Wopɛ Daakye a Ɛyɛ Papa?​—Wobɛyɛ Dɛn Anya?

ƐBƐYƐ dɛn na w’asetena atumi asi wo yiye? Ade biako a wubetumi ayɛ ne sɛ wubesusuw nneɛma ho yiye ahu sɛnea gyinae a wubesi no nnɛ no bɛkɔ akowie daakye.

Nea ɛwom ne sɛ, ebetumi ayɛ den ama wo sɛ wubesisi gyinae a ɛbɛma awie wo yiye daakye. Adɛn ntia? Efisɛ nnipa a atwa yɛn ho ahyia no pii dwen nea wobenya no nnɛ. Wo de, wunim sɛ wode Bible afotu yɛ adwuma a, ebetumi ama wo ne w’abusuafo ntam ayɛ kama. (Efesofo 5:22–6:4) Nanso sɛ wubetumi ayɛ saa a, gye sɛ wunya bere ma w’abusuafo na wohwɛ yiye na woamfa wo ho anhyɛ adwuma ne anigyede mu ammoro so. Sɛnea ɛte wɔ asetena mu nneɛma pii mu no, ɛsɛ sɛ wuhu sɛ nneɛma bi bɛma w’ani agye nnɛ nanso ɛremma ensi wo yiye daakye. Wobɛyɛ dɛn anya ahoɔden apaw nea ɛbɛboa wo daakye? Yɛ nneɛma anan yi.

1 Fa W’adwene Bu Nea Ebefi Wo Gyinaesi mu Aba

Ansa na wubesi gyinae biara no, susuw nea ebetumi afi mu aba no ho kɔ akyiri. Bible tu yɛn fo sɛ: “Onitefo ne nea ohu mmusu na ɔde ne ho hintaw.” (Mmebusɛm 22:3) Sɛ wudwen nsunsuanso a wo gyinaesi de bɛbrɛ wo no ho a, ɛbɛma woakwati biribiara a ebetumi awie wo bɔne. Sɛ wudwen mfaso a gyinae pa a wubesi no de bɛbrɛ wo nso ho yiye a, ebetumi ahyɛ wo den ma woasi gyinae no.

Bisa wo ho sɛ: ‘Sɛ misi gyinae nnɛ a, afe anaa mfe 10 anaa mfe 20 akyi no, dɛn na ebefi mu aba? Gyinae a meresi yi, ɛrenkɔfa awerɛhow anaa ɔyare bi mmrɛ me? M’abusuafo ne wɔn a wɔn ho hia me no nso, ɛbɛka wɔn dɛn?’ Ne kɛse koraa no, bisa wo ho sɛ: ‘Onyankopɔn ani begye gyinae a meresi yi ho? Ɛbɛka me ne n’ayɔnkofa no dɛn?’ Esiane sɛ Onyankopɔn honhom na wɔde kyerɛw Bible no nti, ebetumi aboa wo ama woahu nea ɛbɛma n’ani agye na ama woahu asiane bi a anka w’adwene remma so.—Mmebusɛm 14:12; 2 Timoteo 3:16.

2 W’ankasa Susuw Nea Ebetumi Aboa Wo Ho

Nnipa pii wɔ hɔ a, sɛ anka wɔn ankasa besi wɔn gyinae no, wosuasua afoforo. Nanso sɛ nnipa dodow reyɛ biribi a, ɛnkyerɛ sɛ dekode no bɛma asi wo yiye. Wo ankasa susuw nea ebetumi aboa wo ho. Yɛmfa Natalie * nyɛ nhwɛso. Ɔkae sɛ: “Ná mepɛ sɛ minya aware pa. Nanso na mitumi hu sɛ bra a merebɔ no nti, ɛrenyɛ yiye. Mewɔ sukuu no, na me nnamfo nyinaa yɛ mmabun a wonim ade. Nanso na wɔtaa sisi gyinae bɔne wɔ wɔn asetena mu. Da biara na wɔfa mpena foforo. Me nso mefaa mpenafo bebree te sɛ wɔn ara. Saa abrabɔ no ma midii awerɛhow bebree.”

Natalie fii ase ne Yehowa Adansefo yɛɛ Bible adesua. Asɛm a ɔka ne sɛ: “Mihuu mmabun a wɔwɔ anigye ne awarefo a wɔn aware kɔ yiye wɔ Adansefo no mu. Ɛwom sɛ na ɛnyɛ mmerɛw mma me de, nanso mede nkakrankakra sesaa m’abrabɔ ne m’akwan.” Dɛn na efii mu bae? Natalie ka sɛ: “Misii so nyinaa, na  mepɛ sɛ meware obi a mepɛ n’asɛm paa. Akyiri yi, minyaa ɔbarima a me ne no kura gyidi biako waree. Mete nka sɛ Onyankopɔn ama manya abusua asetena a manso ho dae mpo sɛ menya.”

3 Nnwen Ɛnnɛ Nko Ara Ho

Ade biako a ɛremma wunnwen ɛnnɛ nko ara ho ne sɛ wubehu botae a wopɛ sɛ wudu ho daakye, na woyɛ nhyehyɛe a ɛbɛma wo nsa aka nea worepɛ no. (Mmebusɛm 21:5) Mfa w’adwene nsi mfe 70 anaa mfe 80 a wode bɛtena wiase no nkutoo so. Mmom no, fa w’adwene bu sɛ woanya daa nkwa a Bible ka sɛ ɛbɛba daakye no.

Bible kyerɛ sɛ Onyankopɔn nam Kristo Yesu agyede afɔre no so ayɛ nhyehyɛe ama nnipa sɛ wobetumi anya daa nkwa. (Mateo 20:28; Romafo 6:23) Onyankopɔn ahyɛ bɔ sɛ ɛrenkyɛ, nea enti a ɔbɔɔ nnipa ne asase no bɛba mu. Wɔn a wɔdɔ Onyankopɔn no benya hokwan atena ase daa wɔ asase a asan ayɛ fɛfɛɛfɛ no so. (Dwom 37:11; Adiyisɛm 21:3-5) Sɛ woannwen ɛnnɛ nko ara ho a, wubetumi anya nea ɛbɛba daakye no mu kyɛfa.

4 Yɛ Botae a Esisi W’ani so no Ho Adwuma

Wobɛyɛ dɛn atumi anya saa bɔhyɛ no? Nea edi kan no, ɛsɛ sɛ wusua Onyankopɔn ho ade. (Yohane 17:3) Sɛ wunya Bible mu nimdeɛ a edi mu a, ɛbɛma woanya awerɛhyem sɛ Onyankopɔn bɔhyɛ a ɛfa daakye ho no bɛba mu. Gyidi a ɛte saa no bɛhyɛ wo den ama woayɛ nsakrae biara a ehia na woanya Onyankopɔn anim dom.

Ma yɛnhwɛ Michael suahu. Ɔka sɛ: “Midii mfe 12 pɛ na mehyɛɛ ase nom nsa ne nnubɔne. Ná medɔm akobɔfo kuw bi, na na migye di sɛ merenni mfe 30 mpo na mawu. Abufuw ne abasamtu nti mebɔɔ mmɔden mpɛn pii sɛ mekum me ho. Menya a, na anka mewɔ asetena pa, nanso meyɛ ara a, ɛnkɔ yiye.” Bere a Michael wɔ ntoaso sukuu no, akobɔfo a na ɔne wɔn bɔ no biako fii ase ne Yehowa Adansefo yɛɛ Bible adesua. Michael nso penee so sɛ obesua Bible.

Nea Michael sua fii Bible mu no ma onyaa adwene foforo wɔ ne daakye ho. “Mihui sɛ asase bɛdan paradise daakye, na nnipa bɛtena asomdwoe mu na dadwen nso befi hɔ. Mibehui sɛ metumi anya saa daakye no bi. Mede sii m’ani so sɛ me ne Yehowa benya ayɔnkofa a emu yɛ den. Nanso ɛtɔ da a na ɛnkɔ yiye. Bere a mifii ase suaa Bible no mpo, ɛtɔ mmere bi a na menom nsa bow, na mekɔfaa ɔbea bi mpo.”

Nneɛma a na ɛtew Michael san n’akyi no, ɛyɛɛ dɛn na otumi dii so na ɔsesaa n’abrabɔ? Nea ɔkae ni: “Me Bible kyerɛkyerɛfo hyɛɛ me nkuran sɛ menkenkan Bible da biara na me ne wɔn a wɔpɛ sɛ wɔyɛ Onyankopɔn apɛde no mmɔ. Mihui sɛ na me nnamfo akobɔfo no da so ara nya me so nkɛntɛnso. Ɛwom sɛ na wɔabɛyɛ sɛ m’abusuafo de, nanso me ne wɔn twaa mu.”

Michael de botae a obetumi adu ho ntɛm sisii n’ani so, na ɛboaa no ma otumi duu botae kɛse a na esi n’ani so no ho, sɛ ɔbɛbɔ ne bra sɛnea Onyankopɔn pɛ. Wo nso wubetumi ayɛ saa. Kyerɛw botae a wopɛ sɛ wudu ho daakye ne nea woyɛ a, ɛbɛma woadu ho no to hɔ. Ka wo botae no ho asɛm kyerɛ wɔn a wɔbɛboa wo, na ma wɔnkyerɛ wo nkɔso a worenya ne baabi a ɛsɛ sɛ woyere wo ho.

Ɛnsɛ sɛ wotwentwɛn wo nan ase sɛ wubesua Onyankopɔn ho ade na wode n’akwankyerɛ abɔ wo bra. Fi ase tutu anammɔn a ɛbɛma ɔdɔ a wowɔ ma Onyankopɔn ne n’Asɛm Bible no ayɛ kɛse. Onyankopɔn Asɛm ka obi a ɔde Bible bɔ ne bra ho asɛm sɛ: “Nea ɔyɛ biara bewie yiye.”—Dwom 1:1-3.

[Ase hɔ asɛm]