“MASO dae bi.” Amerikani a wɔfrɛ no Martin Luther King Jr., a na ɔrepere nnipa kyɛfa ama ne nkurɔfo na ɔkaa saa asɛm no; ɔkae wɔ ne kasa bi a agye din mu bɛyɛ mfe 50 ni. Ɔkaa saa asɛm no August 28, 1963. Asɛm a King kae no, ɔde kyerɛe sɛ ɔwɔ anidaso sɛ daamma bi no, nnipa bɛtena ase a obiara renhwɛ baabi a obi fi ntan no. Ɛwom sɛ ɔkaa saa asɛm no kyerɛɛ Amerikafo de, nanso aman pii anya saa anidaso no bi.

King kaa n’asɛm no, abosome mmiɛnsa akyi, November 20, 1963 no, Amanaman Nkabom no asɛm a wɔde too gua sɛ wobeyi nnipa mu nyiyim biara afi hɔ no, aman bɛboro 100 gye toom. Ɛno akyi no, Amanaman Nkabom no de akwan foforo bi a wɔde bedi ɔhaw no ho dwuma too gua. Wɔabɔ mmɔden de, nanso ma yemmisa sɛ, mmɔden a wɔabɔ no nyinaa akosi sɛn?

March 21, 2012 mu no, Amanaman Nkabom Kyerɛwfo Panyin Ban Ki-moon kae sɛ: “Yɛayɛ ntotoe bebree ne nhyehyɛe a ɛkɔ akyiri wɔ wiase nyinaa a yɛde betu nnipa mu nyiyim, ahɔho ho adwemmɔne ne nneɛma bi a ɛtete saa ase. Nanso nnipa mu nyiyim a ayɛ koankorɔ nti, nnipa mpempem pii hu amane wɔ wiase nyinaa.”

Sɛ wokɔ aman bi so a, wubehu sɛ wɔabɔ mmɔden ama nnipa mu nyiyim ne ɔtan hunu abrɛ ase kakra, nanso nea ɛsɛ sɛ yebisa ne sɛ: Mmɔden a wɔabɔ no, atumi atu ase afi nnipa komam anaasɛ abrabra so kɛkɛ? Ebinom gye di sɛ nea aman no tumi yɛ ara ne sɛ wɔboa wɔn nkurɔfo ma wogyae nnipa mu nyiyim, na ɔtan hunu de, wontumi nyi mfi nkurɔfo mu. Adɛn ntia? Efisɛ nnipa mu nyiyim de, entumi nsie, enti sɛ obi yɛ bi a, mmara ne no bedi. Nanso ɔtan de, ɛyɛ komam asɛm, na sɛ nnipa hyɛ ho mmara a, ɛnyɛ yiye.

Enti, sɛ yɛpɛ sɛ yetu anammɔn bi de tu ɔtan hunu ase a, ɛnyɛ nyiyim nko na ɛsɛ sɛ yɛyɛ ho adwuma, na mmom ɛsɛ sɛ yɛsesa nnipa adwene ne atenka a wɔwɔ wɔ nnipa binom ho nso. Wugye di sɛ biribi saa betumi asi ama ayɛ yiye? Ɛbɛyɛ dɛn na aba saa? Ma yɛnhwɛ nnipa bi asetena mu nsɛm, na ɛbɛma yɛahu sɛ biribi wɔ hɔ a ebetumi aboa nkurɔfo ama wɔasesa wɔn adwene ne sɛnea wɔte nka wɔ nnipa binom ho. Ɛbɛboa nso ama yɛahu nea ebetumi asesa yɛn.

Linda: Wɔwoo me wɔ South Africa, na sɛ mihu South Africani a ɔnyɛ oburoni a, na mimmu no, na mihu no sɛ ɔyɛ furatamni a ɔnka nokware, na ɛsɛ sɛ ɔyɛ nkoadwuma ma aborɔfo. Sɛɛ na ɔtan hunu adidi me mu a minnim. Nanso bere a mifii ase suaa Bible no, saa adwene no fii me mu nkakrankakra. Mibehui sɛ “Onyankopɔn nhwɛ nnipa anim,” na mmom nea ɛwɔ komam na ehia no, na ɛnyɛ obi honam ani anaa kasa a ɔka. (Asomafo Nnwuma 10:34, 35; Mmebusɛm 17:3) Bible mu asɛm a ɛwɔ Filipifo 2:3 no boaa me ma mihui sɛ, sɛ mibu obiara sɛ ɔkyɛn me a, metumi ayi ɔtan hunu afi me mu. Bible mu nsɛm te sɛ eyi a mede yɛ adwuma no aboa me ma midwen obiara ho; sɛ wɔyɛ aborɔfo oo, wɔyɛ abibifo oo, midwen wɔn ho. Ná ɔtan hunu awurawura me mu paa, nanso afei de, made me ho.

Michael: Baabi a metena nyinii no, Australia aborɔfo na wɔdɔɔso wɔ hɔ, na Asiafo de, na  mempɛ wɔn asɛm koraa, ɛnkanka Chinafo. Sɛ mete me kar mu nam kwan so na mihu obi a ɔsɛ Asiani a, mibue kar no twe me ti didi no atɛm; mitumi ka sɛ “Asiani, kɔ wo kurom!” Akyiri yi a mifii ase suaa Bible no, mibehui sɛnea Onyankopɔn pɛ obiara asɛm. Mihui sɛ Onyankopɔn nhwɛ sɛnea onipa no te anaa baabi a ofi; ɔdɔ obiara. Sɛnea Onyankopɔn dɔ nkurɔfo no kaa me koma paa, enti ɔtan no danee ɔdɔ. Sɛ mehwɛ nsakrae kɛse a mayɛ yi a, minhu nea menka. Seesei, nnipa a wofi aman nyinaa so a ɛsono sɛnea wɔte no, mitumi ne wɔn bɔ ma me ho sɛpɛw me paa. Nnipa ahorow ahorow a me ne wɔn bɔ no abue m’adwenem, na ama manya anigye kɛse.

Sandra: Ná me maame fi Umunede, kurow bi a ɛwɔ Delta State, Nigeria. Nanso me papa abusuafo fi Edo State, na wɔka Esan kasa. Esiane sɛ ɛsono baabi a me maame ne me papa fi nti, na me papa abusuafo mpɛ me maame asɛm koraa; wɔtan n’ani araa kosii sɛ owui. Enti mekaa ntam dii nsew sɛ me ne obiara a ɔka Esan kasa no to nkwanta a, yɛapae, na merenware obiara a ofi Edo State da. Nanso, bere a mifii ase suaa Bible no, m’adwene sesae nkakrankakra. Bible ka sɛ Onyankopɔn nhwɛ nnipa anim, na mmom obiara a osuro no no, ogye no tom. Sɛ Bible aka saa a, mene hena a mɛtan obi a ɛsono ne kasa. Mesesaa m’adwene, na misiesiee me ne me papa abusuafo no ntam. Bible mu nsɛm a mede bɔ me bra no ama m’ani agye, na manya akomatɔyam nso. Nnipa a ɛsono baabi a wofi ne kasa a wɔka no, Bible aboa me ma mitumi ne wɔn nyinaa tena asomdwoem. Ɔbarima a mewaree no nso, ɛhe na ofi? Ofi Edo State, na kasa a ɔka ne Esan kasa!

Nnipa a kan no na wɔtan nkurɔfo na wobu wɔn atɛnkan yi, ɛyɛɛ dɛn na Bible tumi boaa wɔn ne afoforo ma wɔsesaa wɔn adwene? Nea ɛma ɛbaa saa ne sɛ Bible yɛ Onyankopɔn Asɛm. Enti etumi ma obi sesa n’adwene ne sɛnea ɔte nka wɔ  nkurɔfo ho. Afei nso, Bible ma yehu ade foforo a nnipa hia na ama ɔtan hunu biara afi hɔ.

Ɛwom, sɛ obi sua Bible a, etumi boa ma ɔsesa adwemmɔne a ɔwɔ wɔ nkurɔfo ho no, nanso sɛ yebetumi atu ɔtan hunu ase koraa a, nneɛma abien bi wɔ hɔ a ɛsɛ sɛ yedi ho dwuma. Nea edi kan no, bɔne wɔ nnipa ho. Bible ka no pen sɛ: “Onipa biara nni hɔ a ɔnyɛ bɔne.” (1 Ahene 8:46) Enti yɛyɛ dɛn koraa a, yɛn nso yɛbɛte nka sɛ ɔsomafo Paulo. Ná ɔpɛ sɛ odi bɔne so nanso na ɛyɛ den, enti ɔkae sɛ: “Bere a mepɛ sɛ meyɛ nea ɛteɛ no, bɔne na ɛwɔ me ho.” (Romafo 7:21) Enti ɛwom, wom ara a, bɔne a ɛwɔ yɛn komam nti, koma no bɛtɔ akɔ “nsusuwii bɔne” so, na ebetumi ama ɔtan hunu aba yɛn mu.—Marko 7:21.

Nea ɛto so abien ne sɛ Satan Ɔbonsam hyɛ akyiri piapia nnipa. Bible ka ne ho asɛm sɛ ɔyɛ “owudifo,” na “ɔredaadaa asase sofo nyinaa.” (Yohane 8:44; Adiyisɛm 12:9) Eyi ma yehu nea enti a ɔtan hunu abu so wɔ baabiara. Ɛsan ma yehu sɛ nneɛma bi wɔ hɔ a, nnipa rentumi nyɛ ho hwee. Ebi ne nnipa ho adwemmɔne, nnipa mu nyiyim, mmusua a wɔtɔre wɔn ase; ebi nso ne ɔman a obi fi mu, ɔsom a ɔwom ne sɛnea ɔte wɔ asetenam a nkurɔfo gyina so yɛ nyiyim.

Enti, sɛ ɔtan hunu betumi afi hɔ koraa a, ɛsɛ sɛ woyi bɔne fi nnipa ho, na Satan Ɔbonsam nso, ɛsɛ sɛ woyi no fi hɔ. Bible ma yehu sɛ saa pɛpɛɛpɛ na Onyankopɔn Ahenni bɛyɛ.

Yesu Kristo kyerɛɛ n’akyidifo sɛ wɔmmɔ Onyankopɔn mpae sɛ: “W’ahenni mmra. W’apɛde nyɛ hɔ wɔ asase so te sɛ ɔsoro.” (Mateo 6:10) Onyankopɔn Ahenni na ebeyi nnipa mu nyiyim ne ɔtan hunu nyinaa afi hɔ; enti ebeyi atɛnkyea nyinaa afi hɔ.

Sɛ Onyankopɔn Ahenni ba, na ebedi asase yi so a, ‘wɔbɛkyekyere’ Satan anaa wobesiw no kwan koraa sɛnea ɛbɛyɛ a ‘ɔrentumi nkɔdaadaa amanaman no bio.’ (Adiyisɛm 20:2, 3) Nnipa nhyehyɛe foforo anaa “asase foforo” a “trenee bɛtena” mu bɛba. *—2 Petro 3:13.

Nnipa a wɔbɛtena saa trenee wiase no mu no, wobeyi bɔne nyinaa afi wɔn mu. (Romafo 8:21) Wɔbɛyɛ Onyankopɔn Ahenni no manfo, enti “wɔrenyɛ bɔne na wɔrensɛe ade bio.” Adɛn ntia? “Efisɛ Yehowa ho nimdeɛ bɛhyɛ asase so mã.” (Yesaia 11:9) Saa bere no nnipa nyinaa betie Yehowa, ɔdɔ Nyankopɔn no, na wobesuasua ne suban. Sɛ ɛba saa a, ɔtan hunu nyinaa befi hɔ, efisɛ “Onyankopɔn nhwɛ nnipa anim.”—Romafo 2:11.