Nea Ɛma Abusua Nya Anigye

Sɛnea Wobɛtete Mmofra Ma Wɔadi Wɔn Asɛyɛde Ho Dwuma

George * ka sɛ: “Anwummere biara, na me babarima Michael, a wadi mfe anan no gyaw nneɛma a ɔde di agoru no gu fie hɔ basabasa. Ansa na ɔbɛkɔ akɔda no, mebɔ mmɔden sɛ mɛma wasesaw ne nyinaa. Nanso sɛ meka a, na Michael bo afuw, na osũ teɛteɛm yɛ n’ade basabasa. Ɛtɔ mmere bi a nea Michael yɛ no haw me, na ɛma me teɛteɛm gu no so, nanso ɛno sɛe asɛm no koraa. Esiane sɛ na mempɛ sɛ yɛde abufuw kɔda nti, migyaee no haw, na ɛyɛ a, na m’ankasa masiesie fie hɔ.”

Emily ka sɛ: “Me haw no fii ase bere a na me babea Jenny, a wadi mfe 13 no nte sukuu dwumadi bi a ne kyerɛkyerɛfo de ama no no ase no. Bere a ofi sukuu baa fie no, osui bɛyɛ dɔnhwerew biako. Mehyɛɛ no nkuran sɛ ɔnkɔka nea ɛhaw no no ho asɛm nkyerɛ ne kyerɛkyerɛfo no ma ɔmmoa no, nanso Jenny kae sɛ ne kyerɛkyerɛfo no asɛm yɛ den ma enti osuro sɛ ɔbɛkɔ n’anim. Ná anka mepɛ sɛ mekɔ sukuu mu hɔ kɔkeka bi kyerɛ ɔkyerɛkyerɛfo no. Efisɛ na mete nka sɛ ɛnsɛ sɛ obi gyigye me dɔba no ma ne werɛ how saa!”

SO George ne Emily asɛm no bi ato wo pɛn? Sɛnea na wɔte nka no, saa ara na awofo pii mpɛ sɛ wobehu sɛ biribi rehaw wɔn ba anaasɛ ɔredi awerɛhow. Sɛ awofo bɔ mmɔden sɛ wɔbɛbɔ wɔn mma ho ban a, ɛnyɛ bɔne. Nanso, tebea a yɛkaa ho asɛm wɔ atifi hɔ no maa saa awofo no nyaa hokwan sɛ wɔbɛtete wɔn mma no ma wɔahu sɛnea wobedi wɔn asɛyɛde ho dwuma yiye. Nokwarem no, ɛsono nneɛma a abofra a wadi mfe 4 betumi asua, ɛnna ɛsono nea abofra a wadi mfe 13 nso betumi asua.

Nanso nokwasɛm ne sɛ, ɛnyɛ bere nyinaa na wubetumi abɔ wo ba no ho ban afi asetena mu nsɛnnennen ho. Awiei koraa no, abofra no begyaw ne maame ne ne papa hɔ na ‘n’ankasa akɔsoa n’adesoa.’ (Galatifo 6:5; Genesis 2:24) Sɛ mmofra betumi ahwɛ wɔn ho so a, ɛsɛ sɛ awofo de yɛ wɔn botae sɛ wɔbɛtete wɔn sɛnea ɛbɛyɛ a wobenyin abɛyɛ nnipa a  wɔnyɛ pɛsɛmenkominya, wɔdwene afoforo ho, na wodi wɔn asɛyɛde ho dwuma yiye. Eyi yɛ nna fam koraa!

Nanso anigyesɛm ne sɛ, awofo betumi asuasua ɔkwampa a Yesu faa so ne n’asuafo no dii nsɛm no. Yesu anwo, nanso nea enti a ɔpaw n’asuafo no na ɔtetee wɔn ne sɛ ɔbɛhyɛ wɔn den, na sɛ onni hɔ mpo a wɔatoa adwuma no so. (Mateo 28:19, 20) Sɛnea Yesu yɛe no, saa ara na ɔwofo biara pɛ sɛ ɔkyerɛkyerɛ ne mma ma wotumi di wɔn asɛyɛde ho dwuma yiye. Ma yensusuw nhwɛso a Yesu yɛ maa awofo no mu abiɛsa pɛ ho nhwɛ.

‘Gyaw Nhwɛsode’ Ma Wo Ba Ansa na Yesu rewie adwuma a ɔbɛyɛe wɔ asase so no, ɔka kyerɛɛ n’asuafo no sɛ: “Magyaw mo nhwɛsode sɛ sɛnea mayɛ mo no, mo nso monyɛ saa ara.” (Yohane 13:15) Ɛsɛ sɛ awofo nso kyerɛkyerɛ wɔn mma na wɔyɛ nhwɛso de boa wɔn ma wohu sɛnea wobedi wɔn asɛyɛde ho dwuma.

Bisa wo ho sɛ: ‘So metaa ka adwuma a ɛsɛ sɛ meyɛ ho asɛm pa? So meka anigye a minya wɔ adwumaden a meyɛ ma afoforo no ho asɛm? Anaasɛ metaa nwiinwii na mede me ho toto wɔn a misusuw sɛ asi wɔn yiye wɔ asetena mu no ho?’

Ɛwom, obiara nyɛ pɛ. Ɛtɔ da a, nneɛma hyɛ yɛn nyinaa so. Nanso, ɛda adi sɛ nhwɛso pa a wobɛyɛ no ne ɔkwan a ɛsen biara a wubetumi afa so aboa wo mma ma wɔahu mfaso a ɛwɔ so sɛ wodi wɔn asɛyɛde ho dwuma yiye.

SƆ EYI HWƐ: Ɛtɔ mmere bi na sɛ ɛbɛyɛ yiye a, wo ne wo ba no nkɔ w’adwumam na kyerɛ no nea woyɛ de nya sika de hwɛ abusua no. Ma wo ba no nka wo ho bere a worekɔyɛ adwuma bi de aboa afoforo no. Ɛno akyi no, wo ne no nsusuw anigye a wunyae bere a moyɛɛ adwuma no ho.—Asomafo Nnwuma 20:35.

Nhwehwɛ Pii Mfi Wo Ba no Hɔ Ná Yesu nim sɛ ebegye bere kakra ansa na n’asuafo no atumi ayɛ adwuma a na ɔpɛ sɛ wɔyɛ no. Bere bi ɔka kyerɛɛ wɔn sɛ: “Mewɔ nsɛm pii ka kyerɛ mo, nanso morentumi nsoa seesei.” (Yohane 16:12) Yesu amfiti prɛko pɛ anka ankyerɛ n’asuafo no sɛ wɔn nkutoo nyɛ biribi a wammoa wɔn. Mmom no, ogyee bere kyerɛkyerɛɛ wɔn nneɛma pii. Ɛyɛ bere a Yesu hui sɛ wɔn nkutoo betumi ayɛ adwuma bi no na ɔma wɔkɔyɛe.

Saa pɛpɛɛpɛ na ntease nnim sɛ awofo bɛma wɔn mma a wonyinii ayɛ mpanyimfo nnwuma. Ɛno mpo no, bere a mmofra no renyin no, ɛnsɛ sɛ awofo no ma wɔyɛ adwuma a ɛboro wɔn ahoɔden so. Sɛ nhwɛso no, ehia sɛ awofo kyerɛkyerɛ wɔn mma ma wohu sɛ ɛsɛ sɛ wodi wɔn ho ni, wosiesie wɔn dan mu, wodi bere so, na wɔhwɛ sika so yiye. Sɛ abofra fi sukuu ase a, ɛsɛ sɛ awofo boa no ma ohu sɛ ne sukuu dwumadi ho hia, na ɛsɛ sɛ ɔfa no aniberesɛm.

Sɛ awofo ma wɔn ba adwuma a, ɛnsɛ sɛ wogyaw ɔno nkutoo, na mmom ɛsɛ sɛ wɔboa no ma otumi yɛ adwuma a wɔde ama no no. George, agya a yedii kan kaa ne ho asɛm no hui sɛ ade biako a ɛmaa Michael bo fuwii a enti na ɔmpɛ sɛ ɔbɛsesaw n’agode no ne sɛ, na ɛte sɛ nea adwuma no boro no so dodo. George ka sɛ: “Sɛ́ anka mɛteɛteɛm agu Michael so sɛ ɔnsesaw n’agode no, mebɔɔ mmɔden kyerɛɛ no ɔkwan a ɔbɛfa so ayɛ adwuma no.”

Dɛn pɔtẽẽ na George yɛe? Ɔka sɛ, “Nea edi kan no, mehyehyɛɛ bere a ɛsɛ sɛ Michael de sesaw agode no anadwo biara. Afei, me ne no nyinaa boom sesaw agode no fii ɔdan no mu mmiako mmiako. Mede adwuma no yɛɛ agodi, na na yɛde si akan hwɛ nea obetumi asesaw ne de awie ntɛm. Ankyɛ koraa na saa adwuma no bɛkaa nneɛma a yɛyɛ ansa na yɛada no ho. Mehyɛɛ Michael bɔ sɛ sɛ owie ne de ntɛm a, mɛkenkan nhoma a n’ani gye ho no mu nsɛm pii akyerɛ no ansa na wada. Nanso sɛ wanyɛ no ntɛm a, mɛkenkan kakraa bi pɛ.”

SƆ EYI HWƐ: Hwehwɛ nea mmofra no mu biara betumi ayɛ a ɛbɛma biribiara akɔ so pɛpɛɛpɛ wɔ fie hɔ. Bisa wo ho sɛ, ‘So  nneɛma bi wɔ hɔ a mmofra no ankasa betumi ayɛ a meyɛ ma wɔn?’ Sɛ saa na ɛte a, wo ne mmofra no mmom nyɛ dekode no kosi sɛ wubehu sɛ wɔn ho akokwaw a wɔn ankasa betumi ayɛ. Ma wonhu pefee sɛ sɛ wodi wɔn asɛyɛde no ho dwuma yiye a, wobɛbɔ wɔn aba so, nanso sɛ wɔanyɛ no yiye a, wobɛtwe wɔn aso. Afei, bɔ mmɔden sɛ wobɛyɛ nea woaka no.

Fa Akwankyerɛ Pɔtẽẽ Ma Sɛ́ ɔkyerɛkyerɛfo pa no, na Yesu nim sɛ ɔkwampa a wotumi fa so sua biribi yiye ne sɛ wobɛkɔ so ayɛ dekode no. Sɛ nhwɛso no, wɔ bere a ɛfata mu no, Yesu somaa n’asuafo no “baanu baanu dii n’anim kɔɔ kurow biara ne faako a na ɔno ankasa rebɛkɔ no.” (Luka 10:1) Nanso, wannyaw wɔn saa kɛkɛ a wamma wɔn akwankyerɛ. Ansa na ɔresoma wɔn no, ɔde akwankyerɛ pɔtẽẽ maa wɔn. (Luka 10:2-12) Bere a asuafo no kɔyɛɛ adwuma no wiei na wɔbɛkaa ho asɛm kyerɛɛ Yesu no, ɔkamfoo wɔn na ɔhyɛɛ wɔn nkuran. (Luka 10:17-24) Ɔma wohui sɛ ɔwɔ wɔn mu ahotoso, na ogye wɔn tom nso.

Sɛ wuhu sɛ ɛyɛ den ma wo mma sɛ wobedi asɛyɛde bi a emu yɛ duru ho dwuma a, woyɛ w’ade dɛn? So wobɔ mmɔden sɛ wubegye wɔn ti, anaasɛ wobɔ wɔn ho ban sɛnea ɛbɛyɛ a wɔn abam remmu na wɔn ani renwu? Ade a ebia wubedi kan ayɛ ne sɛ “wubegye” wo ba no “ti” anaa wubegye ɔhaw no ato wo ho so.

Nanso susuw ho hwɛ: Bere biara a wobɛpere wo ho “agye” wo mma afi tebea bi mu no, adwene bɛn na worema wɔanya? So worema wɔahu sɛ wowɔ wɔn mu ahotoso sɛ wobetumi ahwɛ wɔn ho so? Anaasɛ woreka akyerɛ wɔn sɛ wɔda so ara yɛ mmotafowa a ɛsɛ sɛ woyɛ biribiara ma wɔn?

Sɛ nhwɛso no, dɛn na Emily a yɛadi kan aka ne ho asɛm no yɛ de dii ne babea no asɛm no ho dwuma? Sɛ anka ɔde ne ho begye asɛm no mu no, ɔmaa Jenny ankasa ne ɔkyerɛkyerɛfo no kɔkasae. Emily ne Jenny kyerɛw nsɛmmisa ahorow bi a Jenny de bɛkɔ sukuu mu hɔ. Afei wosusuw bere a ɛbɛyɛ papa sɛ Jenny kɔ ɔkyerɛkyerɛfo no nkyɛn ne no kɔkasa no ho. Na mpo wɔyɛɛ ɔkwan a Jenny bɛfa so ne ɔkyerɛkyerɛfo no asusuw asɛm no ho no ho ɔyɛkyerɛ. Emily ka sɛ: “Jenny nyaa akokoduru kɔɔ ɔkyerɛkyerɛfo no nkyɛn, na ne kyerɛkyerɛfo no kamfoo no sɛ ɔyɛɛ saa. Jenny nyaa n’ankasa mu ahotoso—na me nso minyaa ne mu ahotoso.”

SƆ EYI HWƐ: Kyerɛw nsɛnnennen a wo ba no hyia nyinaa wɔ krataa so. Afei kyerɛw nea wubetumi ayɛ de aboa no ma wadi nsɛnnennen no mu biara ho dwuma hyɛ asɛnnennen biara ano, nanso bɔ mmɔden sɛ “worennye ne ti.” Ɛno akyi no, wo ne wo ba no nyɛ sɛnea obedi ɔhaw no ho dwuma no ho ɔyɛkyerɛ. Ma abofra no nhu sɛ wowɔ ne mu ahotoso sɛ obetumi adi ho dwuma yiye.

Nokwasɛm ne sɛ, sɛ wugye wo mma ti fi asɛnnennen biara ho bere nyinaa a, ɛremma wɔn ankasa ntumi nni asetena mu nsɛnnennen ho dwuma. Mmom, boa wɔn ma wontumi nni wɔn asɛyɛde ho dwuma. Eyi ka akyɛde a ɛsom bo sen biara a wubetumi de ama wɔn no ho.—w10-E 05/1.

[Ase hɔ asɛm]

BISA WO HO SƐ . . .

▪ So asɛyɛde a mepɛ sɛ me mma di ho dwuma no fata?

▪ So meka nea ɛsɛ sɛ wɔyɛ kyerɛ wɔn, na mekyerɛ wɔn sɛnea ɛsɛ sɛ wɔyɛ no?

▪ Da bɛn paa na mehyɛɛ me ba nkuran anaa mekamfoo no?