Ben: Mr. Oduro, m’ani agye paa sɛ mahu wo bio.

Mr. Oduro: Me nso m’ani agye paa sɛ mahu wo.

Ben: Ɛda a mebaa ha no, wokaa asɛm bi, na madwen ho saa ara.

Mr. Oduro: Kae me ɛ.

Ben: Wokae sɛ bere a wotee sɛ Yehowa Adansefo nnye nni sɛ Ɔbonsam gya bi wɔ hɔ no, ɛyɛɛ wo nwonwa.

Mr. Oduro: Ampa, ɛyɛɛ me nwonwa paa. Na mɛka nokware a, mente ase koraa sɛ munnye nni.

Ben: Ɛyɛ me dɛ sɛ woaka akyerɛ me. Sɛ nkurɔfo kyerɛ wɔn adwene saa a, ɛma m’ani gye. Ɛsono sɛnea obiara kyerɛkyerɛ Ɔbonsam gya mu; enti wo nso wote ase dɛn?

Mr. Oduro: Me de, migye di paa sɛ abɔnefo wu a wɔkɔ Ɔbonsam gya mu na wɔbɛyɛ wɔn ayayade wɔ hɔ daa.

Ben: Saa na nnipa bebree gye di. Nanso Mr. Oduro, ma mimmisa wo asɛm kakra. Asɛm a ɛyɛ yaw ato wo pɛn, meboa?

Mr. Oduro: Yiw. Mfe anum ni na obi kum me nuabea.

Ben: O, kosɛ. Mehwɛ a, ɛyɛɛ wo yaw paa.

Mr. Oduro: Ɛnyɛ sɛ woreka yi. Ne ho asɛm ba me tirim daa.

Ben: Mahu sɛ nea enti a ebinom gye di sɛ Ɔbonsam gya ho hia paa ne sɛ, nnipabɔnefo bi adi wɔn bɔne pɛn, na obi nso a obi adi no bɔne pɛn de, ɔpɛ sɛ ohu sɛ wɔatwe abɔnefo aso.

Mr. Oduro: Asɛm no ara na woaka no! Onipa a okum me nuabea a ama yɛredi awerɛhow no, ɛsɛ sɛ wɔtwe n’aso paa.

Ben: Ntease wom sɛ yɛbɛte nka saa. Bible kyerɛkyerɛ sɛ, sɛ wɔteetee nnipa a wɔn ho nni asɛm a, Onyankopɔn nso, ɛhyɛ no abufuw paa, na wahyɛ bɔ sɛ ɔbɛtwe abɔnefo aso. Hwɛ nea Yesaia 3:11 ka; ɛka sɛ: “Ɔbɔnefo nnue!  Mmusu di n’akyi; na nea ɔyɛe no ara bi na wɔde bɛyɛ no!” Enti yebetumi aka no pen sɛ abɔnefo remfa wɔn ho nni; Onyankopɔn bɛtwe wɔn aso.

Mr. Oduro: Na sɛ Ɔbonsam gya nni hɔ sɛnea woreka no a, ɛbɛyɛ dɛn na ayɛ yiye saa?

Ben: Woabisa asɛm paa. Ne tiawa mu no, asotwe a Onyankopɔn de bɛma abɔnefo ne sɛ ɔbɛsɛe wɔn koraa. Hwɛ nea Bible ka wɔ 2 Tesalonikafo 1:9. Mesrɛ wo kenkan hɔ ma yentie.

Mr. Oduro: Yoo. Ɛhɔ kenkan sɛ: “Wɔde daa ɔsɛe bɛyɛ asotwe ama wɔn a wɔte saa no ma wɔafi Awurade anim.”

Ben: Enti Mr. Oduro woahu, sɛ Onyankopɔn bu obi fɔ sɛ ɔyɛ ɔbɔnefo a, anidaso biara nni hɔ mma no efisɛ owu a, ɔrennyan no bio. Anidaso biara nni hɔ sɛ ɔbɛsan atena ase daakye.

Mr. Oduro: Mahu nea Bible reka no, nanso ɛba saa a na asisi aba mu. Owu de, ɛda hɔ ma obiara. Enti wunnye nni sɛ ɛsɛ sɛ wɔtwe abɔnefo aso kyɛn saa?

Ben: Mahu sɛ atɛntrenee ho hia wo paa.

Mr. Oduro: Wommoa.

Ben: Eye paa. Nokwasɛm ne sɛ, biribi nkɔ yiye a, nnipa tumi hu efisɛ saa na Onyankopɔn bɔɔ yɛn. Ɔno nso atɛntrenee hia no. Nanso sɛ nyamesom mu mpanyimfo kyerɛkyerɛ sɛ Onyankopɔn twe nnipa aso wɔ Ɔbonsam gya mu a, na wɔrekyerɛ sɛ Onyankopɔn tirim yɛ den paa.

Mr. Oduro: Mente nea woreka no ase.

Ben: Ma menyɛ nhwɛso bi. Sɛ́ wunim Adam ne Hawa asɛm a ɛwɔ Bible mu no?

Mr. Oduro: Yiw. Onyankopɔn ka kyerɛɛ wɔn sɛ mma wonnni aduaba bi, nanso wodii.

Ben: Ɛno ara ne no. Ma yɛnhwɛ saa asɛm no wɔ Bible mu. Ɛwɔ Genesis 2:16, 17. Ɛhɔ kenkan sɛ: “Na Yehowa Nyankopɔn de ahyɛde yi nso maa onipa sɛ: ‘Turom ha nnua nyinaa, di bi. Na papa ne bɔne ho nimdeɛ dua no de, nni bi, efisɛ da a wubedi bi no, owu na wubewu.’” Enti dɛn na Onyankopɔn kae sɛ, sɛ Adam di aduaba no a, ɛbɛto no?

Mr. Oduro: Ɔkae sɛ Adam bewu.

Ben: Saa pɛpɛɛpɛ. Wo de, dwen ho hwɛ, Adam yɛɛ bɔne no, ɔde bɔne asan adesamma nyinaa. * Nanso, Onyankopɔn ka kyerɛɛ Adam sɛ ɔbɛkɔ Ɔbonsam gya bi mu anaa?

Mr. Oduro: Dabi.

Ben: Enti sɛ Onyankopɔn bɛtwe Adam ne Hawa aso de wɔn agu gya mu daa a, wunnye nni sɛ anka ɛsɛ sɛ ɔka kyerɛ wɔn? Wunhu sɛ ɛno na ɛbɛkyerɛ sɛ ɔwɔ atɛntrenee ne ɔdɔ?

Mr. Oduro: Ampa de.

Ben: Afei nso bere a Adam ne Hawa yɛɛ bɔne no, ma yɛnhwɛ nea Onyankopɔn ka kyerɛɛ wɔn. Mesrɛ wo wonkenkan Genesis 3:19 mma me?

Mr. Oduro: Yoo. Ɛkenkan sɛ: “W’anim fifiri mu na wubedidi kosi sɛ wobɛsan akɔ dɔte mu, efisɛ emu na woyii wo fii. Woyɛ dɔte na dɔte mu na wobɛsan akɔ.”

Ben: Meda wo ase. Sɛnea Onyankopɔn anom asɛm kyerɛ no, ɛhe na na Adam bɛkɔ?

Mr. Oduro: Ɔkae sɛ Adam bɛsan akɔ dɔte mu.

Ben: Saa pɛpɛɛpɛ. Wunhu sɛ sɛ yɛka sɛ obi bɛsan akɔ baabi a, ɛkyerɛ sɛ ofi hɔ na ɔbae?

Mr. Oduro: Ɛte saa.

Ben: Na bere a Onyankopɔn mmɔɔ Adam no, na Adam wɔ he?

Mr. Oduro: Ná onni baabiara.

Ben: Ɛyɛ ampa. Woahu sɛ Onyankopɔn anka Ɔbonsam gya biara ho asɛm wɔ atemmu no mu. Sɛ Onyankopɔn nim sɛ Ɔbonsam gya mu na Adam bɛkɔ ɛnna ɔka kyerɛɛ no sɛ ɔbɛsan akɔ dɔte a ofi mu bae no mu a, ɛnde anka yɛbɛka sɛ Onyankopɔn adaadaa no, anaa meboa?

Mr. Oduro: Anka ɛbɛyɛ nnaadaa mmom.

Ben: Ma yensusuw biribi foforo a ɛfa Ɔbonsam gya ho.

Mr. Oduro: Ɛyɛ dɛn?

Ben: Sɛ nkurɔfo ka Ɔbonsam gya ho asɛm a, hena na wɔkyerɛ sɛ ɔhwɛ so na ɔtwe nkurɔfo aso wɔ hɔ?

Mr. Oduro: Sɛ́ ɛno de Ɔbonsam no ara na ɔhwɛ so.

Ben: Sɛ́ wunim nso sɛ Ɔbonsam yɛ Onyankopɔn tamfo paa. Enti sɛ Onyankopɔn de nnipa gu gya mu sɛ Ɔbonsam nyɛ wɔn ayayade a, wunhu sɛ ɛbɛkyerɛ sɛ Onyankopɔn ne Ɔbonsam ayɛ biako?

Mr. Oduro: Hmm. Minnwen ho saa da.

Ben: Ma yɛnyɛ mfatoho bi. Wowɔ ba, meboa?

Mr. Oduro: Yiw, mewɔ ɔbabarima biako a wadi mfe 15.

Ben: Fa no sɛ wo ba no afi ase retew atua denneennen. Ɔyɛ nneɛma bɔne bebree a ɛma wo werɛ how. Anka dɛn na wobɛyɛ?

Mr. Oduro: Anka mɛbɔ mmɔden akasa akyerɛ no.

Ben: Minim paa sɛ wobɛyɛ nea wubetumi biara ama no agyae nea ɔreyɛ no.

Mr. Oduro: Ɔkwan biara so mɛyɛ saa.

Ben: Yɛmfa no sɛ woayɛ nea ɛsɛ sɛ woyɛ biara nanso wantie wo. Anka worentwe n’aso?

Mr. Oduro: Anka mɛtwe n’aso.

Ben: Nanso, yɛmfa no sɛ woate sɛ nipabɔnefo bi na ɔrekyerɛ wo ba no nneɛma bɔne. Anka wobɛyɛ dɛn?

Mr. Oduro: Anka me bo befuw saa nipa no paa.

Ben: Afei, ma me asɛmmisa yi ho mmuae. Bere a woahu sɛ onipabɔnefo a ne suban nye no na wama wo ba atew wo so atua no, wobɛkɔ saa nipa no nkyɛn akɔka akyerɛ no sɛ ɔntwe wo ba no aso mma wo?

Mr. Oduro: Merenyɛ saa koraa. Ntease biara nnim sɛ mɛyɛ saa.

Ben: Sɛ ɛte saa a, Satan Ɔbonsam a ɔno na ɔdaadaa nkurɔfo ma wɔyɛ bɔne no, wohwɛ a ntease wom sɛ Onyankopɔn bɛma ɔno ara asan atwe abɔnefo aso anaa?

Mr. Oduro: Dabi, minnye nni.

Ben: Bio nso, sɛ Onyankopɔn pɛ sɛ ɔtwe abɔnefo aso wɔ gya mu a, wohwɛ a, Ɔbonsam a ɔyɛ Onyankopɔn tamfo kɛse no, ɔno na ɔbɛpene so atwe wɔn aso anaa?

Mr. Oduro: Eyi de, minnwen ho saa da!

Ben: Nanso nya awerɛhyem sɛ Onyankopɔn bɛsɛe nnipa a wɔasi wɔn bo sɛ bɔne ara na wɔbɛyɛ no. Ma yɛnhwɛ kyerɛwsɛm biako bi a esi asɛm yi so dua; Dwom 37:9. Mepa wo kyɛw kenkan ma yentie.

Mr. Oduro: Yoo. Ɛse: “Wobeyi nnebɔneyɛfo hɔ, na wɔn a wɔtwɛn Yehowa no, wɔn na wobenya asase no adi.”

Ben: Meda wo ase. Wuhuu nea Yehowa se ɔde bɛyɛ abɔnefo no?

Mr. Oduro: Bible se Onyankopɔn beyi wɔn afi hɔ.

Ben: Woayɛ ade. Ɛno kyerɛ sɛ ɔbɛsɛe wɔn korakora. Nanso nnipa papa, kyerɛ sɛ, “wɔn a wɔtwɛn Yehowa no,” bɛtena asase so daa. Minim sɛ nsɛmmisa bi betumi aba w’adwenem. Ebia wubebisa sɛ, adɛn koraa nti na Onyankopɔn nhwɛ mma nnipa nnyae nneɛma bɔne yɛ? Na sɛ ɔbɛsɛe abɔnefo ampa a, adɛn nti na ɔnsɛee wɔn dedaadaw yi?

Mr. Oduro: Nsɛmmisa yi de, ɛho hia paa.

Ben: Sɛ yehyia bere foforo a metumi akyerɛ wo ɛho mmuae a ɛwɔ Bible mu. *

Mr. Oduro: M’ani begye ho saa.