Daabi. Yehowa Adansefo nkasa ntia paneɛ a yɛde bɔ yɛn ho ban fi yare ho. Ɛno deɛ, yegyaw ma Kristoni biara ma ɔno ara kyerɛ sɛ ɔbɛwɔ bi anaasɛ ɔrenwɔ bi. Ɛyɛ a Yehowa Adansefo bebree wɔ bi.

 Sɛ yɛyare a, yɛhwehwɛ ayaresa papa, na sɛnea nnuruyɛfo anya nkɔanim ama yare a ɛyɛ hu so atew no, yɛn ani sɔ paa. Ayaresa ho animdefo a wotu wɔn ho ma na wɔyɛ adwumaden, nkanka bere a yare kodiawuo bi aba no, yɛda wɔn ase paa.

 Yehowa Adansefo tie nea apɔwmuden adwumayɛfo ka. COVID-19 yare yi sei, efi bere a ɛbae no, Yehowa Adansefo akɔ so de wɛbsaet yi abɔ dawuru wɔ kasa bebree mu sɛ, yare no ho akwankyerɛ a apɔwmuden adwumayɛfo de aba no, obiara mmɔ mmɔden nni so. Akwankyerɛ no bi ni: Ehia sɛ yɛtete yɛn ntam, ɛnsɛ sɛ nnipa bebree kohyiam wɔ faako, sɛ yare no bi yɛ obi a, ɛsɛ sɛ ɔde ne ho sie, ɛsɛ sɛ yɛtaa hohoro yɛn nsa, ɛsɛ sɛ yɛde adeɛ kata yɛn ano ne yɛn hwene, na yɛyɛ nneɛma a ɛkeka ho a apɔwmuden ho animdefo anaa atumfoɔ aka no.—Romafo 13:1, 2.

 Mfe pii na Yehowa Adansefo de aka nea edidi so yi ho asɛm wɔ wɔn nhoma ne video bebree mu:

•   Ayaresa ho nsɛm deɛ, yɛma obiara kyerɛ nea ɔpɛ.—Galatifo 6:5.

   “Nhoma yi nkyerɛ sɛ aduru anaa ayaresa bi yɛ kyɛn bi, na ɛnkyerɛ yɛn ayaresa pɔtee biara. Nea ɛyɛ ara ne sɛ, ɛma yehu sɛnea yare bi te, na ayaresa no deɛ, egyaw ma nea ɔrekenkan no ma ɔno ankasa hwɛ nea ɔbɛyɛ.”—Nyan!, February 8, 1987 Borɔfo de.

   “Sɛ paneɛ a yɛde bɔ yɛn ho ban fi yare ho ho asɛm ba a, sɛ wo ne wo mma bɛwɔ bi oo, sɛ monwɔ bi oo, mo ara na mobɛkyerɛ.”—Nyan!, August 22, 1965 Borɔfo de.

•   Nkwa som bo ma yɛn paa, ɛno nti sɛ yɛyare a, yɛhwehwɛ ayaresa.—Asomafo Nnwuma 17:28.

   “Sɛ Yehowa Adansefo yare a, wɔkɔ apɔwmuden adwumayɛfo hɔ ma wɔboa wɔn. Nkwa a wɔwɔ no, wɔn ani gye ho, enti sɛ wɔyare a, wɔyɛ nea wobetumi biara hwehwɛ ayaresa sɛnea ɛbɛyɛ a wɔbɛtena ase akyɛ. Ayaresa a etia Bible deɛ, yennye ntom.”—Ɔwɛn-Aban, July 1, 1975 Borɔfo de.

   “Yehowa Adansefo kɔ ayaresabea, na wɔnom aduru. Wɔpɛ sɛ wonya apɔwmuden na wɔatena ase akyɛ. Ebinom mpo yɛ adɔktafo te sɛ Kristoni Luka a ɔtenaa ase tete no. Ampa, sɛnea ayaresa ho animdefo tu wɔn ho ma yɛ adwumaden hwɛ ayarefo no, Yehowa Adansefo ani sɔ paa. Afei, sɛnea sɛ obi yare a, animdefo yi tumi boa no ma ne ho tɔ no no, ɛno nso, Yehowa Adansefo ani sɔ.”—Ɔwɛn-Aban, February 1, 2011 Borɔfo de.