Dɛn Nti na Ɛsɛ sɛ Yɛkyerɛ Nneɛma Ho Anisɔ?

“Me Nua Dɔfo Raquel,

Meda wo ase paa sɛ wohyɛɛ me nkuran. Ebia wunnim, nanso wo nsɛm no ahyɛ me nkuran paa.”—Jennifer.

SO OBI akyerɛw wo krataa pɛn de akyerɛ biribi a woyɛ maa no no ho anisɔ bere a na wonhwɛ kwan? Sɛ saa a, akyinnye biara nni ho sɛ ɛma w’ani gyee kɛse. Ɛnyɛ nwonwa, efisɛ obiara pɛ sɛ ohu sɛ ne ho hia afoforo na wɔn ani sɔ nea ɔyɛ ma wɔn no.—Mateo 25:19-23.

Sɛ obi yɛ biribi ma yɛn na yɛda no ase a, ɛma yɛne ne ntam ayɔnkofa mu yɛ den. Bio nso, obi a ɔkyerɛ nneɛma a afoforo yɛ ma no ho anisɔ no suasua Yesu Kristo a wammu n’ani angu nneɛma pa a foforo yɛe no so da no.—Marko 14:3-9; Luka 21:1-4.

Awerɛhosɛm ne sɛ, ɛyɛ den ma nnipa pii nnɛ sɛ wɔbɛka nsɛm anaa wɔbɛkyerɛw krataa de ada afoforo ase wɔ nea wɔayɛ ama wɔn no ho. Bible bɔɔ kɔkɔ sɛ “nna a edi akyiri mu no” nnipa bɛyɛ “bonniayɛfo.” (2 Timoteo 3:1, 2) Sɛ yɛanhwɛ yiye a, sɛnea nnɛ nnipa pii nkyerɛ nneɛma ho anisɔ no bɛka yɛn ma ayɛ den sɛ yɛbɛkyerɛ nea afoforo yɛ ma yɛn no ho anisɔ.

Dɛn na awofo betumi ayɛ de akyerɛkyerɛ wɔn mma ma wɔahu sɛnea wɔbɛkyerɛ nneɛma ho anisɔ? Nnipa bɛn na ɛsɛ sɛ yɛda wɔn ase? Dɛn nti na sɛ wɔn a yɛne wɔn te no yɛ bonniayɛfo mpo a, ɛsɛ sɛ yɛkyerɛ nneɛma ho anisɔ?

Kyerɛ Nea Afoforo Yɛ wɔ Abusua no mu Ho Anisɔ

Awofo yɛ adwumaden na ama wɔn mma anya wɔn ahiade. Nanso ɛtɔ mmere bi a ebia awofo bɛte nka sɛ wɔn mma ani nsɔ nea wɔyɛ ma wɔn biara. Dɛn na wobetumi ayɛ de adi tebea yi ho dwuma? Ehia sɛ wɔyɛ nneɛma abiɛsa yi.

(1) Wɔn Nhwɛso. Nhwɛso pa a awofo yɛ wɔ abusua mu no yɛ ɔkwan pa a wɔnam so kyerɛkyerɛ wɔn mma. Bible kaa ɛna mmɔdenbɔfo bi a ɔtraa ase wɔ tete Israel no ho asɛm sɛ: “Ne mmabanin sɔre, na wɔfrɛ no nhyira.” Ɛyɛɛ dɛn na mmofra yi huu sɛnea wɔkyerɛ nneɛma ho anisɔ? Nkyekyɛm no fã a aka no boa ma yehu. Ɛka sɛ: “Ne kunu nso, oyi no ayɛ.” (Mmebusɛm 31:28) Awofo a wɔkyerɛ anisɔ ma wɔn ho wɔn ho no ma wɔn mma hu sɛ, su a ɛte saa no ma nea wɔkyerɛ ne nneyɛe ho anisɔ no ani gye, ɛhyɛ abusua no biakoyɛ mu den, na ɛkyerɛ nso sɛ wɔn ho akokwaw.

Agya bi a wɔfrɛ no Stephen ka sɛ, “Sɛ me yere yɛ aduan ma abusua no a, mebɔ mmɔden sɛ mɛda no ase de ayɛ nhwɛso ama me mma no.” Dɛn na afi mu aba? Stephen ka sɛ, “Me mmabea baanu no ahyɛ eyi nsow, na aboa wɔn ma bere biara a afoforo bɛyɛ biribi ama wɔn no wɔkyerɛ ho anisɔ.” Sɛ woaware a, wotaa da wo hokafo ase wɔ fie nnwuma  nketenkete a ɔyɛ no ho? Sɛ wo mma yɛ nnwuma a ɛsɛ sɛ wɔyɛ mpo a, woda wɔn ase?

(2) Ntetee. Su a ɛma obi kyerɛ nneɛma ho anisɔ no te sɛ nhwiren. Ɛsɛ sɛ wɔhwɛ so yiye na atumi ayɛ fɛ. Ɛbɛyɛ dɛn na awofo atumi aboa wɔn mma ma wɔakyerɛ nneɛma ho anisɔ? Ɔhene Salomo onyansafo no sii ade titiriw bi so dua bere a ɔkyerɛwee eyi no: “Ɔtreneeni koma dwen mmuae ho.”—Mmebusɛm 15:28.

Awofo, so mubetumi atete mo mma ma wɔahu sɛ egye mmɔden na afoforo akyɛ wɔn ade na ɛkyerɛ ayamye nso? Nsɛm ho a wosusuw saa no bɛma anisɔ a wɔwɔ no ayɛ kɛse, sɛnea asase pa ma nhwiren tumi nyin fɛfɛɛfɛ no. Maria a watete mmofra baasa no ka sɛ: “Egye bere na woatumi ne wo mma atra ase akyerɛkyerɛ wɔn nea sɛ obi kyɛ wɔn ade a ɛkyerɛ—ɛne sɛ odwen wɔn ho, na ɔpɛ sɛ wohu sɛnea wɔn ho hia no. Nanso mete nka sɛ mfaso wɔ saa a meyɛ no so.” Nkɔmmɔbɔ a ɛte saa no boa mmofra ma wohu nea ɛsɛ sɛ wɔka ne nea enti a ɛsɛ sɛ wɔka saa.

Awofo a wɔn ani da hɔ no mma wɔn mma nnya adwene sɛ nneɛma pa a wɔyɛ ma wɔn no nyinaa no fata wɔn. * Bible mu kɔkɔbɔ a ɛfa nkoa ho no nso fa mmofra ho bi: “Sɛ obi gyigye n’akoa so fi ne mmofraase a, akyiri nna mu no ɔbɛyɛ bonniayɛfo.”—Mmebusɛm 29:21, NW.

Awofo bɛyɛ dɛn aboa mmofra nkumaa ma wɔakyerɛ nneɛma ho anisɔ? Linda, ɛna bi a ɔwɔ mma baasa ka sɛ, “Sɛ me ne me kunu rekyerɛw krataa akɔda obi a ase a, yɛma yɛn mma no nso yɛ mfonini wɔ krataa no so anaa wɔkyerɛw wɔn din hyɛ nsɛm a yɛakyerɛw no ase.” Ɛwom, ebia na mfonini no nyɛ fɛ anaa wɔn nkyerɛwee no mu nna hɔ, nanso etumi ma wosua nneɛma pii fi mu.

(3) Boasetɔ. Yɛn nyinaa nyaa pɛsɛmenkominya su fii awo mu ma enti ebia a ɛbɛyɛ den sɛ yɛbɛkyerɛ nea afoforo yɛ ma yɛn no ho anisɔ. (Genesis 8:21; Mateo 15:19) Nanso, Bible hyɛ Onyankopɔn asomfo nkuran sɛ: “Momma wɔnkɔ so nyɛ mo foforo wɔ tumi a ɛkanyan mo adwene no mu, na monhyɛ nipasu foforo a wɔbɔɔ no sɛnea Onyankopɔn pɛ.”—Efesofo 4:23, 24.

Nanso awofo a wɔwɔ suahu nim sɛ ɛnyɛ mmerɛw sɛ wɔbɛboa wɔn mma ma ‘wɔahyɛ nipasu foforo.’ Stephen a yɛkaa ne ho asɛm no ka sɛ, “Ɛte sɛ nea egyee bere tenten ansa yɛretumi akyerɛ yɛn mma ma wɔafi wɔn pɛ mu akyerɛ nneɛma ho anisɔ.” Nanso Stephen ne ne yere ampa abaw. Stephen toa so sɛ, “Bere a yɛkɔɔ so nyaa yɛn mmabea no ho abotare pii no, wohuu nea ɛsɛ sɛ wɔyɛ. Seesei, yɛn ani gye sɛnea wɔkyerɛ nea afoforo yɛ ma wɔn ho anisɔ no.”

Yɛn Nnamfo ne Afipamfo Nso Ɛ?

Sɛ obi yɛ biribi ma yɛn na yɛanna no ase a, ɛnkyerɛ sɛ yɛn ani ansɔ nea ɔyɛ maa yɛn no, ebia yɛn werɛ na efii. So ɛho hia paa sɛ yɛkyerɛ biribi a obi bɛyɛ ama yɛn no ho anisɔ na yɛda no ase? Nea ɛbɛyɛ na yɛabua saa asɛm no, ma yensusuw asɛm bi a esii wɔ Yesu ne akwatafo bi ntam no ho nhwɛ.

Bere a Yesu retu kwan akɔ Yerusalem no, ohyiaa akwatafo du bi. Bible ka sɛ: “Na wɔmaa wɔn nne so kae sɛ: ‘Yesu, Kyerɛkyerɛfo, hu yɛn mmɔbɔ!’ Na ohuu wɔn no ɔka kyerɛɛ wɔn sɛ: ‘Monkɔ na momfa mo ho nkɔkyerɛ asɔfo.’ Na bere a wɔrekɔ no wɔn ho fii. Bere a wɔn mu baako hui sɛ ne ho asan no no, ɔsan bae de nne kɛse hyɛɛ Onyankopɔn anuonyam. Na ɔde n’anim butuw Yesu nan ase daa no ase; na ɔyɛ Samariani.”—Luka 17:11-16.

So Yesu buu n’ani guu afoforo a wɔantumi ammɛda no ase no so? Kyerɛwnsɛm no toa so sɛ: “Yesu bua kae sɛ: ‘Edu na wɔn ho fii, ɛnte saa? Ɛnde, akron a aka no wɔ he? Enti wɔanhu wɔn mu biara a wasan n’akyi de anuonyam rebrɛ Onyankopɔn sɛ ɔbarima a ofi ɔman foforo mu yi?’”—Luka 17:17, 18.

 Ná akwatafo baakron a wɔaka no nyɛ abɔnefo. Ná wɔadi kan akyerɛ Yesu mu gyidi wɔ baguam, na na wɔatie akwankyerɛ a ɔde maa wɔn a ebi ne sɛ wontwa kwan nkɔ Yerusalem mfa wɔn ho nkɔkyerɛ asɔfo no. Ɛwom sɛ wɔn ani sɔɔ ayamye a Yesu daa no adi kyerɛɛ wɔn no paa de, nanso wɔantumi amma Yesu nkyɛn ammɛda no ase. Nea wɔyɛe no anyɛ Kristo dɛ. Yɛn nso ɛ? Sɛ obi yɛ yɛn adɔe a, so yetumi ka kyerɛ no ntɛm ara sɛ, meda wo ase, na sɛ ɛbɛyɛ yiye a, yɛakyerɛw krataa akɔma no de akyerɛ sɛ yɛn ani sɔ nea wayɛ ama yɛn no?

Bible ka sɛ “ɔdɔ nyɛ ne ho sɛnea ɛmfata anaa pɛsɛmenkominya.” (1 Korintofo 13:5, Today’s English Version) Enti sɛ obi fi ne komam kyerɛ nea obi ayɛ ama no ho anisɔ a, na ɛnkyerɛ sɛ wapɔw kɛkɛ, na mmom ɛkyerɛ ɔdɔ a ɔwɔ nso. Sɛnea akwatafo no asɛm no ma yehu no, ɛsɛ sɛ wɔn a wɔpɛ sɛ wɔsɔ Kristo ani no da ɔdɔ ne anisɔ a ɛte saa adi kyerɛ obiara, ɛmfa ho ɔman, abusua, anaa ɔsom a ɔwom.

Bisa wo ho sɛ, ‘Bere bɛn na medaa me fipamfo, me yɔnko dwumayɛni, me yɔnko sukuuni, ayaresabea dwumayɛni, obi a ɔtɔn ade, anaa obi foforo a ɔboaa me no ase?’ Fa da koro anaa nnanu yɛ bere dodow a wobɛka akyerɛ obi sɛ woda no ase, anaa wobɛkyerɛw krataa de ada no ase no ho kyerɛwtohɔ hwɛ. Kyerɛwtohɔ a ɛte saa bɛboa wo ma woahu baabi a wotɔ sin a ɛsɛ sɛ wobɔ ho mmɔden.

Nokwarem no, onii a ɛsɛ sɛ yɛda no ase sen biara ne Yehowa Nyankopɔn. Ɔno na “akyɛde pa ne adekyɛde a ɛyɛ pɛ” nyinaa fi no. (Yakobo 1:17) Bere bɛn na wufi wo koma nyinaa mu daa Onyankopɔn ase wɔ ade pɔtẽẽ bi a ɔyɛ maa wo no ho?—1 Tesalonikafo 5:17, 18.

Dɛn Nti na Ɛsɛ sɛ Yɛkyerɛ Nneɛma Ho Anisɔ Bere a Afoforo Nyɛ Saa?

Ebetumi aba sɛ afoforo renkyerɛ nea yɛbɛyɛ ama wɔn no ho anisɔ. Ɛnde, dɛn nti na ɛsɛ sɛ yɛkyerɛ nneɛma ho anisɔ bere a afoforo nyɛ saa? Susuw nea enti a ɛte saa no mu biako ho hwɛ.

Sɛ yɛyɛ nnipa a wɔyɛ boniayɛfo papa a, na yɛresuasua yɛn Bɔfo yamyefo, Yehowa Nyankopɔn. Ɛmfa ho sɛ nnipa pii nkyerɛ ɔdɔ a Yehowa da no adi ho anisɔ no, ɔkɔ so yɛ wɔn papa. (Romafo 5:8; 1 Yohane 4:9, 10) Ɔma “n’awia pue nnipa bɔne ne nnipa papa so na ɔma osu tɔ gu atreneefo ne abɔnefo so.” Sɛ yɛbɔ mmɔden sɛ yɛbɛkyerɛ nneɛma ho anisɔ ɛmfa ho sɛ yɛte wiase a nnipa boniayɛfo ahyɛ mu ma mu a, yɛbɛkyerɛ sɛ yɛyɛ yɛn “Agya a ɔwɔ soro no mma.”—Mateo 5:45.

[Ase hɔ asɛm]

[Asɛm a wɔafa aka wɔ kratafa 15]

Fa da koro anaa nnanu yɛ bere dodow a wobɛka akyerɛ obi sɛ woda no ase no ho kyerɛwtohɔ

[Mfonini wɔ kratafa 15]

Kyerɛ nneɛma ho anisɔ fa yɛ nhwɛso ma wo mma

[Mfonini wɔ kratafa 15]

Wubetumi atete mmofra nkumaa mpo ma wɔakyerɛ nneɛma ho anisɔ