“Munhu Nnipa Ko A Ɛsɛ Sɛ Moyɛ!”
“Munhu Nnipa Ko A Ɛsɛ Sɛ Moyɛ!”
“Esiane sɛ eyinom nyinaa bɛnan nti, munhu nnipa ko a ɛsɛ sɛ moyɛ wɔ abrabɔ kronkron ne onyamesom pa mu!” —2 PET. 3:11.
1. Dɛn nti na na Petro afotu a ɛwɔ ne krataa a ɛto so abien a ɔde kɔmaa Kristofo a na wɔwɔ ne bere so no yɛ ne bere mu de?
BERE a Onyankopɔn honhom kaa ɔsomafo Petro ma ɔkyerɛw ne krataa a ɛto so abien no, na Kristofo asafo no ahyia ɔtaa pii dedaw, nanso na eyi mmaa nsi a na asafo no yɛ no nkɔɔ fam anaasɛ na ɛmmrɛɛ ne nkɔso ase. Enti Ɔbonsam de ɔkwan foforo a na ɔde anya nnipa mpɛn pii wɔ bere bi a na atwam no dii dwuma. Sɛnea Petro ma ɛdaa adi no, Satan bɔɔ mmɔden sɛ ɔde akyerɛkyerɛfo atorofo a na wɔwɔ “aniwa a awaresɛe ahyɛ no mã” ne “koma a aben anibere mu” bɛsɛe Onyankopɔn nkurɔfo adwene. (2 Pet. 2:1-3, 14; Yuda 4) Ɛno nti, Petro krataa a ɛto so abien no yɛ afotu a ɛka koma a na ɛbɛma wɔakɔ so adi Onyankopɔn nokware.
2. Dɛn na 2 Petro ti 3 no twe adwene si so, na nsɛm bɛn na ɛsɛ sɛ yebisa yɛn ho?
2 Petro kyerɛwee sɛ: “Mpɛn dodow a mewɔ ntamadan yi mu de, mihu sɛ ɛteɛ sɛ mekaakae mo de kanyan mo, na minim sɛ ɛrenkyɛ koraa na mapa me ntamadan yi agu baabi . . . Enti bere nyinaa mɛyɛ nea metumi biara na sɛ mekɔ a, mo ankasa moatumi akae eyinom.” (2 Pet. 1:13-15) Nokwarem no, na Petro nim sɛ ɛrenkyɛ na wawu, nanso na ɔpɛ sɛ wɔkae nkaesɛm a ɛyɛ ne bere mu de a na ɔde ama wɔn no. Nokwasɛm ne sɛ, wɔde saa nkaesɛm no kaa Bible mu nsɛm ho, na yɛn mu biara betumi akenkan nnɛ. Petro krataa a ɛto so abien no ti 3 no fa yɛn ho titiriw, efisɛ ɛtwe adwene si nneɛma nhyehyɛe a ɛwɔ hɔ yi “nna a edi akyiri,” ne sɛnkyerɛnne kwan so ɔsoro ne asase a wɔbɛsɛe no no so. (2 Pet. 3:3, 7, 10) Afotu bɛn na Petro de ma yɛn? Ɔkwan bɛn so na sɛ yɛde n’afotu no yɛ adwuma a, ɛbɛboa yɛn ma yɛanya Yehowa anim dom?
3, 4. (a) Asɛm bɛn na Petro kae, na kɔkɔbɔ bɛn na ɔde mae? (b) Nneɛma abiɛsa bɛn na yɛrebesusuw ho?
3 Bere a Petro kaa Satan wiase a wɔbɛsɛe no ho asɛm wiei no, ɔkae sɛ: “Munhu nnipa ko a ɛsɛ sɛ moyɛ wɔ abrabɔ kronkron ne onyamesom pa mu!” (2 Pet. 3:11, 12) Ná Petro nim sɛ wɔn a wɔyɛ Yehowa apɛde na wɔda su ahorow a ɛsɔ n’ani adi nkutoo na wobegye wɔn nkwa wɔ “aweredi da” a ɛreba no mu. (Yes. 61:2) Enti ɔsomafo no san kae sɛ: “Enti, adɔfo, esiane sɛ munim eyi dedaw nti, monhwɛ mo ho yiye na mmaratofo [akyerɛkyerɛfo atorofo] amfa wɔn nnebɔne no antwe mo ankɔ, na bere a moatim yi moanhwe ase.”—2 Pet. 3:17.
4 Esiane sɛ na Petro ka wɔn a ‘wonim eyi dedaw’ no ho nti, na onim sɛ wɔ nna a edi akyiri mu no, ɛho behia sɛ Kristofo hwɛ wɔn ho yiye paa na ama wɔatumi akɔ so akura wɔn mũdi mu. Akyiri yi, ɔsomafo Yohane kyerɛkyerɛɛ nea enti a na ɛsɛ sɛ wɔhwɛ wɔn ho yiye paa no mu pefee. Yohane dii kan huu Satan a na wobetu no afi soro ne wɔn a “wodi Onyankopɔn ahyɛde so na wokura Yesu ho adansedi adwuma mu” a na ne ‘bo afuw wɔn denneennen’ no. (Adi. 12:9, 12, 17) Onyankopɔn asomfo anokwafo a wɔasra wɔn ne wɔn ahokafo “nguan foforo” anokwafo no bedi nkonim. (Yoh. 10:16) Na yɛn mu biara nso ɛ? So yɛbɛkɔ so akura yɛn mũdi mu? Sɛ yɛbɔ mmɔden (1) nya su pa, (2) yɛamma nkekae ne dɛm biara amma yɛn ho wɔ abrabɔ fam ne Yehowa som mu, na (3) yenya adwempa wɔ sɔhwɛ ahorow ho a, wɔbɛboa yɛn ma yɛakɔ so akura yɛn mũdi mu. Ma yensusuw saa nsɛm yi ho nhwɛ.
Nya Su Pa
5, 6. Su ahorow bɛn na ɛsɛ sɛ yɛbɔ mmɔden nya, na dɛn nti na ɛsɛ sɛ yɛyɛ ‘nea yebetumi biara’ na ama yɛanya saa su no?
5 Petro kyerɛwee wɔ ne krataa a ɛto so abien no mfiase mu sɛ: “Monyɛ nea mubetumi biara mfa ɔbra pa nka mo gyidi ho, na momfa nimdeɛ nka ɔbra pa ho; momfa ahosodi nka mo nimdeɛ ho, momfa boasetɔ nka mo ahosodi ho, na momfa onyamesom pa nka mo boasetɔ ho; momfa onuadɔ nka mo nyamesom pa ho, na momfa ɔdɔ amapa nka mo nuadɔ ho. Na sɛ eyinom nyinaa wɔ mo mu ma ebu so a, ɛremma monyɛ mmerɛw anaa wɔn a wɔnsow aba yɛn Awurade Yesu Kristo ho nokware nimdeɛ ho.”—2 Pet. 1:5-8.
6 Nokwarem no, ɛsɛ sɛ yɛyɛ ‘nea yebetumi biara,’ anaasɛ yɛbɔ mmɔden na ama yɛayɛ nneɛma a ɛbɛboa yɛn ma yɛanya su pa. Sɛ nhwɛso no, egye mmɔdenbɔ na ama yɛatumi akɔ Kristofo nhyiam ahorow nyinaa, akenkan Bible da biara da, na yɛn ankasa yɛakɔ so asua ade daa. Na ebegye mmɔdenbɔ ne nhyehyɛe pa na ama yɛatumi ayɛ Abusua Som a yɛyɛ no anwummere no daa ma ayɛ anigye na yɛanya so mfaso. Nanso, sɛ yenya yɛ nhyehyɛe pa na yɛma saa nneɛma a mfaso wɔ so no yɛ ka yɛn hɔ a, ne yɛ renyɛ yɛn den, titiriw bere a yehu mfaso a ɛwɔ so no.
7, 8. (a) Dɛn na ebinom aka afa Abusua Som a wɔyɛ no anwummere no ho? (b) Ɔkwan bɛn so na worenya mo abusua som no so mfaso?
7 Onuawa bi kyerɛw faa nhyehyɛe a wɔayɛ ama abusua som no ho sɛ: “Ɛma yetumi sua nneɛma pii ho ade.” Onuawa foforo nso kae sɛ: “Nokwasɛm ni, na mempɛ sɛ yegyae nhoma mu adesua no yɛ. Ná ɛno ne asafo nhyiam a m’ani gye ho paa. Nanso seesei a yɛyɛ yɛn Abusua Som anwummere no, mihu sɛ Yehowa nim nea yehia ne bere a ehia sɛ ɔde ma yɛn.” Abusua ti bi kae sɛ: “Abusua som a yɛyɛ no boa yɛn paa. Sɛ mema adesua no fa me ne me yere ahiade pɔtẽẽ bi ho a, ɛma yɛn ani gye paa! Yɛn baanu nyinaa hu sɛ yɛrenya nkɔso wɔ sɛnea yɛda honhom kronkron aba no adi mu, na yɛrenya anigye kɛse wɔ asɛnka adwuma no mu sen bere biara.” Abusua ti foforo nso kae sɛ: “Yɛma mmofra no ankasa yɛ wɔn nhwehwɛmu na ama wɔresua nneɛma pii, na wɔn ani gye ho nso. Abusua som nhyehyɛe no ma yenya ahotoso paa sɛ Yehowa nim nea yehia, na obua yɛn mpaebɔ.” So saa ara na wo nso wote nka wɔ nhyehyɛe pa a Onyankopɔn ayɛ ama yɛn no ho?
8 Mma nneɛma nketenkete ntwitware abusua som no mu. Awarefo bi kae sɛ, “Wɔ adapɛn anan a atwam ni, Yawda anwummere biara, na biribi si wɔ yɛn abusua mu a anka ɛreyɛ ama yɛagyae yɛn adesua no yɛ, nanso yɛamma antwitware adesua no mu.” Nokwarem no, ɛtɔ mmere bi a ɛho behia sɛ mosesa bere a mode yɛ adesua no. Nanso, si wo bo sɛ worentwa Abusua Som a moyɛ no anwummere no mu dapɛn biako mpo!
9. Dɛn na Yehowa yɛ de boaa Yeremia, na dɛn na yebetumi asua afi ne nhwɛso no mu?
9 Odiyifo Yeremia yɛɛ nhwɛso pa maa yɛn. Ná ohia honhom fam mmoa a Yehowa de maa no no, na ɔkyerɛɛ ho anisɔ kɛse. Saa mmoa no ma otumi de boasetɔ kaa asɛm no kyerɛɛ nkurɔfo a na wɔapirim wɔn koma no. Yeremia kae sɛ: ‘Yehowa asɛm yɛɛ me komam sɛ ogya a ɛredɛw a wɔato mu me nnompe mu.’ (Yer. 20:8, 9) Mmoa a onyae no san ma otumi gyinaa ahokyere a ɛbae a ekowiei wɔ Yerusalem sɛe mu no ano. Ɛnnɛ, yɛwɔ Onyankopɔn Asɛm no nyinaa. Sɛ yɛde nsi sua Onyankopɔn Asɛm no na yenya Onyankopɔn adwene wɔ nneɛma ho a, yebetumi akɔ so de anigye ayɛ asɛnka adwuma no, de nokwaredi agyina sɔhwɛ ahorow ano, na yɛakɔ so ama yɛn ho atew wɔ abrabɔ fam ne Yehowa som mu te sɛ Yeremia.—Yak. 5:10.
Mma “Nkekae ne Dɛm Biara” Mma Wo Ho
10, 11. Dɛn nti na ɛsɛ sɛ yɛyɛ nea yebetumi biara sɛ yɛremma “nkekae ne dɛm biara” mma yɛn ho, na dɛn na ɛno hwehwɛ sɛ yɛyɛ?
10 Yɛn a yɛyɛ Kristofo no nim sɛ yɛte nna a edi akyiri no mu. Enti, ɛnyɛ yɛn nwonwa sɛ nneɛma a Yehowa kyi te sɛ anibere, nna mu adapaade, ne awudisɛm ahyɛ wiase no mu ma saa. Yebetumi aka ɔkwan a Satan fa so no ho asɛm wɔ saa kwan yi so sɛ: ‘Sɛ wɔrentumi nhunahuna Onyankopɔn asomfo a, ebia wɔn abrabɔ de, wobetumi asɛe no.’ (Adi. 2:13, 14) Enti, ɛsɛ sɛ yetie afotu a Petro fi ɔdɔ mu de maa yɛn yi. Ɔkae sɛ: “Monyɛ nea mubetumi biara mma [Onyankopɔn mmehu] mo sɛ nnipa a wɔn ho nni nkekae ne dɛm biara wɔ asomdwoe mu.”—2 Pet. 3:14.
11 Petro tĩĩ afotu a na wadi kan de ama no mu kae sɛ “monyɛ nea mubetumi biara.” Ɛda adi pefee sɛ, Yehowa a ɔde ne honhom kaa Petro ma ɔkaa saa asɛm no nim sɛ ehia sɛ yɛyere yɛn ho paa na “nkekae ne dɛm biara” amma yɛn ho, na amma Satan wiase no mu dontori angu yɛn ho fĩ. Nea ɛsɛ sɛ yɛyere yɛn ho yɛ no bi ne sɛ yɛbɛbɔ yɛn koma ho ban, na amma akɔnnɔ bɔne anhyɛ yɛn so. (Monkenkan Mmebusɛm 4:23; Yakobo 1:14, 15.) Nea ɛka ho bio nso ne sɛ, ɛnsɛ sɛ yɛma wɔn a ɔbra pa a yɛbɔ sɛ Kristofo no yɛ wɔn nwonwa na “wɔkasa tia [yɛn]” no bu yɛn abam da.—1 Pet. 4:4.
12. Awerɛhyem bɛn na wɔde ma yɛn wɔ Luka 11:13?
12 Esiane sɛ yɛtɔ sin nti, ɛyɛ den ma yɛn sɛ yɛbɛyɛ nea ɛteɛ. (Rom. 7:21-25) Sɛ yɛkɔ Yehowa a oyi ne yam de ne honhom kronkron ma wɔn a wobisa no no nkyɛn nkutoo a, ɛnna yebetumi ahwɛ kwan sɛ yɛbɛyɛ nea ɛteɛ. (Luka 11:13) Saa honhom no nso ma yenya su ahorow a ɛsɔ Onyankopɔn ani, na ɛno boa yɛn na amma asetena mu nneɛma antwetwe yɛn amma yɛanyɛ bɔne, na ɛsan nso boa yɛn ma yegyina sɔhwɛ ahorow a emu betumi akɔ so ayɛ den bere a Yehowa da no rebɛn no ano.
Ma Sɔhwɛ Ahorow Nhyɛ Wo Den
13. Sɛ yehyia sɔhwɛ ahorow a, dɛn na ɛbɛboa yɛn ma yɛagyina ano?
13 Bere tenten a yɛte nneɛma nhyehyɛe dedaw yi mu de, yebehyia sɔhwɛ ahorow. Nanso sɛ́ anka wobɛma w’abam abu no, dɛn nti na womfa sɔhwɛ ahorow a wuhyia no sɛ ɛyɛ hokwan a woanya sɛ wode bɛma Onyankopɔn ahu sɛ wodɔ no ampa, na womma ne mu gyidi a wowɔ mu nyɛ den, na n’Asɛm ho anigye a wowɔ nso nyɛ kɛse? Osuani Yakobo kyerɛwee sɛ: “Me nuanom, sɛ muhyia sɔhwɛ ahorow pii a, mummu no anigye koraa na munhu sɛ mo gyidi a wɔasɔ ahwɛ yi bewie boasetɔ mu.” (Yak. 1:2-4) Kae nso sɛ, “Yehowa nim sɛnea obegye wɔn a woyi wɔn yam som no no afi sɔhwɛ mu.”—2 Pet. 2:9.
14. Ɔkwan bɛn so na Yosef asɛm no hyɛ wo nkuran?
14 Susuw Yakob ba Yosef a ɔno ara ne nuanom tɔn no ma ɔkɔyɛɛ akoa no asɛm no ho hwɛ. (Gen. 37:23-28; 42:21) So atirimɔdensɛm a Yosef nuanom de dii no no ma ogyaee ne gyidi mu? So Yosef bo fuw Onyankopɔn sɛ wama kwan ma asɛmmɔne a ɛte saa ato no? Onyankopɔn Asɛm bua pefee sɛ ne bo amfuw! Bio nso, Yosef sɔhwɛ no anso hɔ ara. Akyiri yi, wotwaa atoro too no so sɛ anka ɔrekɔto obi mmonnaa ma wɔde no kɔtoo afiase. Eyi nso amma wannyae Yehowa som. (Gen. 39:9-21) Mmom no, ɔmaa sɔhwɛ ahorow no hyɛɛ no den, na wohyiraa no kɛse wɔ saa a ɔyɛe no ho.
15. Dɛn na yebetumi asua afi nea Naomi yɛe no mu?
15 Nokwarem no, sɔhwɛ ahorow betumi ama yɛn werɛ ahow anaasɛ yɛn abam abu mpo. Ebia Yosef werɛ howee anaa n’abam bui mmere bi. Akyinnye biara nni ho sɛ Onyankopɔn asomfo anokwafo foforo nso tee nka saa ara. Susuw Naomi a ne kunu ne ne mmabarima baanu wuwui no ho hwɛ. Ɔkae sɛ: “Mommfrɛ me Naomi. Momfrɛ me Mara [ase ne Nwenenwene], efisɛ ade nyinaa so Tumfoɔ no ne me adi no [nwenweenwene].” (Rut 1:20, 21) Ɛnyɛ nwonwa sɛ Naomi kaa saa, na na ntease wom nso. Nanso, sɛnea Yosef yɛe no, ɔno nso annyae ne gyidi mu, na saa ara na wansɛe ɔne Yehowa ntam nso. Yehowa nso hyiraa saa ɔbea a ɔsom bo yi. (Rut 4:13-17, 22) Nea ɛsen saa no, Yehowa besiesie nneɛma bɔne a Satan ne ne wiase bɔne no de aba no nyinaa wɔ Paradise a ɛbɛba asase so no mu. Bible ka sɛ: “Wɔrenkae kan nneɛma no bio, na ɛremma komam bio.”—Yes. 65:17.
16. Su bɛn na ɛsɛ sɛ yenya wɔ mpaebɔ ho, na dɛn nti na ɛsɛ sɛ yenya saa su no?
16 Ɛmfa ho sɔhwɛ biara a ebia yebehyia no, nim a yenim sɛ Onyankopɔn dɔ yɛn bere nyinaa no bɛboa yɛn ma yɛatumi agyina ano. (Monkenkan Romafo 8:35-39.) Ɛwom sɛ Satan rennyae mmɔden a ɔrebɔ sɛ obebu yɛn abam no de, nanso sɛ yɛkɔ so ma yɛn ‘adwenem da hɔ’ na ‘yɛwɛn ma mpaebɔ’ a, ɔrennya yɛn da. (1 Pet. 4:7) Yesu kae sɛ: “Enti, monkɔ so nwɛn, na monsrɛ bere nyinaa na moatumi aguan nneɛma a etwa sɛ esisi yi nyinaa, na moatumi agyina onipa Ba no anim.” (Luka 21:36) Hyɛ sɛnea Yesu de asɛmfua ‘ɔsrɛ’ anaa nkotɔsrɛ, a ɛyɛ mpaebɔ a efi koma mu tɔnn no dii dwuma no nsow. Yesu nam afotu a ɔde mae sɛ yɛnkotow nsrɛ no so sii so dua sɛ ɛnnɛ ne bere a ɛsɛ sɛ yesusuw gyinabea a yɛwɔ wɔ ɔno ne n’Agya anim no ho anibere so. Ɛyɛ wɔn a wɔwɔ gyinabea pa wɔ Yehowa anim no nkutoo na wobetumi ahwɛ kwan sɛ wobegye wɔn nkwa wɔ Yehowa da no mu.
Kɔ so Yɛ Nnam wɔ Yehowa Som Mu
17. Sɛ asasesin a wudi adanse wom no mu yɛ den a, ɔkwan bɛn so na nhwɛso pa a tete adiyifo no yɛe no betumi aboa wo?
17 Ɔsom adwuma a yɛyɛ no ma yenya abotɔyam. Eyi ma yɛkae asɛm a Petro kae no. Ɔkae sɛ: “Munhu nnipa ko a ɛsɛ sɛ moyɛ wɔ abrabɔ kronkron ne onyamesom pa mu!” (2 Pet. 3:11) Nneɛma a yɛyɛ de kyerɛ sɛ yɛwɔ onyamesom pa no mu nea edi kan koraa ne asɛmpa no a yɛka no. (Mat. 24:14) Nokwasɛm ne sɛ, nsasesin bi wɔ hɔ a emu asɛnka adwuma betumi ayɛ den, esiane sɛ ebia emu nnipa yɛ anibiannaso anaasɛ wɔsɔre tia yɛn anaasɛ wɔma asetena mu nneɛma a wohia gye wɔn adwene nti. Ná ɛsɛ sɛ Yehowa asomfo a wɔtenaa ase tete no gyina su a ɛtete saa a nkurɔfo daa no adi ano. Nanso, wɔamma wɔn abam ammu da, na mmom wɔkɔɔ so kaa Onyankopɔn asɛm no “mpɛn pii.” (Monkenkan 2 Beresosɛm 36:15, 16; Yer. 7:24-26) Dɛn na ɛboaa wɔn ma wotumi gyinaa ano? Wobuu adwuma a na wɔreyɛ no sɛnea na Yehowa bu no no, na ɛnyɛ sɛnea na wiase no bu no no. Afei nso, wobuu no sɛ ɛyɛ nidi kɛse sɛ Onyankopɔn din da wɔn so.—Yer. 15:16.
18. Ɔkwan bɛn so na Ahenni no ho asɛm a yɛka no bɛma obiara ahu Onyankopɔn din no yiye daakye?
18 Yɛn nso yɛanya hokwan reka Yehowa din ne n’atirimpɔw ho asɛm kyerɛ afoforo. Wode susuw eyi ho hwɛ: Esiane asɛnka adwuma a yɛyɛ no nti, sɛ Onyankopɔn da kɛse no ba a, n’atamfo rentumi nka sɛ wɔanka Yehowa ne n’atirimpɔw ho asɛm ankyerɛ wɔn da. Nokwarem no, wobehu sɛ Yehowa na ɔne wɔn reko sɛnea Farao a ɔtenaa ase tete no hui no. (Ex. 8:1, 20; 14:25) Bere koro no ara no, Yehowa bedi n’asomfo anokwafo ni denam hu a ɔbɛma obiara ahu pefee sɛ wɔn na na wɔyɛ n’ananmusifo ampa no so.—Monkenkan Hesekiel 2:5; 33:33.
19. Dɛn na yebetumi ayɛ de akyerɛ sɛ yɛpɛ sɛ yɛde Yehowa ntoboase no di dwuma yiye?
19 Bere a Petro de ne krataa a ɛto so abien a ɔde kɔmaa ne mfɛfo gyidifo reba awiei no, ɔkae sɛ: “Mummu yɛn Awurade ntoboase no sɛ nkwagye.” (2 Pet. 3:15) Nokwarem no, momma yɛnkɔ so mfa Yehowa ntoboase no nni dwuma yiye. Ɔkwan bɛn so? Denam su ahorow a ɛsɔ n’ani a yebenya, “nkekae ne dɛm biara” a yɛremma ɛmma yɛn ho, adwempa a yebenya wɔ sɔhwɛ ahorow ho, ne nsi a yɛbɛkɔ so de aka Ahenni no ho asɛm no so. Sɛ yɛyɛ saa a, ebetumi ama yɛanya nhyira a ɛto rentwa da wɔ “ɔsoro foforo ne asase foforo” no mu.—2 Pet. 3:13.
So Wokae?
• Yɛbɛyɛ dɛn atumi anya su pa?
• Dɛn na yebetumi ayɛ na “nkekae ne dɛm biara” amma yɛn ho?
• Dɛn na yebetumi asua afi Yosef ne Naomi hɔ?
• Dɛn nti na asɛnka adwuma a yɛyɛ no yɛ hokwan kɛse?
[Adesua no ho Nsɛmmisa]
[Mfonini wɔ kratafa 9]
Okununom, dɛn na ɛbɛboa mo ma mo ne mo abusua anya su pa?
[Mfonini wɔ kratafa 10]
Dɛn na yebetumi asua afi sɛnea Yosef yɛɛ n’ade wɔ sɔhwɛ ho no mu?