Bible ma yehu sɛ efi nneɛma abien. Nea edi kan, ɛwom sɛ nnipa atumi ayɛ nneɛma akɛse pii de, nanso wɔammɔ nnipa sɛ wɔn ankasa ntutu wɔn anammɔn. Nea ɛto so abien, nnipa nhyehyɛe adi nkogu efisɛ “wiase nyinaa da ɔbɔnefo” Satan Ɔbonsam tumi mu. Ɛno nti na nnipa ayɛ ayɛ ara nso wontumi mfaa asomdwoe mmaa wiase no.—Kenkan Yeremia 10:23; 1 Yohane 5:19.

Ade foforo nso a ama asomdwoe abɔ yɛn ne sɛ nnipa yɛ pɛsɛmenkominya na wɔpɛ tumi. Sɛ asomdwoe betumi aba wiase baabiara a, gye sɛ yenya aban a ebetumi akyerɛkyerɛ nkurɔfo ama wɔadɔ adetrenee adwen nnipa ho.—Kenkan Yesaia 32:17; 48:18, 22.

Ade nyinaa so Tumfoɔ Nyankopɔn ahyɛ bɔ sɛ ɔbɛma aban biako pɛ adi nnipa nyinaa so. Saa aban no besi nnipa nniso ananmu. (Daniel 2:44) Saa aban no ba a, Onyankopɔn Ba Yesu na obedi ade, na ɔbɛyɛ Asomdwoe Hene. Obeyi bɔne afi asase so baabiara, na ɔbɛkyerɛ nnipa asomdwoe kwan.—Kenkan Yesaia 9:6, 7; 11:4, 9.

Seesei mpo, nnipa mpempem pii wɔ wiase a Yesu de adwuma ahyɛ wɔn nsa sɛ wɔmfa Onyankopɔn Asɛm Bible no nkyerɛkyerɛ nkurɔfo, na ama wɔahu sɛnea wɔne wɔn yɔnko nnipa bɛtena asomdwoe mu. Ɛrenkyɛ, asomdwoe bɛba wiase nyinaa.—Kenkan Yesaia 2:3, 4; 54:13.