Nsɛm a Akenkanfo Bisa

Dɛn Nti Na Yehowa Adansefo Nni Ako?

Baabiara a Yehowa Adansefo te no, wonim wɔn sɛ efi tete na wɔmfa wɔn ho nhyɛ amanaman ntam akodi anaa ɔmanko mu. Nhwehwɛmu nhoma bi a wɔkyerɛw no mfe 50 ni no kae sɛ: “Sɛ edu ɔko bere a, Yehowa Adansefo nnyina ɔfã biara.”—Australian Encyclopædia.

Ade titiriw a enti Adansefo no mfa wɔn ho nhyɛ akodi mu ne sɛ, sɛ Kristofo no, ɛbɛsɛe wɔn ahonim. Awurade Yesu Kristo ahyɛde ne ne nhwɛso na wɔde atete wɔn ahonim. Ɔka kyerɛɛ n’akyidifo no sɛ wɔnnɔ wɔn yɔnkonom. Afei nso, ɔhyɛe sɛ: “Monkɔ so nnɔ mo atamfo, na monyɛ wɔn a wɔtan mo no papa.” (Luka 6:27; Mateo 22:39) Bere a Yesu asuafo no mu baako bɔɔ mmɔden sɛ ɔde nkrante a ɛhyɛ ne ho bɛbɔ Yesu ho ban no, Yesu ka kyerɛɛ no sɛ: “San fa wo nkrante no hyɛ nea ɛhyɛ, na wɔn a wɔtwe nkrante nyinaa bewu nkrante ano.” (Mateo 26:52) Enti Yesu nam ne nsɛm a ɔkae ne ne nneyɛe so kyerɛe pefee sɛ ɛnsɛ sɛ n’akyidifo kura akode.

Ade foforo nti a Yehowa Adansefo nni ako ne sɛ wɔn nuanom a wɔne wɔn som no wɔ wiase baabiara. Enti sɛ wodi ako a, ɛbɛma onua ne onua de abɔ ani, na ɛno ne Yesu ahyɛde a ɛne sɛ ‘wɔnnodɔ wɔn ho’ no nhyia.—Yohane 13:35.

Yehowa Adansefo mmu ɔdɔ ho nnyinasosɛm a yɛaka ho asɛm no sɛ nsusuwii bi ara kwa. Sɛ mfatoho no, susuw nea wɔyɛe wɔ Wiase Ko II, a ɛkɔɔ so wɔ afe 1939 kosi 1945 mu no ho hwɛ. Wɔde Yehowa Adansefo bɛboro 4,300 guu afiase wɔ United States, sɛ wɔamfa wɔn ho anhyɛ ɔko no mu nti. Wɔ Britain no, wɔde nnipa bɛboro 1,500, a na wɔn mu bɛboro 300 yɛ mmea, guu afiase esiane sɛ wɔanyɛ nnwuma ammoa ɔko no nti. Wɔ Nasi Germany no, Aban no hyɛe ma wokunkum Adansefo bɛboro 270 sɛ wɔamfa wɔn ho anhyɛ ɔko no mu. Wɔde Adansefo bɛboro 10,000 guu afiase anaa nneduaban mu wɔ Nasi nniso no ase. Adansefo a wɔwɔ Japan no nso huu amane saa ara. Obiara a ne ho nipa bi wui wɔ akono wɔ Wiase Ko II no mu—anaa akodi biara a akɔ so wɔ ɛno akyi—betumi anya awerɛhyem sɛ Yehowa Adansefo nsa nni wɔn mu biako mpo wu mu.

Adwene a Yehowa Adansefo kura wɔ akodi ho no da adi pefee wɔ Wolfgang Kusserow nsɛm a etwa to a emu da hɔ no mu. Wɔ afe 1942 mu no, Nasifo no twaa Germanni aberante a na wadi mfe 20 yi ti, efisɛ wankɔ ɔko. (Yesaia 2:4) Ɔkae wɔ asraafo asɛnnibea no anim sɛ: “Wɔde Onyankopɔn Asɛm a ɛwɔ Kyerɛw Kronkron no mu na ɛtetee me sɛ Yehowa Ɔdansefo. Mmara Kronkron a ɛsen biara a Onyankopɔn de ama adesamma ne sɛ: ‘Ɛsɛ sɛ wodɔ Onyankopɔn sen biribiara, na wodɔ wo yɔnko sɛ wo ho.’ Mmara nsɛm foforo ka sɛ: ‘Nni awu.’ So yɛn Bɔfo no ma wɔkyerɛw eyinom nyinaa maa nnua?”—Marko 12:29-31; Exodus 20:13.

Yehowa Adansefo gye di sɛ, Yehowa, ade nyinaa so Tumfoɔ Nyankopɔn no nkutoo na ɔde asomdwoe a enni awiei bɛba asase so. Wɔhwɛ kwan sɛ Yehowa bedi ne bɔhyɛ a ɛne sɛ ‘ɔbɛma akodi agyae kosi asase ano’ no so.—Dwom 46:9.