Ɛyɛ Ampa sɛ “Ɛrentumi Nyɛ Yiye”?

PO SO hyɛn a wɔfrɛ no Titanic no fii ase yɛɛ adwuma 1912, na saa bere no, na ɛno na ɛso na ɛyɛ fɛ paa. Sɛnea wɔde nyansahu mu nimdeɛ a edi mu yɛe nti, wɔkae sɛ ɛhyɛn no rentumi mmem da. Nanso yɛn nyinaa nim nea esii. N’akwantu a edi kan no, ɛkɔpem asukyenee bi wɔ Atlantic po no atifi fam, na ɛmemee maa emu nnipa bɛyɛ 1,500 wuwui. Po so hyɛn a wɔkae sɛ ɛrentumi mmem no, ankyɛ koraa na ɛkɔhyɛɛ po ase.

Nneɛma pii na ɛma yɛka sɛ biribi rentumi nyɛ yiye. Sɛ yɛte nka sɛ biribi boro yɛn ahoɔden, yɛn nimdeɛ ne yɛn nyansa so a, yetumi ka sɛ dekode no rentumi nyɛ yiye. Nneɛma a nyansahufo atumi ayɛ nnɛ no, bebree wɔ hɔ a, bere bi a atwam no na yehu no sɛ ɛrentumi nyɛ yiye, efisɛ saa bere no na ɛboro nnipa ahoɔden so na na wɔnna nsoo ho dae mpo sɛ biribi saa betumi ayɛ yiye. Ɛnnɛ, nneɛma bi wɔ hɔ a, bɛyɛ mfe 50 a atwam ni no, anka yɛbɛka sɛ ɛrentumi nyɛ yiye, nanso ayɛ yiye. Ebi ne sɛ, nnipa atumi akɔ ɔsram so, wɔatumi atena asase so akyerɛ afiri kwan akɔ Mars so, wɔanya awosu ho nimdeɛ, na yetumi tena yɛn fie hu nea ɛrekɔ so wɔ nkurow ne aman foforo so. Kan U.S. mampanyin Ronald Reagan bɔɔ asɛm no nyinaa mua bere a na ɔrekasa akyerɛ nyansahu mu akukudamfo no. Ɔkae sɛ: “Mo, nyansahu mu akunini, nneɛma a anka ɛrentumi nyɛ yiye nnɛra no, moama atumi ayɛ yiye nnɛ.”

Ɔbenfo John Brobeck kaa nkɔso a ɛyɛ nwonwa a ɛreba no ho asɛm sɛ: “Nyansahufo biara rentumi nka no pen sɛ ade bi rentumi nyɛ yiye. Nea obetumi aka ara ne sɛ ɛbɛyɛ den sɛ ɛbɛba. Nanso obetumi aka sɛ seesei yenni nimdeɛ a yebetumi de akyerɛkyerɛ biribi mu.” Ɔbenfo no toaa so sɛ, sɛ yɛte nka sɛ biribi rentumi nyɛ yiye a, “ade biako a ɛsɛ sɛ yɛde yɛn adwene kɔ so ne ahoɔden bi a ɛwɔ hɔ a nyansahufo nnim baabi a efi. Bible ka sɛ saa ahoɔden no yɛ Onyankopɔn tumi.”

 Onyankopɔn Fam De Ade Nyinaa Tumi Yɛ Yiye

Bere tenten ansa na Ɔbenfo Brobeck reka asɛm yi no, na Yesu a ofi Nasaret a wɔaka ne ho asɛm sɛ onipa a ɔsen biara a watena ase pɛn no aka dedaw sɛ: “Nea ɛrentumi nyɛ yiye wɔ nnipa fam no betumi ayɛ yiye wɔ Onyankopɔn fam.” (Luka 18:27) Onyankopɔn honhom kronkron no yɛ tumi a ɛsen tumi biara wɔ amansan yi mu. Yenni kwan biara a yebetumi afa so ahu tumi no dodow. Honhom kronkron betumi ama yɛayɛ nneɛma bi a anka yɛn ahoɔden ntumi nyɛ.

Esiane sɛ yɛyɛ nnipa nti, ɛtɔ da a yetumi kɔ tebea bi mu ma yɛte nka sɛ yɛrentumi nyɛ ho hwee. Ebi ne bere a ebia owu afa yɛn ho nipa bi, anaa bere a nneɛma nkɔ yiye wɔ yɛn abusua mu na yɛrepɛ baabi de yɛn ti afa no. Ebi nso a na yɛn asetena ayɛ basaa ma agyaw yɛn adwennwene ara ama yenhu nea yɛnyɛ yɛn ho. Ɛba saa a, yɛte nka sɛ yɛn ho aka mu na yenni anidaso biara. Dɛn na yebetumi ayɛ?

Bible ka sɛ, sɛ obi wɔ ade nyinaa so Tumfoɔ no mu gyidi na sɛ ɔyɛ nea obetumi biara de sɔ n’ani na ɔbɔ mpae srɛ ne honhom kronkron a, ebetumi aboa no ama wadi nneɛma a ɛboro n’ahoɔden so no so. Hyɛ Yesu awerɛhyem nsɛm yi nsow: “Nokwarem mise mo sɛ obiara a ɔka kyerɛ bepɔw yi sɛ, ‘Tutu kɔhwe po mu,’ a onnye kyim ne komam na mmom ɔwɔ gyidi sɛ nea ɔka no bɛba mu no, ɛbɛyɛ hɔ ama no.” (Marko 11:23) Sɛ yɛma kwan ma tumi a ɛwɔ Onyankopɔn Asɛm mu ne ne honhom no kyerɛ yɛn kwan wɔ abrabɔ mu a, tebea biara nni hɔ a yɛrentumi nni so.

Ma yɛmfa ɔbarima bi a kokoram kum ne yere a ɔne no atena mfe 38 nyɛ nhwɛso. Ná ontumi koraa. Ɛyɛɛ no sɛ ontumi ntena. Ɛtɔ bere bi a na ɔte nka sɛ, sɛ wawu koraa a anka ɔpɛ sen sɛ ɔbɛkɔ so atena ase a ne yere nka ne ho. Ɔkae sɛ ɔtee nka sɛ ɔnam esum kabii bon mu. Seesei ogye di sɛ mpae a ɔde nusu bɔe, Bible akenkan a ɔyɛɛ no daa ne Onyankopɔn honhom na ɛboaa no ma ɔfaa tebea a na ɛyɛ no sɛ ontumi nnyina mu no mu.

Ná nkurɔfo bi aware reyɛ agu. Ná ɔbarima no wɔ abufuw bɔne ne subammɔne bebree. Ná asetena ayɛ den ama ɔbea no, enti anka ɔrekum ne ho. Ɛnna ne kunu fii ase ne Yehowa Adansefo suaa Bible. Nea osuae no boaa no ma ogyaee ne subammɔne ne abufuw bɔne no. Suban a na ɛte sɛ nea ontumi nnyae no, ɛyɛɛ ne yere nwonwa sɛ otumi gyaee ne nyinaa.

Ɔbarima bi nso kae sɛ ɔde nnubɔne ne brabɔne sɛee n’abrabɔ ma ɛde awerɛhodi kɛse bɛtoo ne so. Ɔka sɛ: “M’anuonyam nyinaa yerae.” Ofi ne komam bɔɔ Onyankopɔn mpae sɛ: “Awurade, minim sɛ wowɔ hɔ. Mesrɛ wo boa me!” Mpae a ɔbɔe no nti, Yehowa Adansefo ne no bɛyɛɛ Bible adesua, na ɛma ɔsesae koraa. Ɔka sɛ: “Ɛtɔ mmere bi a m’adwene bu me fɔ na mete nka sɛ mfaso biara nni me so. Ɛtɔ da a me werɛ tumi how paa. Ne nyinaa mu no, Onyankopɔn Asɛm aboa me ama madi saa atenka no nyinaa so. Sɛ mintumi nna anadwo a, mekaakae Bible mu nsɛm a masua no bi. Sɛ mede m’adwene si nneɛma pa so saa a, ɛboa me.” Seesei waware ama n’ani agye. Ɔne ne yere nyinaa de ahokeka reboa nkurɔfo ama wɔde wɔn werɛ ahyɛ tumi a ɛwɔ Onyankopɔn Asɛm mu no mu. Bere a ɔyɛ aberante a nneɛma nkɔ yiye koraa no, wannwen ho da sɛ nneɛma betumi asesa saa.

Osuahu ahorow yi kyerɛ sɛ tumi wɔ Onyankopɔn Asɛm mu na ne honhom kronkron no betumi ayɛ nneɛma a ɛboro nnipa ahoɔden so. Nanso ebia wobɛka sɛ, “Egye gyidi paa!” Ɛyɛ ampa. Bible koraa ka sɛ “gyidi nni hɔ a, obi ntumi nsɔ Onyankopɔn  ani.” (Hebrifo 11:6) Wo de, dwen ho hwɛ: Fa no sɛ wowɔ yɔnko berɛbo bi a ɔwɔ tumi, anaa ɔyɛ panyin wɔ sikakorabea bi, ɛnna ɔka kyerɛɛ wo sɛ: “Nsuro koraa. Wo de, wuhia biribiara a, behu me.” Nea ɛbɛyɛ biara n’asɛm no bɛkyekye wo werɛ. Nanso nnipa taa di yɛn huammɔ ma ɛyɛ yaw. Ebia na wo yɔnko no pɛ sɛ odi ne bɔhyɛ so paa nanso tebea bi a ɔbaa mu nti, antumi anyɛ yiye. Sɛ w’adamfo no wu a, ɛnde adwempa a onyae sɛ ɔbɛboa wo no nyinaa bɛyɛ ɔkwa. Nanso Onyankopɔn de, nneɛma a etumi to nnipa no biara nni hɔ a ebetumi ahaw no. Bible ma yɛn awerɛhyem sɛ: “Biribiara nso Onyankopɔn yɛ.”​—Luka 1:37, The Jerusalem Bible.

“Wugye Eyi Di?”

Nsɛm bebree wɔ Bible mu a edi adanse sɛ saa asɛm no yɛ nokware. Yɛnhwɛ ɛho nhwɛso bi.

Bere a Sara dii mfe 90 a wɔka kyerɛɛ no sɛ ɔbɛwo ɔbabarima no, ɔserewee, nanso sɛnea ɛyɛe a yebenyaa Israelfo no di adanse sɛ ɔbea yi woe ampa. Apataa kɛse bi menee ɔbarima bi ma odii nnansa wɔ apataa no yam, na onyaa nkwa bɛkaa n’anom asɛm. Wɔfrɛ no Yona. Ná Luka yɛ oduruyɛfo, enti na onim nsonsonoe a ɛda obi a wawu ne obi a watɔ mum ntam. Ɔkyerɛwee sɛ aberante Eutiko fi mfɛnsere ano wɔ abansoro so bɛhwee fam wui ma wonyanee no. Saa nsɛm yi nyɛ anansesɛm. Sɛ wotɔ wo bo ase hwehwɛ saa nsɛm yi biara mu a, wubehu sɛ ɛyɛ nokware.​—Genesis 18:10-14; 21:1, 2; Yona 1:17; 2:1, 10; Asomafo Nnwuma 20:9-12.

Yesu kaa asɛm a ɛyɛ nwonwa yi kyerɛɛ n’adamfo Marta: “Obiara a ɔte ase a onya me mu gyidi no renwu da.” Bere a Yesu kaa saa asɛm a wohwɛ a wobɛka sɛ ɛrentumi nyɛ yiye yi, obisaa asɛm a ɛho hia yi sɛ: “Wugye eyi di?” Ɛnnɛ nso ehia sɛ yedwinnwen saa asɛmmisa no ho.​—Yohane 11:26.

Daa Nkwa Wɔ Asase So —Ɛrentumi Nyɛ Yiye Anaa?

Akyerɛwfo bi kyerɛw onyinkyɛ ho asɛm baa wɔn krataa mu sɛ: “Ɛrenkyɛ, ebia yebetumi atena ase akyɛ koraa asen sɛnea ɛte nnɛ no—ebi mpo a, yebetumi atena ase daa.” The New Encyclopædia Britannica kyerɛkyerɛ mu sɛ ɛnyɛ nkwammoaa a egyae adwuma yɛ, nkwakoraabɔ ne mmerewabɔ, anaa nneɛma bi a ɛtete saa na ɛma nnipa wu, na mmom ɛbɛyɛ sɛ biribi foforo a yennim na ɛmma nipadua no nyɛ adwuma yiye anaa egyae adwuma yɛ koraa. * Nhoma no kae sɛ: “Sɛ obi nyin a, ebetumi aba sɛ nneɛma bi a ekurakura nipadua no na asɛe ma enti ɛmma dwumadi a ɛho hia no nkɔ so yiye.”

Saa nsɛm yi nyinaa yɛ nnipa adwene, nanso Bible de, ɛma yenya adanse a edi mu sɛ yebetumi atena ase daa, na ɛnyɛ nnipa nyansa anaa nyansahu biara. Nkwa Nsuti, Yehowa Nyankopɔn a ɔbɔɔ yɛn no ahyɛ bɔ sɛ “ɔbɛmene owu akosi daa.” (Dwom 36:9; Yesaia 25:8) Wugye eyi di? Yehowa na wahyɛ saa bɔ no, na ɔrentumi nni atoro nso.​—Tito 1:2.

[Ase hɔ asɛm]

[Asɛm a wɔafa aka wɔ kratafa 27]

“Nneɛma a anka ɛrentumi nyɛ yiye nnɛra no, . . . atumi ayɛ yiye nnɛ.”​—RONALD REAGAN

[Asɛm a wɔafa aka wɔ kratafa 28]

Sɛ abrabɔ yɛ den a, hena nkyɛn na wokɔ?

[Mfonini Fibea wɔ kratafa 27]

NASA photo