SAA asɛm yi ma yehu nea afi nnipa nniso mu aba. Nnipa nniso akɔfa amanehunu ne awerɛhow a enni ano aba. Efi tete no, nnipa a wɔwɔ adwempa a wɔabɔ mmɔden sɛ wɔbɛma nneɛma akɔ so pɛpɛɛpɛ no, ebewie ase no, na ɔporɔw ne kɛtɛasehyɛ ama wɔadi nkogu. Adɛn ntia? Dɛn nti na ɔporɔw ne kɛtɛasehyɛ da so wɔ hɔ? Yebetumi aka sɛ efi nneɛma akɛse abiɛsa bi a epiapia nnipa.

Bible ka no pefee sɛ yɛn “nyinaa wɔ bɔne mu.” (Romafo 3:9) Bɔne agye ntini wɔ yɛn mu te sɛ ɔyare a enni aduru a ‘ɛwɔ yɛn’ mogya mu. Bɔne adi nnipa so “hene” mfe mpempem pii. “Bɔne mmara” yɛ adwuma wɔ yɛn mu da biara. Bɔne a ɛwɔ yɛn mu no ma nnipa bebree dwen wɔn nko ara ho, na nea ɛwɔ wɔn adwenem ara ne sɛ wobedidi nkurɔfo ho anaasɛ wɔbɛfa kwan biara so abedi nkurɔfo so tumi.—Romafo 5:21; 7:17, 20, 23, 25.

Adifudepɛ ne pɛsɛmenkominya na ahyɛ wiase yi mu ma. Esiane sɛ saa nneɛma no atwa yɛn ho ahyia nti, ɛyɛ den ma ebinom sɛ wɔbɛtwe wɔn ho afi saa nneɛma no ho. Pɛsɛmenkominya piapia wɔn ma wɔpere tumidi. Afei nso ɛba wɔn komam denneennen sɛ wobenya sika ne ahonyade pii asen nea wohia. Awerɛhosɛm ne sɛ, ɛnhaw wɔn sɛ wobedi atoro de anya nea wɔpɛ. Ɛsɛ sɛ anka saafo yi tumi ko tia subammɔne, nanso wodi ‘nnipa dodow akyi kɔyɛ bɔne.’—Exodus 23:2.

Ɔbɔfo tuatewfo Satan ‘redaadaa asase sofo nyinaa.’ (Adiyisɛm 12:9) Nea ɔpɛ ara ne sɛ ɔbɛdaadaa nnipa. Obiara mpɛ ahokyere, enti Ɔbonsam betumi afa anifere kwan so apiapia yɛn ama yɛapɛ sika ne ahonyade wɔ nnaadaa kwan so.

Enti eyi kyerɛ sɛ yɛte sɛ abaduaba bi a Satan de ahama asuso yɛn mu de yɛn yɛ nea ɔpɛ anaa? Yebenya ho mmuae wɔ asɛm a edi hɔ no mu.