Gyidini Nokwafo ne Ɔman Ba Pa​—Yɛbɛyɛ Dɛn Ayɛ Abien no Nyinaa?

NNEƐMA titiriw abien bɛn na yehu wɔ Yesu som adwuma no mu? Nea edi kan no, Yesu bɔɔ mmɔden sesaa nnipa abrabɔ; wanyɛ sɛ ɔbɛsesa amammui nhyehyɛe. Wo de, ma yɛnhwɛ ade a Yesu sii so dua wɔ ne Bepɔw so Asɛnka no mu. Ansa na ɔreka sɛ ɛsɛ sɛ yɛyɛ sɛ nkyene ne hann no, ɔka kyerɛɛ n’atiefo sɛ, wɔn a “wonim wɔn honhom mu ahiade” no na wobenya anigye. Ɔsan kae sɛ: “Anigye ne wɔn a wodwo, . . . wɔn a wɔn koma mu tew, . . . wɔn a wɔpɛ asomdwoe.” (Mateo 5:1-11) Yesu boaa n’akyidifo no ma wohui sɛ ehia sɛ wɔsesa wɔn adwene ne sɛnea wɔte nka na ama ɛne Onyankopɔn adwene wɔ papa ne bɔne ho no ahyia, na ɔma wohui nso sɛ ehia sɛ wofi koma nyinaa mu som Onyankopɔn.

Nea ɛto so abien no, Yesu yam hyehyee no maa nnipa a na wɔrehu amane, na ɔyɛɛ biribi de boaa wɔn. Nanso, wamfa ansi n’ani so sɛ obeyi amanehunu nyinaa afi hɔ. (Mateo 20:30-34) Ɔsaa ayarefo yare, nanso yare amfi hɔ. (Luka 6:17-19) Ɔmaa wɔn a na wɔhyɛ wɔn so no nyaa ahotɔ, nanso atɛnkyea annyae. Ɔmaa nnipa a na ɔkɔm de wɔn no aduan dii, nanso ɔkɔm da so de adesamma.—Marko 6:41-44.

Wɔma Nkurɔfo Sesa Wɔn Suban na Wɔyɛ Biribi De Boa Afoforo

Adɛn nti na Yesu de n’ani sii so sɛ ɔbɛma nkurɔfo asesa wɔn suban na waboa wɔn a wɔwɔ ɔhaw, na wansesa nhyehyɛe a ɛwɔ hɔ anaa wɔanyi amanehunu amfi hɔ? Ná Yesu nim sɛ Onyankopɔn abɔ ne tirim sɛ daakye ɔde N’Ahenni no beyi nnipa nniso nyinaa afi hɔ na wayi nneɛma a ɛde amanehunu ba nyinaa afi hɔ. (Luka 4:43; 8:1) Enti bere bi a Yesu asuafo no ka kyerɛɛ no sɛ ɔmfa ne bere pii nsa yare no, ɔka kyerɛɛ wɔn sɛ: “Momma yɛnkɔ baabi foforo, nkurow a ɛbemmɛn ha no mu na menkɔka asɛm no wɔ hɔ nso, efisɛ eyi nti na mebae.” (Marko 1:32-38) Yesu yɛɛ biribi de boaa nnipa bebree a na wɔwɔ ɔhaw mu, nanso nea na ehia no kɛse paa ne sɛ ɔbɛka asɛmpa no na wakyerɛkyerɛ Onyankopɔn asɛm.

Ɔkwan a Yesu faa so yɛɛ n’asɛnka adwuma no, saa ara nso na Yehowa Adansefo bɔ mmɔden yɛ wɔn asɛnka adwuma nnɛ. Sɛ obi wɔ ɔhaw bi a, wɔn koma ka wɔn ma wɔyɛ biribi boa no. Nanso Adansefo no mmɔ mmɔden sɛ wobeyi wiase haw afi hɔ. Wogye di sɛ Onyankopɔn Ahenni na ebeyi nneɛma a ɛde amanehunu ba nyinaa afi hɔ. (Mateo 6:10) Sɛnea Yesu yɛe no, wɔn nso wɔbɔ mmɔden sɛ wɔbɛma nkurɔfo asesa wɔn suban na ɛnyɛ sɛ wɔbɛsesa amammui nhyehyɛe. Ntease wom sɛ wɔyɛ saa, efisɛ adesamma haw akɛse no mfi amammui nhyehyɛe na mmom efi nnipa suban.

Ɔman Mma Pa

Bere koro no ara Yehowa Adansefo gye di sɛ ɛyɛ Kristofo asɛde sɛ wɔyɛ ɔman mma pa. Enti, wɔde nidi ne obu ma atumfoɔ no. Wɔnam wɔn nhoma ahorow ne asɛnka adwuma a wɔyɛ no so boa nkurɔfo ma wodi mmara so. Nanso, sɛ atumfoɔ no pɛ sɛ Adansefo no yɛ biribi a ɛne Onyankopɔn mmara nhyia a, wontie atumfoɔ no. Wotie “Onyankopɔn sɛ sodifo mmom sen nnipa.”—Asomafo Nnwuma 5:29; Romafo 13:1-7.

 Yehowa Adansefo srasra wɔn a wɔwɔ wɔn mpɔtam no nyinaa, na sɛ wɔpɛ a, wɔne wɔn yɛ Bible adesua a wontua hwee. Adesua a wɔne nkurɔfo yɛ yi nti, nnipa mpempem pii asesa wɔn suban. Afe biara wɔboa nnipa mpempem ma wogyae nneɛma bɔne bi te sɛ sigaretnom, asabow, nnubɔne, kyakyatow, ne nna mu ɔbrasɛe. Wɔabɛyɛ ɔman mma a wɔn suban ayɛ papa efisɛ wɔasua sɛ wɔde Bible no bɛbɔ wɔn bra.—Hwɛ asɛm a wɔato din “Bible Tumi Sesa Nnipa” a ɛwɔ Ɔwɛn-Aban yi kratafa 18 no.

Afei nso Bible nkyerɛkyerɛ boa mmusua ma obiara nya obu ma ne yɔnko. Ɛboa nso ma nkitahodi kɔ so yiye wɔ okunu ne ɔyere ntam, awofo ne wɔn mma ntam, ne afei mmofra no ntam. Saa nneɛma no na ɛma biakoyɛ ba mmusua mu. Sɛ biakoyɛ ba mmusua mu nso a, ɛma nneɛma kɔ so yiye wɔ mpɔtam hɔ.

Wohwɛ nneɛma a yɛaka ho asɛm wɔ nhoma yi mu no a, w’adwene yɛ wo dɛn? Bible ma kwan sɛ yɛmfa amanyɔsɛm mfrafra nyamesom anaa? Yehu pefee sɛ Bible mpene so. Nanso ɛsɛ sɛ nokware Kristofo yɛ ɔman mma pa anaa? Yiw, ɛsɛ sɛ wɔyɛ ɔman mma pa. Wɔbɛyɛ dɛn ayɛ saa? Nea ɛbɛma wɔayɛ saa ne sɛ wobetie Yesu ahyɛde no na wɔayɛ wɔn ho sɛ nkyene ne hann ama wiase no.

Wɔn a wɔbɔ mmɔden sɛ wɔde Kristo akwankyerɛ yi bɛyɛ adwuma no ne wɔn mmusua nyinaa benya mfaso, na ɛde mfaso nso bɛbrɛ nnipa a wɔwɔ wɔn mpɔtam. Yehowa Adansefo a wɔwɔ baabi a wote no ani begye ho sɛ wɔne wo bɛka Bible adesua nhyehyɛe a ɛrekɔ so wɔ mo mpɔtam hɔ no ho asɛm. *

[Ase hɔ asɛm]

[Asɛm a wɔafa aka wɔ kratafa 10]

Yesu bɔɔ mmɔden sesaa nnipa abrabɔ; wanyɛ sɛ ɔbɛsesa amammui nhyehyɛe

[Asɛm a wɔafa aka wɔ kratafa 11]

Yehowa Adansefo gye di sɛ ɛyɛ wɔn asɛde sɛ wɔyɛ ɔman mma pa