Ɛrenkyɛ Biara Asase Bɛdan Paradise!

“Yɛn Agya a wowɔ soro, wo din ho ntew. W’ahenni mmra. W’apɛde nyɛ hɔ wɔ asase so sɛnea ɛte wɔ soro.”—Mateo 6:9, 10.

SAA mpae a nnipa pii bɔ a wɔfrɛ no Yɛn Agya Ɔwɔ Soro anaa Awurade Mpaebɔ no ama adesamma anya anidaso. Ɔkwan bɛn so?

Sɛnea yɛahu wɔ Awurade Mpaebɔ no mu no, Onyankopɔn Ahenni bɛma wɔayɛ Onyankopɔn apɛde wɔ asase yi so sɛnea ɛda adi sɛ ɛte wɔ soro no. Na Onyankopɔn pɛ ne sɛ asase bɛdan Paradise bio. (Adiyisɛm 21:1-5) Dɛn ankasa ne Onyankopɔn Ahenni no, na ɛbɛyɛ dɛn de Paradise aba asase so bio?

Ɛyɛ Aban Ankasa

Onyankopɔn Ahenni yɛ aban ankasa. Sɛ aban biara betumi ayɛ adwuma a, ehia sodifo ahorow, mmara ahorow, ne ɔmanfo a ebedi wɔn so. So Onyankopɔn Ahenni du saa ahwehwɛde yi ho? Hyɛ mmuae a Bible no de ma wɔ nsɛmmisa abiɛsa a edidi so yi ho no nsow:

Henanom na wobedi ade wɔ Onyankopɔn Ahenni no mu? (Yesaia 33:22) Yehowa Nyankopɔn apaw ne Ba, Yesu Kristo, sɛ onni Ahenni no so. (Mateo 28:18) Wɔ Yehowa akwankyerɛ ase no, Yesu apaw nnipa kakraa bi afi “abusua ne kasa ne nkurɔfo ne ɔman biara mu” a wɔbɛka ne ho ne no adi “asase so ahene.”—Adiyisɛm 5:9, 10.

Mmara bɛn na Onyankopɔn Ahenni ahyehyɛ ama ne mamfo sɛ wonni so? Mmara no bi wɔ hɔ a ɛhwehwɛ sɛ wɔn a wɔahyɛ ama wɔn  no yɛ ho biribi. Yesu kyerɛɛ mmara no mu nea ehia paa bere a ɔkae sɛ: “‘Ɛsɛ sɛ wode wo koma nyinaa ne wo kra nyinaa ne w’adwene nyinaa dɔ Yehowa wo Nyankopɔn.’ Eyi ne ahyɛde a ɛyɛ kɛse sen biara ne nea edi kan. Nea ɛto so abien a ɛte sɛ ɛno ne sɛ, ‘Dɔ wo yɔnko sɛ wo ho.’”—Mateo 22:37-39.

Mmara afoforo nso hwehwɛ sɛ wɔn a Onyankopɔn Ahenni bedi wɔn so no twe wɔn ho fi nneyɛe ahorow bi ho. Sɛ nhwɛso no, Bible ka no pefee sɛ: “Mommma wɔnnnaadaa mo. Aguamammɔfo anaa abosonsomfo anaa awaresɛefo anaa mmarima a wɔde wɔn yɛ adapaade anaa mmarima a wɔne mmarima da anaa akorɔmfo anaa adifudepɛfo anaa asabofo anaa wɔn a wɔsopa afoforo anaa apoobɔfo rennya Onyankopɔn ahenni.”—1 Korintofo 6:9, 10.

Henanom na Onyankopɔn Ahenni bedi wɔn so? Yesu de wɔn a Onyankopɔn Ahenni bedi wɔn so no totoo nguan ho. Ɔkae sɛ: “Wobetie me nne, na wɔabɛyɛ kuw biako anya ɔhwɛfo baako.” (Yohane 10:16) Sɛ obi betumi ayɛ Onyankopɔn Ahenni no muni a, ɛnsɛ sɛ onii no ka kɛkɛ sɛ obedi Oguanhwɛfo Pa, Yesu akyi, na mmom ɛsɛ sɛ odi n’ahyɛde so nso. Yesu kae sɛ: “Ɛnyɛ obiara a ose me sɛ, ‘Awurade, Awurade’ no na ɔbɛhyɛn ɔsoro ahenni no mu, na mmom nea ɔyɛ m’Agya a ɔwɔ soro no apɛde no na ɔbɛhyɛn mu.”—Mateo 7:21.

Ne saa nti, wɔn a wɔyɛ Onyankopɔn Ahenni no mufo no bɔ Onyankopɔn din, Yehowa, sɛnea Yesu yɛe no, na wodi din no ni. (Yohane 17:26) Wotie Yesu ahyɛde a ɛne sɛ wɔnkyerɛkyerɛ afoforo “ahenni ho asɛmpa” no. (Mateo 24:14; 28:19, 20) Na wɔda ɔdɔ kann adi kyerɛ wɔn ho wɔn ho.—Yohane 13:35.

Wɔbɛsɛe “Wɔn a Wɔsɛe Asase No”

Sɛnea nneɛma rekɔ so wɔ wiase nnɛ no kyerɛ sɛ ɛrenkyɛ Onyankopɔn Ahenni de nsakrae kɛse bɛba asase yi so. Yɛyɛ dɛn hu saa? Mfe 2,000 a atwam ni no, Yesu kaa sɛnkyerɛnne pii a ebesisi a ɛbɛkyerɛ sɛ “Onyankopɔn ahenni no abɛn” ho asɛm. (Luka 21:31) Sɛnea yɛahu wɔ asɛm a edi eyi anim mu no, ɛnnɛ yehu saa sɛnkyerɛnne no afã ahorow wɔ wiase nyinaa.

Dɛn na ebedi akyi aba? Yesu bua sɛ: “Afei ahohiahia kɛse a efi wiase mfitiase besi mprempren ebi nsii, na ebi nso nsi bio bɛba.” (Mateo 24:21) Ɛnyɛ nnipa na wɔde ahohiahia yi bɛba. Mmom no, ɛyɛ Onyankopɔn na ɔbɛyɛ ade de ‘asɛe wɔn a wɔsɛe asase no.’ (Adiyisɛm 11:18) “Wobegu abɔnefo” a wɔn pɛsɛmenkominya nti, asase no resɛe no ase afi asase so. Nanso nnipa atreneefo a wɔsom Onyankopɔn yiye no na ‘wɔbɛtra mu.’—Mmebusɛm 2:21, 22.

Ɛfata sɛ Yehowa Nyankopɔn de ne ho gye nsɛm mu saa. Dɛn ntia? Susuw mfatoho yi ho: Fa no sɛ wowɔ fie bi a wode hane. Wɔn a wɔte fie hɔ no bi suban ye, na wosusuw afoforo ho; wotua wɔn dan ka, na wɔhwɛ fie no so yiye. Nanso nnipa binom te fie hɔ a wɔn suban nye na wonsusuw afoforo ho; wontua dan ka, na wɔnhwɛ dan no so yiye koraa. Ɛmfa ho sɛ woabɔ wɔn kɔkɔ mpɛn pii no, wɔnsesa wɔn subammɔne no. Sɛ ɛba saa a, dɛn na wobɛyɛ? Sɛ́ ofiewura no, akyinnye biara nni ho sɛ wubetu nnipa a wɔn suban nye a wɔte fie hɔ no.

Saa ara na Yehowa Nyankopɔn, nea ɔbɔɔ asase ne nea ɛwɔ so nyinaa no wɔ hokwan sɛ ɔkyerɛ nnipa a ɛsɛ sɛ wɔtra asase yi so. (Adiyisɛm 4:11) Yehowa atirimpɔw a wada no adi ne sɛ obeyi nnipa abɔnefo a wɔnyɛ n’apɛde na wɔhaw afoforo adwene no afi asase yi so.—Dwom 37:9-11.

Asase Bɛdan Paradise Bio

Ɛrenkyɛ, Onyankopɔn Ahenni a ɛhyɛ Yesu Kristo nsa no bedi asase so. Yesu frɛɛ eyi “bere  a wɔayɛ nneɛma foforo.” (Mateo 19:28) Dɛn na ɛbɛkɔ so wɔ asase so? Hyɛ Bible bɔhyɛ ahorow yi nsow:

Dwom 46:9. “Ɔma akodi gyae kosi asase ano.”

Yesaia 35:1. “Sare so ne nkyerekyerewa benya anika, na anhwea pradada adi ahurusi, na ahan sɛ nhwiren.”

Yesaia 65:21-23. “Wɔn a mapaw wɔn yi bedi wɔn nsa ano adwuma. Wɔrenyɛ adwumayɛhunu, na wɔrenwo mma ɔpatuwu.”

Yohane 5:28, 29. “Dɔn no reba a wɔn a wɔwɔ nkae ada mu nyinaa bɛte [Yesu] nne na wɔafi adi.”

Adiyisɛm 21:4. “[Onyankopɔn bɛbopa] wɔn aniwam nusu nyinaa, na owu nni hɔ bio, na awerɛhow ne osu ne yaw nso nni hɔ bio.”

Nea Enti a Yegye Di

So wugye Bible bɔhyɛ ahorow di? Bible hyɛɛ nkɔm sɛ nnipa pii rennye nni. Ɛka sɛ: “Nna a edi akyiri no mu no fɛwdifo bedi wɔn ankasa akɔnnɔ akyi abedi fɛw aka sɛ: ‘Ne mmae a wɔahyɛ ho bɔ no wɔ he? Hwɛ, efi da a yɛn agyanom dedae no, biribiara te sɛ nea na ɛte fi abɔde mfiase.’” (2 Petro 3:3, 4) Nanso fɛwdifo a wɔte saa no adi mfomso paa. Susuw nneɛma anan a enti wubetumi agye nea Bible ka no adi no ho hwɛ:

(1) Tete no, Onyankopɔn de ne ho gyee asase so nsɛm mu. Noa bere so Nsuyiri no yɛ eyi ho nhwɛso titiriw.—2 Petro 3:5-7.

(2) Onyankopɔn Asɛm hyɛɛ nea ɛrekɔ so wɔ wiase nnɛ no ho nkɔm pɛpɛɛpɛ.

(3) Biribiara nte sɛ “nea na ɛte fi abɔde mfiase” no. Ɛnnɛ, nnipa abrabɔ ne asase so nneɛma asɛe sen bere biara wɔ abakɔsɛm mu.

(4) Ɛnnɛ, ‘wɔreka ahenni ho asɛmpa’ wɔ asase so nyinaa de akyerɛ sɛ ɛrenkyɛ “awiei no bɛba.”—Mateo 24:14.

Yehowa Adansefo to nsa frɛ wo sɛ wo ne wɔn mmesua Onyankopɔn Asɛm, Bible, sɛnea ɛbɛyɛ a wubetumi asua daa nkwa a yɛn ani da so wɔ Onyankopɔn Ahenni nniso ase no ho ade pii. (Yohane 17:3) Nokwasɛm ni, asetra pa bi wɔ hɔ ma adesamma daakye. Mmere pa bɛba nnansa yi ara! So wobɛka wɔn a daakye wobenya nhyira yi no ho?

[Mfonini wɔ kratafa 7]

Wɔn a wɔka sɛ nneɛma bɛyɛ te sɛ nea ɛte bere nyinaa no nnim nea wɔreka koraa

[Mfonini wɔ kratafa 8]

So wobɛka wɔn a daakye wobenya nhyira yi no ho?