Ná wɔde owiyammo yam awi (ayuo) anaa atoko ma wɔde yɛ paanoo. Ná mmaa anaa nkoa de owiyammo di dwuma da biara da wɔ fie. Enti tete no, na owiyammo nnyigyei mpa ofie biara mu.—Exodus 11:5; Yeremia 25:10.

Mfonini ne ahoni ahorow a efi tete Egypt no ma yɛhu sɛnea na wɔde owiyammo di dwuma no yie. Ná wɔde awi anaa atoko no gu ɛboɔ a ɛso trɛw na abɔ kɔ mu kakra so. Afei nea ɔreyam ade no bu nkotodwe, na ɔde ne nsa mmienu nyinaa sɔ ɛboɔ ketewaa bi a wɔde yam ade mu de yam awi anaa atoko no. Sɛnea nwoma bi kyerɛ no, na saa ɛboɔ no mu duru bɛyɛ sɛ kilogram mmienu anaa nnan. Sɛ na wɔde owiyammo di dwuma sɛ akode a, na ɛyɛ hu paa.—Atemmufoɔ 9:50-54.

Mpɛn pii no, sɛ na abusua bi bɛyɛ aduane a gye sɛ wɔyam, enti Bible baraa sɛ ɛnsɛ sɛ wɔde owiyammo si awowa. Deuteronomium 24:6 ka sɛ: “Obiara nnnye oyuyammoɔ anaa ɛboɔ a ɛda soɔ no awowa. Sɛ ɔyɛ saa a, ɛyɛ ɔkra na wagye no awowa no.”

Bible no ka sɛ Yesu ‘da Agya no kokom.’ (Yohane 1:18) Saa asɛm no ma yɛhu sɛ Yesu ne Onyankopɔn wɔ abusuabɔ soronko bi na ɔwɔ n’anim dom. Saa asɛm no ma yɛkae ade a na Yudafo no taa yɛ bere a wɔredidi no.

Wɔ Yesu bere so no, sɛ na Yudafo rebɛdidi a, na wɔde nkonnwa twa didipon ho hyia. Afei wɔn mu biara tena ase de ne ti kyerɛ didipon no, na ɔtwe ne nan mu kɔ n’akyi. Ɛno akyi no, ɔde ne nsa benkum twere akonnwa no. Sɛ obi tena hɔ saa a, ɛma ne nsa nifa no da hɔ kwa. Esiane sɛ na wɔn a wɔrebɛdidi no nyinaa twere wɔn nsa benkum so, na wɔte hɔ nnidiso nnidiso nti, nwoma bi ka sɛ “na obiara ti bɛn nea ɔtoa no so no kokom. Ɛno nti, na wɔbɛtumi aka sɛ ‘ɔda ne yɔnko no kokom.’”

Sɛ obi to pon na ɔto nsa frɛ wo a, na ɛyɛ hokwan kɛse sɛ ɔde wo bɛtwere ne kokom anaa wobɛtwere abusua ti no kokom. Enti bere a na Yesu redi Twam a etwa to no, ɔsomafo Yohane, “osuani a na Yesu dɔ no no” na na ɔtwere Yesu kokom.’ Ɛno nti, na Yohane bɛtumi ‘atwere Yesu kokom’ abisa no asɛm.—Yohane 13:23-25; 21:20.