Nea yɛrebɛka ho asɛm wɔ ha yi yɛ nsɛm a ebia woabisa pɛn, na ɛbɛkyerɛ wo faako a wubetumi anya ho mmuae wɔ wo Bible mu. Yehowa Adansefo ani begye ho sɛ wɔne wo bɛbɔ ho nkɔmmɔ.

1. Adɛn nti na Onyankopɔn ama ne ho din?

Akyinnye biara nni ho sɛ wopɛ sɛ obiara de wo din ankasa frɛ wo na ɛnyɛ sɛ ɔde edin bi te sɛ “papa,” “owura,” “awuraa,” anaa “maame” bɛfrɛ wo. Wo din na obiara de hu wo. Abodin a wɔde frɛ Onyankopɔn no bi ne “Awurade Tumfoɔ,” “ade nyinaa so Tumfoɔ Nyankopɔn,” ne yɛn “Bɔfo Kɛse no.” (Genesis 15:2; 17:1; Ɔsɛnkafo 12:1) Nanso wama ne ho din na ama yɛatumi ne no afa adamfo. Twi kasa mu no, Onyankopɔn din paa ne Yehowa.—Kenkan Yesaia 42:8.

Bible asekyerɛfo pii de din bi te sɛ “Onyankopɔn” ne “Awurade” asi Onyankopɔn din ankasa anan wɔ Bible mu. Nanso edin no pue wɔ tete Hebri nkyerɛwee a wɔde kyerɛɛ Bible ase no mu bɛyɛ 7,000. Ɛda adi sɛ Onyankopɔn pɛ sɛ nnipa hu ne din.—Kenkan Yesaia 12:4.

2. Adɛn nti na ehia sɛ yehu Onyankopɔn din?

Sɛ yɛka sɛ obi nim Onyankopɔn din a, ɛnyɛ ɛno ara ne sɛ onim din no bɔ kɛkɛ. Obi a ɔde Onyankopɔn din nim no no ne no wɔ ayɔnkofa. Edin Yehowa no kyerɛ “Nea Ɔma Ɛyɛ Hɔ.” Nea ɛkyerɛ ne sɛ Onyankopɔn bɛyɛ ne ho sɛnea ɔpɛ biara ama n’atirimpɔw ayɛ hɔ. Enti sɛ obi nim Onyankopɔn din a, ɛkyerɛ sɛ ogye di sɛ ɔbɛma ne bɔhyɛ nyinaa aba mu. (Dwom 9:10) Wɔn a wonim Onyankopɔn din na wɔde yɛ adwuma no, wɔn gyidi ka wɔn ma wɔde wɔn ho to no so, na wɔma n’apɛde hia wɔn sen biribiara. Yehowa Nyankopɔn bɛbɔ saafo no ho ban.—Kenkan Dwom 91:14.

  3. Adɛn nti na Onyankopɔn pɛ sɛ yehu ne din?

Onyankopɔn pɛ sɛ nnipa de ne din hu no efisɛ mfaso wɔ so ma wɔn. Ɛma wɔne Onyankopɔn fa adamfo, na wonya anidaso sɛ wɔbɛtena ase daa. Enti ɛnyɛ nwonwa sɛ Yehowa pɛ sɛ yɛma nnipa hu ne din!—Kenkan Yohane 17:3; Romafo 10:13, 14.

Yesu maa nnipa huu Onyankopɔn din, na ɔkwan a ɔfaa so yɛɛ saa ne sɛ ɔkyerɛkyerɛɛ wɔn Onyankopɔn akwan, ne mmara, ne ne bɔhyɛ. Ɛnnɛ Yesu akyidifo gu so reyɛ adwuma a ɛma nkurɔfo hu Onyankopɔn din no wɔ aman nyinaa mu. Wɔbom yɛ saa adwuma yi sɛ ‘nnipa a Onyankopɔn ayi wɔn ama ne din.’—Kenkan Asomafo Nnwuma 15:14; Yohane 17:26.

4. Dɛn na Onyankopɔn bɛyɛ de ahyɛ ne din anuonyam?

Yehowa Nyankopɔn pɛ sɛ ɔhyɛ ne din anuonyam efisɛ nkurɔfo agu ho fi. Ebi ne sɛ nnipa binom ka sɛ ɛnyɛ ɔno na ɔbɔɔ nkwa, na ɛho nhia sɛ yetie no. Ebinom nso se onnwen yɛn ho, na ɔno na ɔma yehu amane. Saafo no sɛe Onyankopɔn din. Nanso ɔrenhwɛ mma wɔnyɛ saa daa. Onyankopɔn bɛsɛe nnipa a wogu ne din ho fi no.—Kenkan Dwom 83:17, 18.

Nea Yehowa bɛyɛ de ahyɛ ne din anuonyam ne sɛ n’Ahenni no bɛsɛe nnipa nniso nyinaa na ama adesamma anya asomdwoe ne dwoodwoo asetena bio. (Daniel 2:44) Ɛrenkyɛ, obiara behu sɛ Yehowa ne nokware Nyankopɔn no.—Kenkan Hesekiel 36:23; Mateo 6:9.

Dɛn na ɛsɛ sɛ woyɛ? Sua Onyankopɔn Asɛm na wo ne ne nkurɔfo mmɔ na ama woatumi abɛn no. Sɛ Yehowa hyɛ ne din anuonyam a, ɔbɛkae n’asomfo anokwafo.—Malaki 3:16.

Sɛ wopɛ nsɛm pii a, hwɛ nhoma Yehowa Adansefo atintim yi, Dɛn na Bible Kyerɛkyerɛ Ankasa? ti 1.

[Kratafa 16 mfonini]

Onyankopɔn din wɔ tete Hebri nsaano nkyerɛwee mu