Hena na Ɛsɛ sɛ Ɔkyerɛkyerɛ Mmofra Onyankopɔn Ho Asɛm?

“Osuani nsen ne kyerɛkyerɛfo, nanso obiara a wɔakyerɛkyerɛ no yiye no bɛyɛ sɛ ne kyerɛkyerɛfo.”—LUKA 6:40.

AWOFO binom te nka sɛ wɔmfata sɛ wɔbɛkyerɛkyerɛ wɔn mma Onyankopɔn ho asɛm. Ebia wobesusuw sɛ wɔn nhomasua nkɔɔ anim, anaasɛ wonni nyamesom ho nimdeɛ pii a ebetumi ama wɔayɛ akyerɛkyerɛfo pa. Esiane eyi nti, ebia wobegyae adwuma titiriw yi ama obusuani anaa ɔsom mu kannifo bi.

Ɛnde, hena paa na ɔfata sɛ ɔkyerɛkyerɛ mmofra nyamesom ho nokwasɛm ne abrabɔ ho gyinapɛn ahorow? Susuw nea Bible ka fa saa asɛm yi ho hwɛ, na fa toto nea nhwehwɛmufo ahu no ho.

Dɛn ne Agya Asɛyɛde?

Nea Bible kyerɛkyerɛ: “Agyanom, monnhyɛ mo mma abufuw, na mmom momfa Awurade nteɛso ne nyansakyerɛ ntete wɔn.”—Efesofo 6:4, “Holman Christian Standard Bible.”

Nea nhwehwɛmufo ahu: Sɛ agyanom ase tim wɔ nyamesom mu a, mfaso bɛn na wonya? Wɔkae wɔ asɛm bi a wotintimii wɔ afe 2009, a n’asɛmti ne Fathers’ Religious Involvement and Early Childhood Behavior mu sɛ: “Sɛ ɔbarima de ne ho hyɛ ɔsom bi mu a, ebetumi aboa no ma wayɛ  agya pa. Nyamesom boa ma yenya mmoa fi nnipa afoforo hɔ na ɛma yenya ahosodi. Ɛsan de akwankyerɛ ne nkyerɛkyerɛ a ɛbɛma yɛabɔ bra pa ma yɛn.”

Bible si hia a ehia sɛ agya no tete mmofra na ɔkyerɛkyerɛ wɔn no so dua kɛse. (Mmebusɛm 4:1; Kolosefo 3:21; Hebrifo 12:9) Nanso, so saa afotu no ho hia nnɛ? Wɔ afe 2009 mu no, Florida Sukuupɔn no kyerɛw asɛm bi de kyerɛkyerɛɛ nkɛntɛnso a agyanom tumi nya wɔ wɔn mma so no mu. Nhwehwɛmufo no hui sɛ ɛnyɛ den sɛ mmofra a wɔn agyanom dii akoten wɔ wɔn ntetee mu no bɛda tema adi na wɔabu wɔn ho. Mmarimaa a wɔn agyanom atete wɔn no aso ntaa nyɛ den, na ɛntaa mma sɛ mmeawa no benya adwenemhaw. Akyinnye biara nni ho sɛ Bible mu afotu ho da so ara hia.

Ɛna Asɛyɛde Ho Hia Dɛn?

Nea Bible kyerɛkyerɛ: “Mpo wo maame mmara.”—Mmebusɛm 1:8.

Nea nhwehwɛmufo ahu: Wɔ afe 2006 mu no, Handbook of Child Psychology nhoma no kae sɛ: “Sɛ wɔkyekyɛm pɛpɛɛpɛ a, bere a ɛnanom ne wɔn mma nkumaa de di nkitaho no boro nea agyanom tumi ne mmofra no de di nkitaho no so ɔha mu nkyem 65 ne 80, na saa ara na ɛte wɔ aman foforo mu.” Esiane eyi nti, ɛnanom kasa, wɔn nneyɛe, ne wɔn suban nya mmofra no so nkɛntɛnso kɛse bere a wɔrenyin no.

Sɛ agya ne ɛna nyinaa bom de Onyankopɔn ho nokware nimdeɛ tete wɔn mma a, ɛma mmofra no nya akyɛde ahorow abien a ɛsom bo. Nea edi kan no, mmofra no nya hokwan ne wɔn soro Agya no hyehyɛ adamfofa a wobetumi anya so mfaso wɔn nkwa nna nyinaa. Nea ɛto so abien no, mmofra no tumi di wɔn awofo nhwɛso akyi sua sɛnea ɛsɛ sɛ okunu ne ɔyere yɛ biako na ama wɔatumi adu wɔn botae ahorow a ɛho hia ho. (Kolosefo 3:18-20) Ɛwom sɛ afoforo betumi aboa agya ne ɛna no de, nanso ɛyɛ awofo no asɛyɛde sɛ wɔkyerɛkyerɛ wɔn mma Onyankopɔn ho asɛm ne sɛnea Onyankopɔn pɛ sɛ abusua biara tena.

Nanso, ɔkwan bɛn na ɛsɛ sɛ awofo fa so kyerɛkyerɛ wɔn mma? Akwan bɛn na ɛda adi sɛ ɛbɛboa paa?