So Asase Awiei Abɛn?

Wubebua nsɛmmisa a edidi so yi dɛn?

So daakye, asase so tebea

(a) bɛyɛ yiye?

(b) bɛyɛ sɛnea ɛte yi ara?

(d) bɛsɛe koraa?

SO WOBƆ mmɔden sɛ wubenya daakye ho adwempa? Saa a wobɛyɛ no so wɔ mfaso pii. Nhwehwɛmu kyerɛ sɛ nnipa a wɔwɔ asetra ho adwempa no adwenem taa bue, na wɔwɔ apɔwmuden. Nhwehwɛmu bi a wɔyɛe bere tenten bi a atwam ni no mpo kyerɛ sɛ, nnipa a wɔwɔ asetra ho adwempa ntaa nnya komayare te sɛ wɔn a wonni asetra ho adwempa no. Nea efi nhwehwɛmu no mu bae no ne asɛm bi a wɔkae mfehaha pii wɔ Bible mu no hyia: “Anigye koma ma ahoɔden, na honhom a abotow yow nnompe mu.”—Mmebusɛm 17:22.

Nanso esiane nea nyansahufo reka fa asase ho yi nti, ɛyɛ den ma nnipa pii sɛ wobenya anigye ne asetra ho adwempa. Susuw nea nsɛm ho amanneɛbɔfo aka afa nea ɛbɛba asase so daakye no bi ho hwɛ.

Okyinnsoromma a Ɛda Asiane Mu

Wɔ afe 2002 mu no, Stockholm Asuae a Ɛhwɛ Nneɛma a Atwa Yɛn Ho Ahyia So no de kɔkɔbɔ mae sɛ, sɛnea wɔresɛe asase de apɛ sika ayɛ mpɔntudwuma no “de asɛm na  ɛnam, na ɛbɛma asase ne wim tebea asakra koraa.” Nhwehwɛmu no toaa so sɛ, ohia a aka nnipa pii wɔ wiase nyinaa, nnipa binom a wodi yiye sen afoforo, ne abɔde mu nneɛma a wɔkɔ so sɛe no no betumi ama nnipa ahyia “ɔhaw ahorow pii.”

Wɔ afe 2005 mu no, Amanaman Nkabom no de Millennium Ecosystem Assessment Synthesis Report too gua. Nea ɛma wɔyɛɛ eyi no ne mfe anan a wɔde yɛɛ abɔde a ɛwɔ Asase so mu nhwehwɛmu no. Saa nhwehwɛmu a ɛkɔ akyiri a animdefo bɛboro 1,360 a wofi aman 95 mu yɛe no de kɔkɔbɔ a ɛyɛ hu mae sɛ: “Nneɛma a nnipa reyɛ wɔ asase so no boro asase no ahoɔden so ma enti ɛyɛ den sɛ yɛbɛhwɛ kwan sɛ asase no ankasa besiesie ne ho ama nkyirimma anya baabi atra daakye.” Amanneɛbɔ no toa so sɛ, sɛ yɛbɛkwati ɔhaw no a, gye sɛ “yɛyɛ nsakrae kɛse wɔ mmara a yɛahyehyɛ ato hɔ, nhyehyɛe ahorow a yɛayɛ, ne nneɛma a yɛabɔ yɛn tirim sɛ yɛbɛyɛ a yennya nyɛe mu.”

Anna Tibaijuka, a ɔyɛ ɔpanyin paa wɔ Amanaman Nkabom asoɛe a ɛhwɛ nnipa atrae ho nsɛm so no kaa nea nhwehwɛmufo dodow no ara gye tom no ho asɛm sɛ: “Sɛ yɛkɔ so sɛe nneɛma saa a, ɛnde ɛbɛyɛ den paa ama yɛn daakye.”

Nea Enti a Ɛsɛ sɛ Yenya Asetra ho Adwempa

Yehowa Adansefo a wotintim nsɛmma nhoma yi nso gye di sɛ ɛrenkyɛ, nsakrae kɛse bi bɛba asase yi so. Nanso wogye di sɛ sɛ́ anka nneɛma bɛsɛe no, nsakrae a ɛbɛba yi bɛma wiase tebea ayɛ yiye asen bere biara a abɛsen kɔ. Dɛn nti na wɔwɔ ahotoso saa? Nea enti a ɛte saa ne sɛ wɔwɔ bɔhyɛ ahorow a ɛwɔ Onyankopɔn Asɛm, Bible mu no mu ahotoso. Bɔhyɛ a ɛte saa no mu biako ka sɛ: “Aka kakraa sɛ na ɔbɔnefo nni hɔ, na wɔhwehwɛ ne trabea a, na onni hɔ. Na ahobrɛasefo benya asase no adi, na wɔagye wɔn ani asomdwoe bebree mu.”—Dwom 37:10, 11.

So anidaso a ɛte saa yɛ adaeso ara kwa? Ansa na wubebua saa asɛm no, tɔ wo bo ase susuw asɛm yi ho: Mfe mpempem a atwam ni no, Bible hyɛɛ nneɛma atitiriw a ɛresɛe asase na ɛrehaw nnipa nnɛ no ho nkɔm. Yɛsrɛ wo, kenkan kyerɛw nsɛm a wɔatwe adwene asi so wɔ asɛm a edi hɔ no mu no, na fa toto nea ɛrekɔ so nnɛ a wuhu wɔ wiase mu no ho hwɛ. Bere a woyɛ saa no, ahotoso a wowɔ sɛ Bible no ka nea ebesisi daakye ho asɛm pɛpɛɛpɛ no mu bɛyɛ den.