Pagsanjan yɛ kurow a ɛwɔ Philippines. Nsu bi a esian fi mmepɔw mu a agye din bɛn hɔ, na nnipa pii kɔ hɔ kɔhwɛ. Ɛhɔ na wɔtetee me papa a wɔfrɛ no Nardo Leron; abusua a ofi mu no, na wodi hia. Bere a ohuu nyansakorɔn a ɛrekɔ so wɔ aban mu, polisi adwuma mu, ne baabi a ɔyɛ adwuma no, ɛyɛɛ no yaw, na ne bo fuwii.

 M’awofo woo nwɔtwe, na wɔyɛɛ adwumaden de hwɛɛ yɛn. Ná m’awofo hwɛ mfuw so wɔ mmepɔw so, enti sɛ wofi fie a, na ɛkyɛ ansa na wɔaba. Mpɛn pii no, na me ne me nuabarima Rodelio ankasa na yɛhwɛ yɛn ho, na na ɔkɔm taa de yɛn. Yɛyɛ mmofra no, yɛannya bere pii anni agorɔ. Yɛn mu biara di mfe nson a, na ɔkɔyɛ adwuma wɔ afuw kɛse bi mu. Ná yɛsoa kube a emu yɛ duru de sian mmepɔw atenten. Sɛ nneɛma no mu yɛ duru dodo na yentumi mpagya a, na yɛtwe fa fam.

 Ná yɛn papa hwe yɛn, nanso nea na ɛyɛ yɛn yaw pa ara ne sɛ yebehu sɛ ɔreboro yɛn maame. Ná yɛpɛ sɛ yesiw no kwan, nanso yɛantumi anyɛ hwee. Bere a yenyinii no, me ne Rodelio faa adwene sɛ yebekum yɛn papa. Me yam a, na anka yɛwɔ agya a ɔdɔ yɛn!

 Sɛnea na me papa yɛ basabasa no haw me na ɛhyɛɛ me abufuw, enti bere a midii mfe 14 no, mifii fie. Medaa abɔnten kakra, na mifii ase nom wii. Bere bi akyi no, mekɔyɛɛ adwuma bi; na meka suhyɛn, na na mefa nkurɔfo a wɔrekɔhwɛ nsu a esian fi mmepɔw mu no.

 Mfe kakra akyi no, mikosuaa ade wɔ sukuupɔn mu wɔ Manila. Nanso esiane sɛ na Memeneda ne Kwasida biara metaa tu kwan kɔ Pagsanjan kɔyɛ adwuma nti, na minnya bere nsua ade. Ná nneɛma mu yɛ den ma me, na na ɛte sɛ nea minni anidaso biara wɔ asetena mu. Afei de, na menom wii a, ɛntew m’adwinnwen so bio. Mifii ase faa nnubɔne a nkurɔfo fa a ɛma wɔn ani so yɛ krakra te sɛ methamphetamine, cocaine, ne heroin. Nnubɔnenom nso de, mpɛn pii no, ɛne aguamammɔ na ɛnam. Ná nkurɔfo a wɔwɔ baabi a mete no di hia, na na atɛnkyea ne amanehunu abu so wɔ hɔ. Ɛyɛɛ me sɛ aban no na ama aba saa, enti na mikyi aban no kɔkɔɔkɔ. Mibisaa Onyankopɔn sɛ, “Adɛn nti na asetena te saa?” Meyɛe sɛ mɛhwehwɛ me nsɛmmisa ho mmuae wɔ ɔsom ahorow mu, nanso mannya bi. M’abam bui, enti mefaa nnubɔne pii sɛnea ɛbɛyɛ a ɛbɛma me werɛ afi me haw.

 Afe 1972 no, sukuufo a wɔwɔ Philippines tew wɔn ho guu mmɔnten so yɛɛ ɔyɛkyerɛ pii tiaa aban no. Ɔyɛkyerɛ no baako de, mekɔɔ bi, na ekowiee basabasayɛ mu. Wɔkyeree nnipa bebree, na abosome bi akyi no, aban no maa asogyafo tumi ma wɔhyehyɛɛ mmara maa ɔman no nyinaa.

 Mesan kɔdaa abɔnten so bio. Nea ɛma ɛbaa saa ne sɛ, esiane sɛ mede me ho hyɛɛ atuatew no mu nti, na misuro sɛ aban no bɛma wɔakyere me. Nea ɛbɛyɛ a manya sika atɔ nnubɔne no, mifii ase bɔɔ korɔn, na ewiee ase no, na me ne asikafo ne ahɔho bɔ aguaman. Sɛ mewu oo, sɛ menya nkwa oo, na ɛmfa me ho.

 Saa bere no, na me maame ne me nuabarima kumaa ahyɛ ase ne Yehowa Adansefo resua Bible. Me papa bo fuwii pa ara, na ɔhyew wɔn Bible ho nhoma. Nanso, wɔn mmienu nyinaa kɔɔ so suaa Bible no, na wɔbɔɔ asu bɛyɛɛ Adansefo.

 Da bi, Ɔdansefo bi ka kyerɛɛ me papa sɛ, Bible ahyɛ bɔ sɛ bere bi bɛba a, wobebu atɛntrenee mapa wɔ asase so baabiara. (Dwom 72:12-14) Me papa ani gyee saa asɛm yi ho ara ma ɔyɛe sɛ ɔno ankasa bɛhwehwɛ mu. Bere a ɔyɛɛ saa no, ohui wɔ Bible mu sɛ Onyankopɔn ahyɛ bɔ sɛ ɔbɛma aban bi a ebebu atɛntrenee aba. Ohuu nea Onyankopɔn pɛ sɛ okununom ne agyanom yɛ nso. (Efesofo 5:28; 6:4) Bere tiaa bi akyi no, ɔne me nuanom a aka nyinaa bɛyɛɛ Adansefo. Esiane sɛ na mewɔ akyirikyiri nti, na minnim nea ɛrekɔ so wɔ m’akyi.

 Afe 1978 no, mitu kɔɔ Australia. Ɛwom sɛ na asomdwoe wɔ ɔman no mu, na na emufo nso di yiye de, nanso m’asom annwo me. Mekɔɔ so nom nsa, na mefaa nnubɔne. Saa afe no rekɔ n’awiei no, Yehowa Adansefo bɛsraa me. Wɔma mihui sɛ Bible aka sɛ asomdwoe bɛba asase so, na m’ani gyee ho pa ara. Nanso, na misuro sɛ me ne wɔn bɛbɔ.

 Ɛno akyi bere tiaa bi no, mesan kɔɔ Philippines kodii nnawɔtwe kakra. Me nuanom ka kyerɛɛ me sɛ yɛn papa abɔ mmɔden ayɛ nsakrae ama ne suban ayɛ fɛ, nanso abufuw a na ahyɛ me mã nti, na mempɛ sɛ mehu n’anim koraa.

 Me nuabea kumaa de me kɔɔ Bible mu ma mihuu nea enti a amanehunu ne ntɛnkyea ahyɛ asetena mã saa. Ɛyɛɛ me nwonwa sɛ abaayewa a onnim hwee yi tumi buaa me nsɛmmisa no. Ansa na merefi hɔ akɔ no, me papa maa me nhoma a wɔato din Wubetumi Atra Ase Daa wɔ Paradise wɔ Asase So. a Ɔkaa sɛ: “Nkyinkyin nhaw wo ho. Saa nhoma yi bɛboa wo ama woahu nea worehwehwɛ no.” Ɔhyɛɛ me nkuran sɛ, sɛ mesan kɔ Australia a, menkɔhwehwɛ Yehowa Adansefo.

 Mitiee me papa afotu, enti mihuu Yehowa Adansefo Ahenni Asa bi a ɛbɛn baabi a na mete wɔ Brisbane no. Memaa wɔne me suaa Bible. Bible nkɔmhyɛ te sɛ nea ɛwɔ Daniel ti 7 ne Yesaia ti 9 no ma mihui sɛ daakye Onyankopɔn aban bedi yɛn so. Ɛno de, nyansakorɔn biara nnim. Mihui sɛ asase dan Paradise a, yɛn ani begye. Ná mepɛ sɛ mesɔ Onyankopɔn ani, enti mihui sɛ ɛsɛ sɛ mehyɛ me ho so, migyae nsa ne nnubɔne nom, na migyae aguamammɔ. Ɔbea a na me ne no te no, me ne no gyaee mpenatwe, na nnubɔne ne nsa a na ne nom aka me hɔ no nso, migyaee. Bere a minyaa Yehowa mu ahotoso kɛse no, mebɔɔ mpae sɛ ɔmmoa me ma mintumi nyɛ nsakrae afoforo.

 Nkakrankakra, mibehui sɛ nea meresua no betumi ama obi asakra ampa. Bible ka sɛ yɛyere yɛn ho a, yebetumi ahyɛ “nipasu foforo.” (Kolosefo 3:9, 10) Bere a mebɔɔ mmɔden sɛ mɛyɛ saa no, mihui sɛ nea mate afa me papa suban a asesa ho no, ɛbɛyɛ sɛ ɛyɛ nokware. Sɛ́ anka me bo befuw me papa na mafa ne ho tan no, na mepɛ sɛ me ne no siesie yɛn ntam mmom. Ewiee ase no, mede me papa bɔne kyɛɛ no, na ne ho tan a na mewɔ fi me mmofraase no, miyi fii me mu.

 Meyɛ aberante no, na metaa di nkurɔfo akyi kɔyɛ nneɛma a ebetumi apira me ne afoforo. Mihui sɛ kɔkɔbɔ a ɛwɔ Bible mu no yɛ nokware. Fekubɔne maa mefom kwan. (1 Korintofo 15:33) Nanso manya nnamfo a metumi de me ho ato wɔn so wɔ Yehowa Adansefo mu, na wɔaboa me ama mayɛ onipa pa. Afei nso, minyaa ɔyere pa wɔ me nnamfo no mu. Ne din de Loretta. Me ne no nyinaa kyerɛkyerɛ nkurɔfo ma wohu sɛ Bible betumi aboa wɔn.

 Bible a me papa suae nti, ɔne me maame tenaa ɔdɔ mu, ɔbrɛɛ ne ho ase, na ɔbɛyɛɛ Kristoni a ɔpɛ asomdwoe. Mannye anni da sɛ me papa suban betumi asesa saa. Mebɔɔ asu bɛyɛɛ Yehowa Dansefo afe 1987. Ɛno akyi no, me ne me papa hyiae, na ɔyɛɛ me atuu! Ná ɔnyɛ me saa da!

 Me papa ne me maame kɔɔ so kaa Bible mu anidaso ho asɛm kyerɛɛ afoforo bɛboro mfe 35. Me papa bɛyɛɛ obi a ɔbɔ ne ho mmɔden na odwen afoforo ho, na na afoforo nim no sɛ ɔboa nkurɔfo. Saa bere no, mibenyaa obu maa no, na na medɔ no pa ara. Afei de, na m’ani gye pa ara sɛ meyɛ ne ba! Afe 2016 mu na me papa wui. Nanso, m’ani agyina no pa ara, efisɛ bere a me ne no nyinaa de Bible nkyerɛkyerɛ yɛɛ adwuma no, ɛma yɛsesaa yɛn suban pa ara. Seesei de, minni obiara ho tan bio. Afei nso, m’ani agye pa ara sɛ mahu me soro Agya Yehowa Nyankopɔn; wahyɛ bɔ sɛ biribiara a ɛde ɔhaw ba mmusua a ɛwɔ wiase baabiara mu no, obeyi afi hɔ.