Wotuu Wɔn Ho Mae Koraa​—Wɔ Ecuador

NÁ ƐHO abehia sɛ aberante bi a ɔwɔ Italy a wɔfrɛ no Bruno si gyinae bi. Ná afei ara na wawie ntoaso sukuu, na ɔno na odii kan wɔ wɔn sɔhwɛ mu. Enti abusuafo ne akyerɛkyerɛfo tutu guu n’asom sɛ ɔntoa so nkɔ sukuupɔn. Ná wahyira ne ho so ama Yehowa ahyɛ no bɔ sɛ ɔde n’apɛde bedi kan wɔ n’asetenam. Enti afei gyinae bɛn na obesi? Ɔkae sɛ: “Mebɔɔ mpae ka kyerɛɛ Yehowa sɛ medi me bɔhyɛ so na mede n’apɛde adi kan wɔ m’asetenam. Nanso mekaa me komam asɛm nso. Mekae sɛ mepɛ sɛ m’ani gye na mitumi yɛ nneɛma pii wɔ ne som mu.”

 Mfe kakra akyi no, Bruno tu kɔɔ Ecuador, South America. Ɔka sɛ Yehowa tiee ne mpaebɔ ma ne nsa kaa nea n’ani nna so koraa. Bere a okoduu Ecuador no, sɛɛ na mmerante ne mmabaa pii atu kɔ hɔ dedaw reyɛ Yehowa som adwuma denneennen.

MMABUN A ‘WƆSƆ YEHOWA HWƐ’

Yehowa to nsa frɛ yɛn sɛ: ‘Monsɔ me nhwɛ sɛ meremmue ɔsoro mfɛnsere mma mo na merenhwie nhyira ngu mo so anaa.’ (Mal. 3:10) Bruno ne mmabun mpempem pii agye saa asɛm yi atom, enti ‘wɔasɔ Yehowa ahwɛ.’ Ɔdɔ a wɔwɔ ma Onyankopɔn nti, wosii gyinae sɛ wɔde wɔn bere, wɔn ahoɔden, ne wɔn sika bɛsom no wɔ baabi a adawurubɔfo nnɔɔso.

Bere a mmerante ne mmabaa yi duu ɔman foforo no so no, wohui ampa sɛ “otwa adwuma no sõ, nanso adwumayɛfo no sua.” (Mat. 9:37) Eyi ho nhwɛso ne asɛm a Jaqueline a ofi Germany kyerɛw kɔɔ Ecuador baa dwumadibea no. Ɔkyerɛwee sɛ: “Mebaa Ecuador no, bɛyɛ mfe abien ara ni, nanso me ne nnipa 13 sua Bible, na wɔn mu 4 ba adesua daa. Ɛyɛ anigyesɛm ankasa.” Chantal a ofi Canada nso ka sɛ: “Afe 2008 mu no, mituu kɔɔ Ecuador mpoano baabi. Saa bere no na asafo biako pɛ na ɛwɔ hɔ, nanso seesei asafo abiɛsa na ɛwɔ hɔ na akwampaefo a wɔwɔ hɔ nso boro 30.  Biribiara nni hɔ a ɛyɛ me anigye sen sɛ mehu sɛ Bible asuafo pii renya nkɔso saa!” Nnansa yi ara na Chantal tu kɔɔ kurow bi a egu Andes Bepɔw no so. Nnipa 75,000 na wɔte kurom hɔ nanso asafo biako pɛ na ɛwɔ hɔ. Chantal ka sɛ: “Nnipa pii regye nokware no, na ama asɛnka adwuma no ayɛ anika paa.”

NSƐNNENNEN A ƐWOM

Nea yɛreka yi nkyerɛ sɛ ɛyɛ mmerɛw sɛ wubetu akɔ ɔman foforo so akɔsom wɔ hɔ. Mmabun binom mpo de, nsɛnnennen no fi ase ansa na wɔafi wɔn man mu. Kayla a ofi United States ka sɛ: “Nsɛm a anuanom binom a wɔwɔ m’asafo mu kekae no buu m’abam. Ná saa anuanom no nni adwemmɔne biara, nanso na wonhu nea enti a mepɛ sɛ mitu kɔ ɔman foforo so kɔyɛ akwampae adwuma no wɔ hɔ. Ɛtɔ da bi a na m’adwene atu afra, enti mibisaa me ho sɛ, ‘Gyinae a masi yi ye?’” Kayla bɔɔ Yehowa mpae daa na ɔne anuanom mmarima ne mmea a wɔn ani da hɔ bɔɔ nkɔmmɔ. Eyi boaa no ma ohui sɛ Yehowa hyira wɔn a woyi wɔn yam som no. Afei Kayla yɛɛ n’adwene sɛ ɔbɛkɔ.

Ebinom nso wɔ hɔ a, na ɛyɛ den ma wɔn sɛ wobesua kasa foforo. Siobhan a ofi Ireland ka sɛ: “Sɛ mepɛ sɛ meka asɛm bi na mintumi nka a, na ɛhaw me. Mibehui sɛ ɛsɛ sɛ minya abotare na mede animia sua kasa no, na sɛ midi mfomso a na mede ayɛ serew.” Anna a ofi Estonia ka sɛ: “Ná ɔhyew wɔ hɔ, mfuturu agye baabiara afa, na na ɛyɛ den sɛ wobɛkɔ akogyina pipe ase anya nsuhyew aguare. Nanso na ɔhaw yi mu biara nni hɔ a ɛto Spanish sua. Ɛtɔ mmere bi a, na ɛyɛ me sɛ minnyae kasa no sua ntena me baabi. Nanso mibehui sɛ ɛsɛ sɛ mede m’adwene si mmɔden a merebɔ so na ɛnyɛ mfomso a midi.”

Ade foforo a ɛyɛ yaw ne sɛ wubegyaw w’abusuafo ne wo nnamfo hɔ akɔtena baabi. Jonathan a ofi United States ka sɛ: “Bere a mikoduu hɔ no, ankyɛ koraa na m’ani gyinaa m’abusuafo ne me nnamfo, na meyɛɛ basaa. Nanso bere a minyaa bere pii kenkan Bible na meyɛɛ asɛnka adwuma no, mihui sɛ me ho resan me. Afei bere a minyaa suahu pii wɔ asɛnka adwuma no mu na  minyaa nnamfo foforo wɔ asafo no mu no, m’ani san gyei.”

Ebia wubehu nso sɛ ɔman foforo so asetena nna fam. Wubehu sɛ ɛhɔ nte sɛ wo kurom. Beau a ofi Canada ka sɛ: “Sɛ wowɔ wo kurom a nneɛma bi wɔ hɔ a wunya daa, enti wonnwen ho koraa. Ebia wunya pipe nsu ne anyinam ahoɔden daa, nanso ɛha de, ɛba nnɛ a ɔkyena na ate kɔ.” Aman pii so no, akwantu nyɛ ahogono, na nnipa bebree nnim akyerɛw ne akenkan. Ines a ofi Austria ka sɛ nea ɛboaa no ne sɛ ɔde n’adwene sii su pa a nnipa no wɔ so. Ɔka sɛ: “Wɔpɛ nnipa, wɔn yam ye, na wodwo. Nea ɛsen ne nyinaa no, wɔn ani gye ho sɛ wobesua Onyankopɔn ho asɛm.”

‘NHYIRA BEBU SO’

Mmerante ne mmabaa a wɔresom wɔ Ecuador yi nyinaa de nneɛma bi abɔ afɔre, nanso wɔahu nso sɛ Yehowa ‘tumi yɛ ade ma ɛkyɛn nea wosusuw koraa.’ (Efe. 3:20) Ampa, wɔahu sɛ wɔanya ‘nhyira ma abu so.’ (Mal. 3:10) Tie nea wɔka fa asɛnka adwuma no ho:

Bruno: “Bere a mebaa Ecuador no, mifii ase yɛɛ asɛnka adwuma no wɔ Amazon mpɔtam. Ná ɛhɔ yɛ anika paa. Akyiri yi meboa ma wosii adan foforo wɔ Ecuador Betel. Seesei meresom wɔ Betel hɔ. Bere a mewɔ Italy no, meyɛɛ m’adwene sɛ mede Yehowa apɛde bedi kan, na mekae nso sɛ mepɛ sɛ m’ani gye na mitumi yɛ nneɛma pii wɔ ne som mu. Ampa-ne-ampa ara wama abam saa.”

Beau: “Seesei mabɛn Yehowa paa efisɛ mede me bere nyinaa reyɛ ɔsom adwuma no wɔ Ecuador ha. Eyi akyi no, mitumi tutu akwan kɔhwɛ mmeae a ɛyɛ anika. Ɛyɛ biribi a na ɛda me koma so.”

Anna: “Esiane sɛ meyɛ osigyani nti, na minnye nni sɛ metumi ayɛ sɛ ɔsɛmpatrɛwfo. Nanso seesei de mahu sɛ metumi ayɛ. Yehowa ahyira me ma seesei me ne nnipa pii sua ade, meboa ma wosisi Ahenni Asa, na manya nnamfo pii nso.”

Elke: “Bere a mewɔ Austria no, na mebɔ mpae daa sɛ Yehowa mmoa me ma minnya onipa biako pɛ ne no nsua Bible. Mebaa ha yi, manya nnipa 15 ne wɔn sua Bible! Sɛ mihu sɛ saafo yi de anigye resua Yehowa ho ade a, na me koma atɔ me yam.”

Joel: “Sɛ wokɔ ɔman foforo so kɔyɛ Yehowa som adwuma a, wusua nneɛma pii. Wuhu sɛ ɛsɛ sɛ wode wo ho nyinaa to Yehowa so. Woyɛ saa a, ɔno nso behyira wo mmɔdenbɔ so ma w’ani agye! Bere a mifi United States baa ha foforo no, na adawurubɔfo 6 pɛ na wɔwɔ baabi a mewɔ no, nanso afe biako ntam na yenyaa adawurubɔfo 21. Nnipa 110 na wɔbaa Nkaedi no bi.”

WO NSO Ɛ?

Anuanom mmerante ne mmabaa, so mubetumi akɔsom wɔ baabi a adawurubɔfo nnɔɔso? Ebehia sɛ wototo nneɛma yiye ansa na woasi gyinae a ɛte saa. Nanso nea ehia paa ne sɛ wobɛdɔ Yehowa ne wo yɔnko nnipa. Sɛ wowɔ ɔdɔ a ɛte saa, na sɛ wubetumi atu akɔ ɔman foforo so akɔsom a, ɛnde fa asɛm no to Yehowa anim. Afei wo ne w’awofo ne asafo mu mpanyimfo mmɔ ho nkɔmmɔ. Ebia wubehu sɛ wo nso wubetumi atu akɔ baabi akɔsom ma w’ani agye.

[Asɛm a wɔafa aka wɔ kratafa 3]

Kayla a ofi United States bɔɔ Yehowa mpae daa na ɔne anuanom mmarima ne mmea a wɔn ani da hɔ bɔɔ nkɔmmɔ. Eyi boaa no ma ohui sɛ Yehowa hyira wɔn a woyi wɔn yam som no

[Kratafa 6 adaka/​mfonini]

Sɛnea wubesiesie wo ho akɔsom wɔ ɔman foforo so

• Sua ade daa

• Kenkan August 2011 Yɛn Ahenni Som, kratafa 4-6

• Wo ne wɔn a wɔasom wɔ ɔman foforo so pɛn mmɔ nkɔmmɔ

• Kenkan ɔman no abakɔsɛm ne amammerɛ

• Sua ɛhɔ kasa kakra

[Kratafa 6 adaka/​mfonini]

Nea ebinom yɛ de hwɛ wɔn ho bere a wɔresom wɔ ɔman foforo so ni:

• Afe biara wɔkɔ wɔn kurom kɔyɛ adwuma asram kakra

• Wɔde wɔn fie ma han

• Wɔma obi hwɛ wɔn adwuma so

• Wɔyɛ adwuma wɔ Intanɛt so

[Mfonini wɔ kratafa 4, 5]

1 Jaqueline a ofi Germany

2 Bruno a ofi Italy

3 Beau a ofi Canada

4 Siobhan a ofi Ireland

5 Joel a ofi United States

6 Jonathan a ofi United States

7 Anna a ofi Estonia

8 Elke a ofi Austria

9 Chantal a ofi Canada

10 Ines a ofi Austria