Abraham—Ɔbarima A Ne Gyidi Yɛ Den

Fa w’adwene bu sɛ Abraham gyina abɔnten anadwo dasum rehwɛ ɔsoro nsoromma a ɛhyerɛn no. Ogyina hɔ no, nea na ɔredwen ho ne bɔ a Onyankopɔn hyɛe sɛ n’asefo bɛdɔɔso sɛ nsoromma no. (Genesis 15:5) Bere a Abraham huu nsoromma no, ɛma ɔkaee Yehowa bɔhyɛ no. Afei nso ɛmaa no awerɛhyem sɛ bɔhyɛ no bɛba mu, efisɛ sɛ Yehowa atumi abɔ amansan kɛse yi ne nea ɛwom nyinaa a, ɛbɛyɛ dɛn na ɔrentumi mma Abraham ne Sara nwo ba? Eyi ma yehu sɛnea na Abraham gyidi yɛ den.

DƐN NE GYIDI? Sɛ Bible ka “gyidi” a, nea ɛkyerɛ ne biribi a obi nhu nanso ɔwɔ mu awerɛhyem. Awerɛhyem a ɛte saa no gyina adanse a edi mu so. Obi a ɔwɔ Onyankopɔn mu gyidi no de n’ani si Yehowa bɔhyɛ ahorow so, na onya mu ahotoso sɛ ɛbɛba mu ɔkwan biara so.

DƐN NA ABRAHAM DE KYERƐE SƐ ƆWƆ GYIDI? Abraham daa no adi sɛ ogye Onyankopɔn bɔhyɛ di. Gyidi nti, Abraham tu fii ne man mu efisɛ na ɔwɔ ahotoso sɛ Yehowa bedi ne bɔhyɛ so na wakyerɛ no asase foforo a ɔnkɔ so. Gyidi nti, Abraham dii atutena wɔ Kanaan asase so efisɛ na onim sɛ sɛnea ɛte biara asase no bɛba abɛyɛ n’asefo agyapade. Afei nso gyidi nti, Abraham yɛe sɛ ɔde Isak rebɔ afɔre, efisɛ na ɔwɔ ahotoso sɛ Yehowa pɛ a, obetumi anyan no.—Hebrifo 11:8, 9, 17-19.

Abraham de n’adwene sii daakye so na ɛnyɛ nea atwam. Ɛwom sɛ Abraham ne Sara nyaa asetena pa wɔ Ur sen Kanaan de, nanso “wɔankɔ so annwen ɔman a na wɔafi mu no ho.” (Hebrifo 11:15, Today’s English Version) Mmom no, nhyira a wɔne wɔn asefo benya afi Onyankopɔn hɔ daakye  no na wɔde wɔn adwene sii so.—Hebrifo 11:16.

Enti gyidi a Abraham nyae wɔ Yehowa bɔhyɛ mu no, na ɛbɛba mu ampa? Ɔkwan biara so. Yehowa maa ne bɔhyɛ no nyinaa baa mu. Abraham asefo bɛyɛɛ ɔman a wɔfrɛɛ wɔn Israel no. Bere bi akyi no, Israelfo no bɛtenaa Kanaan asase no so. Saa asase no ara na Yehowa hyɛɛ Abraham bɔ sɛ ɔde bɛma n’asefo no.—Yosua 11:23.

DƐN NA YESUA FI MU? Yebetumi anya ahotoso sɛ Yehowa bɛma ne bɔhyɛ aba mu. Sɛ ɛyɛ den wɔ nnipa ani so mpo a, yebetumi anya awerɛhyem sɛ “Onyankopɔn fam de, ade nyinaa betumi ayɛ yiye.”—Mateo 19:26.

Abraham nhwɛso no kyerɛ yɛn sɛ, ɛnsɛ sɛ yɛde yɛn adwene si nea atwam so, na mmom ɛsɛ sɛ yɛde yɛn ani si anigye a yebenya daakye no so. Saa na ɔbarima bi a wɔfrɛ no Jason abɔ mmɔden sɛ ɔbɛyɛ. Ɔyare bi ama Jason abubu agu hɔ koraa. Jason ka sɛ: “Nokwarem no, ɛtɔ mmere bi a m’adwene kɔ nneɛma a atwam no so.” Ɔde ka ho sɛ: “Nea ɛyɛ a m’ani gyina paa ne nneɛma nketenkete bi te sɛ me yere Amanda a mɛyɛ no atuu.”

Nanso, Jason wɔ Yehowa mu gyidi paa sɛ ne bɔhyɛ nyinaa bɛba mu. Yehowa bɔhyɛ no bi ne sɛ, yɛn asase yi bɛdan paradise na ɔbɛma anokwafo anya daa nkwa ne apɔwmuden. * (Dwom 37:10, 11, 29; Yesaia 35:5, 6; Adiyisɛm 21:3, 4) Jason ka sɛ: “Ɛyɛ a mekae me ho sɛ mmere pa da m’anim.” Afei ɔkyerɛkyerɛ mu sɛ: “Ɛrenkyɛ, dadwen oo, abɛbrɛsɛ oo, awerɛhow oo, afobu oo, ne nyinaa befi hɔ koraa.” Hwɛ sɛnea ɔwɔ gyidi kɛse te sɛ Abraham!

[Ase hɔ asɛm]