NEA ƐMA ABUSUA NYA ANIGYE
Mmusua a Mmanoma Wom ne Emu Haw
MARGARET * TE AUSTRALIA, NA ƆWƆ MMANOMA: “Me kunu yere dedaw no ka kyerɛɛ mmofra no sɛ meka asɛm biara a, mma wonntie; sɛ meka kyerɛ wɔn sɛ wonkotwitwi wɔn se mpo a, mma wonntie.” Ɛyɛ Margaret sɛ saa afotu bɔne no kɔfaa nsɛmnsɛm baa n’aware mu.
Afie a mmanoma wom no, wɔne nnipa a wɔnte fie hɔ no nkitahodi tumi yɛ den paa. * Sɛ obi wɔ abanoma a, mpɛn pii no, ebehia sɛ ɔne abofra no maame anaa ne papa ankasa tena ase dwen nneɛma bi ho te sɛ ebia nsrahwɛ, asotwe ne sikasɛm. Ɛtɔ da a, nnamfo ne abusuafo nso, etumi yɛ den ma wɔn sɛ wobegye ɔhokafo foforo no atom. Momma yɛnhwɛ sɛnea Bible mu afotu betumi aboa mmusua a mmanoma wom ma wɔadi ɔhaw a ɛtete saa ho dwuma.
NKITAHODI 1: ABOFRA NO MAAME ANAA NE PAPA
Judith a ofi Namibia no wɔ mmanoma, na nea ɔka ne sɛ: “Me mmanoma no maame ka kyerɛɛ wɔn bere bi sɛ ɛnyɛ wɔn maame ne me; meyɛ wɔn papa yere foforo, enti sɛ me ne papa no wo a, ɔnyɛ wɔn nua. Asɛm no hyee me paa efisɛ na mepɛ mmofra no asɛm te sɛ me ara me mma.”
Animdefo kyerɛ sɛ, sɛ abanoma wɔ fie a, sɛnea abanoma no ne n’awofo ankasa ntam te no betumi akɔfa asɛm kɛse aba fie hɔ. Wɔn a ɛtaa yɛ asɛm ma wɔn paa ne abofra no maame a ɔwoo no ne ne maame a ɔne no te. Dɛn na ebetumi aboa wɔn?
Nea ɛbɛboa: Kyerɛ nea obetumi ayɛ ne nea ontumi nyɛ. Sɛ woyɛ w’adwene sɛ wubeyi abofra no maame anaa ne papa a ɔwoo no no asi nkyɛn a, ɛbɛhaw abofra no paa. * Nea ‘ɔwoo’ abofra no, ne ho hia paa wɔ abofra no asetenam. (Mmebusɛm 23:22, 25) Sɛ woma wo hokafo dedaw no nya abofra no ho kwan boro so a, ebetumi ateetee wo hokafo foforo no anaa ahyɛ no abufuw mpo. Abofra no maame anaa ne papa a ɔwoo no no, ma no hokwan bi, nanso mma ɔnntra hye na anka w’aware.
NEA ƐBƐBOA AWOFO
- Sɛ wo ne wo hokafo dedaw no rekasa a, ka mmofra no nkutoo ho asɛm; mfa nsɛm foforo mma mu. Wubetumi afa kwan bi so aka akyerɛ no sɛ, sɛ ɔpɛ sɛ ɔfrɛ a, ɛbɛyɛ yiye a anka ɔmfrɛ awia, na ɔmfa nhyɛ bere pɔtee bi. Ɛno ye sen sɛ ɔbɛfrɛ bere biara a ɔpɛ anaa ɔbɛfrɛ anadwo.
- Sɛ ɛnyɛ wo na mmofra no te wo nkyɛn a, wubetumi afrɛ wɔn telefon so; wubetumi akyerɛw wɔn krataa, wubetumi nso de text message akɔma wɔn, na wopɛ nso a, wubetumi de e-mail akɔma wɔn. (Deuteronomium 6:6, 7) Ebinom mpo tumi de abɛɛfo mfiri bɔ nkɔmmɔ ma wohu mmofra no. Sɛ wo ne wɔn di nkitaho saa a, wubetumi ahu sɛnea wo mma no te paa, na woatumi akyerɛ wɔn akyerɛ pa te sɛ nea wo ne wɔn na ɛte.
NEA ƐBƐBOA ƐNANOM A WƆWƆ MMANOMA
- Nya “tema” ma mmofra no maame, na ma ɔnte ase sɛ nea aba no nkyerɛ sɛ woresi n’anan. (1 Petro 3:8) Bere biara a mmofra no wɔ wo nkyɛn no, ka wɔn ho nsɛm kyerɛ wɔn maame no, nanso taa ka wɔn ho asɛmpa. (Mmebusɛm 16:24) Ɛyɛ a ma ɔnka n’adwene, na sɛ ɔkyerɛ n’adwene nso a, da no ase.
- Mmofra no maame wɔ hɔ na sɛ woreyɛ biribi akyerɛ sɛ wopɛ wɔn asɛm a, tɔ wo bo ase kakra. Beverly a ɔte United States no wɔ mmanoma, na ɔka sɛ: “Ɛyɛ a me mmanoma no pɛ sɛ wɔfrɛ me Mama. Yɛne wɔn ka kosii sɛ, yɛwɔ fie de a, wobetumi afrɛ me Mama, na sɛ wɔn maame Jane anaa n’abusuafo no bi wɔ hɔ a, ɛnde wɔmmfrɛ me saa. Efi saa bere no, me ne Jane ntam yɛɛ kama. Eduu baabi mpo no, sukuu dwumadi bi wɔ hɔ a, me ne no nyinaa boaa mmofra no ma wɔyɛe.”
Ɛbɛyɛ wo nwonwa sɛ nsɛm a woka kyerɛ wo mma no, ɛno na wɔde yɛ adwuma
NEA ƐBƐBOA AKORAFO NO AMA WƆN NTAM AYƐ PAPA
- Sɛ mmofra no wɔ hɔ a, nka wo kora no akyi asɛmmɔne. Ɛnyɛ den koraa sɛ wobɛkeka asɛmmɔne wɔ wo yɔnko akyi, nanso sɛ woyɛ saa a, etumi haw abofra no paa. Sɛ abofra no te nea wokae no a, obetumi akɔka wɔ baabi foforo, na ebi nso a na wanhu ka. (Ɔsɛnkafo 10:20) Sɛ abofra bɛka kyerɛ wo sɛ ɔwofo biako no aka wo ho asɛm a, hu sɛ yaw bi na ɔde reka saa. Wubetumi aka biribi te sɛ: “Ɛhaw me sɛ wotee saa asɛm no. Wo maame bo afuw me, na sɛ nkurɔfo bo fuw nso a, wotumi keka nsɛm a ɛyɛ yaw.”
- Sɛ ɛbɛyɛ yiye a, anka monhwɛ nhu sɛ ɔwofo biara a mmofra no bɛkɔ ne nkyɛn no, mmara biako na ɛbɛyɛ adwuma. Sɛ ɛrentumi nyɛ yiye saa a, ma wonhu sɛ ɛsono baabiara ne ɛhɔ mmara, nanso nka biribiara mfa mmu ɔwofo biako no abomfiaa. Ma yɛmfa nhwɛso bi:Abofra no maame a ɔne no te: Kwame, bɛfa wo toworo no kɔhata.Kwame: Me maame hɔ de, yɛde gu hɔ na wahata ama yɛn.Abofra no maame a ɔne no te (ɔde abufuw kasa): Ɛnde ɔrekyerɛ wo akwadworɔ.Ɔkaa nea edi so yi a, anka ɛno mmom nye?Abofra no maame a ɔne no te (ɔtɔ ne bo ase kasa): Ɛno nso ye. Ɛha de obiara hata ne de.
- Sɛ ɔwofo biako no bɛba abɛfa mmofra no a, mfa biribi nhyɛ saa bere no mfa nsiw kwan. (Mateo 7:12) Sɛ wopɛ sɛ mmofra no yɛ biribi saa bere no, na sɛ woyɛ ho hwee a ɛnyɛ yiye a, ɛnde srɛ kwan fi ɔwofo biako no hɔ ansa na woama mmofra no ayɛ.
Nidi ne obu tumi boa paa
SƆ EYI HWƐ: Bere biara a wobɛsan ahyia wo kora no, yɛ nea edidi so yi:
- Tew w’anim ma no. Mmubu no anikyew, na nyɛ biribiara mfa nkyerɛ sɛ ne ho yɛ wo ahi.
- Bɔ ne din kyia no. Enti sɛ ɔde Jane a, wubetumi aka sɛ, “Jane, maakye ɛ.”
- Sɛ modɔɔso na morebɔ nkɔmmɔ a, munnnyi no mmfi mu.
NKITAHODI 2: MMANOMA A WƆANYINYIN
Nhoma bi a wɔato din Step Wars kyerɛ sɛ ɔbea bi kae sɛ, sɛnea ne kunu gyina ne mma mpanyimfo akyi no, n’ani nnye ho. Sɛ ɔka kyerɛ ne kunu sɛ mmofra no mmu no a, onnye ntom. N’anom asɛm ne sɛ: “Ɛma me bo fuw paa.” Dɛn na wubetumi ayɛ wo mma mpanyimfo no na amma w’aware anyɛ basaa?
Nea ɛbɛboa: Kyerɛ sɛ wudwen wɔn ho. Bible ka sɛ: “Obiara nnhwehwɛ nea eye ma ne nko, na mmom ne yɔnko nso de.” (1 Korintofo 10:24) Bɔ mmɔden sɛ wobɛte wɔn ase. Sɛ mmanoma no anyinyin a, ebia ɛbɛyɛ wɔn sɛ, sɛ wɔpɛ maame anaa papa a wɔne no te no asɛm a, wɔn maame anaa wɔn papa a ɔwoo wɔn no rempɛ wɔn asɛm bio anaa ɛbɛyɛ wɔn sɛ wɔayi abusua a wofi mu no ama. Awofo no nso, ebia wobesuro sɛ wɔka mmofra no asɛm a, wɔne mmofra no ntam bɛyɛ basaa.
Nhyɛ wo mmanoma no mma wɔmmmɛn wo. Mmom sɛ wotɔ wo bo ase a, ɛno ara de ne ho bɛba. Ntease nnim sɛ obi bɛhyɛ ne yɔnko sɛ onnya ɔdɔ kann mma no. (Nnwom mu Dwom 8:4) Enti sɛ wowɔ mmanoma a, nnya adwene sɛ da koro pɛ wubetumi ayɛ ama wɔabɛn wo.
Sɛ wɔyɛ wo biribi a w’ani nnye ho mpo a, mfa ho yaw nkeka nsɛm a ebesi wo tirim biara. (Mmebusɛm 29:11) Sɛ ɛyɛ den sɛ wobɛhyɛ wo tɛkrɛma so a, bɔ mpae sɛnea Ɔhene Dawid a ofi Israel yɛe no. Ɔkae sɛ: “O Yehowa, wɛn m’ano ma me, boa me ma menhwɛ m’anofafa pon ano.”—Dwom 141:3.
Ofie a wɔwoo mmofra no wom no, sɛ ɛhɔ ara na mobɛtena a, wubehu sɛ mmofra no nni fie no ho agoru koraa. Wobɛyɛ nsakrae bi wɔ fie hɔ mpo a, ma ɛnyɛ kakraa bi, titiriw mmofra no dan mu. Mubetumi nso adwen ho atu akɔtena baabi foforo.
SƆ EYI HWƐ: Sɛ wo mmanoma a wɔayɛ mpanyimfo no kasa w’anim basabasa anaa wommu wo a, ka ho asɛm kyerɛ wo hokafo no na tie nea ɔwɔ ka no yiye. Nhyɛ no sɛ ɔnkasa nkyerɛ ne mma no. Nea ehia paa ne sɛ wo ne wo hokafo nyinaa, obiara bɛte ne yɔnko ase. Sɛ munya asɛm no ho “adwenkoro” a, mubetumi abom ayɛ tebea no ho biribi.—2 Korintofo 13:11.
Mmofra a wɔwɔ abusua no mu no, mia w’ani pɛ wɔn nyinaa asɛm
NKITAHODI 3: ABUSUAFO FOFORO NE NNAMFO
Marion wɔ mmanoma, na ɔte Canada. Ɔka sɛ: “Ɛyɛ a m’awofo taa kyɛ me ba no nneɛma, nanso me kunu mma no de, wɔnkyɛ wɔn bi. Enti yɛn ara yɛtɔ bi ma wɔn, nso nyɛ da biara na yetumi yɛ saa.”
Nea ɛbɛboa: Dwen abusua a wowom seesei no ho ansa. Ma w’abusuafo ne wo nnamfo nhu sɛ abusua a wowom seesei no, wunni ho agoru. (1 Timoteo 5:8) Ɛrentumi mma sɛ w’abusuafo ne wo nnamfo bɛpɛ abusua a wowom seesei no mufo asɛm prɛko pɛ, nanso wubetumi aka akyerɛ wɔn sɛ wonnya obu mma wɔn. Kyerɛ mu kyerɛ wɔn sɛ, sɛ wɔyɛ biribi ma mmofra no bi na wotwa afoforo gya a, ɛbɛma saa mmofra no ayɛ basaa.
Bɔ mmɔden sɛ wobɛma mmofra no aka akɔ wo nsenom dedaw no nkyɛn. Ɔbaatan bi a wɔfrɛ no Susan te England, na ɔka sɛ: “Me kunu wui no, afe ne fã na mesan waree. Ná ɛyɛ den ma me kunu dedaw no awofo sɛ wobegye me kunu foforo no atom. Nanso yɛma wohui sɛ yɛntoo wɔn nkyenee, efisɛ na yɛma mmofra no frɛ wɔn wɔ telefon so, na na yɛda wɔn ase sɛ wɔreboa yɛn; ɛbaa saa no nneɛma yɛɛ yiye kakra.”
SƆ EYI HWƐ: Bɔ mmɔden sɛ wubehu wo hokafo no adamfo anaa ne busuani ko a ɛyɛ den paa sɛ wobɛka akɔ ne ho no. Afei wo ne wo hokafo no nsusuw nea mubetumi ayɛ ama mo ntam ayɛ yiye no ho.
Sɛ wowɔ mmanoma a, abusuafo a wɔnte fie hɔ no betumi ama ɔhaw aba abusua no mu. Nanso sɛ wode Bible afotu yɛ adwuma a, wubetumi anya nhyira a Bible ka ho asɛm yi: “Nyansa na wɔde kyekye ofie, na nhumu na ɛma egyina.”—Mmebusɛm 24:3.
^ nky. 3 Wɔasesa edin ahorow no bi.
^ nky. 4 Wopɛ sɛ wuhu sɛnea wubetumi adi ɔhaw afoforo ho dwuma a, hwɛ asɛm a ɛwɔ Nyan! a ɛbaa April 2012, Borɔfo de no. Wɔato din sɛ “Secrets of Successful Stepfamilies” (Nea Ɛma Abusua a Mmanoma Wom Gyina). Yehowa Adansefo na wotintimii.
^ nky. 8 Sɛ wo hokafo dedaw no yɛ n’adwene sɛ ɔbɛhaw adwene a, ebehia sɛ wusiw no kwan wɔ nneɛma pii mu de bɔ w’abusua ho ban.
BISA WO HO SƐ . . .
- Me kunu anaa me yere hokafo dedaw no, ɛbɛyɛ dɛn na me ne ne ntam ayɛ papa?
- Yɛn abusuafo ne yɛn nnamfo nso, yɛbɛyɛ dɛn aboa wɔn na wɔankɔfa ɔhaw biara amma yɛn abusua mu?
Ebia W'Ani Begye Wei Nso Ho
ƆWƐN-ABAN
Mma Awaregyae Mmmɔ Wo Asesa
Wɔn a wogyae aware no, wɔn mu dodow no ara hu sɛ awaregyae akyi no, nneɛma nkɔ sɛnea wɔhwɛɛ kwan no. Bible mu afotu pa betumi aboa wo ama woatumi agyina ano.
W’ABUSUA BETUMI ANYA ANIGYE
Sɛnea Mobɛma Asomdwoe Atena Mo ne Abusuafo Ntam
Wubetumi adi w’awofo ni, na bere koro ara nso woama w’aware agyina.
