Ayamye Nan Abufuw

DA BI Adansefo baanu a wɔwɔ Netherlands a wɔde George ne Manon kɔɔ ɔbea panyin bi nkyɛn sɛ wɔrekɔka Ahenni ho asɛmpa no akyerɛ no. Wɔtee sɛ na waware mprenu ma ne kununom baanu no nyinaa ne ne babarima awu. Bio nso na ɔkwaha dennen bi ayɛ no. Ɔyɛɛ dinn tiee asɛm a wɔreka no, nanso wantew n’anim amma wɔn.

George ka kyerɛɛ Manon sɛ ɔhwɛ a ɔbea no ayɛ ankonam na biribi haw no, enti osusuw sɛ wɔnsan nkɔsra no na wɔmfa nhwiren bi nkɔma no. Na ɔbea no din de Rie, na bere a wɔde nhwiren no kɔe no, ne ho dwiriw no. Nanso bere amma kwan sɛ ɔne wɔn bɛbɔ nkɔmmɔ, enti wɔde hyɛɛ da foforo. Bere a da no soe a George ne Manon kɔe no, wɔbɔɔ ɔpon no mu, nanso obiara annye so. Wɔsan kɔɔ hɔ mmere foforo, nanso wɔanhu no. Afei na ɛyɛ wɔn sɛ ɔbea no ahyɛ da ne wɔn redi atetɛatetɛ.

Afei da bi, George nyaa Rie wɔ fie. Ɔbea no paa no kyɛw sɛ wɔbae no wɔanto no fie, na ɔka kyerɛɛ no sɛ na ɔwɔ ayaresabea. Ɔkae sɛ: “Munnim nea esii bere a mo baanu fii fie ha no. Mifii ase kenkan Bible!” Wɔbɔɔ nkɔmmɔ kama, na wɔne no fii Bible adesua ase.

Bere a Rie resua Bible no, ɛsesaa no ma ɔbea a na abufuw ne yaw ahyɛ no ma no bɛyɛɛ obi a n’anim tew na ne yam ye. Ɛwom sɛ na yare no ama waka fie de, nanso wantwentwɛn ne nan ase koraa na ofii ase kaa nneɛma foforo a wasua no ho asɛm kyerɛɛ obiara a ɔbɛsraa no. Yare no nti na ontumi nkɔ asafo nhyiam daa, nanso anuanom sraa no maa n’ani gyei. Da a odii mfe 82 no, saa da no ara na ɔkɔɔ ɔmansin nhyiam bi ase ma wɔbɔɔ no asu de kyerɛe sɛ wahyira ne ho so ama Onyankopɔn.

Ɛno akyi asram kakra bi no, Rie wui na wohuu anwensɛm bi a wakyerɛw. Ɔkae wɔ anwensɛm no mu sɛ mmerewabɔ ne ankonamyɛ ne abɛbrɛsɛ na ɛnam, na ɔkyerɛe sɛ ayamye ho hia paa. Manon kae sɛ: “Anwensɛm no kaa me koma, na meda Yehowa ase sɛ ɔboaa yɛn ma yɛdaa ayamye adi kyerɛɛ ɔbea no.”

Yehowa ankasa ayɛ nhwɛso a ɛboa yɛn ma yɛda ɔdɔ ne ayamye a ɛte saa adi. (Efe. 5:1, 2) Sɛ yɛnam ayamye so ‘da yɛn ho adi sɛ Onyankopɔn asomfo’ a, nnipa pii betie asɛm a yɛreka no.—2 Kor. 6:4, 6.