Nea Ɛma Abusua Nya Anigye

Bere a Wo Hokafo Hia Mmoa Soronko

Efi bere a wohui sɛ manya yare bi a ɛma mebrɛ tra so bere nyinaa no, ɛho behiae sɛ me kunu nkutoo yɛ adwuma de pɛ sika. Nanso, wanka ɛka a na yɛbɔ no ho asɛm ankyerɛ me da. Dɛn nti na na ɔde nneɛma sie me saa? Ɛbɛyɛ sɛ na yɛn sikasɛm asɛe paa, na na onim sɛ sɛ mihu a me koma betu.​—Nancy. *

NSƐNNENNEN betumi asɔre wɔ aware mu, nanso sɛ yare bi a ne sa yɛ den bɔ awarefo no mu biako a, ɔhaw no betumi ayɛ kɛse. * So worehwɛ obi a yare nti ontumi nyɛ hwee? Sɛ saa a, so nsɛmmisa a edidi so yi mu bi haw wo: ‘Sɛ me hokafo no tebea no sɛe sen sɛnea ɛte yi a, dɛn na mɛyɛ? Bere tenten ahe na metumi akɔ so ahwɛ me hokafo no bere a me nkutoo na meyɛ aduan, siesie fie, na meyɛ adwuma de pɛ sika no? Dɛn nti na ɛhaw me sɛ me mmom na mete apɔw?’

Nanso sɛ wo na woyare a, ebia wubebisa wo ho sɛ: ‘Sɛ mintumi nni m’asɛyɛde ho dwuma a, me so mfaso ne dɛn? So me yare yi nti, me ho yɛ me hokafo ahi? So anigye a yebetumi anya sɛ awarefo no aba awiei?’

Awerɛhosɛm ne sɛ, yare a ne sa yɛ den ama aware pii agu. Nanso, eyi nkyerɛ sɛ ɔkwan biara so w’aware no begu.

Ɛmfa ho sɛ awarefo pii hyia tebea a ɛte saa no, wɔatumi agyina ano. Sɛ nhwɛso no, susuw Yoshiaki ne Kazuko ho hwɛ. Akwanhyia bi a Yoshiaki hyiae maa n’akyi berɛmo ho kae ma enti obubui koraa. Kazuko ka sɛ: “Biribiara a me kunu bɛyɛ no, gye sɛ woso ne mu. Esiane sɛ mehwɛ no nti, ama me kɔn, me mmati, ne m’abasa nyinaa yɛ me yaw. Eyi ama midi ayaresabea bi a wɔhwɛ nnompe mu yare akɔneaba daa. Eyi nti, metaa te nka sɛ ɛyɛ den sɛ wobɛhwɛ ɔyarefo.” Nanso ɛmfa ho sɛnea Kazuko brɛ nyinaa no, ɔka sɛ: “Ama yɛn aware no asɔ.”

Ɛnde, dɛn na sɛ awarefo yɛ a ɛbɛma wɔanya anigye wɔ tebea a ɛte saa mu? Ade biako ne sɛ, awarefo a wɔkɔ so kura anigye a wɔwɔ mu no mmu yare no sɛ ɛyɛ obiakofo asɛm, na mmom wobu tebea no sɛ ɛyɛ wɔn baanu nyinaa asɛm. Nea ɛte ne sɛ, sɛ ɔhokafo biako yare a, wɔ ɔkwan bi so no, ɛka wɔn baanu nyinaa. Wɔakyerɛkyerɛ sɛnea okunu ne  ɔyere dan wɔn ho wɔn ho no mu wɔ Genesis 2:24 sɛ: “Ɔbarima begyaw ne papa ne ne maame hɔ na ɔde ne ho akɔfam ne yere ho na wɔayɛ ɔhonam koro.” Ne saa nti, sɛ yare a ne sa yɛ den bɔ ɔwarefo bi a, ehia sɛ awarefo baanu no nyinaa ka wɔn ti pam ho kõ yare no.

Bio nso, nhwehwɛmu kyerɛ sɛ awarefo a wɔkɔ so bom yɛ nneɛma bere a yare a ne sa yɛ den abɔ wɔn mu biako no gye wɔn tebea no tom, na wɔhwehwɛ akwampa a wobetumi afa so agyina ano. Akwan a wɔfa so gyina tebea a ɛtete saa ano no ne Bible mu afotu a entwam da no hyia. Susuw nyansahyɛ abiɛsa a edidi so yi ho hwɛ.

Obiara Mmoa ne Yɔnko

Ɔsɛnkafo 4:9 ka sɛ: “Baanu ye sen obiakofo.” Dɛn ntia? Efisɛ, nkyekyɛm 10 no kyerɛkyerɛ mu sɛ: “Sɛ obiako hwe ase a, nea ɔka ne ho no bɛma no so.” So ɛyɛ a, wokamfo ‘wo hokafo de ma no so’?

So mohwehwɛ akwampa a mubetumi afa so aboa mo ho mo ho? Yong a ne yere fã adwudwo no ka sɛ: “Mebɔ mmɔden sɛ bere nyinaa mesusuw me yere ho. Bere biara a mɛte nka sɛ osukɔm de me no, misusuw me yere ho sɛ ebia osukɔm de ɔno nso. Sɛ mepɛ sɛ mekɔ abɔnten kɔhwɛ sɛnea abɔde a atwa yɛn ho ahyia no yɛ fɛ a, mibisa no sɛ ebia ɔne me bɛkɔ anaa. Ne sũ yɛ me sũ, na ne haw nso yɛ me haw.”

Nanso sɛ wo na wo hokafo rehwɛ wo yare a, so nneɛma bi wɔ hɔ a w’ankasa betumi ayɛ a ɛrempira wo? Sɛ saa a, ebetumi ama woanya ahotoso kɛse, na ɛbɛhyɛ wo hokafo no nkuran ma wakɔ so ahwɛ wo.

Sɛ́ anka wubesusuw sɛ wunim ɔkwampa a wobɛfa so ahwɛ wo hokafo no, dɛn nti na wummisa no nea n’ani begye ho paa? Akyiri yi, Nancy a yɛkaa ne ho asɛm wɔ asɛm yi mfiase no kaa sɛnea abusua no sikasɛm a na onnim ho hwee no haw no no ho asɛm kyerɛɛ ne kunu. Seesei ne kunu bɔ mmɔden ne no susuw wɔn sikasɛm ho.

SƆ EYI HWƐ: Kyerɛw akwan a wususuw sɛ wo hokafo no betumi afa so aboa wo no wɔ krataa so, na ma ɔno nso nyɛ saa. Afei gye ne krataa no, na wo nso fa wo de no ma no. Mo mu biara mpaw nsɛm a moakyerɛw no mu biako anaa abien a mubetumi de ayɛ adwuma.

Monyɛ Nhyehyɛe Pa

Ɔhene Solomon nyansafo no kae sɛ: “Biribiara wɔ ne bere a wɔahyɛ ato hɔ.” (Ɔsɛnkafo 3:1) Nanso, sɛ yɛhwɛ sɛnea yare a ne sa yɛ den no tumi sɛe abusua bi nhyehyɛe a, ɛbɛyɛ te sɛ nea morentumi nyɛ nhyehyɛe pa biara. Dɛn na mubetumi ayɛ na ama moatumi atoto mo nneɛma yiye kakra?

Ɛwom wom a, mo baanu nyinaa betumi ayi mo adwene afi yare no so. So mubetumi akɔ so ayɛ nneɛma bi a na moyɛ ansa na yare no reba abusua no mu no? Sɛ ɛnte saa a, ɛnde nneɛma afoforo bɛn na mubetumi asɔ ahwɛ? Mubetumi ayɛ biribi a ɛnyɛ den koraa te sɛ nhoma bi a mobɛkenkan akyerɛ mo ho mo ho, anaa biribi a ɛyɛ den te sɛ ɔman foforo so kasa a mubesua. Sɛ mobom yɛ nneɛma a yare no nsi mo kwan sɛ mobɛyɛ a, ɔdɔ a mowɔ ma mo ho mo ho no mu bɛyɛ den, na anigye a mowɔ no nso bɛyɛ kɛse.

Ade foforo a ebetumi aboa ma moakɔ so akari pɛ ne sɛ mo ne afoforo bɛbɔ. Bible ka wɔ Mmebusɛm 18:1 sɛ: “Nea ɔtew ne ho no hwehwɛ nea n’ankasa pɛ; ɔtwe ne ho fi nyansa nyinaa ho.” So wohyɛɛ no nsow wɔ saa nkyekyɛm no mu sɛ sɛ obi tew ne ho a, etumi sɛe n’anigye? Nanso, sɛ motaa ne afoforo bɔ a, ebetumi ama mo ho asan mo, na ama mo ani agye. Dɛn nti na mumfi mo pɛ mu nto nsa mfrɛ obi mma ɔmmɛsra mo?

Ɛtɔ mmere bi a, ɛyɛ den ma wɔn a wɔhwɛ wɔn ahokafo a wɔyare no sɛ wɔbɛkari pɛ wɔ  nneɛma mu. Ebinom soa nnwuma pii gu wɔn ho so dodo, na nkakrankakra ɛhyɛ wɔn brɛ ma etumi bɔ wɔn nso yare. Ebewie ase no, na abubu wɔn ma wontumi nhwɛ wɔn dɔfo a ɔyare no bio. Enti sɛ worehwɛ wo hokafo a yare a ne sa yɛ den abɔ no a, ɛnsɛ sɛ wubu w’ani gu w’ahiade so. Ɛyɛ a gye bere fa kɔtena baabi a ɛhɔ yɛ komm na home. * Ebinom ahu sɛ, sɛ bere ne bere mu wɔka wɔn asɛm kyerɛ wɔn yɔnko a wɔne no wɔ bɔbeasu koro a, etumi ma wɔn ho bae wɔn.

SƆ EYI HWƐ: Kyerɛw akwanside ahorow a wuhyia bere a wohwɛ wo hokafo a ɔyare no wɔ krataa so. Afei, kyerɛw akwan a wobɛfa so adi akwanside ahorow yi so, anaa sɛnea wubetumi adi ho dwuma yiye. Sɛ́ anka wubedwinnwen ho pii no, bisa wo ho sɛ, ‘Dɛn ne ɔkwan tiawa a metumi afa so adi tebea no ho dwuma yiye?’

Bɔ Mmɔden sɛ Wubenya Tebea no Ho Adwempa

Bible no bɔ kɔkɔ sɛ: “Nka sɛ: ‘Dɛn nti na kan nna no ye sen nnɛ?’” (Ɔsɛnkafo 7:10) Enti, ɛnsɛ sɛ wudi wo tebea no ho abooboo pii. Kae sɛ wiase a yɛwɔ yi, prɔmprɔm nte hɔ daa. Nea ɛbɛboa wo ne sɛ wobɛpene wo tebea no so, na woayɛ nea wubetumi biara.

Dɛn na ebetumi aboa wo ne wo hokafo no wɔ eyi yɛ mu? Munsusuw nhyira ahorow a moanya no ho. Sɛ muhu sɛ ahoɔden aba kakra a, momma mo ani nnye. Monhwehwɛ nneɛma a mubetumi ayɛ, na momfa botae a mubetumi adu ho nsisi mo ani so.

Awarefo bi a wɔfrɛ wɔn Shoji ne Akiko de afotu a yɛkaa ho asɛm no yɛɛ adwuma ma ɛboaa wɔn. Bere bi a wohui sɛ Shoji yere Akiko anya yare bi a wɔfrɛ no ɔdae no, ɛho behiae sɛ wogyae Kristofo som adwuma a na wɔde wɔn bere nyinaa yɛ no. So ɛhaw wɔn? Yiw. Nanso Shoji tu obiara a wakɔ tebea a ɛte saa mu no fo sɛ: “Nnwinnwen nneɛma a worentumi nyɛ ho mfa nhaw wo ho. Nya nneɛma ho adwempa. Sɛ mpo mowɔ anidaso sɛ nneɛma bɛyɛ yiye daakye a, momfa mo adwene nsi nea mutumi yɛ seesei no so mmom. Wɔ me fam no, nea meyɛ ne sɛ, mema m’ani kũ me yere ho na meboa no.” Sɛ wo hokafo hia mmoa soronko a, afotu pa a ɛte saa no betumi aboa wo nso.—w09-E 11/1.

[Ase hɔ nsɛm]

BISA WO HO SƐ . . .

Dɛn na ehia sɛ me ne me hokafo yɛ seesei ara?

▪ Ɛsɛ sɛ yɛka yare no ho asɛm pii

▪ Ɛnsɛ sɛ yɛde yɛn adwene si yare no so pii

▪ Ɛnsɛ sɛ yɛhaw yɛn ho pii

▪ Ɛsɛ sɛ yɛboa yɛn ho yɛn ho

▪ Ɛsɛ sɛ yebom yɛ nneɛma a yare no nsi yɛn kwan sɛ yɛbɛyɛ

▪ Ɛsɛ sɛ yɛne afoforo bɔ kɛse

▪ Ɛsɛ sɛ yɛde botae bi sisi yɛn ani so

[Mfonini wɔ kratafa 20]

Nea ɛbɛyɛ na moakari pɛ wɔ asetena mu no, so mubetumi abom adi agoru bi?