Nea Yesua Fi Yesu Hɔ

Wɔ Sɛnea Yɛne Afoforo Di Mu

Dɛn nti na ɛsɛ sɛ yɛda ayamye adi?

So woda ayamye adi bere mpo a afoforo ne wo nni no ayamye so? Sɛ yɛpɛ sɛ yesuasua Yesu a, ɛsɛ sɛ yɛda ayamye adi kyerɛ wɔn a wɔtan yɛn no mpo. Yesu kae sɛ: “Sɛ modɔ wɔn a wɔdɔ mo a, mfaso bɛn na ɛwɔ so ma mo? Abɔnefo mpo dɔ wɔn a wɔdɔ wɔn. . . . Mmom no, monkɔ so nnɔ mo atamfo . . . , na mobɛyɛ Ɔsorosoroni no mma, efisɛ ne yam ye ma bonniayɛfo ne abɔnefo.”—Luka 6:32-36; 10:25-37.

Dɛn nti na ɛsɛ sɛ yɛde bɔne firi?

Sɛ yedi mfomso a, yɛpɛ sɛ Onyankopɔn de firi yɛn. Yesu kyerɛe sɛ ɛfata sɛ yɛbɔ mpae srɛ Onyankopɔn hɔ bɔne fafiri. (Mateo 6:12) Nanso Yesu san kae sɛ, sɛ Onyankopɔn de yɛn bɔne befiri yɛn a, gye sɛ yɛn nso yɛde afoforo mfomso firi wɔn. Ɔkae sɛ: “Sɛ mode nkurɔfo mfomso firi wɔn a, mo soro Agya nso de befiri mo; sɛ moamfa nkurɔfo mfomso amfiri wɔn a, mo Agya nso remfa mo mfomso mfiri mo.”—Mateo 6:14, 15.

 Dɛn na ɛbɛma mmusua anya anigye?

Ɛwom sɛ Yesu anware da de, nanso yebetumi asua sɛnea yɛbɛma yɛn abusua asetra ayɛ anigye ho nsɛm pii afi ne hɔ. Ɔnam ne kasa ne n’abrabɔ so yɛɛ nhwɛso sɛ yensuasua. Susuw nsɛntitiriw abiɛsa a edidi so yi ho hwɛ:

1. Ɛsɛ sɛ okunu dɔ ne yere sɛ n’ankasa ne nipadua. Yesu yɛɛ nhwɛso maa okununom. Ɔka kyerɛɛ n’asuafo no sɛ: “Mede ahyɛde foforo rema mo, sɛ monnodɔ mo ho.” Wɔnnodɔ wɔn ho dɛn? Ɔkae sɛ: “Sɛnea medɔ mo no.” (Yohane 13:34) Bible no kyerɛ sɛnea nnyinasosɛm yi fa okununom ho. Ɛka sɛ: “Okununom, monkɔ so nnɔ mo yerenom sɛnea Kristo nso dɔɔ asafo no na ɔde ne ho too hɔ mae no . . . Saa ara na ɛsɛ sɛ okununom dɔ wɔn yerenom sɛ wɔn ankasa nipadua. Nea ɔdɔ ne yere no dɔ ne ho, na onipa biara ntan n’ankasa honam da; mmom no ɔhwɛ so ma n’ani kũ ho sɛnea Kristo nso yɛ asafo no.”—Efesofo 5:25, 28, 29.

2. Ɛsɛ sɛ awarefo di wɔn ho nokware. Sɛ obi fi ne hokafo akyi a, ɛyɛ bɔne a etia Onyankopɔn na ɛsɛe mmusua nso. Yesu kae sɛ: “Monkenkanee sɛ . . . ‘Eyi nti na onipa begyaw ne papa ne ne maame na wakɔbata ne yere ho, na baanu no ayɛ honam biako’? Enti wɔnna so nyɛ baanu bio, na mmom ɔhonam biako. Enti nea Onyankopɔn aka abom no, mma onipa biara nntetew mu. . . . Mise mo sɛ sɛ ɛnyɛ aguamammɔ nti na obi gyaa ne yere na ɔsan ware foforo a, wasɛe aware.”—Mateo 19:4-9.

3. Ɛsɛ sɛ mmofra brɛ wɔn ho ase hyɛ wɔn awofo ase. Ɛwom, na Yesu yɛ pɛ, nanso na n’awofo no nyɛ pɛ. Ne nyinaa akyi no, otiee wɔn bere a na ɔyɛ abofra no. Bere a Yesu dii mfe 12 no, Bible kaa ne ho asɛm sɛ: “Ɔne wɔn [n’awofo] kɔɔ Nasaret, na ɔkɔɔ so brɛɛ ne ho ase hyɛɛ wɔn ase.”—Luka 2:51; Efesofo 6:1-3.

Dɛn nti na ɛsɛ sɛ yɛde nnyinasosɛm ahorow yi di dwuma?

Bere a Yesu retwe n’asuafo no adwene asi asuade a ɛwɔ asɛm yi mu so no, ɔkae sɛ: “Sɛ munim eyinom na moyɛ a, mo ani begye.” (Yohane 13:17) Sɛ yɛyɛ Kristofo ampa a, ɛsɛ sɛ yɛde Yesu afotu a ɛkyerɛ sɛnea yɛne afoforo nni no di dwuma. Ɔkae sɛ: “Sɛ mododɔ mo ho a, ɛno na ɛbɛma nnipa nyinaa ahu sɛ moyɛ m’asuafo.”—Yohane 13:35.

Sɛ wopɛ nsɛm pii a, hwɛ Dɛn na Bible Kyerɛkyerɛ Ankasa? * nhoma no ti 14

[Ase hɔ asɛm]

[Mfonini wɔ kratafa 16, 17]

Yesu bɛ a ɛfa ɔba desɛefo no ho no kyerɛ yɛn mfaso a ɛwɔ ayamye ne bɔne a wɔde kyɛ so.—Luka 15:11-32

[Mfonini wɔ kratafa 17]

Ɛsɛ sɛ awarefo di wɔn ho nokware