Momma Yemmisa Yesu

Nyamesurofo pii te nka sɛ ɛsɛ sɛ nyamesom de ne ho hyehyɛ amanyɔsɛm mu. Wogye di sɛ nyamesom betumi aboa kɛse ama adesamma haw afi hɔ. Nanso gyidifo komapafo foforo gye di sɛ ɛnsɛ sɛ yɛde nyamesom frafra amanyɔsɛm mu. Wo nso ɛ? Wususuw sɛ dɛn na ɛsɛ sɛ nyamesom yɛ wɔ amanyɔsɛm ho? So ɛsɛ sɛ nyamesom ne amanyɔsɛm di afra?

EBINOM aka Yesu Kristo ho asɛm sɛ ɔno ne “obi a ɔwɔ nkɛntɛnso sen biara wɔ adesamma nyamesom abakɔsɛm mu.” Enti yɛmfa no sɛ ɔwɔ ha na yɛrebisa no sɛ, Ɛsɛ sɛ yɛde nyamesom frafra amanyɔsɛm mu anaa? Anka dɛn na ɔbɛka? Bere a ɔwɔ asase so no, ɔde n’anom asɛm ne ne nneyɛe buaa saa asɛmmisa no. Ɛho nhwɛso ne sɛ, Yesu maa akwankyerɛ wɔ Bepɔw so Asɛnka a agye din no mu de boaa n’akyidifo ma wohuu dwuma a ɛsɛ sɛ wodi wɔ wɔn mpɔtam. Ma yɛnhwɛ saa ɔkasa no mu nsɛm kakra.

 Ɛsɛ sɛ Wɔyɛ Nhwɛso Pa Ma Nkurɔfo

Yesu kyerɛɛ nea ɛsɛ sɛ n’akyidifo yɛ wɔ wiase. Ɔkae sɛ: “Mone asase so nkyene, na sɛ nkyene ahoɔden fi mu a, ɛbɛyɛ dɛn na asan anya n’ahoɔden bio? Wɔrentumi mfa nyɛ hwee bio gye sɛ wɔtow gu abɔnten ma nnipa tiatia so. Mone wiase hann. . . . Momma mo kanea nhyerɛn nnipa anim, na wɔahu mo nnwuma pa na wɔahyɛ mo Agya a ɔwɔ soro no anuonyam.” (Mateo 5:13-16) Adɛn nti na Yesu de n’akyidifo no totoo nkyene ne hann ho?

Yesu nsɛm no kyerɛ sɛ n’akyidifo te sɛ nkyene ma nnipa nyinaa, na ɛnyɛ nnipa kakraa bi. Ɛkyerɛ sɛ wɔte sɛ hann ma wɔn a wɔpɛ sɛ wohu ade yiye no nyinaa, na ɛnyɛ nnipa kakraa bi. Ntotoho a Yesu yɛe no maa emu daa hɔ pefee sɛ ɔmpɛ sɛ n’akyidifo bɛtew wɔn ho afi nnipa ho. Adɛn ntia?

Hyɛ no nsow sɛ, sɛ woamfa nkyene anto aduan mu a, ɛrentumi nkora so. Afei nso sɛ wosɔ kanea na woamfa ansi dan mu a, esum no remfi hɔ. Enti ɛnyɛ nwonwa sɛ Yesu anka da sɛ n’asuafo no ntew wɔn ho nkɔkyekye gyidifo kurow wɔ asase no fã baabi. Wanka ankyerɛ n’akyidifo no nso sɛ wɔntew wɔn ho nkɔtena nkokorafie. Mmom no, sɛnea yɛde nkyene to aduan mu de kora so na kanea nso hyerɛn baabi a esum wɔ no, ɛsɛ sɛ Kristofo nso yɛ nhwɛso pa ma afoforo.

“Wɔnyɛ Wiase no Fã”

Nanso ahyɛde a Yesu de maa n’akyidifo no sɛ wɔne afoforo nni nkitaho no de asɛm bi a ɛho hia ba. Asɛm no ne nea ɛsɛ sɛ Kristofo yɛ wɔ amanyɔsɛm ho. Adɛn ntia? Ansa na Yesu rewu no, ɔbɔɔ Onyankopɔn mpae maa n’akyidifo no sɛ: “Mensrɛ sɛ yi wɔn fi wiase, na mmom mesrɛ sɛ hwɛ wɔn so esiane ɔbɔnefo no nti. Wɔnyɛ wiase no fã sɛnea menyɛ wiase no fã no.” (Yohane 17:15, 16) Enti ɛbɛyɛ dɛn na yɛatumi aka sɛ Kristofo nyɛ wiase no fã bere a wɔntew wɔn ho mfi nnipa ho? Nea ɛbɛma yɛate ase no, ma yɛnhwɛ nsɛmmisa foforo abiɛsa:

• Yesu buu amanyɔsɛm dɛn?

• Ɛnnɛ, dɛn na ɛsɛ sɛ Kristofo yɛ?

• Kristofo nkyerɛkyerɛ ka ɔmanfo asetena dɛn?

[Asɛm a wɔafa aka wɔ kratafa 4]

Yesu maa emu daa hɔ pefee sɛ ɔmpɛ sɛ n’akyidifo bɛtew wɔn ho afi nnipa ho