwɔ hɔ seesei yi.”—Heb. 9:9.

Bere a yɛde kyerɛw nsɛm yi totoo kyerɛw nsɛm foforo ho no, ɛbɛdaa adi pefee sɛ ɛnyɛ afei na wɔresi honhom fam asɔrefie no, na afei nso, Kristofo a wɔasra wɔn no nyɛ “abo” a wɔresiesie wɔn wɔ asase so de wɔn akɔ mu. Mmom no, Kristofo a wɔasra wɔn no resom wɔ honhom fam asɔrefie no adiwo ne ne Kronkronbea hɔ, na wɔbɔ Onyankopɔn “ayeyi afɔre” daa.—Heb. 13:15.

[Mfonini wɔ kratafa 23]

Yɛbɛyɛ dɛn atumi ate “Onyankopɔn nneɛma a emu dɔ no” ase yiye?