Nsɛmmisa a Efi Akenkanfo Hɔ

Bere bɛn na Britain ne Amerika Wiase Tumidi no bɛyɛɛ wiase tumidi a ɛtɔ so ason a Bible ka ho asɛm no?

▪ Ohoni kɛse a Ɔhene Nebukadnesar hui no nnyina hɔ mma wiase tumidi nyinaa. (Dan. 2:31-45) Mmom egyina hɔ ma wiase tumidi anum a ɛko tiaa Onyankopɔn nkurɔfo na edii tumi fi Daniel bere so reba no nkutoo.

Sɛ yɛhwɛ sɛnea Daniel kaa ohoni no ho asɛm a, yehu sɛ Britain ne Amerika Wiase Tumidi no bepue afi Roma mu, na ɛrenni Roma so nkonim. Daniel hui sɛ ohoni no nan yɛ dade, na dade no toam ara kosi ne nansoaa so. (Dade ne dɔte adi afra wɔ ne nan ase ne ne nansoaa mu.) * Eyi kyerɛ sɛ Britain ne Amerika Wiase Tumidi no bepue afi ohoni no nan a ɛyɛ dade a egyina hɔ ma Roma no mu. Abakɔsɛm kyerɛ sɛ saa pɛpɛɛpɛ na ɛbae. Ná Britain yɛ Roma Ahemman no fã, nanso mfe 1700 awiei mu hɔ no Britain maa ne homene so. Akyiri yi Amerika benyaa tumi kɛse. Nanso na wiase tumidi a ɛtɔ so ason a Bible ka ho asɛm no nnya mmae. Dɛn ntia? Efisɛ na Britain ne Amerika nkaa wɔn ntama mmɔɔ ano nyɛɛ biribi titiriw biara. Wiase Ko I no mu na wɔyɛɛ saa.

Saa bere no, Amerika titiriw na na “ahenni mma no” reyɛ adwuma. Ná wɔn adwuma no ti wɔ Brooklyn, New York. (Mat. 13:36-43) Ná wɔn a wɔasra wɔn no reka asɛmpa no denneennen wɔ aman a wɔhyɛ Britania Ahemman no ase nso mu. Wiase Ko I mu no, Britain ne Amerika dii nsawɔso ne wɔn atamfo koe. Afei nso ɔko no kanyan ɔmampɛ honhom ma enti Britain ne Amerika tuu wɔn ani sii Onyankopɔn ‘bea’ no asefo so. Wɔbaraa wɔn nhoma ahorow kyekyeree wɔn a wodi asɛnka adwuma no anim guu afiase.—Adi. 12:17.

Sɛ yɛhwɛ Bible nkɔmhyɛ mu a, yehu sɛ wiase tumidi a ɛtɔ so ason no anyi ne ti wɔ mfe 1700 awiei bere a Britain fii ase maa ne homene so no. Mmom wiase tumidi a ɛtɔ so ason no bae Awurade da no mfiase. *

[Ase hɔ nsɛm]

[Kratafa 19 mfonini]

Wɔde anuanom baawɔtwe a wɔwɔ Ɔwɛn Aban asafo no ti koguu afiase June 1918