M’abusuafo fi Tonga. Ɛyɛ ɔman a ɛwɔ Pacific anafo, na nsupɔw bɛyɛ 170 na ɛwɔ hɔ. Yɛwɔ Tonga no, na yenni nneɛma pii, na yenni anyinam kanea, na na yenni kar nso. Nanso na yɛwɔ nsu wɔ fie, na na yɛwɔ nkokɔ kakra nso. Ná me ne me nuanom mmarima mmienu kɔ sukuu, enti yɛma kwan a, na yɛboa yɛn papa wɔ abusua no afuw mu. Ná yedua kwadu, bayerɛ, burobe, ne bankye. Ná me papa tɔn afuw no mu nneɛma de hwɛ abusua no, na na ɔyɛ nnwuma nketenkete bi nso ka ho. Ná yɛn abusua no ani gye Bible ho paa, na na yɛmfa asɔrekɔ nni agorɔ. Saa ara na na nnipa a wɔte supɔw no so pii te. Nanso, na yɛn adwene yɛ yɛn sɛ, sɛ yebenya asetena pa a, gye sɛ yetu kɔtena ɔman a emufo wɔ sika so.

 Midii mfe 16 no, me wɔfa maa yɛn abusua no tu kɔɔ California, U.S.A. Ná ɛsono sɛnea ɛhɔ asetena te koraa, enti na ɛyɛ den ma yɛn. Ɛwom sɛ yɛn sikasɛm yɛɛ yiye kakra de, nanso na yɛte ahiafo mu, na na nnipa a wɔyɛ basabasa na wɔnom nnubɔne atwa yɛn ho ahyia. Edu anadwo a, na nkurɔfo taa totow atuo, na na wɔn a yɛne wɔn te mpɔtam no dodow no ara suro nsɛmmɔnedifo. Ná nnipa pii de tuo hyɛ wɔn ho de bɔ wɔn ho ban, anaa wɔde siesie akasakasa. Me ne obi nyaa akasakasa ma ɔbɔɔ me tuo; besi nnɛ nyinaa tuo aboba no da so hyɛ me koko.

 Mewɔ ntoaso sukuu no, na mepɛ sɛ meyɛ me ho sɛ mmabun afoforo. Mifii ase gyee m’ani traa so, na mewee nsã yɛɛ basabasa, na na menom nnubɔne nso. Bere rekɔ so no, menom cocaine araa ma ne nom kaa me hɔ. Nea ɛbɛyɛ a menya sika atɔ nnubɔne no, na mebɔ korɔn. Ɛmfa ho sɛ na m’abusuafo kɔ asɔre daa no, mannya afotu biara a ɛbɛboa me na manni m’atipɛnfo akyi ankɔyɛ bɔne. Nneɛma bɔne a na meyɛ nti, wɔkyeree me mpɛn pii. Ná m’abrabɔ regye nsam! Ewiee ase no, wɔde me kɔtoo afiase.

 Afe 1997 mu no, na meda afiase. Da koro, ɔbarima bi a na ɔno nso da afiase hɔ hui sɛ mikura Bible. Ná ɛyɛ Buronya, na Tongafo bu saa bere no sɛ ɛyɛ kronkron. Obisaa sɛ minim nea Bible ka fa Kristo awo ho anaa, nanso na minnim ho hwee. Ɔkyerɛɛ me nea Bible ka fa Yesu awo ho, na mihui sɛ amanne ahorow a wɔyɛ wɔ Buronya mu mpo, enni Bible mu. (Mateo 2:1-12; Luka 2:5-14) Ɛyɛɛ me nwonwa paa, na ɛma mibisaa me ho sɛ, ‘Dɛn bio na Bible no kyerɛkyerɛ?’ Ná saa ɔbarima no kɔ Yehowa Adansefo nhyiam a wɔyɛ no nnawɔtwe biara wɔ afiase hɔ no bi, na me nso meyɛɛ m’adwene sɛ mɛkɔ bi. Mekɔɔ hɔ no, na wɔresua Adiyisɛm nhoma a ɛwɔ Bible mu no. Ɛwom sɛ nea wɔkae no mante ase papa de, nanso mihui sɛ nea na wɔkyerɛkyerɛ no nyinaa fi Bible mu.

 Bere a Adansefo no ka kyerɛɛ me sɛ wɔpɛ sɛ wɔne me sua Bible no, mepenee so ntɛm ara. Me ne Adansefo no suaa ade na mihui sɛ Bible ahyɛ bɔ sɛ daakye asase bɛyɛ paradise. (Yesaia 35:5-8) Mibehui sɛ, sɛ metumi asɔ Onyankopɔn ani a, na ɛsɛ sɛ meyɛ nsakrae akɛse wɔ m’asetena mu. Mihui sɛ, sɛ mannyae nneɛma bɔne a meyɛ no a, Yehowa Nyankopɔn remma menkɔ Paradise a wahyɛ ho bɔ no mu. (1 Korintofo 6:9, 10) Enti misii me bo sɛ mɛhyɛ m’abufuw so, na magyae sigaretnom, nsãwe, ne nnubɔnenom.

 Afe 1999, aka kakra ama bere aso sɛ woyi me fi afiase no, aban mpanyimfo no san yii me kɔɔ afiase foforo. Ɛno nti, mantumi ne Adansefo no ansua Bible bɛboro afe. Nanso, na masi me bo sɛ mɛkɔ so ayɛ nsakrae wɔ m’asetena mu. Afe 2000 mu no, aban no gyee hokwan a na mewɔ sɛ metena United States no, na wotwaa me asu kɔɔ Tonga.

 Mekɔɔ Tonga no, ntɛm ara na mehwehwɛɛ Yehowa Adansefo, na mesan fii ase ne wɔn suaa Bible. Ná m’ani gye nea meresua no ho, na bere a mihui sɛ Adansefo a wɔwɔ Tonga no de wɔn nkyerɛkyerɛ nyinaa gyina Bible so te sɛ Adansefo a wɔwɔ United States no, ɛmaa m’ani gyei paa.

 Esiane sɛ na me papa wɔ dibea wɔ n’asɔre mu nti, na obiara nim no wɔ yɛn mpɔtam hɔ. Enti bere a mede me ho bɔɔ Yehowa Adansefo no, mfiase no ɛyɛɛ m’abusuafo nwonwa, na ɛmaa wɔn bo fui. Nanso, akyiri yi m’awofo ani gyei sɛ Bible afotu reboa me ama magyae subammɔne no na mabɔ bra pa.

 Ade baako a na ɛyɛ den sɛ megyae ne nsã bi a na Tongafo taa we paa. Wɔfrɛ saa nsã yi kava. Nnawɔtwe biara, Tongafo mmarima bebree sɛe nnɔnhwerew pii de we kava. Kava yɛ nsã bi a etumi ma obi da; wɔde mako dua ntini na ɛyɛ. Mesan baa me kurom no, ɛkame ayɛ sɛ anwummere biara na mekɔ baabi a wɔtɔn kava, na na mitumi nom araa bow a minhu hwee. Ade baako a na akɔfa ɔhaw yi aba ne nnamfo a na mede me ho abɔ wɔn no. Ná wɔmfa Bible afotu nyɛ hwee. Adansefo no boaa me ma mihui sɛ Onyankopɔn ani nnye nea na mereyɛ no ho. Enti, meyɛɛ nsakrae sɛnea ɛbɛyɛ a Onyankopɔn begye me atom na manya ne nhyira.

 Mifii ase kɔɔ Yehowa Adansefo nhyiam nyinaa bi. Nnipa a na wɔn nso rebɔ mmɔden sɛ wɔbɛyɛ nea ɛsɔ Onyankopɔn ani a mede me ho bɔɔ wɔn no boaa me ma mitumi gyinaa sɔhwɛ ano. Afe 2002 no, wɔbɔɔ me asu ma mebɛyɛɛ Yehowa Dansefo.

 Manya Onyankopɔn abotare a Bible ka ho asɛm no so mfaso paa: ‘Yehowa wɔ mo ho abotare efisɛ ɔmpɛ sɛ obiara bɛsɛe, na mmom ɔpɛ sɛ obiara nya adwensakra.’ (2 Petro 3:9) Onyankopɔn pɛ a anka wasɛe wiase bɔne a aporɔw yi dedaadaw, nanso wama wiase bɔne yi akɔ so atena hɔ abesi saa bere yi sɛnea ɛbɛyɛ a nnipa a wɔte sɛ me betumi ne no afa adamfo. Migye di sɛ obetumi ama maboa afoforo ama wɔn nso ne no afa adamfo.

 Yehowa mmoa so nti m’abrabɔ annye nsam koraa. Seesei, memmɔ korɔn mfa nkɔtɔ nnubɔne. Mmom, mebɔ mmɔden sɛ mɛboa afoforo ama wɔn nso abɛyɛ Yehowa nnamfo. Mede me ho bɔɔ Yehowa Adansefo no na mihyiaa Tea, me yere a medɔ no. Yɛwɔ babarima baako, na yɛn abusua no ani gye paa. Yɛn nyinaa kyerɛkyerɛ afoforo sɛ, Bible ka sɛ daakye nnipa bɛtena asase so asomdwoe mu wɔ paradise.