Bible ka sɛ na wɔde pɛprɛ gu ntade mu anaa mpa so ma ɛyɛ huam. (Dwom 45:8; Mmebusɛm 7:17; Nnwom mu Dwom 4:14) Pɛprɛ a Bible ka ho asɛm no, ɛbɛyɛ sɛ efi dua a wɔfrɛ no Agarwood (Aquilaria dua bi) mu. Sɛ wotwa dua no na sɛ ɛrewu a, ngohuam ne aneneduru fi mu ba, na wɔyam dua no muhumuhu de yɛ “pɛprɛ,” na afei wɔtɔn.

Bible ka sɛ Israelfo ntamadan te sɛ “pɛprɛ nnua a Yehowa atɛw.” (Numeri 24:5, 6) Ɛbɛyɛ sɛ Agarwood dua no kɛse ne ne tenten ho asɛm na na Bible reka; ná dua no tenten tumi yɛ mita 30, na ɛtrɛtrɛw nso. Ɛwom, saa dua no bi nni Israel nnɛ, nanso nhoma bi ka sɛ: “Seesei de, Yordan Subon a na sika ne nnipa abu so wɔ hɔ no, saa dua no bi nni hɔ, nanso biribiara nkyerɛ sɛ, saa nnua no ne nnua foforo bi a enni hɔ seesei no, wɔannua bi wɔ hɔ saa bere no.”—A Dictionary of the Bible.

Onyankopɔn hyɛɛ mmara sɛ nneɛma a ne nkurɔfo de bɛba asɔrefie hɔ abɛbɔ afɔre no, ɛsɛ sɛ ne nyinaa di mu paa. Ná Onyankopɔn mpɛ mmoa a wɔadi dɛm. (Exodus 23:19; Leviticus 22:21-24) Yudani nhoma kyerɛwfo Philo tenaa ase asomafo no bere so, na ɔkyerɛe sɛ saa bere no, na asɔfo hwehwɛ mmoa no ho “fi wɔn tirim kosi wɔn nan ase” de hwɛ hu sɛ wodi mu biribiara mu na “dɛm anaa nkekae biara nni wɔn ho.”

Nhomanimfo E. P. Sanders kae sɛ ebetumi aba sɛ asɔrefie mpanyimfo “na wɔmaa kwan maa nokwaredifo bi tɔn mmoa a wɔde bɔ afɔre no, na ansa na wɔbɛma wɔn kwan no, gye sɛ asɔfo no ahwehwɛ nyɛmmoa ne nnomaa no ho awie. Sɛ wɔtɔn aboa no ma obi a, ɛsɛ sɛ wɔma no nsɔano bi de kyerɛ sɛ aboa no di mu.”

Afe 2011 mu no, wɔn a wotutu fam hwehwɛ tetefo nneɛma mu huu saa nsɔano no bi; dɔte na wɔde yɛe bɛyɛ mfe 2,000 ni. Asɔrefie no mpɔtam hɔ baabi na wohuu saa nsɔano no. Wɔde Aram kasa na akyerɛw so, na asɛm a wɔakyerɛw no nkyerɛase ne sɛ, “Wɔatew ho ama Onyankopɔn.” Wɔkyerɛ sɛ ebetumi aba sɛ mmoa ne nneɛma a na wɔde bɔ afɔre wɔ asɔrefie hɔ no, asɔrefie mpanyimfo no na na wɔde saa nsɔano no bobɔ ho.